1 Kings 2 - Ohiatonhseratokénti

Ne Táwit Né Nonakènhkha Sahorihwakéthaʼte Ne Solomon

¹ Nó꞉nen ne Táwit skanórons arénheie, iahó꞉nonhke ne roiénha Solomon tánon tahá꞉wen nonakènkha karesharónhtsera:

² “Ónen ónhwe ne kawistáheks nakíheie. Sanikonhranirónhak tánon tashanikonhrakonhthaʼkwénhak,

³ tánon thóh nátser tsi nahó꞉ten ne Roiá꞉ner Saní꞉io enhiarihhónhten. Orihwaʼkwékon satewánhnarak ne rahohianerénhseras ó꞉ni ne rahorihwatátʼtseras, tsi nikahiatónhnions ne Mahís rahohianerenserákon, né káti ne kwáh tsikʼnonhwésons niáse tsi ensahianerásthen tsi nenhshá꞉tiere.

⁴ Tó꞉ka entsewénhnaraʼkwe, ne Roiá꞉ner enhatsénawasʼthe narahrátseras né rósons nó꞉nen sahatró꞉ri swatsiratátie enhonhtkórasʼthe Nisraerʼró꞉nonhke kwáh tsi nikaríhwes enhonthenhnikonhráren nahontewénhnaraʼkwe ne rahorihwatátʼtseras enhotirihwatoʼkénhake kwáh ronerhiasakwékon ó꞉ni rahonahthonnhetseraʼkwékon.

⁵ “Tánon shé꞉kon ó꞉ia nahó꞉ten. Sèhiaʼre tsi nahó꞉ten ne Joab tsi nihatiéraʼse tsi nisakononhwarhiákon ne tenihiáse Nisraerʼró꞉nons theʼnhiʼsenhnowánen ne Israerʼró꞉nons rahotiʼsohtár, Abner né roʼníha ne Ner tánon ne Amasa né꞉ne roʼníha ne Jether. Sèhiaʼre kén tsi ní꞉ioht tsi sakoséhton né skénnonhk thiʼkènhne né shiʼkaháwisʼkwe né tsi ahonsahatʼkárhiakʼthe né ronenhéions tsi nihotirihwakanonhníhon ne shiʼwaterí꞉ioʼkwe. Waʼshakononhwarhiakónhnion ne iáh othènen tehotiníkon ronhnónhkwe, tánon kíʼ ónenh í꞉i né sewaʼkatherihwaʼkéte tsi nihotséren tánon wakeronhiáken tsi niaʼtehioné꞉non.

⁶ Sateriéntare tsi nénhshieʼre; tó꞉sa tseríhon ne skénhnonk khók tsi ní꞉ioht tsi arénheie.

⁷ “Ók shé꞉nest ne kanoronhkwáhtsera tsi nòkwah ne Barzillai sakohiohokónhas né꞉ne Gilead nónhwe nithonénon tánon sehiathenhnikonhráren, tsioríhwa tsi nithotirihwaiérihkwe tsi nòkwah ní꞉i nó꞉nen shiʼwakatekwenhátsiesʼkwe tsi nòkwah ne tsaʼthatekénha Absalom.

⁸ “Tánon ó꞉ni ne Shimei né꞉ne roʼníha ne Gera, né nènhne ne tsi tkanáthaien ne Bahurim ne Benjamin nónhwe nithawénon. Tehiotenonhianíton tsi ní꞉ioht tsi wahatkenrenhserónhni ne tewenhniseráteʼkwe ne Mahanaim shahá꞉ke, ók shiaʼtsaʼtiatátken tsi kaniatarathátse ne Jordan, tahí꞉hion ne kwáh iorihwaníron akarahrátʼtsera rahosénhnakon ne Roiá꞉ner tsi kwáh iáh thahinonhwarhiákonhke.

⁹ Ók iáh kíʼ tehiówenk né kénk tsahonhsáre ne tó꞉sa othènen wahonwaréwaʼthe. Sateriénthare tsi nenhshié꞉re, tánon ónenk tsi né enshaterihwathéntsaʼte nahonwanonhwaʼrhiákon.”

Shaʼrénheie Ne Táwit

¹⁰ Táwit warénheie tánon Táwit rahonáthakon nónhwe wahonwahiatháta.

¹¹ Kaiéri niwáhsen nihiosehráke roʼnonhtíhiokwe Nisraerʼró꞉nonke, tsáta nihioseráke rotkorásthonhne ne Hebron nónhwe tánon asenhniwásen-ásen nihioseráke ne Jerusalem nónhwe.

