1 Corinthians 7 - Ohiatonhseratokénti

Ahieriwísake Tsi Nòkwa Ne Kaniákʼtshera

¹ Ónen, kén niaʼitewáhiere tsi naorihoténsons ne sahiáton. Ashíron nètho rónkwe roʼianerasténhnis ne iáh thaoniakon.

² Nók né aoríwah tsi niwéso ne kaweienʼnákʼsens, kwáh niaʼtehionkwétake ioteriwíson ne aoniákonke, tánon kwáh niaʼtewahthonwisentsheráke ioteriwíson nahioniákonke.

³ Ne rónkwe tánon ne tiotʼtonwísen kwáh tehnitiáron tsi ronahteriwahiénni nahní꞉nahʼne tsi rotiniákon, tánon snihiatátʼtion ronahteriwahiénni ne tahiataterientiʼiósten tsi nahtehonatonwentióni.

⁴ Ne tiotʼthonwísen iáh ahónha tekaiatakweʼní꞉io nahoierónta, ónk né꞉ne ró꞉ne; kwáh ne sahoríwah ne rahónha iáh rahónha tehaiatakweʼniʼio ne raoierónta, onk né꞉ne ró꞉ne kaiatakweʼní꞉io.

⁵ Tóhsa tetiatatenonhiánits tsi nahtetiátere, nek khók tóhkaʼ kén né entʼkahénthe entiateriwahserónni kénk nikariwésʼsha ahshaʼtatenakthóhtaʼse nahsaterénnaien, nók ethò꞉ne ientsitiatasónteren tsi nihiorennáʼon tsi seniniákon. Né kí꞉ken enshanónstathe ne tóhsa tahianikonrahkénni ne Ranesonrónon tioríhwa tsi iáh tsatekaiéri tsi niʼtishatateniarótaron.

⁶ Iáh ne kíʼ tekonróris ne akonrihónten, ónk nék khók nakonríhon.

⁷ Akwáh ne akeráhko tsi nítion thóh naʼisewahiathohténhake tsi í꞉i ní꞉ioht; ónk tieʼhiatátʼtion katohkénston tsi niteshahkówi ne Rawenni꞉io, tionkwéta kén nèn꞉ne ní꞉ioht tsi teshakówi, nó꞉ia thóh ne ní꞉ioht tsi teshakówi.

⁸ Ónen, ne iáh tehotiniát꞉kons tánon ne ionateréhons káhton ahiohianeréhake ne shariwáhke iaskóntak ne sonháhak khók ahshiteróntahke tsi í꞉i ní꞉ioht.

⁹ Nók tóhkaʼ iáh teshakwénion ahontaseniarótarohke ne saskanéktsheras, wáhs kíʼ tánon sáhniak—sénha ioiánere naiakóniake tsi ní꞉ioht nahʼiontiatatʼtiahásheke nonwehʼsentsherákon.

¹⁰ Né꞉ne rohtiniákʼkons wáhtien ne thènen ahkíron né꞉ne iáh í꞉i tewahkewénna ónk né꞉ne Roiá꞉ner; ne tsionthonwísen tóhsa shotehwéntet ne róne.

¹¹ Nók tóhkaʼ thóh nenkáiere, tóhsa kíʼ tsóniak tóhkaʼ ó꞉ni shiaʼteriwahsherónni ne róne; tánon ne rónkwe iáh tatehiotonwentsóʼhon ne tahonsahiatetʼkhási ne róne.

¹² Nahkotiakhésons káh꞉ton (hiatetiáti, iáh né Roiá꞉ner), tóhkaʼ ne rónkwe roriwiʼióston ne roniákon iáh tetiawetákwen tánon iatehioriwahiéntase né skátʼke ahniteróntahke, tosa shaseiatewénhtet.

¹³ Tánon tóhkaʼa ne tsiothonwísen ioriwiʼióston né rotiniákon ne rónkwe né iáh tathawetákwen tánon kíʼ iatehoriwahoiéntahse ne skátʼke ahniteróntahke, iáh tatehiotonwentsóʼhon ne ahonsahotewéntehʼthe.

¹⁴ Asèhken ne rónkwe ne iáh tethawetákwen né iónnis nahawerientí꞉io ne Rawenni꞉io né tsi tehníteron ne róne, tánon ne iáh tetiawetákwen ne tsiotonwísen né iónnis tsi rawerientiʼióstha ne Rawenni꞉io né tsi teníteron ne roriwiʼióston róne. Tóhka kí꞉ken iáh thóh takénhake, né shakotiʼienokónha thóh nahonnonnótenke tsi ní꞉ioht ne iáh tetiakawetákwen; nók tsi ní꞉ioht, shakoiénas ne Rawenni꞉io.

