1 Kings 22 - Ohiatonhseratokénti

Né Rotó꞉kense Micaiah Wahoronhkáten Ne Ahab

¹ Kwáh kíʼ skénnonk thikènhne tsi naʼtehónhtere ne Israerʼró꞉nons tánon ne Syriaró꞉nons né tehioseráke niaháhe,

² ók kíʼ nasénhaton sihioserakehátse né Ronhnonhtí꞉io Jehoshaphat ne Judah nónhwe Ronhnonhtí꞉io Ahab wahotkénsera né Israerʼró꞉nonhke nónhwe.

³ Né Ahab washakorihwanónhtonhse ne rahonkwetaʼshón꞉as, “Onh nonhtséren tsi iáh othènen tethewahiéra nahonsetewaiéna ne Ramoth né Gilead nónhwe nahonshatsitewákwah ne ronhnonhtí꞉io ne Syrianʼhne? Í꞉i onhkwáhkwenk!”

⁴ Tánon ne Ahab wahorihwanónhtonhse ne Jehoshaphat, “Ahíʼteneʼken niahiʼtsatsathónhti ne Ramoth?” “Wakathateweienhnenhtháhon tánon nó꞉nenh níse ensathateweienénhtaʼne,” ne Jehoshaphat wathariwaseráko, “tánon ó꞉ni natʼsóhtar ó꞉ni nakonhkwetaʼshónhas ne rotisáthens tsi ronhterí꞉ios.

⁵ Ók kíʼ thiʼtsiátseren tsi thininhikonhríhsak ne Roiá꞉ner.”

⁶ Sók kíʼ ne Ahab iashakonónhkʼkon ne rotitó꞉kense, ká꞉nonh né kaiéri tewenhniáwe niháti, tánon washakorihwanónhthonhse, “Iakhehiatsatónhti onhtèken ne Ramoth, khés ne iáh?” “Iasheʼhiatsiathónhti,” wathatirihwaseráko. “Ne Roiá꞉ner énthion natesenhniétsera.”

⁷ Ók kíʼ ne Jehoshaphat waharihwanónhton, “Iáh kén tehióien ne óia shé꞉kon rotó꞉kense nahontháwe tsi atsitewanikonhríhsake ne Roiá꞉ner?”

⁸ Ahab watharihwaseráko, “Shé꞉kon saiáta rothathénron, né꞉ne Micaiah né꞉ne roʼníha ne Imlah. Ók kíʼ ríhsons nenhné꞉he tsioríhwa tsi iáh nonhwénton tsehorihwáken né thènen ahioianeréhake nakerihwáke; tiotʼkonhónwe knahótenk karihwahétken í꞉ken.” “Iáh tehiówenk né꞉ne ashí꞉ron!” ne Jehoshaphat watharihwaseráko.

⁹ Ethòne ne Ahab iahó꞉nonhke ne teiehiatorethákwah rarihwénhtha í꞉ken tánon wahoróri ahonónksa ne Micaiah kwáh ónenk.

¹⁰ Né teninonhtiʼiotseráke, né ronatʼtseronhniáton ne rotinonhtí꞉io rahonatʼtserónhniat, thóh nítskothe ne rahonanitskwáhraʼne né꞉tsi ietʼthethákwah nónhwe kwáh thók ástste ne tsi iothenhenrénhton ne Samaria, tánon ratikwékon ne rotitó꞉kenhse thóh rahothihénton iehatirihwákens.

¹¹ Saiáta, né꞉ne Zedekiah né꞉ne roʼníha ne Chenaanah, rotenakaríson karístatsi nahó꞉ten rótston tánon wahawénhase ne Ahab, “Kén nahó꞉ten ne Roiá꞉ner ráton: ‘Né kí꞉ken énsatsʼte nahisewaterí꞉io ne Syriaró꞉nons tánon kwáh í꞉ken tsi ensheʼsénhni.’”

¹² Ratikwékon ne roná꞉tsakes rotitó꞉kense kwáh neʼsáka tsi wahonníron. “Iasewanénhrih ne Ramoth nónhwe tánon se ensewatʼkwéni,” wahonhníron. “Né Roiá꞉ner enthetsítion naʼtesenhniétsera.”

¹³ Tsi nikaríhwes, ne ronaterihóntons tsi niháti ne Micaiah ronhwenhnónkʼson, “Ratikwékon ne ronátsakes ne rotitó꞉kense iahatirihwáken tsi enhohianerásthen ne ronhnonhtí꞉io, tánon ioiánere nonhní꞉se thóh náshiere.”

¹⁴ Ók ne Micaiah watharihwaseráko, “Tsi nironhnheʼhónwe ne Roiá꞉ner waʼkararátsthe tsi né enkíron tsi nahó꞉ten enhá꞉rori nakíron!”

