1 Kings 18 - Ohiatonhseratokénti

Elijah Tánon Ne Rothithókenhse Né Baal Nónhwe Nihanákere

¹ Kwáh thóh tsi nióre onakènhke, né nasénhaton sihioserakehátse shiʼiahonwenhtsatʼtháton, ne Roiá꞉ner wahawénhase ne Elijah, “Wáhs tánon Ronhnonhtí꞉ioke Ahab niaháse, tánon okenhnorésera entkathénieʼthe.”

² Káti ne Elijah thóh niahá꞉re. Nathonkarhiákon ne Samaria nónhwe ónenh kwáh tsononkwísen iotónhon,

³ káti ne Ahab Obadiah iahó꞉nonhke, tsi rahónha ranikonhrárahkwe tsi kanónhshoʼthe ne kanonhtiʼiotserákon. (Né Obadiah kwáh íken tsi thaʼwethákwenhne tsi rosénhnaiensʼkwe ne Roiá꞉ner,

⁴ tánon nó꞉nen ne Jezebel sihononhwarhiákonsʼkwe ne Roiá꞉ner rahonkwéta rothokenséhaʼkwe, né Obadiah enskatewenhniáwe niháti iashakohiathénhawe, osthenrokónhsons waʼsakohiathasethánion tekenhtsókwahkes washakotsiokónhni wísks-niwásenh nihá꞉ti ne skenhtsiókwah, tánon waʼshakonónhthen ó꞉ni wasakonekánonhte.)

⁵ Né Ahab wahawénhase ne Obadiah, “Ánion thóh iétewe tewatʼkénhsera kwáh tsi niaʼtekahiónhake ó꞉ni ne kahionhathátse ne tsi wathonhontsáien nahitewatʼkátho tó꞉ka kén iaʼtekaiéri tsi níkon ahíitewahontatʼtsénhri naʼiehthihiateweiénthon ne kosáthens tánon ne tewahóntes nahonhnónnetsthe. Tó꞉ka nónhwa iáh thaʼtehiothonhontsóhon né skahiátha aietʼthinonhwarhiákon nonhkwahtsenenhókons.”

⁶ Iathotirihwaiénthaʼse kanón꞉we nihohontsakwénhrare né skenhtsókwah enhóntkenhse, tánon ákte niathónhne.

⁷ Tsi nonthahatʼthahí꞉neʼne Obadiah, thontaʼiawénhstsi Elijah waʼthiáteraʼne. Wahoiénhthereʼne, rahohénton watatʼtsákete, tánon wahorihwanónhtonhse, “Kwáh kén í꞉se shiénshe?”

⁸ “Hen, Í꞉i ne Elijah,” watharihwasehráko. “Wáhs kíʼ iatsró꞉ri ne hiáʼnhas ronhnontí꞉io tsi kénʼen í꞉khés.”

⁹ Obadiah watharihwasehráko, “Onh nih wakatiéren tsi teshathonhontsóni asetʼtherónhkwen nahakenonhwariákon ne Ronhnontí꞉io Ahab?

¹⁰ Né tsi nironnhehónwe ne Roiá꞉ner, Saní꞉io, Kerihwanírats nètho ronhnón꞉tio tsi iahiathisákon kwáh tsi niaʼtekanakerasehráke tsi ionhontsáte. Nónen ne rakóra ne tsi kanakerasehráien rót꞉rori tsi iáh rahonakerasehrákon thé꞉ses, ne Ahab enhorihwanónhtonhse ne rakóra naharihwánerate tsi iáh taieshahiatatʼtsénri.

¹¹ Tánon kíʼ ónenh í꞉sere thóh hiáke nahiróri tsi kénʼen íh꞉ses?

¹² Onh né nenhiáwenhne tó꞉ka ne Raonikónra ne Rawenni꞉io kák nónhwe ákthe nónhwe niahiaiathénhawe kwáh tsi niʼiosthóre é꞉ren énhkethe ne kénʼen? Ethòne, nónen enhiʼró꞉rihke ne Ahab tsi kénʼen í꞉h꞉ses tánon iáh thahakwéni nahiaoiatatʼtsénhri, kwáh kíʼ enhakenonhwarhiákon. Sehiárak tsi kwáh wakerihwató꞉ken tsi niʼihsénhnaiens ne Roiá꞉ner né꞉ne kwáh shiʼkekʼsáha kènhʼne.