¹² Solomon thonsahonakʼtháʼkwen ne roʼníha Táwit tsi rononhtí꞉iokwe, tánon ne rahononhtihiótsera ahoshastsʼténhsera kwáh íken tsi iorihwaníronhkwe tsi nikakwatakwènhne.

Sarénheie Ne Adonijah

¹³ Ethòne ne Adonijah, né꞉ne ronisthénha ne Haggith, wahotkénhsera ne Bathsheba, né꞉ne ronisthénha ne Solomon, “Ateró꞉sera kén íken tsi waskenataré꞉nahse?” Wakarihwanónhton.

¹⁴ Tánon iaháiesʼthe, “Knahótenk wá꞉tien nakonhrihwanónhtonhse.” “Nahó꞉ten káti?” wakarihwanónhton.

¹⁵ Waʼtharihwasehráko, “Sateriénhtharaʼkwe tsi í꞉i tehiothonhontsóhonhne nahonkatenonhtiʼióston tánon onhkwetaʼkwékon Nisraerʼró꞉nonke iakorihwanonhwéhonkwe. Ók kíʼ ó꞉ia nahá꞉wenhne, tánon iatiathatekénha wahononhtí꞉ione tsioríhwa tsi Roiá꞉ner et nihonikonhró꞉thenhne.

¹⁶ Káti ónenh énskak khók wá꞉tsien tsi nahó꞉ten akerihwanónhton; asatʼthontátʼtseke tó꞉sa takathonhníhas.” “Nahó꞉ten káti?” Bathsheba wakarihwanónhton.

¹⁷ Watharihwasehrákwahse, “Asatʼthontátʼtseke tserihwanónhtons ne Ronhnonhtí꞉io Solomon—wakateriéntare tsi iáh tahiathonhníhaʼse—nahatʼthónthaʼte í꞉i ahonshakheʼiéna ne Abishag, né꞉ne ken nitsakohiónha ne Shunem nitsakawénon, nahionhkeniʼniáke.”

¹⁸ “Kwáh íken tsi ioiánere,” watʼkarihwasehráko. “Tenhiakenithárenh kíʼ ne ronhnonhtí꞉io ne sarihwáke.”

¹⁹ Sók kíʼ ne Bathsheba ronhnonhtí꞉ioke niaháhe ne tanitháren ne Adonijah rahorihwáke. Ne ronhnonhtí꞉io wathátaʼne tsi wateshakonónhweron ne ronisténha tánon wathatʼtsákete nakohénton. Ethòne kíʼ sahá꞉tsien ne rahonitskwáhrane tánon wahathénnahne nó꞉ia ahontahonhnitsʼkwahraʼserénhaʼwe né saweienhthethákwen nòkwahti ahonhnitskwáhren.

²⁰ Wakénron, “Nihiorihwá꞉a wá꞉tien nakonhrihwanónhtonhse; tó꞉sa kíʼ takathonhníhas.” “Nahó꞉ten káti, isthénha?” waharihwanónhton. “Iáh kíʼ takonhiatonhníhaʼse.”

²¹ Watʼkarihwasehráko, “Tserihon ne tsathatekénha Adonijah iashakohiathénhaʼwe ne Abishag nahotíniaʼke.”

²² “Nonhtséren tsi takerihwanonhtónhnis ne Abishag rahónha ahihionhkwéton?” ne ronhnonhtí꞉io waharihwanónhton. “Saʼtehiohiánere kíʼ naskerihwanónhtonse nahihianitskwaráhtseron ó꞉ni. Ethohʼsáne, iatsiathatekénha íken, tánon ne Abiathar ne ratsihénstatsi ó꞉ni ne Joab rahiatákʼtha níʼthakwe!”

²³ Ethòne ne Solomon kwáh íken tsi iorihwaníron tsi ní꞉ioht tsi waharihwaníraʼte rahosénhnakon ne Roiá꞉ner, “Aiáwens ne Rawenni꞉io ahátsienhthe nakíheie tó꞉ka iáh thahiʼhiónhnien ne Adonijah tsi rónhnhe ahakárhiakʼte tsi rakerihwanonhtónhnis kí꞉ken!

²⁴ Né Roiá꞉ner kwáh kí íken tsi iorihwaníron tsi nihakerihwaʼsehronhniénhni né rakeʼníha Táwit rahonitskwáhraʼne; rotsenawásthon tsi nihorahrátsʼton tánon thaʼkáwi ne kanonhtiʼiótsera ó꞉ni tsi nienkatwatsiríhne. Wakerihwaníraʼte ne tsi rónnhe ne Roiá꞉ner nètho Adonijah tsi kwáh ónhwa wenhniseráte enhrénheie!”

