1 Kings 11 - Ohiatonhseratokénti

Né Solomon Wahotsiathonthákwahse Ne Rawenni꞉io

¹ Ne Solomon kwáh íken tsi shakorihwaʼkweniénsthaʼkwe ne thihiononhontsátes konhnónhkwe. Tshieskàte ne sakoiénha ne Egyptró꞉non ronhnonhtí꞉io ne rotiniákon né꞉ne Hitró꞉non konhónh꞉kwes tánon ne konhónh꞉kwes ne Moab, Ammon, Edom, tánon ne Sidon nónhwe niʼtsonenónhsehron.

² Wahotiniákʼkon iawerohátien ne Roiá꞉ner tsi shakoró꞉ri Nisraerʼró꞉nons ne tó꞉sa thahonthatenákʼthen nètho onhkweshón꞉as, né enkarihónhni Nisraerʼró꞉nons enhontherihwató꞉kensʼte tsi nòkwah ne tikaniʼiosehrátes.

³ Ne Solomon tsáta tewenhniáwe nikónhti rothiniakónhne ne ronhtinonhtí꞉ios rahotihiathasehtseraʼsónhas tánon ó꞉ni áhsen tewenhniáwe nikónhti roskaraiénthaʼkwe. Onón꞉ha wakonhtirihónhni tsi wahotsiathonhthákwahse ne Rawenni꞉io,

⁴ tánon tsi nióre ne kwáh shiaʼhoksthénhaʼne tehonwanikonhrakénhnion nashakosenhnaienthákwahke ne thikaniʼioserátes. Iáh teshorihwatókenhne rahonháke ne Roiá꞉ner né Rahoní꞉io kènhne, tsi né nihiothónhne ne ronikénhen Táwit.

⁵ Né shaʼsénhnaiensʼkwe ne Astarte, né rahotiʼní꞉io kènhne ne Sidon, ó꞉ni ne Molech, né ahotehénsera ne Ammon.

⁶ Waharihwánerake tsi nòkwah ne Roiá꞉ner tánon iáh teshorihwatókenhne ne rahonháke tsi né nihiothónhne ne ronikénhen Táwit.

⁷ Né tsi ionónh꞉te nàkonh nòkwahti ne Jerusalem thóh nónhwe nahathenathónhni naʼkonhwasenhnaienthákwahke ne Chemosh, né ahotehénhsera íken ne Moab, tánon thóh nónhwe nenhkonhwaʼsenhnaienʼthákwahke ne Molech, né꞉ne ahotehénsehra íken ne Ammon.

⁸ Kwáh ó꞉ni wahakwahthakwenháton ne ionhterenhnaienthákwahs tsi nónhwe ne thihiononhontsátes ne rothiniákʼkhons ahónton nakonhtsáhaʼte ne kanethanórons tánon nakonhterihwathéntsaʼte nakonwanateskóntʼthaʼse ne onónha ahotiniʼiohokónhas.

^9-10 Ethosàne ne Roiá꞉ner, ne Sakoní꞉io Nisraerʼró꞉nons, tehiorihwáke rothotashiénhni ne Solomon tánon rorihwasthénhni né tó꞉sa ashakosénhnaien ne tikaniʼiosehrátes, ne Solomon iáh kíʼ tehowenhnarákwen ne Roiá꞉ner ók khèkenk wahotsathonhthákwahse. Káti ne Roiá꞉ner wahonákwahse ne Solomon.

¹¹ Tánon wahawénhaʼse, “tsioríhwa tsi kwáh thá꞉sehthe waʼtéshiaʼke ne saterihwaseronhniátsera tsi nòkwah í꞉i tánon waʼsatewenhnónhti naʼkerihwatátʼtsheras, Waʼkaráhratsʼthe tsi enhkhónkwah ne kanakeráhsera tánon ónhkak tsi niháti ne sonhkwetaʼshón꞉ʼas enthekhéhion.

