1 Kings 8 - Ohiatonhseratokénti

Naʼterihwasehronhniátshera Oneró꞉kwáh Ononsatokentiʼkówaʼne Niahatíhaʼwe

¹ Ethòne ónenh ne Ronhnonhtí꞉io Solomon iasakonónkʼkhon ratikwékon ne shakotihenthénhse ne tsi ratitsiókwaiens tánon ne tsi ratitáraiens Nisraerʼró꞉nonke nahonthahónhne rahohénton ne Jerusalem nónhwe né nahónton niakáhake ne Roiá꞉ner Rahoterihwaʼsehrionhniátshera Nonerokwáhkon í꞉wa Zion nónhwe nenhthatíhaʼwe, né꞉ne Táwit Rahonátakon íken, Ononsatokentíke nienká꞉hake.

² Rathikwékon thóh nónhwe nahontsataróhroʼke ne tsi nikaríhwes Tehonhtenonwerátons ne Hionhthasehthá꞉kwas né꞉ne tsatákhaton niwenhnitakehaton, né꞉ne tsi niwenhnitare ne Ethanim.

³ Nó꞉nen ratikwékon ne sakotihéntenhse shiʼhonatsataró꞉ron, ne ratitsihénstatsis watatinerókwahkwe naʼterihwasehronhniátshera thóh í꞉wa

⁴ tánon Ononsatokentiʼkówaʼne iahatíhionhte. Né Levites tánon ne ratitsihénstatsis Wathonhnathákwahte nònhne Natóhsehra tsi nónhwe nihénteron ne Roiá꞉ner ó꞉ni akwékon nahowenhsónhas Ononsatokentiʼkówaʼne iahatihiónhte.

⁵ Ronhnonhtí꞉io Solomon tánon kanenhrakwékon Nisraerʼró꞉nonke iakotiataró꞉ron ohénton tsi Kanerókwahien Naʼterihwasehronhniátshera í꞉wa tánon ronatsokowánen teiotinakaronhtónha ó꞉ni tsionónskwahron wahonwanateskónhten—sóh꞉tsi ronatsiokowánen nahonwanásehte.

⁶ Ethòne ónenh ne ratiʼtsihénstatsis Ononhsatokentiʼkówaʼne niahatíhaʼwe naʼterihwaseronhniátshera nonerókwahkon í꞉wa tánon thohnónhwe nahatí꞉ien tsi nónhwe ne kwáh tsiotokénti íken, né꞉ne nàkon ne tsi tenihnerahontiónhtons ne thiʼnirhios.

⁷ Tsi naʼtehonatehonhnonhtsaʼkaráwen né wakaróhrokste noneró꞉kwa tánon ne kanawahá꞉tes ne ronátston tsi thóh thí꞉ha.

⁸ Né tsi ieiotʼthónhnions ne kanawahátes tsík ónhka enwáton nahiontkáto tó꞉ka kwáh thóh nónhwe naʼthenhiétaʼne ohénton ne tsi nónhwe né kwáh Iotokénti í꞉ken, ók iáh nákte nónhwe íken. (Né kanawahatesónhas shé꞉kon thóh tkakérons nónhwa nikaháwis.)

⁹ Kwáh iáh thaʼhóthen tèwa ne aterihwasehronhniátshera kanerókwahkons nék khók ne tekanénhiakes tsi nikáien ne Mahís thóh rotáronhs ne tsi Tsionónh꞉te ne Sinai, né nónen ne Roiá꞉ner sahá꞉sa naʼterihwasehronhniátshera skát꞉ke nonhkweshón꞉as Nisraerʼró꞉nonke tsi natethonénon ne Egypt.

¹⁰ Tsi nishotihiakenhenhátie ne ratiʼtsihénstatsis Nononhsatokentiʼkówaʼne, thontahiawénhstsi ohtsáta wakanonhsíne

¹¹ né tehioswatʼthéton ne tehiokará꞉iak kaswatʼthétsera né tsi thóh í꞉res ne Roiá꞉ner, tánon iáh tehiothónhon né thóh niahonsahonénonhke nahotihióten ne rahotihioténhsehras.

¹² Ethòne ónen ne Solomon wahaterénhnaien: “Í꞉se Saiá꞉ner, sanihiónte ne karákwah ne tsi karonhiáte, thóh nónhwe nisaráhkwen nasiterónhtake né꞉ne tsi iotsátares ó꞉ni ne tsi tetsiókaras.

