1 Kings 1 - Ohiatonhseratokénti

Ne Ronhnonhtí꞉io Táwit Ónen Shiʼhoksténha

¹ Ne Ronhnonhtí꞉io Táwit ónenh kwáh thóh tsi nihosksthénha, tánon ethosáne ne rahonhatseraʼsónhas áhsires wahonwáraʼse, iáh kíʼ tewátonskwe nahohiathataríhen.

² Sók kíʼ ne rahonkwetaʼshón꞉as wahonwénhase, “Sanontí꞉io, takwahríhon ne kén nitsohiónha iahiakwahiathisákʼkha né skát꞉ke ahiseniterónhthake tánon ne tahisarihwásnieʼse. Kwáh tsatákʼtha enwáraʼte tánon ensahiathataríhaʼthe.”

³ Kwáh íken tsi akwékon nonhtahónhnethe ne Israerʼró꞉nonhke tsi wakonhwahiatisáke ne watkathohtsherí꞉io ken nitsohiónha, tánon kiʼ Shunem nónhwe nakonhwahiatatʼtsénhrih ne iónhkwe Abishag konwáiatsts, tánon ronhnonhtí꞉ioke niakonhwahiathénhaʼwe.

⁴ Kwáh íken tsi watkathotsherí꞉io, tánon wathorihwásnieʼse ne ronhnonhtí꞉io ó꞉ni wahothenhnikonhráren, ók ne ronhnonhtí꞉io iáh kíʼ theotinawi꞉on.

Adonijah Wahaské꞉na Nanitskwáhra

^5-6 Kíʼ tsi ónenh rawenhéion ne Absalom, ne Adonijah rahónha tokʼsténhaʼkwe, né꞉ne roʼníha ne Táwit tánon né ó꞉ni iathatekénha ne Haggith. Kwáh íken tsi ronhkwetí꞉iohne. Né Táwit iáh nonhwénhton tehotewenhnaienthónhon né tsit nahó꞉ten akénhake, tánon raskánekskwe ne rahónha ahatenonhtí꞉iosʼthe. Wahathatesehrethawíhon notsónkwas, tánon kosáhtens, tánon wísk-niwásen niháti ronónh꞉kwe nahonwahʼiatanonhnatiésheʼke.

⁷ Joab watnhitháren (né꞉ne ronwaiénha ne Zeruiah tánon ne Abiathar né꞉ne ratsihénstatsi íken), tánon wahonwararátsʼthen tsi enthonwatswanónhna tsi níhreʼre.

⁸ Ók ne Zadok né ratsihénstatsi, tánon ne Benaiah né꞉ne roʼníha ne Jehoiada, tánon ne Nathan rotokenséhakwe nenhné꞉e, tánon ne Shimei, Rei, tánon ne Táwit ronwahiathanónhnaʼkwe iáh nenhné꞉e Adonijah tethonwatswanónhnen.

⁹ Énska wenhniserátheʼkwe ne Adonijah waʼsakoteskónhthen ne teiotinakaronhtónhʼas, tèro, tánon né ionaresénhsens tiohnhónskwarons owíras né Snake Rock nónhwe, ákta ne tsi tsonáweroʼtes ne Enrogel. Waʼsakohónkaron ne ronátsakes ne Ronhnonhtí꞉io Táwit sakohiohokónhas tánon ne ronhnonhtí꞉io rahonhatserahókons né꞉ne Judah nithonénons nahonthahónhne tsi nihotéskonhte rokʼkwáhere,

¹⁰ ók iáh kíʼ nènhne tehohonkaráwi ne asénhnon nihiathatekénha Solomon ó꞉ni ne Nathan né rotó꞉kenhse ó꞉ni ne Benaiah ó꞉ni ne ronhnonhtí꞉io ronhwahiathanónhnah.

Solomon Wahonwanonhtí꞉iosʼthe

¹¹ Ethòne ne Nathan Bathsheba wahatkénsehra, né꞉ne Solomon ronisténha, tánon waharihwanónhtonhse, “Iáh kén tesarihwarónhnen nètho Haggith roiénha Adonijah rahónha wahathatenonhtí꞉iosʼthe? Tanon ne Ronhnontí꞉io Táwit kwáh iáh othènen teharihwaienthénhri!

¹² Tó꞉ka tesatonhontsóni nasehnónsthaʼthe tsi sónnhe tánon ne tsi rónnhe né tshiénha Solomon, akonhiatenikónhronh kíʼ

¹³ ónenk Ronhnontí꞉ioʼke Táwit niaháse tánon et tserihwanónhtons, ‘Sanontí꞉io, iáh kén kwáh tesarihwaniráton tsi takararatsʼthénhni tsi rihiénha Solomon teshianakʼthákwen tsi sanonhtí꞉io íken? Ónh káti ní꞉ioht, káti, tsi Adonijah wahononhtí꞉iohne?’”