¹⁵ Nók kíʼ, tsi nikáien ne iáh tetiakawetákwen ionskáneks nahonsahonwahtewénteʼthe ne rohriwiʼióston thohnatenróʼon, thóh kíʼ niʼiáwenh. Ne thóh ní꞉ioht ne roriwiʼióston tenatenróʼon, tóhkaʼ kén rónkwe tóhkaʼ ó꞉ni tsiotonwísen akénhake, iatatewenní꞉io tsi naní꞉iere. Rawenni꞉io iehianáton né skénnon tsi aʼshónʼnheke.

¹⁶ Ónh ní꞉ioht tsi aisiniriwhníronke, né taitiatatenónsthaʼthe?

Thóh Ní꞉ioht Tsi Shónnhek Tsi Naʼtehotonwenhtióni Ne Rawenni꞉io

¹⁷ Tsi sewahiatátʼtion ioterwíson naitiónnheke tsi ní꞉ioht tsi thiáwi ne Roiá꞉ner, tánon tsi niʼshiatótenʼne shianaiáton ne Rawenni꞉io. Ne kíʼ thóh ní꞉ioht tsi kheʼrihonniénnis noriwahshónʼhas tsi ienakerénion ne iakoriwiʼióstons.

¹⁸ Tóhka ne rónkwe ronwahwarahkwétaron tánon wahaiéna tsi nihónas ne Rawenni꞉io, tóhsa rahteniénten nahonshahatónten tsi ronwahwarakwétaron; tóhkaʼ iáh tehonwahwarakwétaron ne rónkwe tánon wahaiéna tsi nihónas ne Rawenni꞉io, tóhsa kíʼ ratewahrakwétaron.

¹⁹ Asèhken tóhkaʼ ahotewahrakwétaronke ne rónkwe tóhkaʼ ó꞉ni iáh, iáh nenʼné꞉e thènen teʼkéntons; nahóten kariwahkweʼní꞉io né꞉ne ahiontewénhnaraʼkwe ne Rawenni꞉io raotiawenráhtseras.

²⁰ Tsi sehwahiatátʼtion aówenk thóh naitionʼnoténhake tsi nitiotón꞉ne tsi wesewahriwahnónweh꞉ne ne Rawenni꞉io shiahtsisewáhnha꞉ne.

²¹ Sheʼwahnaskwakén꞉en kén ne Rawenni꞉io shiáhtsisewahnháton? Kíʼ, totʼthikénhak; nók tóhkaʼ satesénnaien nahonshahsatathewenní꞉ioʼne, thoʼnatier.

²² Asèhken ne rahnáskwah ne Roiá꞉ner shiahonáton rahonháke kíʼ ne Roiá꞉ner non nishohtatewenniʼióʼon; kwáh né ská꞉ka ne iontathewenní꞉io ne Kerístos ieskakonáton rahónha kíʼ rahonkwéta íken.

²³ Rawenni꞉io rohníh꞉non ó꞉ni rohkariákon ne shariwáhke; kwáh káti tóhsa ieshathenaskónniat nónkwe.

²⁴ Tewatenroʼshón꞉a, tsi sewahiatát꞉tion aówenk naisewahkwekónhake ne Rawenni꞉io kwáh tsi niʼtiotónʼne nohénton shiaheshanáton.

Kariwahnonthóntshera Tsi Nòkwa Ne Iáh Tehiakoniákon Tánon Ne Ionateréhons

²⁵ Ónen, ne takariwahseráhkwen tsi nahóten sewahiáton tsi nòkwah ne iáh tehiakoniákon; iáh tewáhtien ne thènen ahakróhrike ne Roiá꞉ner, nók ne tsi nithohriwahiéri ne Roiá꞉ner thakáwi natʼthokhátshera nahónton ahontahiakétakwe.

²⁶ Taiehiatórete nónwah nikaháwi ne kanikonrahronhiakénsera, kanontónnions tóhkaʼ ne iohiánere ne rónkwe thóh ní꞉iohtónhak tsi nironʼnóten.

²⁷ Shaniákon kén ne tsiontonwísen? Tóhsa kíʼ satheniénten nahonshasatékwahthe. Iáh kén tesaniákon? Tóhsa kíʼ senahkwíʼsak.

²⁸ Nók kíʼ tóhkaʼ enshaniáke, iáh kíʼ tesariwáhneren; tánon tóhkaʼ ne tsiontonwísen ne iáh teioniákon nenioniáʼke, iáh kíʼ teioriwáhneren. Nók kék khók ahontakeráko nahkonnónstathe ne niaʼtewenniseráke iakonikonraronhiakéntha ne iakoniátʼkons.