¹³ Káti ónenh wakenonsónhni ne Iononhsanerákwat Ononsatokentiʼkówa ne sarihwáke, né thóh nónhwe nasiterónhtake né꞉ne tsi nénhwe.”

Né Solomon Washakotháraʼse Nonhkweshón꞉as

¹⁴ Tsi ehʼkakénhnioʼte nonhkweshón꞉as, ne Ronhnonhtí꞉io Solomon waʼtatkaraténi ne tashakokʼkáneren, tánon wahorihwanónhtonhse ne Rawenni꞉io nashakohiathatéristhe ne ronónha.

¹⁵ Wahénron, “Tehonwanonhweráton ne Roiá꞉ner Sakoní꞉io Nisraerʼró꞉nonhke! Rotienawáston tsi nihorahratsʼténhni ne rakenikénhen Táwit, nó꞉nen sahoróri,

¹⁶ ‘Tsi nikaháwi thontakhehiatínekenhwe nakonhkwetashón꞉as ne Egypt, iáh arèko shiʼwakerákwen ne kanatowanénke tsi nihiohóntsa ne Israerʼró꞉nonhke tsi nónhwe naʼkanonhsonhníhake Nononhsatokentiʼkówa tsi nónhwe nahiontsenhnaiénthakwahke. Ók kíʼ í꞉se wakonhiataráko, Táwit, nasheiatkórasthe nakonhkwetaʼshón꞉as.’”

¹⁷ Tánon kíʼ ne Solomon iahathasónhteren, “Né rakeʼníha Táwit roʼtenikonhrónhnikwe nahanonhsónhni nononhsatokentiʼkówa né nahonwasenhnaiéntakwahke ne Roiá꞉ner Sakoní꞉io Israerʼró꞉nonke,

¹⁸ ók kíʼ ne Roiá꞉ner wahawénhase, ‘Teshié꞉ritskwe tsi serahkwe askenonhsónhnien Nononhsatokentiʼkówa,

¹⁹ ók kíʼ iáh nonhwénhton í꞉se tsiasehnonhsónhni. Ehʼtsiénha, ne kwáh í꞉se ehʼtsiénha, né enhanonhsónhni nakenonhsatokentiʼkówa.’

²⁰ “Tánon ónenh kíʼ ne Roiá꞉ner rotienawáston tsi nihorahrátston. Í꞉i teshiʼnatʼthakwénhni ne rakeʼníha tsi rononhtí꞉ioʼkwe ne Israerʼró꞉nonke, tánon kíʼ wakenonhsónhni nononsatokentiʼkówa nahonwasenhnaienthákwahke ne Roiá꞉ner Sakoní꞉io Nisraerrónonke.

²¹ Tánon kíʼ ó꞉ni kenatʼthonhniénhni Nononhsatokentiʼkówaʼne naʼterihwasehronhniátshera Oneró꞉kwáh né thóh í꞉wa nosténhras ne aterihwasehronhniátshera né tsi nihó꞉sonh ne Roiá꞉ner skát꞉ke ne ietisotʼthonhkonhkénʼen nónen sathontashakohiatínekenwe ne Egypt.”

Ne Solomon Rahoterénhnaient

²² Ethòne ónen rahotihénton nonhkweshón꞉as ne Solomon thóh niaháre ohénton wathá꞉taʼne ne ientienharákwahke, thóh nónhwe nahanenhtsakétsko

²³ tánon wahaterénhnaien, “Saiá꞉ner Sewenní꞉io NʼIsraerʼrónons, kwáh iáh othènen nó꞉ia tekaniʼiosehráien tsi níse ní꞉ioht ne é꞉neken ne tsi karonhiáte khés nehthàke ne tsi ionhwenhtsáte! Sheʼiateweientónhni ne sateriwaseronhniátshera skát꞉ke ne shonkwetaʼshón꞉as tánon shenatónhnis ne sanonhronhkwáhtshera nó꞉nen thóh ní꞉ioht tsi enhonhnónh꞉nheke kwáh ronhnerhiasakwékon tsi eniesawénhnarakwe.

