1 Kings 14 - Ohiatonhseratokénti

Tsi Warénheʼie Ne Jeroboam Roiénha

¹ Thóh shiʼkaháwi ne Jeroboam roiénha Abijah wahononhwátʼthen.

² Jeroboam washaʼkawénhase ne shakoksthénha, “Teshathatierónhnion né꞉ne tó꞉sa ónhka aieshaiénhtereʼne, tánon Shiloh nónhwe niaháse, tsi nónhwe thanákere ne rotó꞉kense Ahijah, tsi nikáien ne ráwenh í꞉i enskatenonhtí꞉iosʼte ne Israerʼró꞉nonke.

³ Oiéri nikanataʼráke iatsawíthen, tánon ostónha ká꞉ret, tánon skawísa otsinakonhthákwahne otsikhéta. Tierihwanón꞉tons onhnènhne nenhohiátawen ne tsi theʼniʼiénha, tánon kíʼ enhiaró꞉ri.”

⁴ Sók kíʼ tsi thóh nonhshó꞉the ne Ahijah niahá꞉he né꞉ne Shiloh nónhwe. Né tsi nonhtahóhionhne ne Ahijah né wakarihónhni waʼtharónhweʼke.

⁵ Né Roiá꞉ner wahoró꞉ri né Jeroboam teníteron tá꞉we nahorihwanónhtonse né roiénha rahorihwáke, né tsi rononhwáʼthani. Tánon ne Roiá꞉ner wahoró꞉ri tsi nahó꞉ten ahénron. Shiaʼhónwe ne Jeroboam ró꞉ne, thóh nakáiere tsi shí꞉ken nónhkak akóren akénhake.

⁶ Ók kíʼ nó꞉nen ne Ahijah sahothónhtene thontáwehiathe, wahénron, “Thasatháwehiat. Wakateriénhthare tsi Jeroboam teseníteron. Onh nihiotséren tsi í꞉sehre ónhkak akórenh ashathatónhni? Iáh tekarihwí꞉io tsi nahó꞉ten wá꞉tsien ne sarihwáke.

⁷ Wáhs tánon tsróri ne Jeroboam kén nahó꞉ten ne Roiá꞉ner, ne Sakoní꞉io Nisraerʼró꞉nonke roʼróhris: ‘Í꞉se konhiatará꞉kwen tsi nihiákon nonkweshónhas tánon wakonhkó꞉rasʼthe nashehiatkórasthe nakonhkwetashón꞉as Nisraerʼró꞉nonke.

⁸ Khé꞉kwen ne kanakerásera ne Táwit rahowátsires tánon í꞉se tkonhiáwi. Ók iáh kíʼ étho teshiathóten tsi né ní꞉ioht nakenhátsera Táwit, né rahónha kwáh íken tsi rorihwatókenhne nakonháke, roʼtewenhnarákwen nakerihwatátʼtseras, tánon nek khók thóh nenháiere tsi nenhkerihwanónhweʼne.

⁹ Í꞉se sénha iashohétsthe tehiotenonhianítons tsi ní꞉ioht tsi waserihwánerake tsi ní꞉ioht né thóh natserénton ronatkoráston. Wasekʼkénron tánon wasawénhrate nakenakwáhtsera né tsi washatsathonhniseronhniánions tánon karístatsis nahó꞉ten washehiatonhniánions nakonhwatisenhnaienthákwahke.

¹⁰ Né kí꞉ken enkarihónhni kwáh enthékhaʼwe ne kakaronhniátseras ne sawatsirákes tánon ratikwékon enkhenonhwarhiakónhnion ne rotsiskenrakétes tsi niensatwatsírihne, kenhnahontahotíhionske khés nahotikʼsténhake. Kwáh kíʼ enkhehiáthonʼthe ne sawátsire; thóh ní꞉ioht tsi ienhiakohiathénhawe tsi ní꞉ioht nhó꞉ta.

