1 Kings 5 - Ohiatonhseratokénti

Né Solomon Wahathateweienénhtaʼne Nahanonhsónhni Nononhsatokentiʼkó꞉wa

¹ Ronhnonhtí꞉io Hiram né Tyre nónhwe kwáh tiókonhte tsi ronaténroʼkwe ne Táwit, tánon káti saharihwáronhke nètho Solomon tsi rahónha teshonatʼthakwénhni ne roʼníha Táwit tsi rononhtí꞉io íken,

² Ne Solomon hionsahoteriwaniáthaʼse ne Hiram:

³ “Sateriéntare nètho tsi ne iorihonhníhon tsi tiokonhthákwen kaiénthakwe nateriʼiósera ne rakeʼníha tsi ratikwékon ronateriʼióhon ne tehontátʼtsons ne rahiatatʼtónhtie kanakerasehrakérons, iáh tehotesenhnaientháhon nahotenonhsónhnike nononhsatokentiʼkówa né nahonwasenhnaienthákwahke ne Roiá꞉ner Raoní꞉io né꞉ne tsi nihoiéren ne Roiá꞉ner tahá꞉wenh natesenhniétshera tashakoróʼrotʼthe ratikwékon ne tehontátʼtsons.

⁴ Ók kíʼ nónhwa ne Roiá꞉ner Nakení꞉io íken tahá꞉kon ne skénnon íken akwékon tsi nonhwésons niwakateristhatátie. Iáh tewátien nónka tahiakwahtátʼtson, tánon káti iáh tehiótʼtheron nahontahionhkatiathónhti.

⁵ Ne Roiá꞉ner roʼraratsʼthénhni ne rakeʼníha Táwit, ‘Ehʼtshiénha, rahónha enshíiʼnonhtí꞉iosʼthe ne tahonsahianakʼthákwen, kwáh kíʼ enhakenonhsónhnien nononhsatokentiʼkó꞉wa.’ Tánon káti ónenh iaʼtewakerihwaiéntaseh nakenonsónhni nètho ononhsatokentiʼkówa ne nahonwasenhnaienthákwahke ne Roiá꞉ner Nakení꞉io íken.

⁶ Káti hiasehiathéniet ne sonkwetashón꞉has ne Lebanon nahionkerónhtsiakʼse nonenthákwentes. Akonkwetashón꞉ʼas skátke enhothihióten, tánon kíʼ kwáh enkhekárhiakʼse ne sonhkwetashón꞉ʼas tsi nénhshiehre. Tsi kwáh sateriénhtaʼre, nakonhkwetashón꞉as iáh thóh nióre tsi tehonateriénhtare onh ní꞉ioht tsi aháthironhtsákon tsi ní꞉ioht ne sonhkwetashón꞉as.”

⁷ Ne Hiram kwáh íken tsi wahawerientí꞉io sahaiéna tsi nonhtahaterihwaniéthe ne Solomon, tánon káti wahénron, “Tehonwanonweráton ne Roiá꞉ner nónhwa wenhniseráte Asèken thó꞉wi ne Táwit thóh nióre tsi ratenikonhratʼthóka roiénha né tahonsahonakʼthákwen tsi ronhnonhtí꞉io íken nètho ratishástsʼthe kenhtiókwah!”

⁸ Ethòne kíʼ ne Hiram hionhsahoterihwaʼniéthaʼse ne Solomon: “Watienáhon ne tisaterihwaniéton, tánon kíʼ waʼkathateweienhnenhtháhon ne thóh nátiere tsi nisehrihwanónhtons. Enʼtkátkaʼwe nonenhthakwénhtes ó꞉ni ne ohnénhta karonhtaʼsónhas.

⁹ Nakonkwetaʼshón꞉ʼas enthonhnontatsnénhthaʼkwe nokhonrétshas ne Lebanon tánon kaniatarakheʼkowánen nienhatíhaʼwe tánon thenshakothinerékʼkhons tánon enhoniosehrónhni nahonnawènhthaʼkwe tsi nónhwe ne tkawenó꞉the nenhsehráko. Thóh nónhwe nakonhkwetaʼshón꞉ʼas iaʼthenshatiʼnerenkshiónko, tánon ne shonkwetaʼsónhas enhonʼtsiatakweʼní꞉iosthe. Tsi nòkwah níse ahisaterihwaiénhniʼke, akenónhwene naséhnonhte nakonhkwetaʼshón꞉ʼas.”

¹⁰ Káti ne Hiram kwáh wahokhonrehtsaʼwíhon nonenhthakwénhtes ó꞉ni nonénhtas tsi natehotonhontsónihne,

¹¹ tánon ne Solomon tahá꞉wenh ne Hiram 100,000 nikawinotserákes onátsias tánon 110,000 nikaweró꞉kwahkes ne kwáh ahóskon íken iaʼkeniewatakénhie né niaʼtehiosehráke nasakónonhte rahonkwetashón꞉as.

¹² Ne Roiá꞉ner kwáh kíʼ wahatsénawasʼthe tsi nihorarátstons tánon tahá꞉wenh ne Solomon naʼtenikonhratʼthokhátseras. Kwáh kíʼ skénnenk tikènhne tsi naʼtehiátere ne Hiram tánon ne Solomon, tánon wahiatsanerenhsehrónhni tsi naʼtehiátere.

¹³ Ne Ronhnonhtí꞉io Solomon 30,000 niháti ronhnónkwe washakohonkhárhiake né nahontenatserónhni akwékon tsi niwatenáskwah ne Israerʼró꞉nonhke,

¹⁴ tánon Adoniram ohénton iathó꞉tasʼte nashakothenhnikonhráren. Waʼteshakoniʼtsiotsiaʼke né꞉ne 10,000 niháti ne shotitsokwáhstsons, skenhtsokwátʼtsons sehwenhníta Lebanon nónhwe ienhatiʼterónhtake tánon tewenhnítake tsi thatíteronh ienshatiʼterónhthake.

¹⁵ Tánon ne Solomon 80,000 niháti rahonkwetaiénthaʼkwe ne rathiʼnenhiakwétarons ne tsi iononhtarónhnions kanakerasehráiens nónhwe nihatinákere, tánon 70,000 niháti nahatinenhiakaréni,

¹⁶ 3,300 niháti ne ratiʼhiotensehrakweʼní꞉io ohénton iaʼtesakótasthe nahonwanahtenhnikonhraʼsónhteraseh ne rahotihioténhseras.

¹⁷ Né꞉ne Ronhnonhtí꞉io Solomon tsi wahathénhnaʼne né꞉ne kwáh kanenhiowánens wahathikwetarónhko né꞉ne tsi nónhwe nenhwatsitʼkwáhre Nononhsatokentiʼkówa.

¹⁸ Ne Solomon tánon ne Hiram rahotinhatserasónhas tánon ne ronhnónhkwe ne Byblos nónhwe nithonénons ronónha wahatiʼnenhiasehronhniánion tánon ne ohkonrétshas tsi enkanonsonhniátonhke Nononsatokentiʼkówa.