²⁴ Shatienawáston tsi nitsiarahratsʼténhni ne rakeʼníha Táwit: ónhwa wenhniseráte kwáh tsi niaʼtekawénhnake tsi ionanónhon.

²⁵ Tánon káti ónen, Saiá꞉ner Sheʼwenní꞉io Nisraerʼró꞉nons, wakaterénhnaien né ó꞉ni nahsatiénawasʼte nó꞉ia tsinitsiarahratsʼténhni ne rakeʼníha ne shastsró꞉ri tsi kwáh tiókonte tsi né nónhkak ne tsi ienhatwatsiríhne enhotkorastónhake tsi enhonhnontí꞉ioʼke Nisraerʼró꞉nonke, né ki entewanón꞉ton tsi kwáh enthotinikonhrakonhthakwénhake tsi eniesawenhnarákwahke tsi né niʼhiotónhne ne rahónha.

²⁶ Káti ónen, O Sé꞉wenní꞉io ne Israerʼró꞉nons, satʼthóntat kwáh orihwakwékon thóh niʼiáwen tsi niʼtsiarahratsʼténhni ne rakeʼníha Táwit, ne sanhatsherakénʼen.

²⁷ “Ók askwé꞉ni ken, O Sewenní꞉io, né kwáh tsi ionhwenhtsáte nónhwe nasenákereke? Akwékon iáh tsiatekaiéri tsi níwah ne tsi karonhiáke nahisatsénawasʼthe, onhkáti naiawénhne kí꞉ken Ononsatokentiʼkówa ne wakenonhshí꞉sa ne iaʼtakaiérike tsi náhonske?

²⁸ Saiá꞉ner Akení꞉io, Í꞉i ne sanhátsera íken. Satahónsatat nakaterénhnaient, tánon satʼthóntat tsi nikonhrihwanonhtónhnis nónhwa wennhniseráte.

²⁹ Satenhnikonhráren kí꞉ken Ononsatokentiʼkówa ne tsi niwenhniserésons ó꞉ni tsi niwasonhtésons, tsi kén nónhwe nisará꞉kwen naieshasenhnaienthákwahke. Takwatʼthónhtet nónen enkaterénhnaien tsi nòkwah kí꞉ken Ononsatokentiʼkówa.

³⁰ Satʼthóntet nakwahterénhnaient ó꞉ni ne rahonaterénhnaient ne shón꞉kwetashón꞉ʼas nónen enhonterenhnaien tsi nòkwah ki ken Ononsatokentiʼkówa. Tsi tesíteron ne karonhiáke takwatʼthónhtet tánon saskwahnikónhrens.

³¹ “Nónen nónhkak enhionhthaterihwàro tsi wahonthatenikonhrákʼsaʼte nakorénhsons tánon enhtsionhthatsiathénhaʼwe ne tsi tsienharákwah ne kénʼen Ononsatokentiʼkówaʼne tsi enhierihwanírate tsi iáh tehiakoníkon,

³² Ó Saiá꞉ner, tasatahónsatat thóh nónhwe karonhiáke tánon tetsiató꞉ret ne sanhátshera. Sheréwat ne iakoníkon tsi naʼtehonathénhtion, tánon sashehiátʼkaf ne iáh tehiakoníkon.

³³ “Nó꞉nen ne shonkwetaʼshónhas Nisraerʼró꞉nonhke né ronhwatisénhnion ne tehontatʼtsions né iorihonhníhon tsi rotirihwanerenhákskon tsi nòkwah níse, tánon káti nó꞉nen í꞉seke nienhsonhtiéraʼte tánon kénʼen Ononsatokentiʼkówaʼne naʼthentʼthónhne, kakweniensthahtserákon tsi ronaterénhnaien ne sonháke nahonshasehnikónhrenhse,

³⁴ tashehiatahónsatat ne karonhiáke nónhwe. Shasehnikónhrens ne rahotirihwanerahák꞉tsheras ne shonkwetaʼshón꞉as tánon thontashehiaténhaf tsi nónhwe nihionhontsáien tsi nishehiararatsʼténhni ne sakotisotʼtkonkonhkénʼen.

