1 Kings 15 - Ohiatonhseratokénti

Né Ronhnonhtí꞉io Abijah Né Judah Nónhwe

¹ Né satekonhátonʼiawénhre shiʼhioserakeháton shiʼhononhtí꞉ioʼkwe ne Jeroboam né Israerʼró꞉nonke, né Abijah rahónha né wahononhtí꞉ioʼne ne Judah nónhwe,

² tánon áhsen niʼiohseráke wahatkórasʼte ne Jerusalem. Né ronisténha Maacah ionhtá꞉tiastsʼkwe, né sakoiénha kènhne ne Absalom.

³ Kwáh thóh ní꞉ioht tsi waharihwáneraʼke tsi kíʼ niʼhiothónhne ne ronikénhen tánon iáh kíʼ thethonikonhrakonhthákwenhne tsi nahorihwatokénhake rahonháke ne Roiá꞉ner Rahoní꞉io, tsi né nihiothónhne ne tehioteréseraʼne nióre rosotʼkénʼen Táwit.

⁴ Ók kíʼ Táwit rahorihónhniat ne Roiá꞉ner Raoní꞉io tahá꞉wenh ne Abijah roskenhrakéte ahowiraiénhtaʼne né꞉ne rahónha tahonsahonatʼthákwen nahonsahatkórasʼthe ne Jerusalem ó꞉ni nahontháhane ne Jerusalem.

⁵ Né Roiá꞉ner né ahoríhwa thóh kí꞉ken nahá꞉iere tsioríhwa ne Táwit tsi thóh nihoiéren né nahontahonikonhraiérihthe tánon iáh nonhwénhton tehotewenhnónhtion tsi nahoténsons ne rahorihwatátʼtseras, nek khók né Uriah né Hitró꞉non aorihwasónha.

⁶ Naterihiósera tsi nitsiothásaʼwe tsi natehiátere ne Rehoboam tánon ne Jeroboam thóh nihiothónhne kwáh tsi nikaríhwes rónhnheʼkwe ne Abijah.

⁷ Tánon kwáh akwékon tsi nihotseránions ne Abijah akwékon thóh nónhwe nikahiatónhnions Tsi Nihonwatikáratons ne Ronhtinontí꞉ios ne Judah Nónhwe.

⁸ Né Abijah warénheʼie tánon thóh nónhwe nihonwahiatháten ne Táwit rahonáthakon, tánon né꞉ne roiénha Asa thonhsahonatʼthákwen tsi sahatenonhtí꞉iosʼthe.

Né Ronhnontí꞉io Asa Ne Judah Nónhwe

⁹ Né tewasenháton shiʼhioserakeháton shiʼhononhtí꞉iokwe ne Jeroboam ne Israerʼró꞉nonhke nónhwe, né Asa Judah né nónhwe nahononhtí꞉ioʼne,

¹⁰ tánon kaiérih niwásenh nihioseráke rakóraʼkwe ne Jerusalem. Né sakosotkénʼen né꞉ne Maacah, né꞉ne Absalom sakoiénha kènʼne.

¹¹ Né Asa né꞉ne wahohióthen nahothahonikonhraiérihthe ne Roiá꞉ner, tsi kíʼ niʼiohtʼthónhne ne rosotʼkénʼen Táwit.

¹² Washakorékwahte tsi kanakeraseráien ratikwékon ne rotiskenrakéte ó꞉ni tsonatʼthonhwísen ne iotirihwahiathatónhons né ionaterihwatsʼterístons ne tehotirihwiʼióstons tsi nón꞉we nihonhterenhnaienthákwas, tánon akwékon é꞉ren wahahawithánions ne kahiatonhnisónhas né thotirihónhthaʼkwe roshahánionʼkwe.

¹³ Washakorihontháko ne shakosót꞉tha Maacah tsi iakonontí꞉ioʼkwe kaʼnisténhsera kènʼne, tsioríhwa tsi iohiatonhniserónhni ne ioterihwathéhat íken né tetsotenienthénston ne kaní꞉io Asherah. Né Asa waʼhahiatonhniseriáʼke tánon thóh nónhwe iahatsáhaʼthe ne Kidron ahonrákwahkon.