¹⁵ Nó꞉nen rahohénton ne Ronnonhtiio Ahab shiaʼthátaʼne, ne ronhnonhtí꞉io wahorihwanónhtonhse, “Micaiah, iothonhónken ne Ronhnonhtí꞉io Jehoshaphat tánon ní꞉i niahiákene niaʼsatsathónhti ne Ramoth, khés ne iáh?” “Iaʼtsitsatsiathónhti!” ne Micaiah watharihwaseráko. “Orihwí꞉io tsi entsatʼkwéni. Ne Roiá꞉ner enthetsisénon naʼtesenhniétsera.”

¹⁶ Ók ne Ahab watharihwaseráko, “Nó꞉nen ensetʼtháraʼse rahosénhnakon ne Roiá꞉ner, satʼró꞉ri norihwí꞉io! Thóh niʼiohrihwáke enhkonhró꞉ri nètho?”

¹⁷ Né Micaiah watharihwaseráko, “Khékens Nisraerʼró꞉nons rahotisóh꞉tar tehonarénion tsi hionhniarónhnions tsi ní꞉ioht ne teiotinakaronhtónʼas iáh tehiotí꞉ien ne shaʼkónonhne. Tánon ne Roiá꞉ner wahénron, ‘Kí꞉ken ronhnónhkwe iáh tehothí꞉ien ne sakohénthenhse; sheʼríhon kwáh skénhnonk tsi sonhthénhti.’”

¹⁸ Né Ahab wahawénhase ne Jehoshaphat, “Iáh kén tekonhró꞉ri tsi iáh nonhwénhton thènen tehioiánere tsi iehakerihwákenhse? Kwáh tiókonhthe tsi knahó꞉thenk wahét꞉ken í꞉ken!”

¹⁹ Né Micaiah iahathasónhteren: “Ónen kíʼ sathahónsatat tsi nahó꞉ten ráton ne Roiá꞉ner! Wahíken ne Roiá꞉ner rahonitskwáhraʼne ne karonhiáke thènskothe, ratikwékon ne rahoronhiakeró꞉nons rahiatákʼta rónhʼnethe.

²⁰ Né Roiá꞉ner waʼharihwanónhton, ‘Ónhka tahonwanikonhrakénhni ne Ahab né káti ne Ramoth nónhwe iá꞉re tánon entʼthonwanonhwarhiákon?’ Ótsiakes ne ratironhiakeró꞉nons énska tsi nahó꞉ten wahonhníron, tánon ne ronátsiakes óia nònhne nahó꞉ten wahonhníron,

²¹ ethòne raronhiakeró꞉non thóh nonhtáre, rahohénton ne Roiá꞉ner niaháre, tánon wahénron, ‘Í꞉i thenhiʼnikonhrakénhni.’

²² ‘Onhní꞉ioht?’ ne Roiá꞉ner waʼharihwanónhton. Né raronhiakeró꞉non watharihwaseráko, ‘Thóh iénke tánon ratikwékon ne Ahab rahonkwetashón꞉ʼas rotitó꞉kense enkhehiónhnien nahonhnó꞉wenhthe.’ Ne Roiá꞉ner wahénron, ‘Wáhs kíʼ tánon tetsenikonhrakénhni. Kwáh kíʼ ensaterihwathénhtsaʼse.’”

²³ Tánon ne Micaiah iahá꞉sa: “Kenh ki nahá꞉wenhne. Né Roiá꞉ner washakahónhnien ne shonkwetaʼshónhas naiesanowénhthen. Ók kíʼ kwáh rahónha rohianerenhseríhson tsi karihwaiesátsera thetsatátken!”

²⁴ Ethòne ne rotó꞉kense Zedekiah tsítres ne Micaiah niaháre, wahoranonhsáhiake, tánon waharihwanónhton, “Kát꞉ke né Roiá꞉ner Raonikonhratokénti niwakatewenhthéton tánon í꞉se tahisenitháren?”

²⁵ “Kwáh ensherihwatsénhri nó꞉nen kák nónhwe nonàken tsionákʼthaien nienhénse nashathashethána,” ne Micaiah watharihwaseráko.

²⁶ Ethòne ne Ronhnonhtí꞉io Ahab wahó꞉nhane saiáta ne rahonkwéta, “Nahoiéna ne Micaiah tánon Amon niehohiathénhaf, né꞉ne rakóra ne kanatowanénhke, ó꞉ni ne tsi thénhteron ne Ronhnonhtí꞉io roiénha Joash.

²⁷ Sheʼró꞉ri tsi ionhthatenothónkwah iehonwahiathónhti tánon kanátaro khók tánon oné꞉kanos ronnhékwenk tsi nióre skénnok thènskeʼwe.”