¹³ Iáh kén tesarihwáronhke nètho nó꞉nen ne Jezebel shiʼhiakononhwarhiakónhnionsʼkwe ne rothitokenhséhakwe ne Roiá꞉ner rahonkwetashón꞉ʼas kènhne énska tewenhniáwe niháti tsi iosthenrakarónhtons nónhwe nikhehiathasethánion, tehothitsiókwahkes wískʼson-niwásen niháti ne shothitsókwahs, tánon thaʼkhehiatkáwaʼse ne ká꞉khwa ó꞉ni noné꞉kanos?

¹⁴ Onh káti ní꞉ioht tsi askená꞉ne thóh iáke tánon nahiróri ne ronhnonhtí꞉io tsi kénʼen íh꞉ses? Kwáh kíʼ enhakenonwarhiákon!”

¹⁵ Né Elijah watharihwaseráko, “Tsi nironnhehónwe ne Roiá꞉ner Roshaststenhseró꞉waʼne, tsi nikáien rihióthenhse, Kerihwanírats tsi kwáh í꞉i thóh iénhke tsi thénhteron ne ronhnonhtí꞉io nónhwa wenhniseráte.”

¹⁶ Káti ne Obadiah Ronhnontí꞉ioke Ahab kíʼ niahá꞉re tánon wahó꞉rori, tánon ne Ahab tahathénhti ne tahiatátken ne Elijah.

¹⁷ Nónen ne Ahab sahó꞉ken ne Elijah, wahénron, “Káti kwáh í꞉se íken—íh꞉se thiʼsonháha testsirónhnis Nisraerʼró꞉nonke!”

¹⁸ “Iáh í꞉i tetʼtsirónhnis thèken,” ne Elijah watharihwaseráko. “Kwáh íh꞉se—í꞉se tánon ne iaʼníha. Iáh thesathewenhnarákwah ne Roiá꞉ner rahorihwatátʼtseras tánon né tshénhnaiens ne kahiatónhni Baal.

¹⁹ Ónen káti onhkwetaʼkwékon shehiatharó꞉rok né tahiakwahtátken tsi Tsonónhte ne Carmel. Thaʼsehiathénhaf thíken 450 niháti rothitókense né Baal ahonkwetashónhas tánon ne 400 niháti rothitókense né kahiatónhni Asherah ahonkwetashón꞉ʼas né꞉ne roʼnónha tsakótsʼwanonhne ne Iononhtí꞉io Jezebel.”

²⁰ Káti ne Ahab ratikwékon iashakónonhke Israerʼró꞉nons ó꞉ni ne rothitó꞉kense ne Baal nónhwe ne tahontátʼken tsi Ionón꞉te ne Carmel.

²¹ Né Elijah ónhkwe tsi rónhnes niahá꞉re tánon wasakawénhase, “Tóh shé꞉kon nikaríhwes ne iathahiʼsewarihwaiénthaʼse? Tó꞉ka ne Roiá꞉ner rahónha Ní꞉io í꞉ken, tsi sewasénhnaien kíʼ; ók tó꞉ka Baal Ní꞉io íken, né kíʼ sewasénhnaien!” Ók kíʼ nonhkweshón꞉as iáh ne tsowénhna thènhnen thehó꞉nen.

²² Ethòne ne Elijah wahénron, “kwáh í꞉i khók iatesewakathathénron ne rotó꞉kense ne Roiá꞉ner rahonkwéta í꞉ken, ók kíʼ 450 niháti ne rotitó꞉kense ratítheron ne Baal nónhwe.

²³ Tenihiáse tèro taietʼtsihiaténhaf; tánon kíʼ ne rotitó꞉kense ne Baal saiáta iehonwahiathénhaf, ronhwanonhwarhiákon, ronhwátsof, tánon oienhtháke ratíren—ók tó꞉sa kíʼ sewatsiró꞉ten. Ók kwáh kíʼ nonhní꞉i thóh nenhtiéren ne saiáta tèro.

²⁴ Ethòne kíʼ ne rotitó꞉kense ne Baal iehonterénhnaien rahonháke ne rahó꞉tiní꞉io, tánon kíʼ ní꞉i ienkaterénhnaien rahonháke ne Roiá꞉ner, tánon tsi nikáien ne thenharihwaseráko tsi enthaténieʼthe nó꞉tsire—rahónha kíʼ ne Ní꞉io í꞉ken.” Nonkweshónha wathotihénrethe tsi nahatirihwanónhweʼne.