¹⁴ Tánon ne Nathan iahá꞉iesʼte, “Étho kíʼ, tsi nikaríhwes shé꞉kon tesehníthare ne Ronhnontí꞉io Táwit, entkatháwehiaʼthe tánon akwékon enkerihwanírate tsi nishá꞉ton.”

¹⁵ Káti ne Bathsheba iahá꞉he wahotkénhsera ne ronhnonhtí꞉io tsík thanonhwéststha iahonhtháwehiaʼthe. Kwáh íken tsi rokstenháhon, tánon ne Abishag, ne kén nitsohiónha né Shunem nitsawénon, ahónha tehorihwasnieséhaʼkwe.

¹⁶ Ne Bathsheba kwáh íken tsi ehtàke watewatʼtsákete rahohénton ne ronhnonhtí꞉io, tánon waharihwanónhton, “Nahó꞉ten tesatonhontsóni?”

¹⁷ Watʼkarihwasehráko, “Sanonhtí꞉io, kwáh í꞉ken tsi iorihwaníron tsi ní꞉ioht tsi takararatsthénni rahosénhnakon ne Roiá꞉ner Saní꞉io nètho rihiénha Solomon tsi rahónha ensatenonhtí꞉iosʼthe tsi tenshianatʼthákwen.

¹⁸ Ók kíʼ Adonijah ónenk shoʼtenonhtiʼióston, tánon iáh othènen tesehrihwaienhtéri.

¹⁹ Kwáh sakotéskonhthe ronatsiokowánen tèro, teiotinakaronhtónʼa, tánon ne ionarésens tiohnhónskwahron owíras, tánon sakohonkaráwi ne sehiohokónhas, tánon ne Abiathar ne ratsihénstatsi, ó꞉ni ne Joab ne raterihiosehrakweʼní꞉io ne tsitʼkhatʼkhwáhere, ók iáh né tehohonkaráwi ne ehʼtshiénha Solomon.

²⁰ Sanontí꞉io, onhkwetaʼkwékon Nisraerʼró꞉nonhke í꞉se teiesakánere nasheróri ónhka tetsitiathaʼsonhteráko tsi enhonhnonhtiʼióhake.

²¹ Tó꞉ka iáh, kwáh tsi niiostó꞉re ensí꞉heie, né riʼiénha Solomon tánon ní꞉i kwáh èhtho nenhionkhiʼiéraʼse tsi sí꞉ken ní꞉ioht ne tahionhkeniʼnioskénhen.”

²² Shékonk shiʼhiótare, ónenh ne Nathan wará꞉we ne tsi kanonhtiʼiotseráien.

²³ Ne ronhnonhtí꞉io wahonwaró꞉ri ne rotó꞉kenhse tsi thóh wará꞉we, tánon ne Nathan iahatháwehiaʼte tánon watʼtatʼtsákete rahohénton ne ronhnonhtí꞉io.

²⁴ Ethòne wahénron, “Sanontí꞉io, sarihowanáhton kén nètho Adonijah tsi rahónha thenshianakʼthákwen tsi ahononhtiʼióhake?

²⁵ Kwáh ónhwa wenhnisehráte ehniehawénon tánon sakoteskónhtha rohnatsokowánen tèro, teiotinakaronhtónʼas, tánon ne ionarésenhs tiohnhónskwahrons owíras. Rathikwékon sakohonhkaráwi ne sehiohonkónhas, tánon ne Joab ne raterihiosehrakweʼní꞉io sonhkwéta, tánon ne Abiathar ne ratsihénstatsi, tánon kwáh ónhwa thóh nahthekhwáhere skát꞉ke ne rahónha tánon tehothihenrénhtha, ‘Karíhwes rónnhek ne ronhnonhtí꞉io Adonijah!’

²⁶ Ók iáh kíʼ ní꞉i tehakonhkaráwi, sénshie, ó꞉ni ne Zadok ne ratsihénstatsi ó꞉ni ne Benaiah ó꞉ni ne Solomon.

²⁷ Kwáh kén oriwakwékon rorihwaniráton ne Ronhnonhtí꞉io kí꞉ken tánon akwékon iáh thesehró꞉ri ne sonkwetaʼshón꞉has ronaterihóntons ónhka tahonsahiesanatʼthákwen tsi sanonhtí꞉io íken?”

