1 Kings 10 - Ohiatonhseratokénti

Tsi Wahakonatarénaʼse Ne Ionhnontí꞉io Ne Sheba

¹ Né Ionnontí꞉io Sheba wakarihwáronhke tsi nihasenhnowánen ne Solomon, tánon Jerusalem nónhwe niahá꞉he nahothenhniénten ne waterihwenhtó꞉res tsi ní꞉ioht tsi ahorihwanonhtonhniónhaʼse.

² Tahiakohiathénhaʼwe ronatsokowánen nahonhatserahókons, tahiakoiathénhaʼwe ó꞉ni nahotsenenhókons ne rotiniakwáhere rothireniakéte ne iontekhwakonhonsthákwahs, owistanoronhsónhas, tánon iawetowánen owistanóron. Né nó꞉nen sathiatátken ne Solomon, iaʼtèkon tsi ní꞉ioht tsi wahorihwanonhthonhniónhase nawehiáraʼne.

³ Akwékon káti niatarihwasehráko; kwáh iáh thaʼhóten tewaterihwenhtó꞉re ne rahorihwáke nahanikonhraiénthaʼte.

⁴ Né Iononhtí꞉io ne Sheba shònhronhke ne rahototkhátseras ne Solomon tánon onhtkátho ne rononhshíson tsi ratienthákwah.

⁵ Onhtkátho ne kákhwa rothikwáhere ne rahothekwáhraʼne, ne rahonanitskwahrasónhas ne rahonkwetaʼshón꞉as, tsi naʼtehatirihwásnie ne rahonhatserasónhas, ne rahonatʼtserónhnias, ne ratikwahé꞉ra, tánon tsi nihateskonthákwah nononsatokentiʼkówaʼne. Kwáh tsi ní꞉ioht nonhtonhniseráton tánon wahorihwaneráko.

⁶ Wahawénhase ne Ronhnonhtí꞉io Solomon, “Tsi nahó꞉ten wakarónhken nakenakeraserákon ne sarihwáke tánon tsi nòkwah ne sathotkhátseras tsi kwáh tó꞉kenske thoʼní꞉ioht!

⁷ Ók iáh kíʼ tethewakethákwen tsi nióre ne kwáh éntke tánon orihwakwékon í꞉i enkatkátho. Ók iáh kíʼ akwékon nasénhnon tewakarónhken; Asèken ne satʼthokhátsera ó꞉ni ne sakwahsétseras sénha tehiotenonhianíton tsi ní꞉ioht tsi ionkró꞉ri.

⁸ Tsi nióre tsi ionateraswí꞉io ne tesewénhterons! Ó꞉ni tsi nihonateraswí꞉io ne sanhatserahókons, né꞉ne tiotkonhónwe sahénton rónhnes tánon ronateraswí꞉hio nahonatʼthónteʼne ne satʼthokhátseras tsi nisathónhnions!

⁹ Tehonwanonweráton ne Roiá꞉ner Saní꞉io íken! Warénesʼthe tsi nihawerienhtí꞉ios tsi nòkwah níse ne tsi wahianonhtí꞉iosʼthe Nisraerʼró꞉nonhke. Né wakarihónhni Nisraerʼró꞉nonke tsi né nènhwe tsi enhanorónhkwahke, í꞉se ne raotinonhtí꞉io wahiónhni ne káti nahónton ne tiókonhte nahisatienawastónhake ne kaianerénhsera ó꞉ni naʼterihwakwahrihshiónhtseras.”

¹⁰ Taháwenh natathawítseras né tiohá꞉seron: thó꞉wah káknonh ne oiéri tewenhniawehetserásen nikakonhtseráke nihióksthe owistanó꞉ron tánon kwáh íken tsi iawetowánens ne ionhtekhwakonhonsthákwahs ó꞉ni nowistanoronhsónhas. Tsi nihiawetowánen ne ionhtekhwakonhonsthákwah wahá꞉wen né tsiahonháha tsawetowánen tsi níkon ahoienáhonhke tsi nitsawénon.

¹¹ Ne Hiram rahonwehiasónhas, tsi nitsotíha nowistanó꞉rons ne Ophir nónhwe, thóh nònhne nitkáha ne Juniper oswénhkares tánon nowistanoronhsónhas.

¹² Ne Solomon noswénhkares né꞉ne wárasʼthe tsi waʼrónhni ne wathenhenrá꞉here Nononhsatokentiʼkówaʼne ó꞉ni ne tsi ronhnónhsohte, tánon ó꞉ni né nònhne ahionhniáthonhke ne karenhshó꞉taron onowaʼkówa ó꞉ni ne iehonrawátstha né ronhterenhnhó꞉tha áhonsthe. Né꞉ne Juniper tsiahonháʼa tkaientí꞉io tsi níkons nó꞉ientes nonhwénhton iekáha ne Israerʼró꞉nonhke; iáh shé꞉kon nonhwénhton teshonatkáton né nakaienhthoténhake.)

¹³ Ne Ronhnonhtí꞉io Solomon tá꞉ron ne ionhnontí꞉io Sheba kwáh akwékon tsi nahó꞉ten wakarihwanónhton, ó꞉ni ne iehiowenhténions tsi niʼiorennháon nathatawítseras nètho tsi nithoterihwaierítston ráh꞉wi. Ethòne kíʼ nahónha ó꞉ni nahonhatseraókons tsi tionhontsáien ne Sheba nionhsahónhne.

