1 Kings 12 - Ohiatonhseratokénti

Nothoreʼkeʼró꞉nons Kentsiókwahs Tahotinákwen

¹ Né Rehoboam Shechem niahá꞉re, thóh nónhwe ratikwékon ne othoreʼkeʼró꞉nons nòkwahti Israerʼró꞉nonke nihonatsatharó꞉ronhne nahonwanontí꞉iosthe.

² Nó꞉nen ne Jeroboam né roʼníha né꞉ne Nebat, Egypt nónhwe niehawénon nahotékwahse ne Ronhnonhtí꞉ioʼkwe Solomon, waharihwáronhke kí꞉ken, thontahathénhti ne Egypt.

³ Nonhkweshón꞉as nothoréke ratiʼtsiókwahiens hionhsahonwénhnonhke, tánon ethòne ratikwékon Jeroboam tsi thénhteron niahónhne tánon wahonwénhase,

⁴ “Né iaʼníha Solomon sonhkwahteweienhnakshathénhni tánon ioreniáksʼte wasonhkwahreniakéthaʼte. Tó꞉ka káti né ashón꞉niaʼthe ne tó꞉sa ahonsahiókstheʼke nonhkwahré꞉na tánon ahontsesénhake tsi ahonsahiatsiónhnheʼke, kwáh kíʼ enhionkwahrihwatokénhake tsi í꞉se enkwahióthenhse.”

⁵ “Ásenh nónhta nióre thonhthásewe tánon thó꞉ne thenhkwahrihwaseráhkwahse,” tsi wá꞉tharihwasehráko. Káti é꞉ren sahónhneʼthe.

⁶ Né Ronhnonhtí꞉io Rehoboam washakorihwanónhthonhse ne thotíhions né꞉ne roʼníha Solomon ronhwatenikonhrasonhteránisʼkwe. “Nahó꞉ten tsi takerihwasheráko naskwahtenikonhron nahontatʼkhéhion kí꞉ken onhkweshón꞉as?” washakorihwanónhtonhse.

⁷ Wathatirihwaseráko, “Tó꞉ka í꞉shere kahiotenhserí꞉io tsi asehióthenhse kí꞉ken onhkweshón꞉as, hioianeré꞉hak kíʼ tsi teserihwaseráko tsi nihatirihwanónhtons, tánon kwáh kíʼ tiotʼkhonhónwe enhotirihwatokénhake tsi enhiesahióthenhse.”

⁸ Ók iáh kíʼ thèhnen karíhwa tehahonniáton tsi nahonwathenhnikónhron ne thotíhions tánon khèʼkenk thóh nòkwah niahá꞉re né kenhnithotihiónsas né skát꞉ke ronathehiáron tánon ó꞉nen né shonwatenikonhrasonhteránis.

⁹ “Onh nahó꞉then tsi askwahtenikonhrasónhteraʼse tsi ná꞉tiere?” waharihwanónhton. “Onh nahó꞉then akheróri kí꞉ken onhkweshón꞉as ne hionhkeriwanonhtón꞉nis né akherá꞉kwahse tsi nihióksthe ne rahothirié꞉na?”

¹⁰ Wathatirihwaseráko, “Kén kíʼ ní꞉ioht tsi aseró꞉ri: ‘Né kwáh kén nitʼkesnonsá꞉a sénha né kátens tsi ní꞉ioht ne rakeníha rashionhontáke!’

¹¹ Shé꞉rori, ‘Rakeʼníha kwáh í꞉ken tsi watsisewarieniakétatʼtse; ók khe kik sénha enkwahrieniaksthá꞉then. Óhkwiʼre rótston tsi tsisewanonwenhseriário; ók ní꞉i né enkwahienthánion ne tèro rahó꞉kwire!’”

¹² Ásen nónhta ohnakènhke ne Jeroboam ó꞉ni onhkwetaʼkwékon Ronhnontí꞉ioke Rehoboam nionhsahónhne, tsi kíʼ nishakorihwisenhénhni.