²⁸ Ne Ronhnonhtí꞉io Táwit wahénron, “Sheʼrihwanónhtons ne Bathsheba tahontahionhtháwehiaʼthe”—tánon tonthonthá꞉wehiaʼte tánon rahohénton wakʼkáthaʼne.

²⁹ Ethòne ónenh waharó꞉ri, “Wakonhiaráratsʼthe tsi nirónnhe ne Roiá꞉ner, tsi nikáien né sakeniakénton tsi nòkwah norihwakwékon tsi naʼtewakenikonhrárahkwe,

³⁰ kíʼ nónhwa wenhniseráte kwáh enkhatiénawasʼthe tsi niwakarahrátsʼton tsi nihkonhiarahratsʼthénhni thóh rahosénhnakon ne Roiá꞉ner, ne Raní꞉io Nisraerʼró꞉nonke, nètho ehʼtshiénha Solomon tsi tenshakenakʼthákwen tsi niwakenonhtí꞉io.”

³¹ Ne Bathsheba ehtàke watewakʼtsákeʼte tánon wakénhron, “Aiáwens Natiáner ne ronhnonhtí꞉io karíhwes arónnheke!”

³² Ethòne ne Ronhnonhtí꞉io Táwit iashakónonhke ne Zadok, Nathan, tánon ne Benaiah. Nó꞉nen sonhthahontáwehiaʼte,

³³ washakawénhaʼse, “Í꞉se iahetsihiathénhaf nakonhkwetaʼshón꞉as ne tehiehiatorethákwah ronaterihónhtons; né rihiénha Solomon rahón꞉ha rosháthen nakitshénenh tewahóntes, tánon iasewateró꞉sen tsi niahí꞉sewe ne Gihon Tsonáweroʼte,

³⁴ tsi nónhwe ne Zadok tánon ne Nathan enthonwarihwaníratʼtse tsi ronhnonhtí꞉io íken Nisraerʼró꞉nonhke. Ethòne ónenh sewahonráwat tánon tesehwahénret, ‘Karíhwes rònnhet ne Ronhnonhtí꞉io Solomon!’

³⁵ Thontatʼtsisehwáser né kénhʼen tánon nó꞉nen ienhanitskwáhren nakanitskwáhraʼne. Kwáh kíʼ thenhshakenatʼthákwen tsi wakenonhtí꞉ioʼkwe, tsioríhwa tsi rahónha rihiataráhkwen ne ahatkórasthe Nisraerʼró꞉nonke ó꞉ni ne Judah nónhwe.”

³⁶ “Kwáh thóh nenhiáwenhne,” tsi watharihwaʼsehráko ne Benaiah, “tánon aiáwens ne Roiá꞉ner Saní꞉io aharihwaníratsʼthe!

³⁷ Tsi kíʼ ní꞉ioht ne Roiá꞉ner tsi sehnikweʼkónhne Sanonhtí꞉io, aiáwens kíʼ nònhne ne Solomon anikwekónhake tánon né arónhniaʼthe ne rahononhtiʼiótsera sénha ahiokwásthonhke tsi niʼiohthónhne ní꞉se.”

³⁸ Káti ne Zadok, Nathan, Benaiah, ó꞉ni ne kanonhtiʼiótsera ronhwatiʼhiathánonhne, ne Solomon Ronhnonhtí꞉io rahotshénen tewahóntes kahiáthake wahonskwáhren tánon wahonthenró꞉sen tsi niahónhne ne Gihon Tsonáweroʼte.

³⁹ Zadok iahá꞉hawe ne kátʼtse ne iakenhiewátha kénie wateienaráhkwah né꞉ne thóh nónhwe nithóha tsi tewathohseroʼte tsi thénhteron ne Roiá꞉ner, tánon wahawehieráro ne Solomon. Wahonthátisʼte ne iehonrawátstha, tánon onhkwetakwékon watsakohénreʼthe, “Karíhwes rónhnhek ne Ronhnonhtí꞉io Solomon!”

⁴⁰ Ethòne kíʼ ónenh ratikwékon sahonwásehre ne Solomon Jerusalem hionsahónhne, tehothihenrétaʼne tsi nihonatʼtsenhnonhnihátie tánon ronaterenhnothátie ne ohoró꞉ta ionterenhnó꞉thas, thoʼnióre tsi ronatʼtsarokwahthonhátie kwáh ahónton ne tahiahontsísonhkwe tsi rónhne.

