1 Kings 16 - Ohiatonhseratokénti

¹ Né Roiá꞉ner wahothárahse ne rotókenhse Jehu né꞉ne roʼníha ne Hanani tánon tahá꞉wenh kí꞉ken aterihwanothátsera ne Baasha rahorihwáke:

² “Ní꞉se iáh tesonhkwetowánenhne, ók kíʼ í꞉se wakonhiónhni nasehénhthenhse nakonhkwetashón꞉as Nisraerʼró꞉nonke. Tánon kíʼ ónenh waserihwánerake tsi kíʼ niʼiohtʼthónhne ne Jeroboam tánon iasehiasárihne nakonkwetaʼshón꞉as karihwanerahatʼtseráke. Né rahotirihwanerahát꞉tseras wahonhwénhrahte nakenakwáhtshera,

³ tánon káti kwáh enkonhiatsʼthási tánon ne sawátsire, kwáh kíʼ tsi nihiʼiérase ne Jeroboam.

⁴ Ónhka tsi niháti ne sawátsire enhonníheʼie ne tsi kanatowanénhke é꞉rhar kíʼ enhonwatiwáraʼke, tánon ónhka ne kahethákes nónhwe nenhonníheʼie akwesʼokónhas né enhonwatiwáraʼke.”

⁵ Orihwakwékons nètho Baasha tsi nihotseránions tánon tsi nihotenikonhrowanátons thóh nónhwe nikahiathónhnions Tsi Nihonwatikáratons ne Ronhtinontí꞉ios ne Israerʼronónke.

⁶ Né Baasha warénheʼie tánon Tirzah nónhwe nihonwahiatháthen, tánon né꞉ne roiénha Elah thonsahonakthákwen tsi sahatenonhtí꞉iosʼthe.

⁷ Nètho aterihwanothátsera né Roiá꞉ner thotʼkáwen tsi nòkwah ne Baasha tánon ne rahowátsire né꞉ne rotokenséhaʼkwe Jehu rahohesthénhni tsioríhwa ne rahorihwanerahát꞉tseras nètho Baasha né thóh nihiawénhen tsi nòkwah ne Roiá꞉ner. Wahawénhraʼthe ne Roiá꞉ner rahonakwáhtshera iáh nék khók tehiorihwáke tsi niʼkarihwáksenhs tsi nihotseránion, kwáh kíʼ tsi nihotseránion ne Ronhnontí꞉ioʼkwe Jeroboam nohénton ne rahónha, ók né kíʼ aoríhwa tsi kwáh ratikwékons sakononhwarhiakónhnions ne Jeroboam rahowátsires.

Né꞉ne Elah Ronontí꞉io í꞉ken Israerʼró꞉nonke

⁸ Né tewasénhaton sihioserathátse shiʼhononhtí꞉ioʼkwe ne Asa ne Judah nónhwe, Né Elah né roʼníha né꞉ne Baasha né wahononhtí꞉ioʼne ne Israerʼró꞉nonke, tánon rahónha tehioseráke wahatʼkórasthe ne Tirzah nónhwe.

⁹ Né Zimri, né꞉ne saiáta íken ne rahonhátsera né asénhnon nihanikonhráraʼkwe ne ronhnonhtí꞉io rahoseresónhas notsónhkwas, wahoterísthaien. Énska kènhne ne Tirzah nónhwe, Né Elah wahonekáthaʼne thóh rahonónskon ne Arza, rahónha né ranikonhráraʼkwe tsi kanonhtiʼiotseráien.

¹⁰ Né Zimri iahatáwehiaʼte kanónskon, wahorónhthaʼte ne Elah, tánon rahónha tonhsahonakthákwen tsi sahatenonhtí꞉iosʼthe. Thóh né kí꞉ken thóh nitsawénhen né꞉ne tewásenh-tsáta sihioserathátse sihononhtí꞉ioʼkwe ne Asa ne Judah nónhwe.

¹¹ Kwáh tsi nihiosthó꞉re ne Zimri wahononhtí꞉ioʼne kwáh washakononhwarhiakónhnion ne Baasha rahowátsires. Ratikwékon ne rotiskenrakéte tánon ne ronhthenhrosónhas tsi wahonwatinonhwarhiákon.

¹² Tánon káti, tahioianénhawe tsi nahó꞉ten ne Roiá꞉ner ráwenh tsi nòkwah ne Baasha rahonháke ne rotókenhse Jehu, ne Zimri ratikwékon washakononhwarhiakónhnion ne Baasha rahowátsires.

