1 Kings 7 - Ohiatonhseratokénti

Ne Tsi Ronónhsohte Solomon Rahononhtiʼiotsherákon

¹ Né Solomon kwáh ó꞉ni wahathatenonhsónhnien, tánon asenhiawénhre nihiosehráke nikaríhwes tsi wahanonhsónhni.

^2-3 Skanónsa ne Solomon rahonónhsa né nofárakon ne karákon ne Lebanon konwáiatskwe 150 niwashí꞉take nikanónhses, 75 niwashí꞉take naʼtekanonskáron, tánon 45 niwashí꞉take nitiotenónsathe. Ásenh nihiotinénhrakes onenhthakwénhte kanawahathó꞉tons, 15 iawénhre nikanawaháthakes ne tiotinénhras, tánon ne onenhthakwénhtes okonhrétsas thóh karónhnions. Ne tsi kenskaráhere onenhthakwénhte íken, ièhwas ne tsi tionhtakweniaienthákwa, thóh ionanenhsáheʼre ne kanawahathótons.

⁴ Né skatísons nòkwahti ne tsi niwasónhtes áhsenh nihiononsthonkwahkáronhte.

⁵ Ne tsi kanonhkarónhtons ó꞉ni tsi iononhsthonkwahkarónhtons akwékon tehiotekeronhthénions, tánon ne ásen nikanensthonkwáhtharons ne sonhwasonhthakaratísons tekonhʼtatkáneres nó꞉ia tkanenhsthonkwahthárions.

⁶ Né iotinenhrakwahríhshion ne kanawahathótons 75 niwashí꞉take nióre íken tánon 45 niwashí꞉take naʼtewathakáron. Waskáhere íken, thóh ionanenhsáhere ne tsi kanawahathótons.

⁷ Né tsi wanitskwahratseró꞉the ionákthaien, né nónhne konhwanathónkwah nofárakon tsi ratirihwénhtha, thóh nónhwe ne Solomon natehahiatorétha norihwasónhas, onenhthakwénhtes etʼtsewaʼshí꞉ras watsthánion oswenkaráke tiotashá꞉wen tsi nióre ne tsitkanenhstharónhnion.

⁸ Ne Solomon tsi nónhwe ne kwáh rahónha rénhteron, né nó꞉ia tsionákʼthaien oná꞉ken ne tsi tehahiatorethákwah nofárakon íken, kwáh ne sáka tsi kíʼ nihiothánions nó꞉ia kanonhsóh꞉tons. Kwáh ó꞉ni thóh nikanonhsóh꞉te washakononhsónhnion ne teníteron, né꞉ne Egypt ronhnonhtí꞉io sakoiénha íken.

⁹ Akwékon kí꞉ken kanonsóh꞉tons tánon ne kanonsohwánen teiehiatorethákwa ne kanonhsonhniáton ne kwáh iohiáneres nonenhiasónhas né꞉ne tsitʼkenskwáhere tiothásaʼwe tsi nióre ne tsi tehiotarothaʼtse ítʼken. Nonenhiasónhas tsi iehnenhiokwátsta nónhwe tkanenhiaseronhniánion tánon kakwetarenháton tsi naʼtehiotonhontsóhon, né꞉ne kanónskon nòkwahti tánon nátste nòkwahti ásare wátston tsi kakwetarenháton.

¹⁰ Né tsitkenskwáhere né꞉ne kwáh kanenhiowánens wátston né tsi ienenhiowátstha kanenhiaserónhni, ótsiakes tekeniʼiawénhre niwashí꞉take nikanénhes tánon ótsiakes ó꞉ni wískʼiawénhre niwashí꞉take niʼkanenhiésons.

¹¹ Tekanenhiasehrónhnions, watheniethensthánion tsi nikakwetarónhkwen, ó꞉ni nonenhthakwénhte okonhrétsas.

¹² Nathenhénrakon íken ne tsi kanonhtiʼiotseráien, Nononhsatokentiʼkówaʼne, tánon ne tsi iehionhtawehiathákwah Nononhsatokentiʼkówaʼne tewasónhtoʼthe tiotinénhra ne okonhréhtsa wáststons tiókonhte nasénhaton nihiotinenhrakéhaton né kanenhiaserónhni tekenstenhrothákwen.