³⁵ “Né nó꞉nen entesónhneke nokenhnorésehra né karihónhnis ne shonkwetaʼshónhas tsi rotirihwáneren tsi nòkwah níse, tánon kíʼ nónen enshontatréwathe tánon kénʼen Ononsatokentíke entʼthónhne enkonhwarihwaníratse ne shasénhna tánon enhóntkaʼwe ne rahotirihwanerahákʼtsheras tsoríhwa tsi nisehrewáthon,

³⁶ tashehiatahónshatat ne karonhiáke nónhwe. Shaʼsanikónhren ne rahorihwanerahák꞉tsheras ne ronhnonhtí꞉io ó꞉ni nonhkweshón꞉as Nisraerʼró꞉nonke, tánon né serihónhnien ne tkarihwaiéri tsi nahónhtsere. Ethòne, O Saiá꞉ner, tashathéniet nokenhnorésehra ne kénʼen sonhontsákes, tsi nisehiáwi ne sonhkwetashón꞉as iehiotkonhthákwen tsi enhonatsenawasthónhake.

³⁷ “Nó꞉nen hionthonkarhiákons tsi ionhontsáte khés kannratarihnétsheras khés iohethaiesáhons tsi kaienthó꞉serons né꞉ne tsistáraʼre khés ne ofaráne ronatekwíson, khés ne shonkwetaʼshón꞉as né꞉ne tehontátʼtsions ronhwatiʼiénen ne tsi rotinathaiéntons; ók nakannró꞉tens akénhake né thóh nónhwe;

³⁸ satahónsatat ne rahonaterénhnaiens. Tó꞉ka nónhkak ne shonkwetaʼshón꞉as Nisraerʼró꞉nonhke, né tsi nihontʼthókas ne ronhné꞉riaʼne tsi nihotinikonhrákʼsens, iathahonhnenhtsáthaʼte aterenhnaienthatsherákon ne kénʼen Nononsatokentiʼkówaʼne nónhwe,

³⁹ sehiatʼthóntet tsi nihonaterénhnaien. Tasehiatʼthóntet ne tsi teshí꞉teron ne karonhiáke, shaʼsenikónhrens, tánon sé꞉ienahwas. Kwáh í꞉sek khók sateriéntare tsi nihiakononhthonʼnionhtseró꞉tens nonhkweshón꞉as ó꞉ni tsi nihiakerhiasóhtens. Tiehiatátʼtions tsi sekenhéhions tsi natahonathénhtionhke,

⁴⁰ né káti ne shonkwetaʼshón꞉as nahónton kwáh tiókonhte tsi aiesawénhnarakwahke tsi nenhatinákereke ne tsi ionhwénhtsaien né tesehiáwi nonhkwashót꞉tsheras.

^41-42 “Nó꞉nen ne tihononhontsátes nahí꞉non nióre tionhontsaiéntons thathinákere enhónronhke tsi nitsenhnowánen ó꞉ni tsi nihiorihowánens tsi nisehiatséraʼse ne shonkwetaʼshón꞉as tánon kíʼ enʼthónhne naʼiesahsénhnaien tánon kénʼen kí꞉ken Ononhsatokentiʼkówaʼne nónhwe nenhonterénhnaien,

⁴³ satʼthóntek ne rahonaterénhnaient. Thóh karonhiáke nónhwe, tsi nónhwe teshí꞉teron, tsiatʼthóntet tánon thóh nátser tsi nihiarihwaʼnonhtónhnis, né káti nonhkwetaʼkwékon tsi nihiohóntsa ahiakoteriéntaraʼne tánon naʼiesawenhnarákwaʼke, tsi né nihatiʼiéra ne shonkwetaʼshón꞉as Nisraerʼró꞉nonke. Ethòne kíʼ enhonateriéntarahne kí꞉ken Ononsatokentiʼkówa ne wakenonhshí꞉son tsi thóh nónhwe nenhieshasenhnaiénthakwahke.

⁴⁴ “Nónen enshé꞉nahne ne shonkwetaʼshón꞉as nahonterihiósehra ne tehontátʼtsons tánon sonháke ienhonterénhnaien, né kwák tsikʼnónhwe nenhonhnésheʼke, né kanatowanénhke ne saráhkwen tánon ne kí꞉ken Ononsatokentiʼkówa ne konhnionhsonhniénhni,

⁴⁵ sathahónsatat ne rahonaterénhnaiens. Tashehiatʼthónhtek ne karonhiáke tánon taséhion naʼtesenhniénhtshera.