¹¹ Ónhka tsi niháti ne sawátsire ne kanatowanénhke nónhwe nenhonhníheʼie érhar kíʼ nènhne enhonwatiwá꞉rake, tánon nónhka ne kahé꞉takes nónhwe nenhonhníheʼie akweksʼokónhas né enhonwatiwá꞉rake. Í꞉i, ne Watiá꞉ner, wakatháti.’”

¹² Tánon kíʼ ne Ahijah iahathasónhteren tsi wahatháraʼse ne Jeroboam teníteron, “Ónen kíʼ wáhs sashathénhti. Kwáh tsi niʼiostó꞉re iensenatáraʼne, netsiénha enrénheʼie.

¹³ Onhkwetaʼkwékon ne Israerʼró꞉nonke tsi enhonwatʼtsiónhnionhse tánon enhonwahiatháta. Kwáh rahonhatsíwa khók tsi nihawatsíra ne Jeroboam tkarihwaiéri tsi ní꞉ioht tsi enhonwahiatháta, tsioríhwa tsi kwáh rahonhatsíwaʼkhók thóh nikonhraiéritsʼkwe ne Roiá꞉ner, ne Sakoní꞉io Nisraerʼró꞉nonke.

¹⁴ Né Roiá꞉ner enhó꞉teron ne ronhnonhtí꞉io Nisraerʼró꞉nonke tsi kwáh ienhaiáksʼtsi ne Jeroboam rahowátsire.

¹⁵ Né Roiá꞉ner kwáh enharéwathe Nisraerʼró꞉nonke, tánon kwáh enhiówake tsi ní꞉ioht ne onhó꞉ta tehiawènhtons tsi kahionhatátse. Tánon kwáh enshakotheró꞉tsi nonhkweshón꞉as Nisraerʼró꞉nonke tsi nónhwe kí꞉ken nihiohontsí꞉io tsi nikáien shakahontsáwi ne sakotisotʼthonkonhkénʼens, tánon kwáh thóh nónhwe iathenshakoréniaʼte ne iehiotohéston ne Euphrates Kaniataratátse, tsioríhwa tsi wahonwénhraʼte ne rahonakwáhtsera né tsi né wakonwahiatonhniserónhni ne Asherah kahiatónhni íken.

¹⁶ Ne Roiá꞉ner enshakotewénhthete Nisraerʼró꞉nons tsioríhwa ne Jeroboam rorihwáneren tánon iashakosárihne Nisraerʼró꞉nons nahatirihwánerake.”

¹⁷ Ne Jeroboam ró꞉ne Tirzah nionhsáwe. Kwák tsi iahontáwehiate nahonónskon, ne raksáha warénheie.

¹⁸ Nonhkweshón꞉as Nisraerʼró꞉nonke wahonwatsiónhnionshse tánon wahonwahiatháta, tsi kíʼ ne Roiá꞉ner nihotró꞉ri rahonháke ne rahonhátsera, né꞉ne rotokensáhakwe Ahijah.

Sharénheie Ne Jeroboam

¹⁹ Nó꞉ia nihiorihothénhsons tsi nahotseránionhke ne Jeroboam, tsi nihoterihióhon naʼterihioseráke tánon tsi ní꞉ioht tsi rotʼkorásthonhne, akwékon thóh nónhwe nikahiatónhnions rahothihiathonhserákons Tsi Nihonwatikáratons ne Ronhtinontí꞉ios ne Israerʼronónke.

²⁰ Ne Jeroboam rakorákenhne tsi ronhnonhtí꞉ioʼkwe né꞉ne tewásenh-tékeni nihioseráke. Warénheie tánon kíʼ wahonwahiatháta, tánon né꞉ne roiénha Nadab thonhsahonatʼthákwen tsi shahatenonhtí꞉iosʼthe.

