1 Corinthians 5 - Ohiatonhseratokénti

Ne Kaweiennakséntshera Ne Tsi Ionterennaientákwah

¹ Nónʼwah, kwàse tsi nihónen né tsi ononwahroríta kanakwaiesháh꞉tshera tsi nisewahtiéra thóh nió꞉re tsi teiotenonianíton akwékon ne iáh tethohnetákwen iáh kíʼ nèn꞉ne tahotinontáh꞉nake. Ionkróri rónkwe skát꞉ke ianónwets ne ieseshahkonisténha!

² Ónhkaʼti nah iotónhake, tsi aisewahtatonníhake? Tihioríwahthe, ahówenk né꞉ne aisewahiatíhake ne kanikonratséntshera, tánon nétho rónkwe né nihoiéren ahówenk ne ahʼtsisewahiatínekenkwe ne sewentiókwahkon.

^3-4 Tánon iawerohátien tsi ahínon nió꞉re natethewáhtere ne tewahierónkes, nók kíʼ tsi kahnonthónnions thóh kíʼ iékes; tánon thóh ní꞉ioht tsi síken ní꞉ioht ne thóh ietewahkwékon, Íʼkhawe raosénnah ne Sonkwaiáner Ié꞉sos ónenk ronwahriwénhthon kí꞉ken rónkwe ne thóh nihoiéren kíʼ ioriwatʼtsáni. Tsi skát꞉ke ensewakʼkennísa, tánon I꞉i akenikónrahke tsi skátʼke entewáhton, né꞉ne raoshastsʼténsera ne Sonkwá꞉ianer Ié꞉sos tewahkwékon,

⁵ ranesonrónon tsi sewahtiakwarísien kí꞉ken rónkwe onhʼnaiáwenhne ahkariwahthónʼton tsi rón꞉ne, ne nahónton ne raotónnhets ahkaniákenʼne nen tewenhniseráhteke nónen téntʼre ne Roiá꞉ner.

⁶ Iáh tetʼkariwahiéri nahisewahtatonníheke! Sehwahteriéntare tsi niwáhton, “Kénk níkon ne iontʼtenkwáhtha kahkwénies nosherahkwékon ahontènʼko.”

⁷ Ónenk tsi akwékon ahéren ensewahʼháwithe nahkáion iontʼtenkwáhtha né꞉ne kariwáhneren né káti ne kwáh iaiokontakwénhake ahisewahriwahtokénhake. Etʼthó꞉ne thóh nensewahiatoténhake tsi ní꞉ioht ne kwáh osheráhse ne iáh tewatʼtenkwáhton, tsi kwáh thoʼní꞉ioht tsi wahkateriéntare kwáh tohnisewahiatóten. Asèhken nonkwáhwenk ne wenhtanórons ónenk kaweiennentáʼon, tsi ónenk ne Kerístos, ne onkwáhwenk ne wahtohhetsʼtákwen teiotinakarotónha owírah, tsi konwahʼronhiakénton.

⁸ Ánion tewahtenikonróhri nonkwáhwenk wahtohʼhesthákwen, tánon, iáh né꞉ne kanátaro ne tekaiéston ne akáʼion iontʼtenkwáhtha kariwáhneren ó꞉ni ne kariwáksens, nók né꞉ne kanátaro ne iáh thènen tathekaiéston ne iontʼtenkwáhtha, né꞉ne kanátaro ne aóskon íken ó꞉ni kariwahkwahrishión꞉tshera.

⁹ Ne kahiatonserákon ne iekonhiatónni wahʼkonróri tóhsa tesewahteriwáies ne rohtinonwahróri.

¹⁰ Nónwah iáh né tekhéton ne iáh tethoʼnetákwen ronónha ne rotinonwahróri tóhkaʼ ó꞉ni ronatétʼtshen tóhkaʼ ó꞉ni ratinénskwas, tóhkaʼ ó꞉ni ronónha ne kaiatónni konwahsénnaiens. Nahsheiatékwahse níse ónenk tsi ienskóntakwe enshahtiatontáko ne ohontsiakékha aoriwahshón꞉a.

¹¹ Nahóten kítons kí꞉ken níse tóhsa tesewahteriwáies nónkah ne ratatenatónkwah tawetákwen nók rohnonwahróri tóhkaʼ óni rotétien tóhkaʼ óni kaiatónni rasénnaiens tóhkaʼ ó꞉ni rawennákʼsen tóhkaʼ ó꞉ni rahkekakástha tóhkaʼ óni ranénskwas. Akwékon tóhsa skát꞉ne tsátien ne taitiátonthe né nihionkwetóten.

^12-13 Nók kíʼ, iáh thènen tewahkeriwáhke ne takhehiatórethe ne kénk thiʼtiakawénon. Rawenni꞉io né tensakohiatórethe. Nók kwáh kíʼ tóhsa tesheiatóret né skátʼke sewahiátare ne sewentiókwahkon? Tsi niwáhton noriwahtokénti, “Éhren ietsiʼiatenháwit ne ionkwetahétʼkens ne sewentsiókwahkon.”