¹⁴ Ethonèsa ne Asa iáh kíʼ akwékon tehorihwathónton ne onhó꞉wen íken tsikʼnonhwésons nihonterénhnaiens, kwáh kíʼ iahakónhthaʼkwe tsi rotherihwatokénstonhkwe rahonháke ne Roiá꞉ner kwáh tsi nirón꞉nheskwe.

¹⁵ Sahakéron akwékon tsi nahoténhsons ne ronikénʼen rathonhnaráhni rahohénton ne Rawenni꞉io, né nònhne sáka nowistanórons tánon ne kawistarákens nahoténsons ne kwáh rahónha rathonhnaráhni.

¹⁶ Ne Ronhnontí꞉io Asa né Judah nónhwe tánon ne Ronhnontí꞉io Baasha Nisraerʼró꞉nonke iehothikonhthákwen ronahterí꞉io tsi natehiátere kwáh tsi nikaríhwes ronaterihón꞉thaʼkwe.

¹⁷ Né Baasha washakonenhrénhthen ne Judah tánon tahathásawen ne wahathenhénron tsi wathanathánake ne Ramah nónhwe né nahónton ne tó꞉sa ahonsahionkweʼné꞉hake ne tahonthaiénthake tánon nahonsaieiakénhsehke ne Judah.

¹⁸ Káti ne Ronhnón꞉tiio Asa iaháhaʼwe akwékon ne kawistaráhkens ó꞉ni nowistanoronhsónhas nononsatokentiʼkówaʼne tkaiénthakwe tánon ne ronhnontí꞉io tsi ronónhsohthe, tánon toʼkàra niháti ne rahonkwetaʼshónhas Damascus niahatíhaʼwe, tsi thénteron ne Ronhnón꞉tiio Benhadad né Syria nónhwe, né꞉ne roiénha ne Tabrimmon tánon ne rosótʼtha né꞉ne Hezion, né kí꞉ken ratirihwenháwi:

¹⁹ “Ánion thitewathénrof, tsi né niʼhiothónʼne ne ietinihokonhkénʼen. Kí꞉ken owistanó꞉ron tánon kawistaráken né wakónhion. Ká꞉ti ónenh thonshasewarihwatʼkhási ne Ronhnontí꞉io Baasha Nisraerʼró꞉nonke, né káti nahónton kwáh é꞉ren ahonshasakohiathenháwiʼthe ne rahosóhtar naʼkenakerahserákon.”

²⁰ Né Ronhnón꞉tiio Benhadad wahá꞉rihwanonhwene né Asa tsi nahó꞉ten wahá꞉rihwanónton tánon iashá꞉kotheniete ne rahonwetashón꞉has ratisenhnó꞉wanens tánon ne rahó꞉tishó꞉tar niakonhwatsathonhti tsi kanató꞉wanens Nisraerʼró꞉nonke. Wahatiiena ne Ijon, Dan, Abel Beth Maacah, né꞉ne iokwenhrá꞉re ákta tsi Kaniatare ne Galilee, tánon kanakeraserakwekon ne Naphtali.

²¹ Nó꞉nen ne Ronhnontí꞉io Baasha waharihwáronhke tsi nahá꞉wenhne, wathátaʼne tsi rothenhenronnihátse ne tahanathanákʼthonʼke ne Ramah tánon Tirzah niaháre.

²² Ethòne ne Ronhnontí꞉io Asa iahaterihwánieʼthe tsikʼnonhwéson ne Judah ratikwékon sakorihwanontónhnis, né kwáh tsikhón꞉ka akénhake, nahiontsniénon né꞉ren ahonsahatiháwiʼte ne Ramah nonenhiasónhas ó꞉ni nonkonhré꞉tsas nètho Baasha róston tsi rothenhenronhniánions. Kí꞉ken okonré꞉tsas ne Asa né wárasthe tsi wahathenhenrónhni tsi wathanathánake ne Mizpah tánon ne Geba, né꞉ne kanatowanénhkes ne tsi kanakeraseráien ne Benjamin.

²³ Akwékon noiásons nihiothá꞉nions ne Ronhnnontí꞉io Asa tsi nihotiéren, rahoahastsʼtenserakwékon tánon ne kanathaiéntons né rothenhenronniánions tsi tehonatanákʼthons, akwékon thóh nónhwe nikahiathónhnions Tsi Nihonwatikáratons ne Ronhtinontí꞉ios ne Judah Nónhwe. Ók tsi waoksʼthénhaʼne wahahiathakénheie né tsi nahoshithanónhwake.