¹³ Né aoríhwa ne tsi nikonhwasénhnaiens ne kahiatónhni tánon ne aoríhwa tsi niakonhwasárihne Nisraerʼró꞉non ne karihwanerenhatʼtsheráke, ne Baasha ó꞉ni ne roiénha Elah wahiawénhrate ne Roiá꞉ner rahonakwáhtshera, ne sako Ní꞉io Nisraerʼró꞉nons.

¹⁴ Akwékon tsi nahorihothénhsons ne Elah tsi nahotsérenhke akwékon thóh nónhwe nikahiathónhnions Tsi Nihonwatikáratons ne Ronhtinontí꞉ios ne Israerʼronónke.

Né Zimri Né Ronhnontí꞉io Né Israerʼró꞉nonke

¹⁵ Né tewásen-tsáta sihioserakehátie sihononhtí꞉ioʼkwe ne Asa ne Judah, né Zimri rakóraʼkwe ne Tirzah nónhwe ó꞉ni Nisraerʼró꞉nonke né꞉ne tsáta nónhta nikaríhweskwe. Nisraerʼró꞉non tekonwahonwarónhnikwe ne kanatowanénhke né Gibbethon né꞉ne Philistia nónhwe,

¹⁶ tánon sahatirihwáronhke nètho Zimri tsi roteristhaiénhthakwe tsi nòkwah ne ronhnontí꞉iokwe tánon tsi roronhtháton tsi rononwarhiákon, ethòne kíʼ tánon ehʼnónhwe ratiʼkwékon Omri wahonwahiataráko nahononhtí꞉ione Nisraerʼró꞉nonke.

¹⁷ Né Omri tánon ne raonénhra sóh꞉tar é꞉ren sahónhneʼthe ne Gibbethon tánon Tirzah niahónʼne né kanathakweʼní꞉ioʼkwe Nisraerʼró꞉nonke tánon watʼkonhwahonwarónhni.

¹⁸ Nó꞉nen ne Zimri sahatkátho ne kanatowanénhke tsi konhwasénhnion, thóh niaháre iahatháwehiaʼte nathenhénrakon né tekanathanákʼthon tsi kanontiʼiotsheráien, wahatsiróthen tsi ronónhshoʼthe ne ronhnonhtí꞉io, tánon thóh ohthonhkhó꞉kon warénheʼie.

¹⁹ Né kíʼ aoríhwa thóh nahá꞉wenhne né tsi rorihwáneren tsi nòkwah ne Roiá꞉ner. Kwáh ki tsi niʼiohthónhne ne thohhénton Jeroboam, wahonikonhrátsʼhathe ne Roiá꞉ner né kwáh rahónha rahorihwanerahák꞉tsheras tánon né tsi iashakosárihne Nisraerʼró꞉nons né karihwanerahakʼtsheráke.

²⁰ Orihwakwékon ne Zimri tsi nihotseránions, thóh íh꞉kare tsi nihoiéren tsi nihotheristhaiénhthaʼkwe, thóh nónhwe nikahiathónhnions Tsi Nihonwatikáratons ne Ronhtinontí꞉ios ne Israerʼronónke.

Né Omri Né Ronhnontí꞉io Íken Ne Israerʼró꞉nonke

²¹ Nonhkweshón꞉as Nisraerʼró꞉nonke tehotinenhrakʼkháshion: ótiakes iéraʼkwe Tibni né꞉ne Ginath roiénha ahatenonhtí꞉iosʼthe, tánon ne ronátiakes né꞉ne thatiráhkwas ne Omri ahononhtí꞉ioke.

²² Tsi iahontésha, tsi nihiákon né꞉ne thatirákwas ne Omri ahatenonhtí꞉iosʼthe né wahontʼkwéni; né Tibni warénheʼie tánon Omri wahononhtí꞉iohne.

