1 Kings 6 - Ohiatonhseratokénti

Solomon Wahanonhsónhni Nononhsatokentiʼkówa

¹ Kaiéri tewenhniáwe nihiosehráke shiʼtiotohétston nonhkweshón꞉as Nisraerʼró꞉nons shaʼtethonathénhtion ne Egypt, né꞉ne kaiéri nihiosehráke nikaríhwes shiʼhononhtí꞉io ne Solomon ne Israerʼró꞉nonke, né tekeníhaton siwenhnithakéhaton, né꞉ne Ziv siwenhnítarahkwe, ne Solomon tahatháshawen wahanonhsónhni Nononhsatokentiʼkówa.

² Né kanónskon 90 niwashí꞉take nikanónses, 30 niwashí꞉take naʼtekanonskáron, tánon 45 niwashí꞉take nitiótʼte.

³ Né tsi iehionthawehiatákwa ionákʼthaien 15 ne iawénhre niwashí꞉take níhions tánon 30 niwásenh niwashí꞉take naʼtekanonskáron, ehʼnatewathakáron tsi kíʼ ní꞉ioht ne ioterenhnaienthákwa.

⁴ Nasonthákes Nononhsatokentiʼkówa wahanonsthonkwahkaronhtónhnion né꞉ne tsatehioskaráhwen, nátsthe nòkwahti sénha naʼtewathakarónha tsi ní꞉ioht ne kanónskon nòkwahti.

⁵ Nasonhthakésons nátsthe nòkwahti, nasonhtatʼthóntses tánon nonàken nòkwahti Nononhsatokentiʼkówaʼne, áhsen naʼtehionákʼthakes iononsanénhthakon wahatinonhsónhni, né skanaktátʼtsons 7½ niwashí꞉take nitiótʼtes.

⁶ Né tsionaktátsons ne ehtàke ionaktaiéntons 7½ niwashí꞉takes naʼtekanonskárons, né asénhnon naʼtehionákthaien 9 niwashí꞉thake naʼtekanonskáron, tánon ne kwáh é꞉neken iehionákthaien 10½ niwashí꞉take naʼtekanonskáron. Ne Ononsatokentiʼkówaʼne nasonhtakésons né skawenskarátʼtsons sénha kíʼ nikaténhsa tsi ní꞉ioht né ehthàke tiostswenhkárate, né káti ne ionakthénions ahónton ne thóh ahontrónh꞉nion nasonhthákes né꞉ne tó꞉sa ne tekarontarenhwánions thóh iathakonhnótʼkaʼwe tsi kénskaron.

⁷ Nonenhiasónhas ne kanonsonhniáton Nononhsatokentiʼkówa tsi ienenhhiowátstha tkanenhiasehrónhni, né꞉ne tó꞉sa othènen tahonhnithonharérasthe tsi enhatinekónhreʼke, ó꞉ni ne ató꞉kens, tánon noiásons ne karísthatsis tsi nihiontsthasónhas nénhonsthe tsi nenhatinonhsónhni Nononhsatokentiʼkówa.

⁸ Né kwáh ehtàke tehionáktaien ne tsi iehionhthawehiathákwa né nenhtiéne nòkwahti Nononhsatokentiʼkówaʼne, kanekóthoʼte tsi ienawénonh ne tekeníhaton iaʼtetionákthaʼne tánon nasénhaton iaʼtetionákthaʼne.

⁹ Káti ne Ronhnonhtí꞉io Solomon wahatenonhshí꞉sa Nononhsatokentiʼkówa. Né tsi kenskaráheʼre waʼtharonhtharenhwánion tánon onenhthakwénhte oswénhkare wá꞉ratsʼte.

¹⁰ Né ásenh-naʼtehionákthanes né iononhsawénhte, tsi nahionatʼthanétarons 7½ niwashí꞉takes nitiotʼkhés, thóh iononhsanénhthakon ákta ne Ononsatokentiʼkówaʼne, tánon ne tehionatatsenawákon ne onenhthakwénhtes tekaronhtharenhwénhnions.