²⁸ “Tó꞉ka skénnonk khók thenhshé꞉seʼwe,” né Micaiah watharihwaseráko, “né káti enwathená꞉thonhkwe ne Roiá꞉ner tsi iáh akonháke tehothatíhon!” Tánon iahathasónhteren, “Sewathahónsatat, sewakwékon, tsi nakíron!”

Tsi Warénheie Ne Ahab

²⁹ Ethòne ne Ronhnonhtí꞉io Ahab Nisraerʼró꞉nonke nónhwe tánon ne Ronhnonhtí꞉io Jehoshaphat né Judah nónhwe iahá꞉ne iakonhwatsathónhti ne tsi kanatowánen Ramoth né꞉ne Gilead nónhwe.

³⁰ Ne Ahab wahawénhase ne Jehoshaphat, “Tsi entsiaterihiósera, Kwáh thenkathatierónhnion, ók kíʼ ní꞉se né satʼtserónhniat ne sanonhtihiótsera athakwénia.” Káti ne ronhnónhtí꞉io Nisraerʼró꞉nonke tsi aterihioseráke niahá꞉re tehothatierónhnion.

³¹ Né ronhnonhtí꞉io ne Syrianhʼne shaʼkoróri ne asenhniwásen-tékeni niháti nohénton iehonnéton notsónhkwas kwáh tó꞉sa ónhka nakóren iesakonatsiathónhti nek khók ne ronhnonhtí꞉io Nisraerʼró꞉nonke.

³² Káti sahonwáken ne Ronhnonhtí꞉io Jehoshaphat, wahón꞉nere tsi rahón꞉ʼa seh ne ronhnonhtí꞉io Nisraerʼró꞉nonke, tánon sahónkheʼte iahonwatsiatónhti. Ók nó꞉nen shathohénreʼthe,

³³ wahónt꞉thoʼke tsi iáh rahón꞉ha tehononhtí꞉io Nisraerʼró꞉nonke, tánon kíʼ wahónk꞉kaʼwe tsi iehonwatsiatónhtion.

³⁴ Kwáh ethòne, né꞉ne iáh ónhka tetsiakothesenhnónhni, né Syriaró꞉non rasóh꞉tar iaharónhthaʼte kaiénkwire né wathó꞉kwahthe ne Ronhnonhtí꞉io Ahab tsi natehiosthóntere ne rotsathawíton ne ratherihiosthákwah. “Wakatʼkaréwathe!” Hiathohénrethe né rothoriénhni notsónhkwa. “Thonhshasatʼkarathéni tánon shathotáro ne tsiwaterí꞉io!”

³⁵ Tsi nikaríhwes waterí꞉io, ne Ronhnonhtí꞉io Ahab thóh rènskothe rahosehréthakon notsónhkwah thóh roienawákon, iateshakokánere ne Syriaró꞉nons. Tsi ronekwáhon tsi nihokarewáton iatkanáwenhte né takanónkwikʼthe notsónhkwa, tánon tsi iahokáraʼwe warénheʼie.

³⁶ Ákta tsi iatewatʼtsenthósere watewatherihwaré꞉ni Nisraerʼró꞉nons rahotetsiókwahkon: “Tsi sewahiatátʼtions sheʼwanakeraserákons nionhsásewe tánon ne tsi kanatowánens!”

³⁷ Káti warénheʼie ne Ronhnonhtí꞉io Ahab. Né rahoierónhta Samaria niahatíhawe tánon wahatihiatháta.

³⁸ Né rahó꞉sere otsónkwah tsi tsonhthawensthákwah ne Samaria nónhwe nonhsahatinóhare, thóh nónhwe nʼérhar wakonhtikánonthe ne rahonekwénhsa tánon ne iotirihwaiathatónhons niskonhtsatoharethákwa, kwáh kíʼ tsi niháwen ne Roiá꞉ner tsi thóh nenhiáwenhne.

³⁹ Kwáh tsi nahorihothénsons ne Ronhnonhtí꞉io Ahab tsi nihotseránion, éhtho í꞉kare tsi nahothénhsons ne rahonónskon karasesthánionkwe né꞉ne kanakarará꞉kens tánon akwékon tsi níkon ronatishahánions, thóh nónhwe nikaiatónhnions Tsi Nihonwatikáratons ne Ronhtinontí꞉ios ne Israerʼronónke.

⁴⁰ Né sarénheʼie né roiénha Ahaziah thonsahonakʼthákwen tsi sahatenonhtí꞉iosthe.