¹² Ethosàne, né꞉ne iaʼníha rahorihwàke tsi iáh éhtho thá꞉tieʼre tsi nikaríhwes ensónhnheke, ók né kíʼ nó꞉nen ne etʼtsiénha enshoterihónthaʼke.

¹³ Tánon iáh kíʼ kanakerasehrakwékon thaíhkwah; khèkok, skenʼtiókwah enhiʼiénraʼse né꞉ne rahorihwàke nakenhátshera Táwit tánon ne Jerusalem ó꞉ni ahorihwàke, né꞉ne kanatowánen né wakatenatharáhkwen.”

Né Solomon Tehontátʼtsons

¹⁴ Káti ne Roiá꞉ner wahahiónhnien ne Hadad, né꞉ne kanonhtiʼiótshera kawátsire íken ne Edom, tahotirihwárahne ne Solomon.

^15-16 Wahónhnise ohénton ne kí꞉ken, nó꞉nen ne Táwit shasakosénhni ne Edom, né Joab né rasenhnowaʼnénhne kènhne ne rahotsiókwah ronhterí꞉ios thóh ièreskwe iashakohiatháta ne ronenhéions. Rahónha tánon ne rahonkwetashón꞉as Edom wahontserónhniaʼthe né꞉ne iá꞉iak niwenhnítake nikaríhwes, tánon thóh nikaháwi ratikwékon washakononhwarhiakónhnion ne rotiskenhrakéte

¹⁷ nék khók ne Hadad iáh tehononhwarhiákon tánon ne toʼkàra niháti ne roʼníha rahonhátsheras ne Edomró꞉nons nahatihiatótens, Egypt né nónhwe iahontekwáhsen. ( Né shikaháwi ne Hadad raksáha nènhne kènhne.)

¹⁸ Midian nónhwe tahonthénhti Paran niahónhne, thóh nónhwe thó꞉ka niháti ronónhkwe wahonhwanatsátarahse. Ethòne Egypt niahónhne tánon ronhnonhtí꞉ioʼke niahónhne, rahónha wahahóntsion ne Hadad tánon ó꞉ni kanónhsa tánon wahoiéritʼtse ne ká꞉khwah.

¹⁹ Ne Hadad wahiateroserónhni ne ronhnonhtí꞉io, tánon ne ronhnonhtí꞉io né꞉ne wahahonkwéton ne sakahonháfa nahotíniaʼke né Hadad, né tsathatekénha ne Ionontí꞉io Tahpenes.

²⁰ Roskenhrakéte wahotiwirahiénhtaʼne, Genubath wahonwaná꞉thonkwe, né꞉ne Ionontí꞉io rahwehiáron thóh kaontiʼiotserákon, thóh nónhwe skát꞉ke rathiterónhtaʼkwe ne ronhnonhtí꞉io roiénha.

²¹ Shiaʼharihwáronhke ne Hadad ne Egypt nónhwe nètho Táwit tsi rawehéion tánon ne Joab ne rasenhnowánenh íken tsi nòkwah ne rahtisó꞉tar tsi rawenhé꞉ion, ne Hadad wahawénhase ne ronhnontí꞉io, “Takeríhon akenakerasehrákon niahonsàke.”

²² “Nonhtsé꞉ren?” ne ronhnonhtí꞉io waharihwanónhton. “Onhkerihwaʼnó꞉ronh ken né thènhnen ahonthakonhiáwiʼke? Né kén ahoríhwa tsi í꞉sehre sanakerahseráhkon niahonshá꞉se?” “Kwáh nék takeríhon thóh niahonsàke,” ne Hadad tsi watorihwaʼseráhkwahse ne ronhnontí꞉io. Ók kíʼ rahonakerahserákon hionsá꞉re. Tsi ronhnontí꞉io íken ne Edom nónhwe, ne Hadad kwáh í꞉ken tsi ronhkwetákʼsenhne, kwáh í꞉ken tsi shakósonskwe Nisraerʼró꞉nons.

