1 Kings 9 - Ohiatonhseratokénti

Né Rawenni꞉io Shé꞉kon Sahó꞉thotashiase Ne Solomon

¹ Nó꞉nen ne Solomon sahanonhsísa tsi rotenonhsonhnihátieʼne Nononsatokentíke ó꞉ni ne tsi ratienhthákwah ne rahonhnonhtiʼiotserákon tánon akwékon tsi nahoténsons ne reráhkwe nahatenonhsónhni,

² né Roiá꞉ner shé꞉kon ki sahothotháshiaʼse tsi ki nihoiéren ne Gibeon nónhwe.

³ Né Roiá꞉ner wahawénhase, “Honkatʼthóntene ne saterénhnaient. Wakenonhsatokentíste kí꞉ken Ononsatokentikówa tsi nónhwe nenhionksenhnaienthákwahke né꞉ne tsi nénhwe enkénhake. Kwáh káti enkathenhnikonhráren tánon tiókonte tsi entké꞉ne.

⁴ Tó꞉ka ensharihwatokénhake tsi enstsióthenhse tánon aterihwakwahrishonhtserákon, tsi né nihiothón꞉ne ne ianikénʼen Táwit, tánon tó꞉ka enshatewénhnaraʼkwe natianerénhseras tánon orihwakwékon thóh nénhshiere tsi nikonhríhonte,

⁵ Kwáh ki thóh nénhtiere tsi nihiʼiararatsthénhni ne ianikénʼen nó꞉nen sahí꞉rori nètho Israerronónhke tsi tiókonhte né enhonatkorastónhake tsi nienhatwatsírihne.

⁶ Ók tó꞉ka ní꞉se tánon tsi niensatwatsírihne ensewákatʼwe tsi takwahnonhteráties, ensewatewenhnónhti ne kaianerénhseras ó꞉ni ne kariwatátʼtseras né tkonhiáwi, né ensehsénhnaien ne tikanihiosehrátes,

⁷ ethòne kíʼ é꞉ren ensekhehiathenháwiʼte nonhkweshón꞉as Israerʼró꞉nons ne tsi ionhontsáien né tekhehiáwi. Kwáh ó꞉ni enkatewénhtheʼte kí꞉ken Ononsatokentiʼkówa né wakenonsatokentíston né꞉ne tsi nónhwe nahiontsenhnaienthákwahke. Kwáh tsikʼnónhwe nonhkweshón꞉as tsi thenhonwatiʼierónhseke Nisraerʼró꞉nonke tánon tsi nenhkonhwaiéraʼse iáh taʼhonsakonhwakweniénsthaʼke.

⁸ Kí꞉ken Ononsatokentiʼkówa ononhwénhsera ienwáton, tánon nonhkwetaʼkwékon nenhionthohétsthake kwáh kíʼ entionhtónhneke tánon enhiakorihwaneráko. ‘Onh niʼhiotséren ne Roiá꞉ner tsi éhtho nahá꞉iere kíʼ kénʼen ionhontsáien tánon kí꞉ken Ononsatokentiʼkówa?’ tsi enhatirihwanónhton.

⁹ Nonhkweshón꞉as tsi thenhatirihwasehráko, ‘Né iorihonhníhon tsi ronhwatewenhtéton ne Roiá꞉ner Raotiní꞉io, tsi nikáien ne tethesakohiatinekénʼen ne raotisót꞉tseras ne Egypt. Né iathonhsahonterihwáieste ne thiʼkaniʼioserátes tánon wakonhwatisénhnaien. Né kíʼ aoríhwa ne Roiá꞉ner taháhawe ki ken karihwaiesátseras ne ronhnonháke.’”

Ne Solomon Tsi Naiaterihwasehrónhni Ne Hiram

¹⁰ Né Solomon tewasenhnihiosehráke nikaríhwes tsi wahanonhsónhni Nononsatokentikówa tánon tsi nón꞉we nihonónhshoʼte.

¹¹ Né Ronhnontí꞉io Hiram né Tyre nónhwe tahotkáwaʼse akwékon nonenhthakwénhte ó꞉ni nonénhtas ohkonhré꞉tsas ó꞉ni akwékon nowistanórons tsi natahotonhotsoníhake tsi ahohióten. Nó꞉nen nakwékon sonhtésa, Ronhnonhtí꞉io Solomon tewásenh nikanáthakes wahá꞉wen ne Hiram né꞉ne tsi watonhontsáien ne Galilee nónhwe.

¹² Ók nó꞉nen ne Hiram Tyre nónhwe nonhtáre wahatkénhsera ne kanatowánens tsi nikáiens ne Solomon ronatawíhon, iáh tehawerientihióhon.

¹³ Káti wahawénhase ne Solomon, “Onh nikanathó꞉tens kí꞉ken waskenatawíhon, tiathatéken!” Asèken kí꞉ken ionhontsáien shé꞉kon Cabul konwaiats.

¹⁴ Asèken ne Hiram 10,000 nikakonhtseráke owistanó꞉rons iehoteniethénhni ne Solomon.