Ne Huramʼs Rahohioténhsera

¹³ Ne Ronhnonhtí꞉io Solomon iahó꞉nonhke rónhkwe né꞉ne Huram ronhwáiats, raristhasehrónhni nahahiatóten né꞉ne tsi kanatowanénhke ne Tyre ranákere, né꞉ne rorenhnáhon ne otsínekwar nikaristó꞉ten ahohióten.

¹⁴ Né roʼníha iáh ónenh tesrónhnhe, né꞉ne Tyre nónhwe nihanákerekwe, rahónha ó꞉ni rorenhnahónkwe ne karístatsi ahohióten; né ronisténha né꞉ne tsi ratiʼtsiókwahien ne Naphtali nonhwehniʼiehiatarákwe. Ne Huram kwáh íken tsi ratenikonhratʼthokhawe tánon rorenhnáhonhne naharistónhni. Wahatʼthóntate tsi nahotátʼtie ne Ronhnonhtí꞉io Solomon tsi wahohonkáron nohénton iaʼthahátaʼne akwékon tsi nenhaterihwathénhtsaʼte ne karístatsis kahioténhseras.

Ne Tékeni Otsínekwar Nikaristó꞉tens Kanawahatasónhas

¹⁵ Huram wahawistanáwenhte notsinékwat nikarístoʼthe nahatenawahathónhniaʼte, ne skanawahatátʼtsons 27 niwashí꞉take nihiónhsons tánon 18 niwashí꞉take tehiotwenónhni, tánon thóh nónhwe nahanawahathóten ne tsi iehionhtawehiathákwah Nononhsatokentíke.

¹⁶ Kwáh ó꞉ni tékeni wahanonhwarotserónhni né otsínekwar nikaristó꞉ten né skát꞉tsons 7½ niwashí꞉takes nitiótʼtes, né꞉ne é꞉neken enwát꞉ren ne tsi kanawahathótons.

¹⁷ Né é꞉neken ne skanawahatátʼtsons karasestánion tsi niʼwatenikonhrónhni tsi naʼtekanonhwaiewénhtons noronhkwásas

¹⁸ tánon tehiotinénhrakes notsínekwar nikaristó꞉tens ne tehiohiatsikhétare nènhne tethewatenienténston.

¹⁹ Nanonhwaró꞉res thóh nikaieronhthó꞉tens tsi ní꞉ioht ne katsitsarákens, 6 niwashí꞉take nikanénhies,

²⁰ tánon thóh nónhwe nahatirónhnion ne tsi tehiotwenónhni íken né꞉ne kwáh é꞉neken noronhkwáhsa tsi niʼwatenikonhrónhni. Tekenitewenhniáwe níkonhs ne tehiohiatsikhétare rononhniánions né꞉ne tehiotwáthaʼse ne skát꞉tsons tsi iehiotwáhtaʼse ne tsi nihiononhwaró꞉ron.

²¹ Ne Huram kí꞉ken tekanawahathákes notsínekwar nikaristó꞉tens ohénton ne tsi iehiontawehiathákwah Nononsatokentiʼkówa nónhwe nahaniotónhnion: tsi nòkwah nentiénen Jachin wahanáthonkwe tánon nothoréke nòkwahti Boaz né wahanáthonkwe.

²² Ne katsitsará꞉ken kaieronhthonhniáton ne ionhniáthon ne otsínekwar karístatsi ne iononhwaró꞉ron ne kanawahátes. Káti wahatihiothenhsehrénthaʼne ne tsi kanawahathótons.

Notsínekwar Karístatsi Tehiotenakwahkweʼnónhni

²³ Ne Huram wahathenakónhni tehiotenakwahkweʼnónhni otsínekwar nikaristhó꞉ten wáratsʼthe, 7½ niwasí꞉take nihionó꞉tes, 15 niwasí꞉take naʼtewathakáron, tánon 45 niwasí꞉take tehiotwenónhni.

²⁴ Akwékon naʼtstes nòkwahti ne kanakwahkeniaʼte ne tsi tehiosohthátse tehiotinenhrákes ne waʼtenenharíhsehres thóh karasthánion notsínekwar karistatsíne, tsehiokwékton tsi kawistanawénhton skát꞉ke ne kanakwáhke.

²⁵ Né kanàkwáh thóh ionenhsáheʼre ratihiátakes ne tekenihiawénre níkons ne otsínekwar karístatsis ionhniáton ne tèro tethonwanatenienthénston akste nòkwahti thethatikáneres ne kanakwáhke, áhsenh níkon ne skatʼtíson énskak khók tsi nónhwe iaʼtehatikánere.