²⁹ Nahóten kítons, tewatenroʼshón꞉a, tsi iáh tetsonaktowáhnen tetsotaténron, tánon kén꞉en ienwahtásawenh ne rohthiʼniátʼkons thóh ní꞉ioht tsi ahonnónnheke tsi shí꞉ken ní꞉ioht ne iáh tahotiniákonke;

³⁰ tsi niháti ne tehonséntos, tsi shí꞉ken ní꞉ioht ne iáh tethotinikonrén꞉en; tsi niháti ne rohtiʼiésshions, tsi shí꞉ken ní꞉ioht nahonatʼtsiennonníhake; tsi niháti ne ratinínons, tsi shí꞉ken ní꞉ioht ne iáh tehonawénhkonwe tsi nahóten rohtinínon;

³¹ tsi niháti ne né꞉e rohnateriwahtentiáton ne thikénhak atenninónseras, tsi shí꞉ken ní꞉ioht ne iáh kwáh né꞉e tehonsteristhákwah, Asèhken ne kíʼ iowentsiáte, tsi niʼiohtonhátse, iáh ahinontshiáʼwe.

³² Ahkenónwene níse né kwáh tóhsa thènen taisewahnikónrahrake. Né iáh teoniákon né tehathenikonrahwenrhétha ne Roiá꞉ner raoioténsera, tioríhwa tsi ratheniéntʼtha nahontaonikonraiérithe ne Roiá꞉ner.

³³ Nók ne roniákon nek khók rahnonthonniónkwah ne onhontsiakhékha aoriwahsónhas tioríhwa tsi teotonwenhtióni nahontahanikonraiériʼthe ne róne;

³⁴ tánon káti tehtsarónkwen tsi tehonwahiatatíronthe. Ne iáh tehioniákon tsiontonwísen tóhkaʼ ó꞉ni ne iáh tekanakwahientéri iotatiataké꞉nen iohʼióthe ne Roiá꞉ner raoioténsera, tsoríwah tsi wahskáneks nakonwahiatathéristhe nahoierónta ó꞉ni ne tsi iónnhe; nók ne ioniákon né iotatioténston tsi nihiorihótens ne tsi ionwentsiáte, tsoríwa tsi íwehre ahontaonikonraiériʼthe ne róne.

³⁵ Ne aoríwah ne kí꞉ken káhton ne tsi íkere akoniénawahse. Iáh tèkereh nahkonhiateniakátsʼtatʼtse. Khék khók, né tewahkatonwenhtióni ne tkariwahiéri ó꞉ni ne iohiánere, tánon iaskóntat né shahióten ne Roiá꞉ner raoʼioténserah ne kwáh tóhsa thènen tahonteshahnikonrahkéhake.

³⁶ Né ónen rohnahteriwahserónni nahothíniake tánon iáh totiriwahiéntase ne tóhsa ahotíniake; tóhkaʼ ne rónkwe ratʼthóhkas iáh tetʼkaiéri tsi nishakotiéraʼse ne kén nitiakohiónha tánon ne rahononronkwáhtshera sóhtsi kashátsʼte tánon ratʼthókas ónenk tsi enhotíniake, nek khók enkakwéni nahónton ahotíniake. Iáh né thènen tekariwahnerahakʼtsheráien ne thóh ní꞉ioht.

³⁷ Ónk tóhkaʼ ne rónkwe, iáh tethonwahnontónni ne thóh naháiere, kwáh rohnikonraníron tsi iatehoriwahiéntase tsi iáh tahóniake, kwáh kíʼ taiérits tsi iáh tèhrehre ahotíniake ne kén nitiakonhionha.

³⁸ Káti ónka enhotíniake ne rohnateriwahseronní꞉ne kwáh kíʼ taiérits; tánon ónhka ne iáh tahotíniake sénha ne taiérits.

³⁹ Ne ioniákon tsiontʼtonwísen iáh tewahtatewenhníʼio tsi náhe rónnhe ne róne; ónk tóhkaʼ enrénheie ne róne, Ethò꞉ne kíʼ ensewahtatewenhní꞉ioʼne tsik ónhka ne rónkwe ahonshahotíniake tsi nitewaskáneks, nók nek khók tóhka Rohriwiʼióston.

⁴⁰ Enhiotʼtsienʼnonníhake, kíʼ - tóhkaʼ, iáh tahonshaióniake. Né nahkatenikónra, tánon kíʼ-íkehre ne Rawenni꞉io Raonikónra wakʼroriháties.