¹³ Né ronhnontí꞉io iáh othènen karíhwa tehahónhni tsi nihonwatenikonhráwi ne thotíhions tánon washakotewenhnatʼtsaníthen nonhkweshón꞉as,

¹⁴ tsi kíʼ nihonwatenikonhráwi ne kennithotihiónsas. Wahénron, “Né rakeʼníha iorieniáksthe tsi sewaketháton; Ók sénha kíʼ enkwahrieʼniaketátsthen. Óhkwire rótston tsi tsisewanonwenhseriário; ók kíʼ tèro rahotí꞉kwire ní꞉i enkwahienthánion!”

¹⁵ Kwáh꞉se Roiá꞉ner thóh nihonikonhróthenhne nahontaháhaʼwe tsi nahó꞉tenh rotharáni ne rotokenséhakwe Ahijah né Jeroboam né roʼníha né꞉ne Nebat né꞉ne Shiloh nónhwe thanakeré꞉kwe. Né kíʼ aoríhwa ne ronhnontí꞉io iáh othèhnen karíhwa teshakahónhni nonhkweshón꞉as.

¹⁶ Nó꞉nen nonhkweshón꞉as sahónt꞉thoke né ronhnontí꞉io tsi iáh seh thaʼsakotahónsathaʼte, wathotihénrethe, “Thorèsek ne Táwit ó꞉ni ne rahowátsire! Kát꞉ke onhtèken ne tkhènhne nahionhkhihiatséraʼse? Né tsiónhkwe Nisraerʼró꞉nonke, Áhnion tsi tewathénhti! Iawerohátien ne Rehoboam rahónha rathatsiatakéna!” Káti nonhkweshón꞉as Nisraerʼró꞉nonke tahotinákwen,

¹⁷ totʼiehénteron ne Rehoboam nek khók shakononhtí꞉iokwe tsi nihiákon né tsi wathonhontsáien ne Judah nónhwe niʼienákere.

¹⁸ Ethòne kíʼ ónen ne Ronhnontí꞉io Rehoboam iahó꞉nonhke ne Adoniram, né tsi rahónha ohénton iehá꞉thakwe ne kahioténhseras, né Nisraerʼró꞉nons iathahatiʼthá꞉ren, ók wahonwanenhióhiake nenhné꞉e tsi iathatikónhten. Ethòne kiʼ, ne Rehoboam kasterihénhke rahoserethákon otsónhkwa wahatítha tánon Jerusalem nónhwe iahatekwáhsen.

¹⁹ Ethohʼnáhe nonhkweshón꞉as nothorekésons nòkwahti ne tsi kanakeraseráien Nisraerʼró꞉nonke shiʼhonwatinenhróthanis tsi rathiwatsíraien ne Táwit.

²⁰ Nó꞉nen nonhkweshón꞉as Nisraerʼró꞉nonke sahatirihwáronhke né Jeroboam Egypt nathethawénon, wahonwahónhkaron nonkweshón꞉as skát꞉ke ahontkenhnísa tánon rahónha wahonwanontí꞉iosthe Nisraerʼró꞉nonke. Kwáh nék khók tsi ratitsiókwaien ne Judah shonwatirihwakweʼniénsthakwe ne Táwit rahowátsires.

Né Shemaiahʼs Tsi Niehorihwáken

²¹ Nó꞉nen ne Rehoboam shiaʼhárawe ne Jerusalem, skát꞉ke washakohiataróhrohke né 180,000 niháti né kwáh ratisohtarí꞉ios né tsi ratiʼtsiókwahien ne Judah ó꞉ni ne Benjamin. Eh nihonikonhró꞉thenhne nahateriʼiósehra tánon nahonsahakwahtháko tsi nathahontahaniarothárohke nothorekéson ratitsiókwahiens Nisraerʼró꞉nons.