¹¹ Ne Roiá꞉ner wahawénhaʼse ne Solomon,

¹² “Tó꞉ka akwékon tsi ensatewénhnaraʼkwe naʼtianerénhseras ó꞉ni naʼkerihwatátʼtseras, thóh kíʼ nénhtiere tsi ki nihihiarahratsʼténhni ne ianikénhen Táwit.

¹³ Thóh skátʼke enhiakwenhterónhtake nakonhkwetashón꞉as kénʼen kíʼ Ononhsatokentiʼkówaʼne né sanonhshón꞉nihatie, tánon iáh ki nonhwénhton takehiatewénhtheʼte.”

¹⁴ Káti ne Solomon iahá꞉sa tsi rononhsonhnihátie Nononhsatokentiʼkó꞉wa.

Tsi Nikanonsasherónhni Ne Kanóns꞉kon Nononsatokentiʼkówaʼne

¹⁵ Né kanóns꞉kon Nononhsatokentiʼkówa né wátston ne washirowánens ne onenhthakwénhte oswénhkare tsitkénskaronh tiotáshawe tsi nióre ne tsitkenskaráhere, ók né tsi kénskaron onénhta ne oswénhkare wátston.

¹⁶ Né kwáh kanóns꞉kon iéken, né konhwanatónhkwah ne Kwáh Iotó꞉ken Nón꞉we Í꞉ken, oná꞉ken nòkwah Nononhsatokentiʼkówa nónhwe iekanonhsónhni. Né꞉ne asenhniwásenh niwashí꞉take nikanón꞉ses tánon né tewasonhthothákwen nonenhthakwénhte oskwénhkares oskwenhkaráke tiotásaʼwe tshièhio ne tsitʼkentskwáhere.

¹⁷ Nohénton ionáktaien tsi nón꞉we ne Kwáh Íotokénti Í꞉ken 60 niwásenh niwashí꞉take nikanón꞉ses.

¹⁸ Ek niewasí꞉ras nonenhthakwénhte né karasesthánion ne watenenharíhseres wakarathákwens ne tánon notsítsas; akwékon ne kanóns꞉kon onenhthakwénhtes wátston, né káti nonenhiasónhas tó꞉sa awené꞉hake.

¹⁹ Nonàken nòkwahti Nononsatokentiʼkówaʼne né kwáh kanónskon iéken wahonhnónhni, thóh nónhwe nenhatí꞉ien ne Roiá꞉ner Rahoneróhkwah Naʼterihwasehronhniátshera í꞉wa.

²⁰ Kí꞉ken ionákthaien ne kwáh kanónskon iéken 30 niwáhsenh niwashí꞉take nikanónses, 30 niwásenh niwashí꞉take naʼtekanonskáron, tánon 30 niwásenh niwashí꞉take nitiótʼte, akwékon ne ioterorók꞉ton nowistanó꞉ron. Ne ietienharákwah né꞉ne ioterorók꞉ton ne ekʼniewasí꞉ras nonenhthakwénhte.

²¹ Ne kanóns꞉kon onowistanoronhtseróskon í꞉ken tánon noronhkwátsas owistanó꞉ron nónhne ne í꞉ken thón tekarónwe ne tsi ieiontawehiaʼtáhkwah ne kanóns꞉kon owistanó꞉ron nónhne í꞉ken.

²² Kwáh akwékon ne kanóns꞉kon nononsatokentiʼkówaʼne owistanorontsheróskon íken, né nònhne sáka ne ietienharákwahke tsi nónhwe ne Kwáh Iotokénhti Íken.

²³ Né tèkeni teninerahóntionhte tenirhio né꞉ne ionhniáton ne iakenhiewátha óiente tánon thóh nónhwe nikáien tsi nónhwe ne Kwáh Iotokénti Ít꞉ken, né skát꞉tsons 15 iawénhre niwashí꞉take nitiótʼthes.