⁴⁶ “Nó꞉nen ne shonkwetaʼshónhas enhatirihwánerake tsi nòkwah níse—tánon iáh ónhka nènhʼne ne iáh tahieriwanerahát꞉ke—tánon thóh ne sanakwahtserákon wasehríhon ne tehontátʼtions nahonwatisénhni tánon ne iahonwatihiathénhaʼwe nahonwatinó꞉ton né kakʼnónhwe ákte nónhwe tionhontsáien, iewerohátien ne thóh ionhontsáien tsi ahinonʼnióre ít꞉ken,

⁴⁷ sehiatahónshaʼtat ne sonhkwetaʼshón꞉as ne rahonaterénhnaient. Tó꞉ka thóh nónhwe nihiohontsáien nihónhnes tsi ensonhtatʼréwaʼthe tánon isèke ienhonterénhnaien, ratirihwanírats tsi nihotirihwáneren ó꞉ni tsi nihononhkwetákʼsenhskwe, sehiatahónshatat O Saiá꞉ner.

⁴⁸ Tó꞉ka thóh ne tsi ionhontsáien kwáh orihwihiohónwe tánon thoʼnethákwen enshontatréwaʼthe tsi nòkwah kí꞉ken ionhontsáien tsi nithesehiáwi ne hionkisotʼthonkonhkénʼen, kí꞉ken kanatowanénhke ne saráhkwen, tánon kí꞉ken Ononhsatokentiʼkówa ne konhnonhsonhniénhni,

⁴⁹ ethòne káti sehiathahónsatat ne rahonaterénhnaiens. Ne tsi teshí꞉teron ne karonhiáke nónhwe sehiatahónsatat tánon shé꞉tenr.

⁵⁰ Akwékon shasanikónhren ne rahotirihwanerahák꞉tsheras tánon tsi nihonathonkwetakʼshá꞉ton tsi nòkwah níse, tánon shéʼhiónhnien ne tehontátʼtsons kwáh kanoronhkwahtsherákon tsi nahonwanatséraʼse.

⁵¹ Í꞉se shonkwetaʼshónhas, ronónha ne thetesheʼhiatinekénʼen ne Egypt nón꞉we, ethohʼnónhwe ne tehiotienhanón꞉hiani karístatsi íken.

⁵² “Sanonhtí꞉io Saiá꞉ner, aiáwens tiókonhte ahontesarihwaiérihke tsi nòkwah ne shonkwetaʼshónhas Israerʼró꞉nons tánon ne rahotinonhtiʼiótsera, tánon sehiatʼthóntek ne rahonaterénhnaient ne nó꞉nen iehiesanáton nasehiénawaʼse.

⁵³ Ró꞉nonha khók washathonhkwetaráko iáh nènhne ne ronátsakes nonhkweshónhas né tsi nihiohóntsa né ní꞉se sonhkwetashón꞉as ahónton, tsi kíʼ niʼsehró꞉ri rahonháke ne Mahís nó꞉nen sathontasehiatínekenhwe ne Egypt nónhwe.”

Nonakènkha Aterénhnaient

⁵⁴ Nó꞉nen ne Solomon saharihókthen tsi roterenhnaiénthakwe rahonháke ne Roiá꞉ner, ohénton ne ietienharákwahke wathátaʼne, tsi nónhwe naʼterenhtsióthaʼkwe tsi ronenhtsakétskwenhne.

⁵⁵ Kwáh tehawenhnakaréni tsi wahorihwanón꞉tonhse ne Rawenni꞉io nashakohiathatérisʼthe ratikwékon nonhkweshón꞉as né nónhwe nihonatsiataró꞉ron. Wahénron,

⁵⁶ “Tehonwanonweráton ne Roiá꞉ner tsi rahónha tesakówi ne rahonkwetashón꞉ʼas ne skénnon, tsi ki nihorahrátston tsi thóh nenháiere. Akwékon niehoieríhton tsi nahoténsons ne tkarihwaiéris roraratsthánion rahonháke ne Mahís.