²³ Káti ná꞉senh-niwá꞉senh énska sihioserakhehátse shihoʼnonhtí꞉iokwe ne Judah nónhwe, né Omri né꞉ne wahathenonhtí꞉iosʼthe Nisraerʼró꞉nonke, tánon káti tékeni-iawénhre nihioseráke rokʼkhorástonhne. Né tonhtsérenhte iá-iak nihioseráke Tirzah nónhwe nihakóraʼkwe,

²⁴ tánon kíʼ ethòne wahá꞉ninon né ionhniáhere ne Samaria nónhwe né꞉ne iá-iak niwenhniawehetserásen nikaʼkwenísʼthakes kawistarákens wahokhárhiakʼse ne rónhkwe Shemer ronhwáiasts. Né Omri wahathenhénraien ne tsi iononhtháheʼre, thóh nónhwe nahanathónhni, tánon né wahanáthonhkwe Samaria, né thonhsahosenhnákwen ne Shemer, né thoʼwenhkénʼen ne ionhniáheʼre.

²⁵ Né Omri waharihwánerake tsi nòkwah ne Roiá꞉ner sénha tsi niʼiohtónhne ne thohtihénton.

²⁶ Kwáh kíʼ tsi niʼiohtónhne ne Jeroboam né thohénton tsi ní꞉ioht ne rahónha, warahwénhrate ne rahonhakwáhtshera ne Roiá꞉ner, né sako Ní꞉io Nisraerʼró꞉nonke, né꞉ne rahorihwanerahák꞉tsheras tánon tsi niashakosárihne nonhkweshón꞉as ne karihwanerahakʼtsheráke ó꞉ni tsi nahatisénhnaien ne kahiatonhnisónhas.

²⁷ Orihwakwékons tsi nihotseránion ne Omri akwékon thóh nónhwe nikahiatónhnions Tsi Nihonwatikáratons ne Ronhtinontí꞉ios ne Israerʼronónke.

²⁸ Né Omri warénheʼie tánon Samaria nónhwe nahonwahiatháta, tánon né꞉ne roiénha Ahab thonsahonakthákwen tsi sahononhtí꞉iohne.

Né꞉ne Ahab Ronhnontí꞉io Í꞉ken Nisraerʼró꞉nonke

²⁹ Násenh-niwásenh shaʼtékon sihioserakhehátse shiʼhononhtí꞉ioʼkwe ne Asa ne Judah nónhwe, ne Ahab né꞉ne roʼníha ne Omri né sahononhtí꞉iohne Nisraerʼró꞉nonke, tánon rahónha rakórahkwe né Samaria né꞉ne tewásenh-tékeni nihioseráke nikaríhwesʼkwe.

³⁰ Rorihwanerenhátskon tsi nòkwah ne Roiá꞉ner sénha ísiʼkonh tsi ní꞉ioht ne ohénton thoʼtirihónthaʼkwe.

³¹ Iáh tsatekaiéri tsi naharihwánerake tsi ní꞉ioht né Jeroboam; ishiʼnónwe niaháhaʼwe tánon ne wahotíniaʼke ne Jezebel, né shakoiénha ne Ronhnontí꞉io Ethbaal né Sidon nónhwe nihanákerekwe, tánon ne wahasénhnaien ne Baal ne Samaria nónhwe, wahahónhnien ne ientsenharáhkwah, tánon ononsatokentiʼkówaʼne iaháhionhte.

³² Tahatsérenhte wahononhsónhnien nononsatokentiʼkówa ó꞉ni ne ietsienharáhkwah ne Baal né Samaria nónhwe.

³³ Tánon ne Ahab kwáh wahahiathonhniserónhni ne Asherah. Né Ahab sénha wahonakónhni ne Roiá꞉ner ne sakoNí꞉io Nisraerʼró꞉nonke, tsi ní꞉ioht ne thóh tihénton ronhtinonhtí꞉iosʼkwe.

³⁴ Tsi nikaríhweskwe ronhnonhtí꞉ioʼkwe, ne Hiel né Bethel nónhwe nihanákereʼkwe sahatenatónhni ne Jericho. Tsi kíʼ niʼhotróri ne Roiá꞉ner rahonháke ne Joshua né꞉ne ronikénhen ne Nun, né Hiel thakowánen roʼienkénʼen, Abiram, warénheʼie nó꞉nen sonhsahensthenrakwénhtharo tsi kenskwáheʼre ne Jericho, tánon kíʼ nó꞉nenh sonhsahaweienénhthaʼne shahathenhenranihionhthónhnion, ne kenhniráha roiénha, Segub, warénheʼie. Akwékon kí꞉ken thóh nahawénhseron tsi tahioianénhaʼwe tsi nitsawénon naterihwanothátsera rahonháke ne Roiá꞉ner tsi nòkwah ne Jericho tsi nihothatíhon ne Joshua né꞉ne roʼníha kénʼen ne Nun.