Ne Ronhnonhtí꞉io Solomon Rahokwahsétsera

¹⁴ Kwáh iatehioseráke ne Ronhnonhtí꞉io Solomon wísk-niwáhsenh niwenhniawehetserásen nikakonhtseráke owistanó꞉ron rahiénasʼkwe,

¹⁵ thiká꞉te tsi nihonwakarhiakséhaʼkwe ne ronahthenhninonhseró꞉tons, tsi nihonatwistonhníhon tsi naʼtehonathatawíhon, tánon nowísta rotikarhiáktons ne Arabiaró꞉nons ronhtinonhtí꞉ios ó꞉ni ne ratikoráhsons ne Israerʼró꞉nonke wathonhontsáiens.

¹⁶ Né Solomon tékeni-tewenhniáwe níkons kowánens waronhniánion ne iontrenhósthákwah tánon né skát꞉tsons watewatnatnátharon kák꞉nonh né wískʼiawénhre nikakonhtseráke owistanó꞉ron.

¹⁷ Tánon ó꞉ni ásen-tewenhniáwe níkons ne kenhniwásas waronhniánion ne ionhrenhosthákwahs, né skát꞉tsons kák꞉nonh ne kaiéri nikakonhtseráke owisʼtanóron watewatnanétha. Akwékon kí꞉kens thóh nónhwe iahathakweʼniáien tsitʼkanónhsohte ne Lebanon karáhkon

¹⁸ Kwáh ó꞉ni wanitskwahratserowánen wahathanitskwahraʼtserónhni. Tó꞉ka nihiokwénhrare kanakaráken waharóhroksthe tánon ne kén iotsétons né꞉ne wá꞉ratsʼthe ne kwáh tkawistanoronhtserí꞉io.

^19-20 Né tsi tewanitskwahrahtseró꞉the iá꞉iak nihioteratʼthéntseronhte nióre éhʼneken ítken, kénreks ronwatihiathonhniánions ne tsi iehiotʼthónhnions naʼteratʼthénhtseras, tekeniʼiawénhre níkons ne kénreks ronhwatihiathonhniánions. Nonàken nòkwah nanitskwáhra tèro né ronhwanonhtsisthonhniáton né ioranenhtákon, tánon ne skatísons né tsi tehiontenenstsará꞉kwahs kénreks nènhne ronhwatiʼiatonhniánions. Iáh nonhwénhton shé꞉kon né nahonhnitskwahrastserothénhake teskaiénthaʼkwe nakthenónhwe nakanonhtiʼiotseraiénthake.

²¹ Akwékon ne Solomon tehatnekonhthákwahkwe kát꞉tses owistanó꞉ron nahó꞉ten ionhniáton, tánon akwékon ne tehionskahónkwahs owistanó꞉ron nahóten ionhniáton ne tsitkanónhsoʼthe ne Lebanon karáhkon tkáien. Iáh thahóten ne kawistaráken tehónsthaʼkwe, né tsi iáh tsatekaiéri tsi nikanó꞉ronhke ne shiʼhotenhniseraténionsʼkwe ne Solomon.

²² Wé꞉so ronhonwaiéntaʼkwe né kaniatarakekówaʼne skát꞉ke kontʼtsirótʼthakwe ne Hiram rahonweiasónhas. Tiókonhte ne áhsenh nihioseráke skónʼneskwe ne rahonweiakówas, owistanó꞉rons, kawistarákens, kanakarará꞉kens, katsinonhtaksʼsonhkónhas, tánon skaʼnaiekówa.

²³ Ne Ronhnonhtí꞉io Solomon sénha rokwáhtshene ó꞉ni ratʼthókhaʼkwe tsi ní꞉ioht ne akó꞉ren ronhnonhtí꞉io akénhake,

²⁴ tánon kwáh ohontsakwékon tehiakotonhontsoníhne ne thóh iáhien tánon ahiontahónsathaʼte natʼthokhátseras ne Rawenni꞉io thó꞉wi.

²⁵ Nónhka enthonwanatharénhsera knahó꞉tenk enthonwahawíthaʼse nahón꞉hion—né꞉ne knahó꞉tenk kawistaráken tánon owistanó꞉ron, wakó꞉ses, ionhterihiosthákwah, hionhtekhwakonhonsthákwahs, akoshá꞉tens, tánon tewahóntes. Iehiokonhthákwenh kí꞉ken nóhsera tehiokwáhthaʼse thóh ní꞉ioht.

²⁶ Ne Solomon wahanitsiokónhni né kaiéri-iawénhre tewenhniáwe nikaseréthakes notsónhkwahs tánon tekeniʼiawénhre-tewenhniawehetserásen niháti ne rotisháthens nónenh enhonterí꞉io. Kwáh thóh tsi niháti Jerusalem nónhwe nashakóteron tánon ne ronátsakes tsik né nonhwéson ne tsi kanatowánens washakóteron.

²⁷ Tsi nikaríwes ronhnonhtí꞉ioʼwe ne kawistaráken thóh nikanákereʼkwe tsi ní꞉ioht nonénhias, tánon ó꞉ni nonenhthakwénhte thóh nònhne nikanákereʼkwe tsi kíʼ ní꞉ioht ne Sycamore tsi keríhtons ne tsi iononhthaienhtháseron ne Judah.

²⁸ Né ronhnonhtí꞉io rahonkwetaʼsonhas né thotiniarótharonhne tsi nihatenaskwahnínonskwe né Musri nitkonhnéthaʼkwe; ó꞉ni ne Cilicia,

²⁹ tánon tsi nihateseretanínonskwe notsónhkwahs né Egypt nikhonhné꞉thaʼkwe. Né teshakokʼkawenhníhaʼkwe ne Hitró꞉nons tánon ne Syriaró꞉nons ronhtinonhtí꞉ios ne koshá꞉tens ó꞉ni notsónhkwas káseres, 600 nikawístakes kawistarákens raná꞉thonsʼkwe ne skaserétas tánon 150 né skanáskwah koshá꞉tens.