²² Ók kíʼ ne Rawenni꞉io rohró꞉ri ne rotokenhséhakwe Shemaiah

²³ nahontaháwen kí꞉ken aterihwanothátsera ne Rehoboam ó꞉ni ratikwékon nonhkweshón꞉as ne tsi ratitsiókwahien ne Judah tánon ne Benjamin:

²⁴ “Tó꞉sa iashehiatsathónhti ne sewathátenonhkwes, né nonhkweshón꞉as Nisraerʼró꞉nonke. Sasewathénhti, sewakwékon. Tsi nahá꞉wenhne í꞉i akerihwatátʼtseras.” Ratikwékon kíʼ wahontewénhnarakwe ne Roiá꞉ner rahorihwatátʼtseras tánon sahonhthénhti.

Né Jeroboam Wahotsathonhthákwahse Ne Rawenni꞉io

²⁵ Né Ronhnonhtí꞉io Jeroboam ne Israerʼró꞉nonke wathanathánake ne tsi kanáthaien ne Shechem né꞉ne tsi ionhnonhtharónhnions kanakeraseráien ne Ephraim tánon thóh nónhwe nikarihwésha iehanákereʼkwe. Ethòne ónenh sahathénhti tánon iahathenhenhrónhni ne tsi tkanátaien Penuel.

^26-27 Rahonháke khók tsi wahénron, “Tsi nónhwa nihiothonhá꞉tie, tó꞉ka nakonhkwetaʼshón꞉ʼas Jerusalem nienhónhne tánon enhonwátatʼtse nahonwateskónhtʼthaʼse ne Roiá꞉ner thóh Nononhsatokentiʼkówaʼne, thóh nòkwah nien shón꞉ne rahonháke ne Ronhnonhtí꞉io Rehoboam ne Judah tánon enhionkenonwariákon.”

²⁸ Nó꞉nen sahanonhthonhniónko, tékeni té꞉ro owíra íken owistanoronhtseróskon wahatsathonhniserónhni tánon washakawénhase ne rahonkwetashón꞉as, “Ónen thóh tsi nikaríhwes Jerusalem niesewé꞉tha niahísewatherénhnaien. Tsiónhkwe Israerʼró꞉nonke, né kí꞉ken ne sewaní꞉ios íken né thetsitsihiatinekénhen ne Egypt!”

²⁹ Énska ne té꞉ro owíra í꞉ken nowistanóron kaiatónhni Bethel nónhwe iahá꞉ien tánon nó꞉ia Dan né nónhwe iahá꞉ien.

³⁰ Tánon káti nonhkweshón꞉as wahatirihwánerake, tsi thóh nónhwe wahonterenhnaiénhna ne Bethel ó꞉ni ne Dan.

³¹ Ne Jeroboam kwáh ó꞉ni waronhniánion nahionhterenhnaienthákwahke nonohtoharakésons, tánon washakohiatarakwenháton ne ratitsihénstatsis né꞉ne iáh Levi rahotiʼtsiokwáhkons tehatihiátare.

Né Tsi Ionhterenhnaienthákwahs Ne Bethel Wakarihwaiésha

³² Né Jeroboam kwáh ó꞉ni wahahianerenhserísha ne karihwiʼiosthónhtsera akakʼkhwárake né꞉ne wísk-iawénhre shískaʼre ne shatekonháton nenhwenhnítarake, kwáh ki tsi ní꞉ioht ne Judah nónhwe. Thóh ietsienharákwahke ne Bethel wahaterihwathénhtsate washakoteskóntʼthase ne owistanó꞉rons tèro owíras kaiatónhni í꞉ken né ró꞉sons, tánon thóh nónhwe ne Bethel nasakóteron ne ratitsihénstatsis nahonterihwatsʼtérisʼthe ne ionhterenhnaienthákwah ró꞉son.

³³ Tánon ne wískʼkhaton siwenhniserakéhaton ne shaʼtekónhaton siwenhnítare, né꞉ne wenhniseráte né rahónha roráhkwen, Bethel niaháre tánon ne wahaterihwathénhtsate nahateskónhten ne ietsienharákwahke nahontenikonhró꞉ri ne kakʼkhwáhere né rohianerenhseríhson Nisraerʼró꞉non rahotirihwáke.