1 Samuel 11 - Ohiatonhseratokénti

Saul Wasakosén꞉ni Ne Ammonró꞉nons

¹ Kákʼnon ne sewenníta onaʼkènke, Nahash ne ne Ammonró꞉non iahá꞉re tánon iathaʼhonwarónhni tsi kanátaien ne Jabesh-gilead; tánon ratiʼkwé꞉kon ne ronhnón꞉kwe ne Jabesh wahonwénhase ne Nahash, “Shón꞉ni ateriwaseronniátshera tsi naʼtetewátere, tánon kwáh í꞉se enkwaiótenʼse.”

² Ók ne Nahash wasakawénhase, “Tiorí꞉wa kiʼ tsi nenhiotón꞉hake kwáh entiaʼnerenhserónhni naterihwaseronhniátshera tsi naʼtetewátere, ne enkénhake nètho tenkhekaratáko ratiʼkwé꞉kon ne satiweientetákwen, tánon neh enkaién꞉taʼne natehénsera onkweʼtakwékon NÍsraerʼronónke.”

³ Ne thonnonkweʼtaions ne Jabesh wahonwénhase, “Tation tsá꞉ta nón꞉ta nikarí꞉wesʼ askwateráraʼte neh nahón꞉ton ratirihwakarénies iahiaʼkiiaténieʼte tsi niwatenáskwa ne Israerʼronónke. Eʼthóhʼne, tó꞉ka iáh ónhka thahionkiʼnónstate, kwáh kiʼ ienhiakwatatákʼkaʼwe shonhá꞉ke.”

⁴ Nó꞉nen shiaʼhónnewe ne ratiʼriwakarénies thóh nón꞉we ne Gibeah ne tsi thóhʼnón꞉sote ne Saul, ne wahontróriaʼte noriwashón꞉ʼahs tsi niʼiakothontèhon nonkweʼókons; tánon ratiʼkwé꞉kon nonkweʼókons wationséntho tsi nihotiwènte.

⁵ Nón꞉wa ne Saul kahentáke nathonʼtahawenonhá꞉tie tehotinákares sakothorihátie; tánon ne Saul wahén꞉ron, “Ónhniʼiakoiátawenhs nonkweʼókons, tsi nahteionséntʼthos?” Káti wahonwaró꞉ri norí꞉wa tsi nontáwe ne tsi thatiná꞉keres ne Jabesh.

⁶ Tánon ne raoʼnikonratokentí꞉tshera ne Ní꞉io wahó꞉rane ne Saul tho kashastsʼtenserákon nó꞉nen wahothóntene kí꞉ken owennahó꞉kons, tánon ne raonhakwátshera teiotenonhianíton tsi taióteke.

⁷ Tsioiá꞉na teotinákares tionónskwaron, washakótiowe tánon iashaʼkotenietaniónhase kwáh tsi niwatenáskwa ne Israerʼronónke ne iahatíhaʼwe ne ratirihwakarénies, rontón꞉ne, “Ónka kiʼ akénhake ne iáh thahontahionténhti nahonwatísere ne Saul tánon ne Samuel, kwáh kiʼ èhʼthoh nenhotiʼiátawen ne raoʼtitsenenókons ne teotinákares tionónskwarons!” Eʼthóhʼne kiʼ ó꞉nen ne raoʼteronhkwáhtshera ne Roiá꞉ner waotíraʼne nonkweʼókons, tánon tsi tahón꞉ne skanikonrát꞉kok í꞉ken.

⁸ Nó꞉nen sahanenraróroʼke thohʼnón꞉we Bezek, tsi nihá꞉ti Israerʼró꞉nons neh thohʼnón꞉we nihónhneskwe áhsen naʼtehonenhniawehetseráse nihá꞉ti, tánon ne Judah nithohnénon tsá꞉ta naʼtehonenhniawehetseráhsen nihá꞉ti.

⁹ Wasakonénhaʼse ne ratiʼriwakarénies ne thohʼné꞉non, “Tiakariwakén꞉niaʼte kwáh enietsiʼién꞉hase ne ratinakeréhnion ne Jabesh-gilead: ‘Nenʼiohrénhenʼne, nohén꞉ton akaʼrakwataríhaʼte, ní꞉se kwáh entsiʼsewatatsiatotaríshion.’” Nó꞉nen ne ratiʼriwakarénies ionsahón꞉newe tsi tatinákere ne Jabesh, nonkweʼókon tsi nahontonhnháren.

¹⁰ Káti ne ratiʼnakeréhnion ne Jabesh nón꞉we wahonníron, “Nenʼiórenhnhe kwáh kiʼ ienʼhiakwatiaʼkwarísi shonháke tánon ní꞉se thóh natakwaiéras kwáh tsi nentesehnón꞉wene.”

¹¹ Thóh siʼiokaratsiérate ne Saul nonkweʼókons áhsen naʼtesakonenrhakhási. Tánon tsi iahó꞉rhenne iaʼsakotinenhrhénten tsi thóh nathaʼtoserótons tánon washaʼkotinonwarhiakhónnion ne Ammonró꞉nons kwáh tsi ní꞉iore nénhtie iahón꞉ton; tánon tsi niʼiákon ne iatiaʼkotátere waʼtionhréhni, káti kwáh iáh ónka ne teionkwé꞉take ahonsakénhaʼke.

¹² Nonkweʼshón꞉ʼahs wahonwénhaʼse ne Samuel, “Ónka nahiaká꞉wenhke, ‘Kwáh káti ken Saul enshonkwanontí꞉ioke?’ Í꞉i tationkwé꞉ton ne nahón꞉ton nahiakinonwarhiákhon.”

¹³ Ók ne Saul wahén꞉ron, “Iáh ónka tahionthaʼtenonwarhiáʼkhon nón꞉wa wenhniseráte, asèken ón꞉wa wenhniseráte ne Roiá꞉ner taháhaʼwe tsi sasahkonónstaʼte NʼIsraerʼró꞉nons.”

¹⁴ Ne Samuel wasakawénhase nonkweʼókons, “Káts, áhnion thóh iétewe Gilgal tánon thóh nón꞉we á꞉se ientsiʼtewariwaní꞉rate nonkwanontiʼiótshera.”

¹⁵ Káti onkweʼtakwé꞉kon iahá꞉hen ne Gilgal, tánon thóh nón꞉we iahonwanontí꞉ioste ne Saul raohén꞉ton ne Roiá꞉ner thohʼnón꞉we Gilgal. Thóh nón꞉we nahonteskónten natakaritétshera aoriwá꞉ke raohén꞉ton ne Roiá꞉ner, tánon thóh nón꞉we ne Saul tánon ratiʼkwé꞉kon Nisraerʼró꞉nons wahontonnáhren teiotenonhiaʼníton í꞉ken.