1 Kings 17 - OhiatonhseratokéntiElijah Tánon Ne Iahonwenhtsátʼthen 1 Né rotó꞉kense Elijah ronhwáiasts, né꞉ne Tishbe nónhwe nihanákere né꞉ne Gilead ahonhtonhwenhtsáke, wahawénhase ne Ronhnonhtí꞉io Ahab, “Raosénhnakon ne Roiá꞉ner, né ronhnhehónwe sako Ní꞉io Nisraerʼró꞉nonke, tsi nikáien rihióthenhse, Wakonhróri tsi kwáh iáh tahonsahioháweʼiaste khés nahiokénhnore né꞉ne tékeni khés násenh nihioseráke nikaríhwes tsi nióre ienskíronh thóh nahonsahiáwenhne.” 2 Ethòne ne Roiá꞉ner wahawénhase ne Elijah, 3 “É꞉ren í꞉set ne kénʼen nónhwe tánon nàkon nòkwah niaháse tánon shaʼtasethána ákta ne Cherith Kahionhathátse, nàkon nòkwah ne Jordan. 4 Né kahionhathátse né ensnekiráthaʼkwe, tánon wakherihónhthen ne tsokaʼwekó꞉wa nahonthaieshakwahawíthen né nónhwe.” 5 Né Elijah wahatewénhnarakwe ne Roiá꞉ner rahorihwatátʼtsera, tánon thóh nónhwe niahá꞉re tsi kahionhatátse ne Cherith. 6 Né wahanekirátʼthe ne kahionhathátse, tánon tsokaʼwekó꞉wahs tahonwanatarenhawíthen ó꞉ni oʼwáron kwáh niaʼtehioronkhetseráke ó꞉ni iatehiokaratseráke. 7 Kénk nikaríhwes ne kahionhathátse onsʼtátʼthen tsioríhwa tsi iáh tetsokénhnores. Elijah Tánon Ne Iotheréhons Né Zarephath Nónhwe 8 Ethòne ne Roiá꞉ner sahawénhase ne Elijah, 9 “Ónenh thóh nónhwe niaháse tsitkanátaien ne Zarephath ákta ne Sidonronhnionke, tánon thóh nónhwe iashathatíteron. Wakerihónthen ioteréons né nónhwe nikanákere nahisanónhthe.” 10 Káti ne Elijah Zarephath niahá꞉re, tánon tsi iahá꞉raʼwe tsi iothenhenraká꞉ronhte ne kanáthakon, ioteréons wahá꞉ken kaienthonʼrónhkwaskwe. “Asatʼthontátʼtseke tatʼnekakwenhníra oné꞉kanos,” warénhase. 11 Tánon kíʼ tsi niahá꞉he nakanekakó꞉ha, iathohénreʼthe, “Tánon asatʼthontátʼtseke taskenatharenhawíthen, ó꞉ni.” 12 Watʼkarihwaseráko, “Tsi ronhnhehónwe ne Roiá꞉ner Saní꞉io wakerihwanírate tsi kwáh iáh othènenh tewakenataráien. Thóh khók níkon wá꞉tien sewatsána othésera katsákon í꞉wa tánon ostónha iakenhiewátha kénhie owísakon í꞉kare. Kénʼen tewakènonhne naʼtsienthonrónhko tánon iahonsátʼkaʼwe naʼkhekónhniaʼthe tsikʼníkon wá꞉tien ní꞉i tánon ne rihiénha onhkeniríhwake. Né onakénkha thetsiatsaská꞉hon, ethòne kíʼ ónenh athonkarhiákon enhionkenírhioʼthe.” 13 “Tó꞉sa teshathatenikonhráhren,” ne Elijah warénhase. “Wáhs tánon setʼkhónhni. Ók thaʼsatiérent nikanatharáha thaʼkenatarónhnien tsitʼkanónhake ahiʼsaiénhthake tánon thaʼsetkhawíthen, tánon nenhiothátere ethòne kíʼ í꞉se tánon né tshiénha tsathatekhónhnien. 14 Asèken kennahó꞉ten ne Roiá꞉ner ne sako Ní꞉io Nisraerʼró꞉nonke, ráton: ‘Nakéra iáh tsahontsahá꞉te nothésera khés nó꞉wise iáh kíʼ tsahontsahá꞉te ne kénhie nohénton enwenhniseráteke nètho Í꞉i, ne Watiá꞉ner, entkhathéniethe nokenhnorésera.’” 15 Né iótereons thóh nionsáwe tánon thóh nakáiere tsi naharó꞉ri ne Elijah, tánon ratikwékon iathoteiérise ne ká꞉khwa né꞉ne tó꞉ka nónhta nikaríhwes. 16 Tsi kíʼ nihorahrátston ne Roiá꞉ner rahonháke ne Elijah, né akéra iáh kíʼ tsehiotʼtsaháton nothésera tánon ó꞉ni nó꞉wise ne wenhierárahkwe. 17 Ostónha onakènhke ne ioteréons roiénha wahononwátʼthen; thakarasé꞉rek khók, tánon khèʼkhók iarénheʼie. 18 Wahawénhase ne Elijah, “Rón꞉kwe Ní꞉io rahonkwéta, onhnontséren kíʼ tsi thóh nastséraʼse? Kenʼthonʼnonhtháse nahonsatsehiarákwen ne Rawenni꞉io nakerihwanerahát꞉tseras tánon né wakarihónhni ne rihiénha tsi warénheʼie?” 19 “Tatʼtsathénhaf ne raksáha nakonháke,” né Elijah wahénron. Tánon wahá꞉kwah ne raksáha rahoierónhta tsi rokhitaróh꞉ne, kanotsoharáke niahohiathénhawe tsi tsoʼnákʼthaien tsi nónhwe nihenterónhtakwe, tánon kanaktháke wahohiatsónhnite. 20 Ethòne ó꞉nen iorahkaréni tsi ní꞉ioht tsi wahaterénhnaien, “O Saiá꞉ner Akení꞉io, onh niʼiohtʼtséren tsi naʼtehiotenonhianíton tsi nasé꞉rahse kíʼ ken ioteré꞉ons? Kwáh iatekaiériʼkwe tsi nitsorihwaiérihkwe tsi natewásnieʼne, tánon ónenh waʼtsenonhwariákon ne roiénha!” 21 Ethòne ne Elijah rahiatháke ne raksáha wahatsiathakwenhtháro ásen niakaiénthe tánon wahaterénhnaien, “O Saiá꞉ner Akení꞉io, thonʼtátʼtsaf kí꞉ken ráksa꞉a satʼtsiónhnhet!” 22 Ne Roiá꞉ner watharihwasehráko ne Elijah rahoterénhnaient, ne raksáha thonʼtonhthásawen sahathónhrie tánon sahathónnhete. 23 Né Elijah ehʼtháke nionhsahohiathénhaʼwe ne raksáha tsíʼthewes ne ronisthénha tánon warénhase, “Satkátho, né tsiénha srón꞉nhe!” 24 Watʼkarihwaseráko, “Ónenh kíʼ onhkateriénhtharaʼne ní꞉se tsi Rawenni꞉io rahonkwéta íken tánon nètho Roiá꞉ner kwáh orihwí꞉io tsi sonháke nónhwe nihathátis!” |
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.
Canadian Bible Society