1 Kings 19 - Ohiatonhseratokénti

Né Elijah Tsi Tsionón꞉te Ne Sinai Ié꞉res

¹ Ronhnón꞉tiio Ahab wasakoró꞉ri ne tení꞉teron Jezebel orihwaʼkwékon tsi nihotséren ne Elijah tánon tsi ní꞉ioht tsi ratikwékon sakononhwarhiakónhnions ne rotitókense ne Baal nónhwe.

² Nahónha iahoterihwaniéthase ne Elijah: “Aiáwens ne ratiní꞉ios ahiónhtienʼte nakíheʼie thóh nakaháwike nenhiórenhne tsi nónhwa nihiowistáhe né iáh thóh thaʼkonhierásere tsi né niseiérase ne rothithokenhséhakwe.”

³ Né Elijah wahoteronhiénhthen tánon wahatèko nahanónsthathe tsi rónnhe; iahohiathénhaʼwe ne rahonhátsera tánon Beersheba niaháre né꞉ne Judah nónhwe. Tánon thóh wahótʼkawe ne rahonhátsera,

⁴ né Elijah konhthatsekówa watatʼtháhakwe karákon niaháre. Watháʼtaʼne tánon tsi iorakwahwéron ne karonhtó꞉kon wahá꞉tsien tánon wahaská꞉neke narénheie. “Sóh꞉tsi wéso, Saiá꞉ner,” tsi wahaterénhnaien. “Iahá꞉saf né tsi kónhnhe; kwáh satehiohiánere nakíheie!”

⁵ Karonhthó꞉kon wahatsatiónhnite tánon iahó꞉taʼwe. Thonʼtaiawénhstsi raronhiakeró꞉non iahoiéna tánon wahénron, “Satkétsko tánon tesatskáhon.”

⁶ Watatʼkathónhnionhwe tánon skanátara wahatkátho tánon skawísa onékanos ranonhtsistákʼtha ká꞉ien. Watatskáhon ó꞉ni wahanekíra, tánon shé꞉kon kíʼ sahatsatiónhnite.

⁷ Né Roiá꞉ner rahoronhiakerónon thonʼtháre tánon né꞉ne tekeníhaton sahóiethe, rathónhnions, “Satʼkétsko tánon tesatskáhon, né tsi nienhsatʼthahí꞉ne nonhtsérenk enshathakenhró꞉kwahse.”

⁸ Né Elijah wahatkétsko, watatskáhon tánon wahanekíra, tánon ne ká꞉khwa iatekaiéri tsi nahoshastsʼténhseron ne tahatʼtháhakwe né kaiéri niwásenh nónhta nikaríhwes nihiohá꞉hes ne Sinai nieʼiawénon, ne ononthathokentíke.

⁹ Thóh nónhwe osónhwakon iahátsnente thoʼnónhwe nahasonhtí꞉iake. Thonhtaiawénhstsi ne Roiá꞉ner rahoronhiakeʼró꞉non wahotháraʼse, “Elijah, onhʼnishatséra né kénʼen?”

¹⁰ Watharihwaseráko, “Saiá꞉ner Sewenhnní꞉io Shaʼshastsʼtenserowánen, kwáh tiotʼkonhónwe tsi í꞉se konhióthense—shonháha khók. Ók kíʼ nonhkweshón꞉as Nisraerʼró꞉nonke wathatíhiake né rahonaterihwaseronhniátsera né sewá꞉shon, rotiríhshion né sáwenk ietsienharákwahs, tánon ratikwékon sakotinonhwarhiakónhnion ne shón꞉kwe tasónhas rotithokenséhakwe. Í꞉i khók iaʼtesewakathathénhron—tánon kíʼ ronhtheniéntha nahionhkenonhwarhiákon!”

¹¹ “Wáhs kíʼ iatsá꞉ken tánon akʼkénhton téstan nononhthakénhiate,” ne Roiá꞉ner wahawénhase. Ethòne ne Roiá꞉ner et wahathóhetsthe tánon iowerasátsthe tahathénieʼthe né watʼkanonhthóresthe tánon waʼtewathenenhiaréni—ók kíʼ né Roiá꞉ner iáh éhtho théres ne tsi iahó꞉the. Watʼkháthaʼne tsi tehioweratháse, tánon ethòne kíʼ thonsahiahontsíʼsonhkwe nónhwa—ók kíʼ né Roiá꞉ner iáh kíʼ éhtho thé꞉res tsi tehiahontsisón꞉hkwah.