²⁵ Ethòne kíʼ ne Elijah washakawénhase né rotitó꞉kense ne Baal, “Né tsi nisewenhtsokowánen, í꞉se tasehwatsérent iatsisewahiathénhaf ne tèro tánon sewakwahtháko. Iasewaterénhnaien rahonháke ne sewaní꞉io íken, ók tó꞉sa kíʼ sewatsiró꞉then nó꞉ienhthe.”

²⁶ Iahonwahiathénhawe ne té꞉ro ne tahonwénhnon, wahathikwahtháko, tánon rahonháke ne Baal wahonterénhnaien tsi nióre ne entseʼsiskaháwiʼkwe. Wathothihénrethe, “Teskwahrihwaserákwas, Baal!” tánon thóh tikonhthákwen tehothinonhniákwen tehonakwahtháse ne tsi ietsienharákwahke ne rothíson. Ók iáh kíʼ thènen taʼthehonaʼterihwaserakwénhni.

²⁷ Né éntse shiʼkaháwi ne Elijah tahatháshawen thashakoiéron: “Sénha tasewakwísron tsi sewatherénhnaien! Rahónha seʼwá꞉wi ne ní꞉io íken! Tó꞉ka senónhwa thihothenhniseratétʼtshens khés né ástste iehawénon, khés tó꞉ka nónhwa roʼthonwehiathánon! Khés ne ró꞉tas, tánon kíʼ ónenk tsi entsisewáiehthe!”

²⁸ Káti ne rotitókense sénha tahonkwísron tsi ronaterénhnaien tánon wahontatreniánion ásare wáhonsthe tánon ne iotsiwehionthoʼtí꞉ie, né tsohianénhas né rahotirihwakahionhné꞉tsera, tsi nióre knakʼkanekwenshó꞉then.

²⁹ Iahonthashón꞉theren kanakwahtserákon tánon tsiatehotihenré꞉tha tsi nióre né satewenhniseríhen ne shiʼhiothohetsthonʼnénhtse; ók iáh kíʼ othènen thaʼtekarihwaserakwenhátse, iáh thaʼhóthen tehonatʼthonthéhon.

³⁰ Ethòne ó꞉nen ne Elijah washakawénhase nonhkweshón꞉as, “Káts tsiaʼtákʼtha nonhthásewe,” tánon kíʼ rathikwékon rahiatákʼta wahonteró꞉rohke. Tahathásawen nahonsahakwahtháko ne rahotsienharákwah ne Roiá꞉ner né꞉ne kaʼríhshion.

³¹ Tekeni-iawénhre nikanénhiakes wát꞉rakwe, né skanenhiátʼtsons né꞉ne shoʼtitsokwátʼtsons né tekeniʼiawénhre nihotiʼtsókwahkes né꞉ne ronhwathisenhnáwi ne Jacob sakohiohokónhas, né nètho rónhkwe tsi nikáien ne Rawenni꞉io riʼsenhnáwi Israel.

³² Né níkens onenhiasónhas né sharónhniaʼthe ne ientsienharákwa tsi ahonwasenhnaienthákwahke ne Roiá꞉ner. Waʼthakwahthásete watronhtsiákon, iatekaiéri tsi nahasónhwetsthe ne kaiéri nikaweró꞉kwahke ahontnekátha.

³³ Ethòne ónenh é꞉neken tahaientharónhnion ne ietsienharákwahke, wahotsóhnion ne té꞉ro, tánon thóh é꞉neken noiéntake tahawahrarónhnion. Wahénron, “Kaiéri nikatséthakes sewanekananónhkon tánon thóh tasewáweron né iewatkáwen tánon noiénthakes.” Thóh kíʼ nahatí꞉iere,

³⁴ tánon wahénron, “Shé꞉kon thóh nonhsaseʼwáier”—tánon kíʼ thóh nonhsahatí꞉iere. “Ské꞉kon énska iesewáteratsʼte,” wahénron—thóh kíʼ nonhsahatí꞉iere.

³⁵ Nonékanos watkanawénhthe aktónhtse ne ietsienharákwahke tánon wakasónhwine ne tsi tehiahontsákon.