²³ Né Rawenni꞉io kwáh ó꞉ni wahahónhnien ne Rezon né꞉ne Eliada roiénha tahiatátʼtson ne Solomon. Né Rezon thohʼtehotékwaʼse ne roʼnáskwe, ronhnontí꞉io Hadadezer né Zobah nónhwe,

²⁴ tánon rahón꞉ha renhtsiokwahkweʼní꞉ioʼkwe ne sonhterihwaʼtewá꞉thas. (Thóh né kí꞉ken thóh nihiawénhen nó꞉nen ne Táwit sahosénhni ne Hadadezer tánon shakononhwarhiakónhnions ne Syriaró꞉nons thonatenhróhonhne.) Ne Rezon tánon ne rahotsiókwah Damascus nónhwe niahónhne thóh nónhwe ionhsahonthatíteron, thóh nónhwe ne thonwatswanónhnahkwe wahonwanontiʼiotserónhni ne Syria nónhwe.

²⁵ Né꞉ne shaʼkósonskwe Nisraerʼró꞉nons tsi nikaríhwes rónhnheʼkwe ne Solomon.

Ne Rawenni꞉io Tsi Nahorahrátsthen Ne Jeroboam

²⁶ Ó꞉ia ó꞉ni rónhnkwe né nònhne ne ró꞉sonhkwe ne Ronhnonhtí꞉io Solomon né꞉ne énska né kwáh rahónha rahonhátshera íken, né꞉ne Jeroboam né roʼníha né꞉ne Nebat, né꞉ne Zeredah nónhwe nihaná꞉kereʼkwe ne Ephraim ahotonhontsáke. Né ronisténha iakoterehónskon Zeruah hionthátsiasts.

²⁷ Né kí꞉ken ne ká꞉kara tsi nonhtahothinákwen. Né Solomon rotsokowanahonhátie ne tsi ionhontsáien né ná꞉kon nòkwahti ne Jerusalem tánon shokwahtakwenhátse ne tekanathanákʼtons tsi waténhraiens ne kanatowanénhke.

²⁸ Né Jeroboam kén nithohiónha tánon akwékon tiehokwénion, tánon nó꞉nen ne Solomon wahát꞉thoke tsi niehát꞉resks nó꞉nen enhohióten, rahón꞉ha wahorihónhten akwékon ahathenhnikonhráren tsi nikahiothenhseroténsons kahiothenhseráiens ne tsi wathonhontsáiens ne Manasseh tánon ne Ephraim nónhwe.

²⁹ Énska kíʼ nenhné꞉e, ne Jeroboam tsi naʼtehostikafhátiesʼkwe tsi nonhtáre ne Jerusalem, ne rotokenhséhaʼkwe Ahijah né꞉ne Shiloh nónhwe nihanákereʼkwe rahonhatsíwa khók tsi watʼthiatátken nowahàke né kahentháke nónhwe.

³⁰ Né Ahijah waharíhsi ne á꞉se rotsathawitonhátieʼne ne wakóses, tékeni iawénhre nikenhná꞉khés tsi ní꞉ioht tsi waharatsónko,

³¹ tánon wahawénhaʼse ne Jeroboam, “Oiéri nikenhná꞉kes í꞉se satiénawast, tsioríhwa ne Roiá꞉ner, né Sakoní꞉io Nisraerʼró꞉nonhke, iaró꞉ris, ‘Enhiʼnonhtiʼiotserákwah ne Solomon, tánon oiéri nikentsiókwahkes í꞉se entkontsokwahkweʼní꞉iosthe.

³² Né Solomon skentsiókwak khók enshakoteweiénton né rahorihónhniat nakenhátsera Táwit tánon né rahotirihwáke ne Jerusalem, né꞉ne kanatowanénhke né waʼkathaterakwénhni nahonkawenhkónhweʼke tsi nihiohón꞉tsa Nisraerʼró꞉nonhke.