²⁶ Né kanakwakthóntse áhsen-nihionká꞉raʼke nikátens. Né tsi tehiosohthátse kwáh ne sáka tsi ní꞉ioht ne tehiontnekonhthákwah kátʼtshe, átste nòkwahti tsi tehotiwenonhnítston tsi kíʼ ní꞉ioht ne katsitsaráken naonerathaʼsónhas. Né kaná꞉kwah kakʼnònh ne 10,000 nikaweró꞉kwahke watnekatháhas.

Né Tékeni Tehiokakwénhtonhte Notsínekwar Karístatsi Ionhniáton

²⁷ Ne Huram kwáh ó꞉ni oiéri nikasehréthakes wahateserethonniánion notsínekwar karístatis wárasʼthe; né skasehretátʼtsons 6 niwasí꞉take nikasehrétes, 6 niwasí꞉take naʼtewathakáron, tánon 4½ niwasí꞉take nitiothesehréthaʼte.

²⁸ Tehiotekeronhténion ne karístatsis tánon thóh hiotiʼienawakónhnions noiakarákes,

²⁹ né꞉ne konhwatiʼhiatharasthánion ne kénreks, tèro, tánon ne tehatinerahontʼtiónhtons tsi roʼnónnhe ne karisthatsíne; ó꞉ni ne kahiakarákes, ne é꞉neken ne nàkon né꞉ne kénreks tánon tèro, tekawathasénion tsi nihonwathihiatharasthánion.

³⁰ Né skasehratátʼtsons kaiéri nihiokakwenhthóntes ne otsínekwar karístastsis íken ó꞉ni ne tekaronhtharenhwákwen. Ne kaiéri naʼtekahiósaiens né notsínekwar nikaristhó꞉tens kanawahathótons thóh hiotiʼienawakónhnions ne kanatsiowánen; ne karasesthánion ne tekaʼwatháses ratiʼhiatarónhnion

³¹ Né é꞉neken nontákʼne tehiotwenónhni athí꞉tsera íken. Né wathitserótons 18 nihionkaráke é꞉neken íken ne kásehre tánon 7 nihionkaráke nákon niehiawénon. Tánon tekaristhaierónhnion kwáh tehiokwahtaséhton.

³² Nokakwenhtaʼsónhas 25 nihionkaráke nitiótʼtes; nákon ne tsi kanorokwáhere nónhwe nihiokakwenhtónhtons, tánon ne tekaronhtharenhwákwen énskak iéken tsi ní꞉ioht tsi kasehrethíson.

³³ Nokakwenhtaʼsónhas kwáh thóh niʼiohthánions tsi ní꞉ioht ne otsónkwas kásehre; ne tsi tekaronhtarenhwánions, ne tsi tewatkakwenhtanákthas, nahosinasónhas, tánon ne wakʼkakwenhthorósthas akwékon kíʼ ohtsinekwaʼróskon karístatsi íken.

³⁴ Kaiéri níkons tsi ní꞉ioht tsi karisthó꞉sehres ne nàkon né skasehretátʼtsons, enskakʼiéken ne kásehre.

³⁵ Tióton nihionkárake tehiosóh꞉thaʼse tehiokwahtaʼséhton ne é꞉neken ne skaʼsehretátʼtsons; tsi ní꞉ioht tsi karisthó꞉sheren énskat iéken ne rásehre.

³⁶ Né iotiʼienawakónhnions ó꞉ni ne kanerohkwáhere né karasesthánion tsi nihonwatiʼhiatarasthánion ne tehatinerahontʼtsónhtons tsi roʼnónnhe, kénreks, tánon ne ioneratésons karonhtasónhas, tsi nónhwe ne shé꞉kon ionát꞉thoʼte né꞉ne tehatisehrí꞉ie tsi enhonwatihiatarasthánion ne konhtírios kwáh thenhonkwahtásehte.

³⁷ Thóh kí꞉ken, ní꞉ioht tsi rothisehrethonhniánion; kwáh akwékon né sakaserétas, satewá꞉se ó꞉ni kwáh sakhontiʼierónhtas íken.

³⁸ Ne Huram kwáh ó꞉ni oiéri nikát꞉sakes roʼtetsonhniánions ne watnekarákwahs, né꞉ne skasehretátʼtsons ahonáwenk. Né skanatsátʼtsons 6 niwashí꞉take tehiotwenónhni tánon 200 nikaweró꞉kwahke watnekonhthákwah.