Shé꞉kon Sénha Ishiʼnónhwe Tsi Nonhsaharihwakanónhni Ne Solomon

¹⁵ Tánon né kí꞉ken tsi niaʼtehionénon titesakonontónhni tsi rotihiothénhen nahatinonsónhni Nononsatokentiʼkówa ó꞉ni ne tsi ratsienhthákwah tánon tsi ronhtienhthákwah ne ratisó꞉tar tánon ne tekanathanákʼtons watenhénraiens ne Jerusalem tánon ne Hazor, Megiddo, ó꞉ni ne Gezer. (

¹⁶ Né Egypt ronhnonhtí꞉io iesakotsatónhtson ne Gezer tánon wahaiéna, washakononhwarhiakhónhnion ne ienakerénion tánon wahathenonhkwahtetʼthánion ne kanatowanénhke. Ethòne ónenh sakoiénha washakonáton ne sahothíniake ne Solomon,

¹⁷ tánon ne Solomon sahanatónhni.) Né washaʼkótsʼte ne thitesakononhtónhni nahotihióten, né Solomon kwáh ó꞉ni hionsahatenathonhniánion ne íehiothohétston ne Beth Horon nónhwe,

¹⁸ ó꞉ni ne Baalath, Tamar né karakhonkówa né Judah,

¹⁹ né kanatowanénhkes thóh nónhwe akwékon ne Solomon nihothenhninonhseróthonsʼkwe, ó꞉ni ne tsi kanatowánens nónhwe nihathakweʼnianienthákwahkwe ne rahoseresónhas otsónhkwas ó꞉ni ne rahotsenenhókons kohsáhtens, tánon noiásons nikanonhsó꞉tens naré꞉re nahatenonhsónhni ne Jerusalem nónhwe, ó꞉ni ne Lebanon tánon ne aktèsonh nonhwésons ne rahonhnonhtiʼiotserákon.

^20-21 Né thitesakononhtónhni nahothihióten ne Solomon ne washakohióthenste tsi nitonatwatsiríhnon nonhkweshón꞉as ne Canaanró꞉nons né꞉ne ronónha Nisraerʼró꞉nons iáh teshakotinonhwarhiákon nó꞉nenh sahonwenhnonhontsákwah. Né kí꞉ken tsi niháti nétho rahtihiátare Amorʼró꞉nons, Hitró꞉nons, Perizró꞉nons, Hivró꞉nons, tánon ne Jebusró꞉nons, nètho tsi nithonatwatsiríhnon iehiokonhtákwen tsi ratináskwah íken shé꞉kon nónhwa nikaháwis.

²² Né Solomon iáh nenhné꞉e teshakonaskónhni Israerʼró꞉nons: wahontsiotarónhni nenhné꞉e, ratisenhnowánens wahónhton, wasakotihénthenhse, ohénton iathatíthaʼne ne rahosereshón꞉as Notsónhkwahs, tánon ne rahonkwetashón꞉as ne rotisáhtens tsi ronhterí꞉ios.

²³ Né꞉ne 550 niháti ronaterihónthaʼkwe teshakothiniarotháronhne ne thithonwananonhtónhni tsi rothihióte ne Solomon ne niaʼtekanónhsakes rononhsonhniánions.

²⁴ Nónen ne Solomon saʼtesakonathákwahte ne sakotsténha, né꞉ne Pharaoh sakoiénha, tsi kanatowanénhke ne Táwit tahionhthénhti thóh niahá꞉he nonón꞉saʼse ranonhsonhniénhni, ethóhʼne ónen wahanonhsónhni tsi ronhtienhthákwah ne só꞉tar.

²⁵ Ásen nihioríhwake ne tiósera ne Solomon enhaterihwathénhtsaʼte nahateskónhten tánon iahá꞉thaʼte ne skaríhwa íken ne ietienharákwahke né rosenhénhni ne Roiá꞉ner. Kwáh ó꞉ni enhotienhkwaronhniáten ne Roiá꞉ner. Tánon káti wahanonhshí꞉sa ne Ononsatokentiʼkówa.

²⁶ Ne Ronhnonhtí꞉io Solomon kwáh ó꞉ni wé꞉so wahatʼthonhionniánion ne konterí꞉ios né Eziongeber nónhwe, né꞉ne ákta ne Elath natsaták꞉tha ne tsi kanéts꞉ker ne Aqaba, né꞉ne Edom ahotonhwenhtsáke íken.

²⁷ Ronhnonhtí꞉io Hiram tó꞉ka niháti ne rotirenhnáhons ratihonwehiakeró꞉nons iasakoténieʼte né skátke ahothihióten ne Solomon rahonkwetaʼshón꞉as.

²⁸ Thóh nónhwe iahontʼtsiró꞉ten tsi tsohontsáien ne Ophir tánon tahonwahawíten ne Solomon kák꞉nonh ne asenhniwásen-tékeni niwenhniawehetserásen nikakonhtseráke owistanóron.