Né Rehoboam Né Ronhnonhtí꞉io Íken Ne Judah Nónhwe

²¹ Né Solomon roiénha Rehoboam kaiéri-niwásenh-énska shaʼtehahoserihiákon sahononhtí꞉ione ne Judah nónhwe, tánon tsáta iawénhre nihioseráke rótkorasthonhne ne Jerusalem, né꞉ne kanatowanénhke ne Roiá꞉ner rorákwen akwékon tsi niwathonhóntsa Nisraerʼró꞉nonke tsi thóh nónhwe nenhonwasenhnaienthákwahke. Né Rehoboam roʼnisthénha né꞉ne Naamah né꞉ne Ammon nitsakawénon.

²² Nonhkweshón꞉as ne Judah nónhwe wahatirihwánerake tsi nòkwah ne Roiá꞉ner tánon sénha ísiʼnonhtsi nahonwénhraʼte ne rahonakwáhtsera né ronónhake nahontahonwatíkwekʼthe ne sakotisotʼthonkonhkénʼen tsi nahonátiereʼke.

²³ Wahonnonhniánion tsi nónhwe nakonhwatiʼsenʼnaienthákwahke ne iáh othènen tekaniʼioserástas tánon wahatiʼnawahathothónhnions tánon wahatiʼswenhkarahnenhtatʼthánion né Asherah tsi akonhwasénhnaien ne tsi ionhnonthariónhnions ó꞉ni ne tsi iorakwahweróstons ne karonhthokónhsons.

²⁴ Sén꞉ha kíʼ iesewahétʼken, né꞉ne ronhnón꞉kwe ó꞉ni konhnón꞉kwes né ronaterihwaʼthenhtsáton ne ierihwahiathátons tsi nón꞉we nihionhterenhnaienthákwas. Nonhkweshón꞉as ne Judah nónhwe akwékon né thóh nihatiʼiéraʼkwe ne ioterihwathehasónhas né nonhkwesón꞉has tsi nikáien ne Roiá꞉ner theshakohiatinekénʼen ne tsi ionhwénhtsaien né nohénton Nisraerʼró꞉nons sahón꞉newe tsi kanakeraseráien.

²⁵ Né wískʼkhá꞉ton shiʼhioserathátse ne Rehoboam shiʼhononhtí꞉io, ne Ronhnontí꞉io Shishak ne Egypt nónhwe iahatsatónhti ne Jerusalem.

²⁶ Akwékon iahiá꞉haʼwe ne kanorónhsons ne Ononsatokentiʼkówaʼne kaiénthakwe ó꞉ni ne ronhnonhtí꞉io rahonónskon, thóh í꞉kare ne owistanó꞉ron tehioniatástha né Solomon roshahánions.

²⁷ Tsi óia ahonsaháien, Né Ronhnón꞉tiio Rehoboam né tehioniathástha né꞉ne sharonhniánion ne otsínekwar nikaristhó꞉tens tánon né washakothakweniaiénʼhaʼse ne ratiʼsenhnowánens né ratinikónhraʼre tsi hiothenhenrenhthónhnions ne kanontiʼiotserákon.

²⁸ Kwáh tsi nihiorihwáke ne ronhnontí꞉io Ononsatokentiʼkówaʼne niénhre, né ratinón꞉ne ienhatíhaʼwe ne tehioniaʼtástha tánon ethòne thóh ienhsonhthakweʼniáien tsi ronhtakweniaienthákwah ne ratinón꞉ne.

²⁹ Kwáh tsi nahorihothénhsons ne ronhnonhtí꞉io Rehoboam tsi nahotiérenhke akwékon thóh nónhwe nikahiatónhnions Tsi Nihonwatikáratons ne Ronhtinontí꞉ios ne Judah Nónhwe.

³⁰ Tsi nikaríwes kí꞉ken ne Rehoboam tánon ne Jeroboam tsi kwáh tsiokonhtákwenh ronaterí꞉io tsi natehiátere.

³¹ Né Rehoboam warénheʼie tánon thóh nónhwe nahonwahiatháta ne kanonhtiʼiotsera tsi ronhwathihiathatahástha ne Táwit Rahonatowanénhke tánon né꞉ne roiénha Abijah thonsahonakʼthákwen tsi sahatenonhtí꞉iosʼthe.