1 Corinthians 2 - Ohiatonhseratokénti

Nateriwahnothátshera Tsi Tehonwahiásonte Ne Kerístos

¹ Ne shiakwahnatarénaʼse, tewatenroʼshónʼa, nakateriwahnóten ne Rawenni꞉io rahówenk ne ioteriwahshetánions noriwí꞉io; iáh tewahkáston ne iowenhnowáhnens ó꞉ni ne tiót꞉the karihonniennítshera.

² Tsi náhe skátʼke íteweskwe, iaʼtewahkeriwahiéntase kwáh akwékon tsi ahonkenikónren nek khók ne Ié꞉sos Kerístos tsi kwáh sénha kaiasáke rahwenhéion.

³ Káti shiakwahnatarénase, Watʼtsiʼióhaʼkwe tánon kwáh tiatakwékon wahtiatontawéton tsi niwahkateronienténni,

⁴ tánon nakerihonniennítshera ó꞉ni nakateriwahnothátshera iáh tsekanikonrahientáhon né tkawenhnaiéris ahónstonke né꞉ne ónkwe akotʼthoʼkhátshera íken, nók ne tionikonrahtihéntot kariwahnírats ne raoshatsʼténsera ne Rawenni꞉io Raonikonratokénti.

⁵ Tsi tisewetákwenh, káti, iáh tohnónwe tehkáien ne ónkwe akotʼthohkhatsherákon ónk tohnónwe nikáien ne Rawenni꞉io raoshatsʼtenserákon.

Rawenni꞉io Raoriwahkwahriʼshióntshera

⁶ Onk ki né khehiateriwahnotánis ne kariwahkwahrishióntshera tsi nihiákon ne ónen ieiakohkontákwen tsi iakoriwiʼióston. Nók iáh kíʼ kariwahkwahrishióntshera tehiókwenk kí꞉ken ionwenhtsiáte iáh ó꞉ni naoshastsʼténseras ne wahsharíne ne kén꞉en ionwenhtsiáte kashastsʼténsera ne iotionhátse raotishastsʼténseras.

⁷ Ne karihwahkwahrishóntshera ne watʼtarákwenh né꞉ne Rawenni꞉io raoʼriwahkwahrishóntshera, né꞉ne ronwahnasheténni nonkweshónʼa, onk ónenk rorákwen nonkwahiataterítshera nohénton ne tsi ionwenhtsiáte shontónni.

⁸ Iáh ónka ne ratikoráhshonsʼkwe ne tsi ionwenhtsiáte teonateriéntarakwe kí꞉ken kariwahkwahrishióntshera. Tóhka aonatheriéntaraʼke, iáh tathahonwahhiasontáke ne Roiá꞉ner né꞉ne rohiataneréhkwat.

⁹ Nók-kíʼ, tsi niwáhton ne oriwahtokénti, “Nahóten ne iáh ónka nonwénhton tehiakotʼkáton tóhkaʼ ó꞉ni ahiakhothonthéʼonke, nahóten ne iáh ónka nonwénhton tehiakononthonniónʼon né nahiawénhʼne, né꞉ne kwáh ehʼní꞉ioht ne Rawenni꞉io tsi shakokwahtakwénhni tsi nihiákon ne ronwahnorónkwah.”

¹⁰ Nók Í꞉i onkwahriwáhke ne Rawenni꞉io wahrotáshon ne raówenhk kariwahséton raohénton ne Ronikonratokénti. Ne Ronikonratokénti kwáh oriwahkwékon tsi rariwísaks, iekaríhare ne kwáh kanonkwáhke tsi ní꞉ioht tsi rohriwahshé꞉ton ne Rawenni꞉io.

¹¹ Kwáh í꞉i khók nonkwahtónnets nontionháke kwáh oriwahkwékon tsi ionkwahientéri; kwáh ne sháh꞉ka, kwáh khók Rawenni꞉io Raonikonratokénti rohientéri ne Rawenni꞉io.

¹² Iáh tehionkwahienáʼon kí꞉ken tsi ionwentsiáte aoriwahshónʼa; khèkhok, né ionkwahienáʼon ne Kashastsʼténsera ne Rawenni꞉io thóh teniéton, ne nahónton nahionkwahteriéntarahne nakwékon tsi niteshonkwáhwi ne Rawenni꞉io.

¹³ Káti, iáh né tehionkwahtaráhkwen tsi niʼionkwahweientetáhon ne ónkwe akorihwahkwahrishón꞉tshera, nók né nowénhna tsi nishonkwahrihonniénni ne Ronikonrahtokénti, tsi nihionkwahnikonrahientáton ne ionnhehónwe noriwihioʼónwe tsi nihiákon né꞉ne iakotienawáston.

¹⁴ Ónhka ne iáh tehonwahtienawáston ne Ronikonratokénti iáh tahónton nahieiénah nahtathawítshera tsi nitewétha ne Rawenní꞉ioke raoshastsʼtenserákon. Né nihionkweʼtóten kwáh iáh tehiakonikonraiéntas, tánon thóh ní꞉ioht tsi ietsénries tahiotenonwahroritóntahke, ne khók tahonwahtihiatoréthakwe tsi nihatisénna kwáh nek tsi ronónnhe.

¹⁵ Ónhka iakóien natʼtótʼkhátshera, né káti iakokwénion ne oriwahkwékon taiehiatórethe, nók iáh ónhka thaiekwéni ne tahonwahhiatórethe.

¹⁶ Tsi niwáhton noriwahtokénti, “Ónhka iakoteriéntahre tsi nihonikonróten ne Roiá꞉ner? Ónhka aiekwéni nahonwahtenikónron?” Nonkwáhtiakes, káti, ionkwáh꞉ien ne Kerístos raonikónrah.