²⁵ Káti ne Ronhnonhtí꞉io Solomon Benaiah wahó꞉nahne, iahahiákenhne tánon wahononhwariákon ne Adonijah.

Ne Abiathar Sahonwanakerákwahthe Tánon Tsi Warénheie Ne Joab

²⁶ Ethòne ónen ne Ronhnonhtí꞉io Solomon wahawénhase ne Abiathar né꞉ne ratsihénstatsi íken, “Wáhs sanakerasehrákon nionhsáse ne Anathoth nónhwe. Tesathénhtion nasí꞉heʼie, ók iáh kíʼ ónenk thaʼkathénhnaʼne nahiesanonhwarhiákon, Asèken tsioríhwa tsi í꞉se senikonhrárahkwe ne Roiá꞉ner rahonerókwah naʼterihwasehronhniátsera í꞉wa tsi nikaríhwes senikwekónhne ne rakeʼníha Táwit, tánon etʼtsénawaʼse akwékon ne rahoronhiakénhsera.”

²⁷ Ethòne kíʼ ónen ne Solomon sahorihontháko ne Abiathar tsi Roiá꞉ner rahotsihénsthatsi íken, tánon ne warónhniaʼthe né tó꞉kenske ahónhton tsi nahó꞉ten ne Roiá꞉ner tháwen ne Shiloh nónhwe tsi nòkwah ne Eli rahowátsires.

²⁸ Ne Joab waharihwáronhke tsi nahá꞉wenhne. (Asèken Adonijah né thotsʼwanónhnaʼkwe, ók iáh nènhne ne Absalom.) Sók kíʼ thóh niahatáke tsi tewató꞉sehrote tsi thénhteron ne Roiá꞉ner tánon thóh wahaienásehron tsi tekahiósaiens ne ietsienharákwake.

²⁹ Nó꞉nen shiahonhterihwíheʼwe tsi thénhteron ne Ronhnonhtí꞉io Solomon nètho Joab et niehotatkhenon tsi tewató꞉serothe tánon ákta í꞉res ne ientienharakwake, Solomon iahoterihwaniénthe ne Joab nahorihwanónhtonhse nonhtséren tsi ientienhará꞉kwahke niahatátkhe. Ne Joab watharihwasehráko tsi thénhteron ne Roiá꞉ner niahatátkhe tsioríhwa tsi rotʼtsánis ne Solomon. Káti ne Ronhnonhtí꞉io Solomon Benaiah iahothénieʼte nahononhwarhiákon ne Joab.

³⁰ Ne Benaiah tsi tewató꞉sehrothe niaháre tsi nónhwe thénhteron ne Roiá꞉ner tánon wahawénhaʼse ne Joab, “Né ronhnonhtí꞉io ratróris tahonthashiákenhne.” “Iáh,” Tsiwatharihwasehráko ne Joab. “Kénʼen enkíheʼie.” Ne Benaiah ronhnontí꞉ioke nionhsáre tánon wahoró꞉ri tsi nahó꞉ten wahénron ne Joab.

³¹ “Tó꞉ki nátier tsi niháton ne Joab,” tsi watharihwasehráko ne Solomon. “Tsenonhwarhiákon tánon tsiatháta. Ethòne kíʼ ní꞉i tánon nakorénhsons ne Táwit rahowátsires tsi iáh thaʼhonsahiakwahterihwakéthaʼte tsi nahó꞉iere ne Joab nó꞉nen sahononhwarhiákon ne iáh othènen tehoníkon ronhkwekénhʼen.

³² Ne Roiá꞉ner kwáh enhoréwaʼthe ne Joab nètho sewaterihwaʼthewáthons, tsi ehʼnihoiéren né tsi kwáh iáh othènen tehoteriénhtaraʼkwe ne rakeʼníha. Ne Joab tenihiáse tenón꞉kwe sakononhwarhiákon né꞉ne Abner, né rasenhnowanénhne ne Israerʼró꞉nons ahonkwetaʼsónha ne sóh꞉tar, tánon ne Amasa, né nènhne ne Judah ahonkwetakénʼen ne rasenhnowanènhne tsi nòkwah ne ratisóh꞉tar. Kwáh iáh othènen tehotiníkon tánon sénha roʼnónha tionhkwetaʼiérisʼkwe tsi ní꞉ioht ne rahónha:

³³ Né karewathátsera ne sewaterihwaʼtewáthon rahónha enhó꞉raʼne tánon tsi nienhatwatsiríne né꞉ne tsi nénhwe enkénhake. Ók ne Roiá꞉ner kwáh kíʼ nènhʼne tiókonhte tsi enteshakáwen nahotihianerásthen ne Táwit rahowátsires nenhónhtsen ne rahonitskwáhraʼne.”