^24-26 Tetsáronh kwáh shaʼtetiótʼthes tánon kwáh saniʼierónhta íken. Sniʼhiatátʼtsons tekenísons teninerahóntʼtionhte, né sninerahontsátʼtions 7½ niwashí꞉takes nihiónhsons, káti tsi níhionhs ne tsi iehiótʼthes ne skanerahónhtsa tsi nióre nó꞉ia 15 iawénhre niwashí꞉take níhions.

²⁷ Skát꞉ke í꞉nethe tsi ní꞉ioht tsi rotí꞉ien tsi nónhwe ne Kwáh Tiotó꞉kenti ít꞉ken, né káti ne tsi iehonaterahóntʼtsates iehiotiʼienakwákon nó꞉ia tsi káien ne kwáh satekanonhsí꞉hen nónhwe, tánon nó꞉ia ninerahontʼtsákes asonhtáke né iehiotiʼienakwáhkon.

²⁸ Kí꞉ken teninerahontʼtsáke tenírhios kwáh owistanoronhtserókskon í꞉ken.

²⁹ Nasonhtakésons ne kwáh tsi kanonhsíhio nónhwe tánon ne kwáh kanónskon ieken neʼnènhne tekaieronhnonháthons tsi wakarathakwahniónhkwen né꞉ne thehatenerahóntʼtionhtons tehatinerahontʼtsónhtons tsi roʼnónnhe ioneratésons karonhtasónhas, tánon notsítsas.

³⁰ Iekaníhare noskwenhkaraʼke owistanó꞉ron kenskarónkwen.

³¹ Né tewatenohanethákwah iakenhiewátha óienhte ionhniáton tánon ne iohnohénton ne tsi nónhwe ne Kwáh Tiotó꞉kenti ít꞉ken; né é꞉neken ne tsi ionohénton iekahiothihiáton tsi tehiotenohakweʼnónhni.

³² Ne kanó꞉has né꞉ne karasesthákwen tsi ronakarathákwens ne thehatinerahontʼtionhtons tehatinerahontʼtsónhtons tsi roʼnónnhe, ioneratésons karonhtasónhas, tánon notsítsas. Né kanó꞉has, ne tehatinerahontʼtionhtons tehatinerahontʼtsónhtons tsi roʼnónnhe, tánon ne ioneratesonhs karonhtasonhas owistanó꞉rons karorók꞉tons.

³³ Né tsi iehontawehiathákwah ne tsi kanonhsíhen íken tehioteké꞉ronhte ne tsi ní꞉ioht tsi watinohónhni né꞉ne iakeniewátha óiente wáhonsthe.

³⁴ Tekanó꞉hake né꞉ne tewatsaséhra onénhta né nakaskwenhkaró꞉ten wahonónhniaʼte

³⁵ tánon ne wahatirasésthaʼkwe ne wakarathákwenh ne tethonwanateʼnienténston ne tehatinerahontʼtsónhtons tsi roʼnónnhe, ioneratésons karonhtasónhas, tánon notsítsas, né nónhne ioterohróks꞉ton nowistanóron.

³⁶ Natenhénrakon thóh né nónhwe niken ohénton nononhsatokentiʼkówa, watenhénraien tiotinénhra ne nonenhthakwénhte okonhrétsas né wástons né꞉ne tiókonte nasénhaton niehiotinenhrakéhaton nonénhia.

³⁷ Tsi wathatitsʼtenhró꞉ten tsi wakonwentskwáhren nononhsatokentiʼkówa né꞉ne tekeníhaton sewenhnítarahkwe, né꞉ne Ziv siwenhnítare, né꞉ne kaieríhaton shiʼhiosehrakehátie shiʼhononhtí꞉iokwe ne Solomon.

³⁸ Né shaʼtekonháton niwenhnitakéhaton, né꞉ne Bul shiʼwenhnítare, né꞉ne enskaiawenhreháton shiʼhioserakehátie shiʼhononhtí꞉iokwe ne Solomon, Nononhsatokentiʼkówa kwáh kíʼ wahatinonhshí꞉sa kwáh kíʼ tsi ní꞉ioht tsi tewatenikonhrónhni. Tsáta nihiosehráke nikaríhwes ne Solomon iahanonhshí꞉sa.