¹² Shonhtó꞉hetsthe tsi tehiahontsiʼsónhkwah ótsire nónhwa sonhthothási—ók kíʼ né Roiá꞉ner iáh kíʼ éhtho thé꞉res tsi iothé꞉kha. Tánon shonthóhetsthe nó꞉tsire kénk nitiót꞉the tehiakotiénhon tsi iakóthaʼre.

¹³ Nó꞉nen ne Elijah sahothónteʼne, rahotsáthawi wakóses wahatʼkonhsashé꞉thakwe tánon iahahiákenhne tánon thóh iathátaʼne tsi iehionhthawehiathákwah ne osónhwakon. Owénhna wahawénhase, “Elijah, onh niʼtsatiéra ne kénʼen?”

¹⁴ Watharihwaseráko, “Saiá꞉ner Sewenní꞉io Sashastsʼtenseroʼwánen, kwáh tiotʼkonhónwe tsi í꞉se konhióthenhse—kwáh sonhá꞉ha khók. Ók kíʼ nonhkweshón꞉ʼas nisraerʼró꞉nonke wathatíhiake ne rahonaterihwaseronhniátsera tsi nòkwah ní꞉se, wahatirihshiónhko ne tsi tienharákwahs, tánon ratikwékon sakotinonwarhiakónhnion ne shonkwetaʼshónhas rotithokenséhakwe. Kwáh kíʼ akonháha khók iatesewakhathathénron—tánon kíʼ ronhthenhniéntha nahionkenonwarhiákon.”

¹⁵ Né Roiá꞉ner wahénron, “Karákon nionhsáse ákta ne Damascus, ethòne iasenatháran tánon iatsató꞉kast ne Hazael tsi rononhtí꞉io í꞉ken ne Syrianke;

¹⁶ Tsató꞉kast né Jehu né꞉ne roʼníha ne Nimshi né꞉ne ronhnontí꞉io Nisraerʼró꞉nonke, tánon tsató꞉kast nònhne ne Elisha né꞉ne roʼníha ne Shaphat né Abel Meholah nónhwe nihanákere né꞉ne teshianakthákwen tsi satokenséhakwe.

¹⁷ Nónhka ahiontèko né tó꞉sa ashakononhwarhiákon ne Hazael kwáh kíʼ nènhne Jehu enshakononhwarhiákon, tánon ónhka ahionhteko ne tó꞉sa ne Jehu ashá꞉kononhwarhiakon kwáh ki nènhne Elisha enshá꞉kononhwarhiakon.

¹⁸ Kwáh kíʼ ó꞉ni tsáta tewenhniawehetserásen nihionkwétakes iathenhwákenre nahiakónhnheke Nisraerʼró꞉nonke—né꞉ne tsi nikáien né rotirihwató꞉ken nakonháke tánon iáh thaʼtekonwathentʼtsotháni ne Baal khés ne tahotinonronhkwáhnionke ne rahohiatónhni.”

Tsi Nahonwanáton Ne Elisha

¹⁹ Né Elijah é꞉ren sàreʼthe né nónhwe, tánon iahohiatatʼtsénhri ne Elisha renhtharakharátʼthos tsohiána tehiotinákares tsionóns꞉kwahron iothihiathénhton; énska-iawénhre nihioiánakhes ohénton wahothitarakaratʼthonhátse, tánon rahón꞉ha ne oná꞉ken nihotharakharatʼthonhátse. Né Elijah wahatsathawithási ne wakóses rotsathawíton tánon Elisha sahohiatháwithe.

²⁰ Ethòne ne Elisha ehʼiékeneʼthe ne tehiotinákares, Elijah wahó꞉sere, tánon wahénron, “Takeríhon niáreʼkwe iatesetʼkhenoronhkwáhnion ne rakeʼníha ó꞉ni nakenisténha tsi kaʼthenhtiónhen, tánon ki ethòne entsítheʼne.” Elijah watharihwaseráko, “Thoʼniʼiáwenh, wáhsʼkiʼ thóh nionhshá꞉se. Iáh tekonhné꞉se!”

²¹ Ethòne ne Elisha thóh nionhsáre tsítʼnethe né raotshénen tehotinákares, tánon washakononhwarhiákon, tánon wahawarárihthe, né wárasthe ne iatsienhtaniáktha tsi wahatekathakwe. Nówaron onhkweshón꞉a nènhne washakowaránonhthe, tánon wahónʼneke. Ethòne ó꞉nen Elijah hionhsahó꞉sere nahosniénon.