³⁴ Sók kíʼ ne Benaiah tsi tewató꞉sehrothe niaháre tsi thénhteron ne Roiá꞉ner tánon wahononhwarhiákon ne Joab, tánon tsi thaʼnákere nónhwe nahonwahiatháta nekahéntake íken.

³⁵ Né ronhnontí꞉io Benaiah ohénton iathonhsahó꞉tasʼthe tsi ratitsiókwahien ne sóhtar né꞉ne Joab rahonatʼthakénʼen tánon Zadok né꞉ne ratsihénstatsi íken né nenhʼné꞉ʼe thonsahonatkʼthákwen né Abiathar.

Shaʼrénheʼie Ne Shimei

³⁶ Ethòne ó꞉nen ne ronhnonhtí꞉io Shimei iahó꞉nonhke tánon wahawénhaʼse, “Shaʼthatenonhshónhnien kénʼen nónhwe Jerusalem. Thóh tsiʼterónhtak tánon tó꞉sa éhʼren sáset ne kanatowanénhke.

³⁷ Tó꞉ka éhren énhsehte tánon hiasató꞉hetste ne Kidron Kahionhatátse, kwáh kíʼ orihwiʼiohónhwe tsi ensíheʼie—tánon iateshiá꞉ti kíʼ tsi ensaterihwaʼhés꞉then.”

³⁸ “Kwáh íken tsi ioiánere, Sanonhtí꞉io,” ne Shimei watarihwasehráko. “Thóh kíʼ nénhtiere tsi nisáton.” Káti karíhwes Jerusalem nónhwe nihanákereʼkwe.

³⁹ Áhsen nihioseráke ohnakènhke, tsi nihiótha, tenihiáse ne Shimei rahonhátseras né꞉ne Achish tánon ne Maacah wanhiniákenhne tsi thénhteron ne ronhnonhtí꞉io ne Gath nónhwe niaháne. Nónen ne Shimei saharihwáronhke tsi Gath nónhwe niehonénon,

⁴⁰ wahokweʼniáren ne rahotshénen tewahóntes tánon tsi thénteron ne Ronhnontí꞉io Achish niaháre né Gath nónhwe, nahonshaʼsakohiatatʼtsénhri ne rahonhátseras. Shaʼsakohiatatʼtsénhri káti tánon tsi thohʼnónhsohʼte hionhsasháaʼkohiathénhaʼwe

⁴¹ Nó꞉nen ne Solomon saharihwáronhke tsi nahá꞉tsere ne Shimei,

⁴² iahó꞉nonhke tánon wahawénhase, “Kohionhniénhni tsi sarihwaniráton nahosénhnakon ne Roiá꞉ner tsi iáhéhren thá꞉sehte ne Jerusalem. Tánon káti konhthokaténhni tó꞉ka nonhwénhton thóh nénhshiere, kwáh oriwiʼiohónwe tsi enshí꞉heʼie. Iáh kén thóh tèhiot tsi sarihwanonhwéhon tánon í꞉sen tsi kwáh enskewénhnaraʼkwe?

⁴³ Ónh nonhtséren, káti, tsi wathé꞉shake tsi nisarahrátston tánon waʼshatewenhnónhti nakerihwatátʼtsera?

⁴⁴ Kwáh toʼkénʼen tsi akwékon sateriéntare ne wahét꞉kens tsi nitserá꞉se ne rakeʼníha Táwit. Káti ne Roiá꞉ner kwáh né enkarihónhni tsi enhiaréwaʼthe.

⁴⁵ Ók kíʼ ní꞉i kwáh kíʼ enhatsatatérisʼthe, tánon né enrónhniaʼthe ne Táwit rahononhtiʼiótsera tsi kwáh enhanónsthate tsi nénhwe enkénhake.”

⁴⁶ Ethòne kíʼ ne ronhnonhtí꞉io wahó꞉nahne ne Benaiah, iahá꞉re tánon wahononhwarhiákon ne Shimei. Ó꞉nenh kíʼ ne Solomon kwáh hiatehahiáti tsi roʼterihwatsʼteríston.