³⁶ Tánon tsi niakahé꞉we tsi nihioterihwíson, ne Elijah né rothó꞉kenhse íken ákta niaháre ne ietseharákwahke tánon wahaterénhnaien, “O Saiá꞉ner, tsheNí꞉io ne Abraham, Isaac, tánon ne Jacob, ónen kíʼ serihwanírat tsi í꞉se Shé꞉wenhnní꞉io Nisraerʼró꞉nonke tánon í꞉i ne sanhátsera íken tánon akwékon kí꞉ken thóh nátiere tsi nisarihwatháton.

³⁷ Teskerihwaserákwas, Saiá꞉ner, teskerihwaserákwas, né káti kí꞉ken onhkweshón꞉as kwáh enhonateriénhtaraʼne tsi í꞉se, ne Saiá꞉ner í꞉ken, ó꞉ni Sewenní꞉io í꞉ken tánon kíʼ shonháke nathontasehiathenhenhátie.”

³⁸ Né Roiá꞉ner ótsire ehtàke tahathénieʼte, tánon onhtsahá꞉the ne nahonteskónhthake, ó꞉ni nó꞉ienthe, tánon nonénhias, ohontsaʼtektánion wakastátʼthaʼte noné꞉kanos ne tsi teiahontsakonhátse.

³⁹ Nó꞉nen nonkweshónhas sahontkátho kí꞉ken, ohontsáke wahonthatsatónhti tánon waʼthothihénreʼte, “Ne Roiá꞉ner séh ne Ní꞉io í꞉ken; né꞉ne Roiá꞉ner rahonhatsíwa Ní꞉io í꞉ken!”

⁴⁰ Né Elijah wahathénhnaʼne, “Ietsiʼiéna ne rothithó꞉kense ne Baal; tó꞉sa ónhka ietsiríhon nahonsahonthèko!” Nónhkweshón꞉as rathikwékon wahonwatiʼiéna, tánon ne Elijah iashakosárihne tsitʼkahionhathátse ne Kishon tánon washakononhwarhiákon.

Tsi Iahontók꞉then Tsi Nihiahontsátʼthen

⁴¹ Ethòne ne Elijah wahawénhase ne Ronhnonhtí꞉io Ahab, “Ónenh kíʼ, wáhs tánon tesatsʼkáhon. Wakatʼthónthe tsi nonhthahiorákare nokenhnorésehra.”

⁴² Tsi nikaríhwes ne Ahab tehotskahónʼnon, Né Elijah tsi tsonón꞉the ne Carmel iahanontáraʼne, thóh nónhwe ohontsáke watatʼtsákete, né ranontsíne tsi naʼtehakwitsátere nónhwe í꞉ken.

⁴³ Wahawénhase ne rahonhátsera, “Wáhs tánon kaniatarakeʼkówa iathesatʼkáneren.” Né ranhátsera thóh niaháre tánon thontáre, rathónhnions, “Iáh thaʼhóthen tewakatʼkáton.” Tsáta nihioríhwa ne Elijah wahoró꞉ri ne thóh iá꞉re niahakenhénhion

⁴⁴ Né tsathakháton shathontáre tánon wahénron, “Wakatʼkátho kénk niwatsátha iáh sénha tekowáne tsi ní꞉ioht ne rónhkwe ratsaná꞉ke, tahiotheskonhkonhátse ne kaniatarakeʼkówaʼne.” Né Elijah wahó꞉nhane ne rahonhátsera, “Wáhs tsró꞉ri ne Ronhnonhtí꞉io Ahab rahoseréthakon notsónhkwah shatítha tánon shathénhti nohénton nokenhnorésera tahótasthe.”

⁴⁵ Kénk nikaríhwes sók né tsi karonhiáte né wakaró꞉roksthe ne tehiotsiathakéras, thontásawen takaweratháse, tánon ioshástste tsi ní꞉ioht tsi wahokénhnore. Né Ahab rahoseréthakon notsónkwah sahathítha tánon tahatháshawen Jezreel nionhsáre.

⁴⁶ Né rahoshaststénsera ne Roiá꞉ner wahó꞉rahne ne Elijah; né rahotserónhniat wahanírathe ne tsi wathakwahtásehthe ne rashionhón꞉take tánon ohénton niaháthake tsi rohonwísere ne Ahab kwáh tsi nióre ne Jezreel.