Né Ronhnontí꞉io Jehoshaphat Né Judah Nónhwe

⁴¹ Né kaieríhaton sihioserakehátse sihonontí꞉ioʼkwe ne Ahab Nisraerʼró꞉nonke, Jehoshaphat né꞉ne ronikénhen ne Asa né ronhnontí꞉ioʼkwe ne Judah nónhwe.

⁴² Asenhniwásen-wísk satehahoserihiákon, tánon rahónha rakórahkwe ne Jerusalem né꞉ne tewásen-wísk nihioseráke nikaríhweskwe. Né roʼnisthénha Azubah ionthátsiastsʼkwe, né sakoiénha ne Shilhi.

⁴³ Kwáh ne sáka tsi ní꞉ioht ne roʼníha Asa ne thohʼhénton, thóh nihoiéren tsi nahó꞉then ne tkarihwaiéri rahohénton ne Roiá꞉ner; ók kíʼ tsi nonhwésons nihonterenhnaienthákwahkwe iáh tekarihwathónton, tánon kíʼ nonhkweshón꞉as iehiakokonhthákwen iehiontkáwas karihwihiosehokónhas tánon nahóntsahathe ne kanethanórons ehnónhwe.

⁴⁴ Né Jehoshaphat skénnon wanón꞉hni ne ronhnonhtí꞉io Nisraerʼró꞉nonke.

⁴⁵ Kwáh nohiásons nihiorihothénhsons nètho Jehoshaphat tsi nahotsérenhke, akwékon tsi nahonikonhratʼtsaníthonhke tsi nihoterihióhon, thóh nónhwe nikahiatónhnions Tsi Nihonwatikáratons ne Ronhtinontí꞉ios ne Judah Nónhwe.

⁴⁶ Ratikwékon é꞉ren wasakohiathenháwiʼte ne rotiskenrakéte ó꞉ni ne tsonatʼthonwísens ne iotirihwahiathatónhon né iotihióthens tsi nónhwe ne onó꞉wens í꞉ken ne ietienharákwah né꞉ne shé꞉kon iatehionathaténhron ne tsi nihothenhniserathénionskwe ne ronikénhen Asa.

⁴⁷ Né tsi iohontsáien ne Edom iáh nènhne tehotinonhtiʼiotseraiénthaʼkwe; né nènhne rakórakwe kènʼne ne rohiathanónhnakwe né ronhnonhtí꞉io ne Judah nónhwe né rohiatarákwen.

⁴⁸ Né Ronhnontí꞉io Jehoshaphat rohonwaiénhthakwe kahonhiowánens né ionhniáton niakontʼtsiró꞉then tsi tiohontsáien ne Ophir nakonhtikóha nowistanórons; ók Eziongeber nónhwe iatkahonwaríhseron tánon iáh kíʼ nonhwénhton tehionatʼtsírothe.

⁴⁹ Ethòne Ronhnonhtí꞉io Ahaziah né Israerʼró꞉nonke waʼshakótatʼtse nashakoríhon ne rahonkwetashón꞉has skát꞉ke ahontʼtsiró꞉then ne Jehoshaphat rahonkwetaʼshón꞉ʼas, ók ne Jehoshaphat iáh né tehotʼthontháton tsi nahonwátatʼtse.

⁵⁰ Né Jehoshaphat warénheʼie tánon thóh nónhwe nahonwahiatháta né kanonhtiʼiótsera tsi ronhwatihiathatahástha né Táwit rahonáthakon, tánon ne roiénha Jehoram thonsahonakʼthákwen tsi sahatenonhtí꞉iosʼthe.

Né Ahaziah Né Ronhnonhtí꞉io í꞉ken Nisraerʼró꞉nonke

⁵¹ Né tsáta iawénhre sihioserathátie shiʼhononhtí꞉ioʼkwe ne Jehoshaphat ne Judah nónhwe, ne Ahaziah né꞉ne roʼníha ne Ahab né sahatenonhtí꞉iosʼthe Nisraerʼró꞉nonke, tánon rahónha wahatʼkórasthe ne Samaria né꞉ne tehioseráke nikaríhwes.

⁵² Waharihwánerake tsi nòkwah ne Roiá꞉ner, né wahá꞉sere né karihwahekénsera thontahatenákerasthe tsi nihaweiennaksénhne né roʼníha Ahab, ó꞉ni né roʼnisthénha Jezebel, tánon ne Ronhnontí꞉io Jeroboam, né꞉ne iesakosaríhnon Nisraerʼró꞉nons ne karihwanerahakʼtseráke.

⁵³ Wahasénhnaien ó꞉ni watharihwás꞉niese ne Baal, tánon kwáh ki tsi niʼiohʼthónhne ne ronikénhen ne thohhénton, wahotenakwenwénraʼtshe ne Roiá꞉ner, né Sakoní꞉io Nisraerʼró꞉nonke.