³⁹ Wísk nikasehréthakes éntie nòkwahti Nononsatokentiʼkówaʼne wahá꞉keron, tánon nó꞉ia wísk nikasehréthakes othoréke ne nòkwahti wahá꞉ien; né onhtakówa tsi tekahiósaien ne nàkon nòkwah nenhtiéne wahá꞉ien.

Tsi Niskakenhenhiónhon Tsi Nikahiatónhnions Nononsatokentiʼkówa Ne Kanónskon Iéiens

^40-45 Ne Huram kwáh ó꞉ni wahatenationniánion, akareniátas, tánon akeraʼsónhas. Akwékon wahohiothenhserísahaʼse ne Ronhnonhtí꞉io Solomon né꞉ne Roiá꞉ner Rahononhsatokenhtiʼkówa ahorihwáke. Né kí꞉ken tsi nahoténsons rosahánion: Ne tekanawahá꞉thakes Ne tekátsakes tsi roieronhtónhni ne iewathohára kanawahathakénhiaʼte Né tsi nihorasthánions ne tekanonwaiewénhton oronhkwásas ne skát꞉tsons ne kanawahathakenhiátes ioháron Ne 400 níkons otsínekwar karístatsis ne tehiohiatsikhétare thethotenienténston rosahánions, né꞉ne tehiotinenhrakeháties né꞉ne 100 níkons tehiokwahtaséhtons ne skát꞉tsons ne hiononhwaró꞉rons ne kanawahathakénhiates Noiéri nikaseréthakes Noiéri níkons onhtaksónhas Nontakówa Ne tekeniʼiawénhre niháti sakohiatonhniánions tèro né ronanenhsarákwenh nonhtakówa Nontaksónhas, iekareniátats, ó꞉ni nakerasónhas Akwékon né꞉ne Ononhsatokentiʼkówaʼne wasthasónhas, né꞉ne Huram rosenhénhni ne Ronhnonhtí꞉io Solomon, né꞉ne tekastaratʼthétons notsínekwar karísthatsis í꞉ken.

⁴⁶ Ne ronhnonhtí꞉io akwékon thóh nónhwe nihothenhnáhon nah ionhníhake ne tsi rathiwisthanahwenhthákwa ne Sukkoth tánon ne Zarethan nónhwe, né꞉ne Jordan ahonrakwáhkon.

⁴⁷ Né Solomon iáh tehokhontseriharónhnion kí꞉ken otsínekwar karísthatsis, sóhtsi iawethowánen íken, káti tsi nahiókstheke iáh kíʼ nonhwénhton tehiothokénhen.

⁴⁸ Ne Solomon kwáh ó꞉ni rothennáhon nowistanó꞉rons nahó꞉ten ahionhniáton tsi niʼiéiens ne kanónskon Nononhsatokentiʼkówa: né꞉ne ietienharáhkwah, natekhwára ne kanátaro ahorihwáke nahowátatʼtse ne Roiá꞉ner,

⁴⁹ né waʼthasehraʼnihionthákwah nohénton í꞉kathe tsi nónhwe ne kwáh iotokénti í꞉ken, wísk níkons nenhtiéne nòkwahti tánon wísk níkons nothoréke nòkwahti íken; notsítsas, kahá꞉sehras, tánon ne tewaswenhtoraráktha;

⁵⁰ ne tehiontnekhonthákwahs kát꞉tses, Ne kahásehras waswá꞉tas, nakerasónhas, ne wateksarákwah ne ionhtienhkwahronhniathákwas, tánon ne onhtatkʼsónhas né iehástha ne ioswenhthataríhens; tánon ne watenohanihionthákwas ne tsi nónhwe ne kwáh iotokénti íken tánon ne ástste nòkwahti ionohentónhnion Nononhsatokentiʼkówaʼne. Akwékon kí꞉kens ne kanónskon tsi niʼiéiens akwékon owistanó꞉rons ionhniáton.

⁵¹ Nó꞉nen ne Ronhnonhtí꞉io Solomon wahahiotenhserísa nononhsatokentiʼkówaʼne, thóh Ononhsatokentiʼkówaʼne tsi hionthaweniaienthákwa wahathakweʼniáien akwékon tsi nahoténsons ne ronikénhen Táwit rorihwatokénston rahohénton ne Roiá꞉ner—né꞉ne kawistarákens, owistanoronhshónhas, tánon noiáson nahoténhsons.