⁴¹ Káti ne Adonijah ónenh thó꞉wa sahonáthaʼne, wahonatʼthónteʼne tsi nihiotsaró꞉kwen. Tánon nó꞉nen ne Joab wahó꞉thonhtene ne iehonrawátstha, waharihwanónhton, “Nahóten kéntons tsi nihiotsaró꞉kwen kí꞉ken kanátakon?”

⁴² Nohénton iahatewenhnók꞉then, Jonathan, né roʼníha ne ratsihénstatsi Abiathar, ehʼwáraʼwe. “Tasatháwehiat,” Adonijah wahénron. “Thiʼsarihwaiéri shón꞉kwe—kwáh toʼkáha tsi karihwí꞉io serihwenháwi.”

⁴³ “Iáh ónhte,” tsi watharihwasehráko Jonathan. “Né Ronhnonhtí꞉io Táwit Solomon wahononhtí꞉iosʼthe.

⁴⁴ Káti ne ronhnonhtí꞉io skát꞉ke iashakoténieʼte ne Zadok, Nathan né꞉ne rothó꞉kenhse, Benaiah, tánon ne kanonhtiʼiotserákon sakotihiatanónhnas nahontheró꞉sen. Tánon né wahoshathénsthaʼkwe ne ronhnonhtí꞉io rahotshénen tewahóntes,

⁴⁵ tánon Zadok ó꞉ni Nathan wahonwarihwaníratʼtse tsi wahonhnonhtí꞉ioʼne ne tsi tsonaweró꞉the ne Gihon. Ethòne kíʼ ónenh kanatowanénhke nionhsahónhne, tehotihenréthaʼne tsi nihonahtsenhnonhnihátie, tánon kíʼ ónenh nonhkweshón꞉has iakotenikonhró꞉ri. Né thíken wesatʼthónhteʼne tsi nihiotsaró꞉kwen.

⁴⁶ Solomon ónenh ronhnonhtí꞉io íken.

⁴⁷ Sénha kíʼ íshiʼnon tsi nahá꞉wenhne, ne teiehiathorethákwa ronaterihóntons iahónhne ne tahonwanonhweráton ne Ronhnonhtí꞉io Táwit tánon wahonhníron, ‘Aiáwens kíʼ ne Saní꞉io nahahiónhnien ne Solomon sénha ahasenhnowanénhke tsi ní꞉se niʼiohthónhne, tánon aiáwens ne Solomon tsi rononhtí꞉io íken sénha kíʼ ahokwahtsʼtónhake tsi niʼiohthónhne ní꞉se.’ Ethòne ki ne Ronhnonhtí꞉io Táwit watatʼtsákeʼte wahaterénhnaien rahonákʼthaʼke

⁴⁸ tánon wahaterénhnaien, ‘Thóh teninonhweráton ne Roiá꞉ner, ne Sakoní꞉io Nisraerʼró꞉nonhke, ónhwa wenhniseráte wahahiónhnien saiáta ne tsi kwahtsiraʼthátie wahononhtí꞉iosʼthe, tánon wahakeríhon ní꞉i akatʼkátho!’”

⁴⁹ Ethòne ne Adonijah ne sakohonhraráwiʼne wahonateronhniénhthen, tánon ratikwékon thonhsahatítaʼne sahonthénhti, satihiatátʼtsons tsi nónhwe nionhsahónhne.

⁵⁰ Ne Adonijah kwáh íken tsi roʼtsánisʼkwe ne Solomon, thóh niaháre tsi tewathohsehróthe tsi nónhwe thénhteron ne Roiá꞉ner tánon tsi tekahiósaien ne ientienharákwa wahaiéna.

⁵¹ Ne Ronhnonhtí꞉io Solomon wahonwaró꞉ri né Adonijah tsi tekahiósaien ne ietienharákwah roienawákon tánon rá꞉wenh, “Né tiotserenhthákwen, tewakatonhontsóni ne Ronhnonhtí꞉io Solomon nahakerihwaníratsʼtse tsi iáh thahakenonhwarhiákon.”

⁵² Solomon watharihwasehráko, “Tó꞉ka rorihwathóken, iáh shékon ne skanonhkwísera ne ranonhtsíne tshiakaié꞉nenʼke; ónh kíʼ tó꞉ka iáh, kwáh kíʼ enrénheie.”

⁵³ Ne Ronhnonhtí꞉io Solomon ethòne kíʼ ónenh iahoterihwaʼniénhthen ne Adonijah tánon thontahonwahiatátsʼnenhte ne ietienhará꞉kwahke. Adonijah ronhnonhtí꞉ioʼke niaháre tánon rahohénton wathathentʼtsóten, tánon ne ronhnonhtí꞉io wahawénhase, “Enwáton nahonshasaténhti.”