³³ Thóh kí nénhtiere tsioríhwa ne Solomon tsi né washakosénhnaien ne thikaniʼioserátes: né꞉ne Astarte, né rahotiní꞉ios ne Sidonró꞉nons; ne Chemosh, ne raotiní꞉io ne Moab; ó꞉ni ne Molech, ne raotiní꞉io ne Ammon. Né Solomon kwáh kíʼ wahakewenhnónhti; tehoterienhthaweriéhon tánon iáh tehotsenawáston naʼtianerénhseras ó꞉ni nakerihwatátʼtieras tsi né niʼiohthónhne ne ronikénʼen Táwit.

³⁴ Ók iáh kíʼ kanonhtihiotseraʼkwékon thahíkwah ne Solomon, Enhiʼríhon nahononhtí꞉ioʼke tsi nikaríhwes enhrónnheke. Thóh kí꞉ken nénhtiere né rahorihwàke nakenhátsera Táwit, tsi rahón꞉ha rihiatharákwen tánon kíʼ roʼtewenhnarákwen natianerénhseras ó꞉ni nakerihwatátʼtieras.

³⁵ Kwáh kíʼ nènhneʼe enhiʼnonhtiʼiotserákwah ne Solomon roiénha tánon í꞉se oiéri nikentsiókwahkes entkónhion,

³⁶ ók kíʼ skenhtsiókwah enhitsiókon ne Solomon roiénha, né káti nahontienhthake né tiókonhte tsi ienhatwatsiríhne nakenhátsera Táwit nahonatʼkorasthónhake ne Jerusalem, né꞉ne tsi kanatowanénhke ne wakathaterakwénhni tsi nónhwe nenh hiontsenhnaienthákwahke.

³⁷ Jeroboam, kwáh í꞉se enkonhnonhtí꞉iosʼthe ne Israerʼró꞉nonhke, tánon kwáh í꞉se ensatʼkórasʼthe kanakerasehraʼkwékon tsi nónhwe nénhsé꞉re.

³⁸ Tó꞉ka kwáh toʼkénʼen enskewénhnaraʼkwe, tánon tsi enshón꞉nheke né énhtsere natsanerénhseras, tánon né enserienhtí꞉iosʼthe tsi thóh nénhshiere tsi niwakerihwatháton, tsi né niʼiohthónhne nakenhátsera Táwit, kwáh kíʼ tiókonhte tsi entenikweʼkónhake. Kwáh í꞉se enkonhnonhtí꞉iosʼte Nisraerʼró꞉nonhke tánon kwáh orihwí꞉io enkónhni tsi nienhsatwatsírihne né thenhtsesanakthákwen, kwáh kíʼ tsi nihihiatiéraʼse ne Táwit.

³⁹ Tsioríhwa tsi nihorihwanerahákskon ne Solomon kwáh kíʼ enkheréwathe tsi nienhatwatsírihne ne Táwit, ók iáh kíʼ tsahontkónhthaʼkwe.’”

⁴⁰ Tánon ki ne Solomon wahatheniénhten nahononhwarhiákon ne Jeroboam, ók tsi thénhteron ne Ronhnontʼi꞉io Shishak ne Egypt nónhwe iahatekwáhsen tánon thóh nónhwe iehenterónhtaʼkwe tsi nióre iarénheʼie ne Solomon.

Shaʼrénheʼie Ne Solomon

⁴¹ Kwáh akwékon tsi nihotseránions ne Solomon, tsi nihononhtí꞉ioʼkwe, tánon ne rahotʼthokhátseras, akwékon thóh nónhwe nikahiatónhnions Tsi Nihonwakáraton ne Solomon.

⁴² Rahónha ronhnonhtí꞉ioʼkwe ne Jerusalem né꞉ne kaiéri niwásen nihioseráke nikaríhwesʼkwe.

⁴³ Warénheʼie tánon Táwit rahonáthakon nónhwe nihonwahiatháten, tánon né꞉ne roiénha Rehoboam teshóonatʼthakwénhni tsi ronhnonhtí꞉ioʼkwe kènhʼne.