⁵⁷ Aiáwens ne Roiá꞉ner Onhkwah Ní꞉io ahitewakwekónhake tsi kíʼ nihatikwékonhne ne ietisotʼthonkonhkénʼen; aiáwens tó꞉sa nonhwénhton ashonkwatewénhtheʼte khés nasonhkwahtsakwahríhsi;

⁵⁸ aiáwens asonhtiónhnien naʼtsitewawenhnará꞉kwahke, né káti nahónton tiókonhte thóh ní꞉ioht tsi ahitiónhneʼke tsi kíʼ natehotonhontsióni nahitiónhneke, ahionhkwahtienawasʼtónhake akwékon ne kaianerénhseras ó꞉ni ne karihwatátʼtseras ne teshakówi ne ietisotʼthonkonhkénhʼens.

⁵⁹ Aiáwens ne Roiá꞉ner ónhka Ní꞉io tiókonhte arehiárake kí꞉ken karihwanonthónhtseras né rahohénton wá꞉tsien. Aiáwens tiókonhte ahoiénhthake natanithenráskon tsi nòkwah ne rahonkwetashón꞉as Nisraerʼró꞉nons ó꞉ni ne rahotinonhtiʼiótsera, né ahonthahioianénhawe tsi natehonatonhontsóni ne niaʼtewenhniserákes.

⁶⁰ Né káti nonhkwetaʼkwékon ne tsi nihiohóntsa ahiakoteriénhtaraʼne nètho Roiá꞉ner iatehahiáti khók tsi Ní꞉io í꞉ken—iáh ónhka nakóren tekáien.

⁶¹ Aiáwens í꞉se, ne rahonkwetashón꞉as, tiókonte ahisewarihwatokénhake rahonháke ne Roiá꞉ner ónhka Ní꞉io, ahisewatewenhnaráhkwahke ne rahohianerénhseras ó꞉ni rahorihwatátʼtseras tsi nónhwa ní꞉ioht nónhwa wennhiseráte.”

Tsi Wakonwatonhnahé꞉raʼse Nononhsatokentiʼkówa

⁶² Ethòne ónen ne Ronhnontí꞉io Solomon tánon ratikwékon nonhkweshón꞉as thóh nónhwe nahonwatesʼkónhthaʼse ne Roiá꞉ner.

⁶³ 22,000 nikanonhtsísʼtakes tiononhskwahrons wahonwanateskónhten tánon 120,000 niháti teiotinakaronhtonhʼa neʼnènhʼne ne sakaríhwa í꞉ken. Tánon káti ne ronhnonhtí꞉io ó꞉ni ratikwékon nonhkweshón꞉as wakonwatonhnahé꞉raʼse Nononhsatokentiʼkówa.

⁶⁴ Kwáh ó꞉ni né sahenhnísera wahatonhnahé꞉rahse nasénhnon nónhwe nathenhénrahkon íken, né꞉ne tsi iokwénhrahre ne ohénton nónhwe Nononhsatokentiʼkówa, tánon éhtho nónhwe nasakoteskónhten ne tsehatihiathakwékon ne konhtitʼtsénens, nonátsas thotiʼiéstons, ó꞉ni nahonaresénhtseras ne konhtitshénens né꞉ne skaríhwa íken tsi thotiʼiéstons. Né kí꞉ken aoríhwa thóh nahá꞉iere tsioríhwa ne otsínekwar karístatsi ietienhará꞉kwah shó꞉tsi kenhniwáha íken nakwékon kí꞉ken thaiesthánions.

⁶⁵ Thóh nónhwe Nó꞉nonsatokentiʼkówaʼne, ne Solomon tánon nonhkweshón꞉as Nisraerʼró꞉nonke wahontenikonhró꞉ri ne tsi kakhwáheʼre ne ionthasehthákwah íken né꞉ne tsáta nónhta nikaríhwes. Kwáh íken tsi iotsiokwahtsánit tsi nónhwe nitsakawenónhsehron tsi nióre ne Hamath Pass né nothoréke nòkwahti tánon Egyptró꞉nonke tsi ronateristhatátse nenhtiéne nónhwe.

⁶⁶ Né satekonháton siwenhniserakéhaton ne Solomon shasakotékwahte nonhkweshón꞉as nahonsahonthénhti. Kwáh kíʼ ratikwékon tsi wathonwarénhsaron tánon shonatsenhnonhnihátse tsi sahonthénhti tsioríhwa akwékon ne Roiá꞉ner rahohiathateríhtseras thó꞉wi ne rahonhátsera Táwit ó꞉ni nonhkweshón꞉a Nisraerʼró꞉nonhke.