²⁴ Ne Asa warénheʼie tánon kíʼ thóh nónhwe nahonwahiatáta né꞉ne ronhtinontí꞉ios tsi ronwatihiathatahástha né Táwit rahonatowanénhke, tánon ne roiénha Jehoshaphat thonsahonatʼthákwen tsi ronhnontí꞉io waháton.

Né Nadab Né Ronhnontí꞉io Íken Nisraerʼró꞉nonke

²⁵ Né tekeníhaton sihioserathátse sihononhtí꞉ioʼkwe ne Asa né Judah nónhwe, Ronhnontí꞉io Jeroboam roiénha Nadab wahononhtí꞉ioʼne Nisraerʼró꞉nonhke, tánon tehioseráke wahatkórasʼthe.

²⁶ Tsi ki niʼiohthónhne ne roʼnikénʼen ne thohénton, waharihwánerake tsi nòkwah ne Roiá꞉ner tánon iashakosárihne Nisraerʼró꞉nons niahatirihwánerake.

²⁷ Né Baasha né꞉ne roʼníha né Ahijah, né꞉ne tsi ratitáraien ne Issachar nónhwe nihahiátare, wahotheristaiénhaʼse ne Nadab tánon wahononhwariákon nó꞉nen ne Nadab tánon ne rahosóhtar tekonwahonwarónhni ne kanatowanénhke ne Gibbethon né꞉ne Philistia nónhwe.

²⁸ Thó꞉ne kí꞉ken thóh nihiawénhen né꞉ne asénhaton siʼhioserathátse shiʼhononhtí꞉ioʼkwe ne Asa né Judah nónhwe. Tánon káti ne Baasha rahónha thonsahonakthákwen ne Nadab tsi sahatenonhtí꞉iosʼte ne Israerʼró꞉nonhke.

²⁹ Kwáh ókʼsak tahathásawen ratikwékon wasakononhwarhiakhónhnion ne Jeroboam rahowátsire. Né tahiohianénhaʼwe ne Roiá꞉ner tsi niháwen rahonháke ne rahonhátsera, né rotó꞉kenhse Ahijah né Shiloh nónhwe nihanákerekwe, ratikwékon ne Jeroboam rahowátsire wahonwatinonhwariákon; iáh né sahiátha tsatehothathénron

³⁰ Né kí꞉ken aoríhwa thóh nahawénhnen tsioríhwa ne Jeroboam wahawénhrathe ne Roiá꞉ner rahonakwáhtshera, né sako Ní꞉io Nisraerʼró꞉nonke, né tsi nihotieránion ne karihwáneren tánon washakahónhnien Nisraerʼró꞉nons thóh nahatí꞉iere.

³¹ Orihwakwékon ne tsi nihotseránions ne Nadab akwékon thóh nónhwe nikahiathónhnions Tsi Nihonwatikáratons ne Ronhtinontí꞉ios ne Israerʼronónke.

³² Né Ronhnonhtí꞉io Asa ne Judah nónhwe tánon ne Ronhnontí꞉io ne Baasha Nisraerʼró꞉nonke nónhwe iehothikonhthákwen tsi ronaterí꞉io tsi naʼtehiátere kwáh tsi nikaríhwes ronaterihónhthaʼkwe.

Né Ronhnontí꞉io Baasha Nisraerʼró꞉nonke

³³ Nasénhaton sihioserakehátse sihononhtí꞉ioʼkwe ne Asa ne Judah nónhwe, ne Baasha né꞉ne roʼníha ne Ahijah wahononhtí꞉ioʼne Nisraerʼró꞉nonke, tánon rahónha wahatkórasʼthe ne Tirzah né꞉ne tewásenh-kaiéri nihioseráke nikaríhwes.

³⁴ Kwáh kíʼ tsi niʼiohtʼthónhne ne Ronhnontí꞉ioʼkwe Jeroboam né thohhénton tsi ní꞉ioht ne rahónha, waharihwánerake tsi nòkwah ne Roiá꞉ner tánon iashakosárihne Nisraerʼró꞉nons karihwanerahakʼtseráke.