1 Corinthians 14 - Ohiatonhseratokénti

Shé꞉kon Sénha Wéso Nahtathawítshera Nitewètha Ne Ní꞉ioʼne

¹ Kanoronkwátshera seh, káti, nónwe nahtehiotonwenhtióʼon niatah꞉isewahtátʼtiahathe. Sewahterhiashaserónni tsi nòkwa ne kariwiʼiostóntshera, sénha nahisewahiéna nahtathawí꞉tshera nahisewahteriwahnóten ne Rawenni꞉io rahoteriwahnothátshera.

² Tsi niháti ne thiʼwenhnáhsathes rontátis iáh tathehathiʼthárah nahkorénson onk nék khók ne Rawenni꞉io, asèken iáh ónka tehonwahtinikonrahiéntas. Né rohnahthaʼtiáton ne ioteriwahséh꞉ton oriwiʼiohónwe ne rahoshatsʼténserah ne Ronikonriioston.

³ Onk tsi niháti ne ronteriwahnótʼtha ne Rawenni꞉io raoteriwahnothátshera ónkwe shakothiretiárons tánon shakotiʼiénahwahse, shakotinikonrahnírats, ó꞉ni teshakonahróton.

⁴ Tsi niháti ne thiʼwennáhsathe rontátis rohnonhatsíwah khók rahotirihwáhke, onk tsi niháti ne rontheriwahnótʼtha ne Rawenni꞉io rahoterihwahnothátshera kwáh kén tiokwahkwékon shakotiʼiénahwase ne tiakawehtákwen.

⁵ Akenónwene ne sewahkwékon thiʼwennásate ahisewahtáti; onk ne ahontahkeráhko ne ahisewahiéntahke nahtathawí꞉tshera nahisewahterihwahnóten ne Rawenni꞉io rahoterihwahnothátshera. Asèhken nónkwe né ionterihwahnótha ne Rawenni꞉io raoterihwahnotátshera sénha ne iorihowáhnen tsi ní꞉ioht ne thiʼwennásahte iontátis—nek khók thokáken ónkak thóh í꞉iens nahienikonrahiéntathe nahóten enhiaiéron, thóh nahontáwe kentiokwakwékon ne tiakawetákwen ahiakoiénahwahse.

⁶ Ne káti nónen thentewahtátʼken, tewatenroʼshónʼa, nahóten akerihontáhko tóhkaʼ thiʼwennásate akatáh꞉ti? Kwáh iáh thènen, nék tohkàken né ienkwahawíten tsi nahoténson ne Rawenni꞉io rohrihotashónkwen tóhkaʼ ó꞉ni knahótenk natʼthohkhátshera tóhkaʼ ó꞉ni niakonikonrahnírats aterihwahnotátshera tóhkaʼ ó꞉ni karihonniennítshera.

⁷ Sewahkenhénʼion ne iáh tehiónne ionterennothákwah tsi ní꞉ioht ne ohoróta ionterennotákwah tóhkaʼ ó꞉ni ne karenhsótaron oʼnowakówah—onʼní꞉ioht tsi aierennaienteríhake tsi ní꞉ioht tsi karénʼnothe nék tohʼkàken kwáh entʼkaiérihthe enkshereh tsi ní꞉ioht tsi tekawenhnakʼkhashiónko tsi ní꞉ioht tsi karennahráston?

⁸ Tánon tóhkaʼ tsi nikáien ne iakoterénnothe ne iehonrahwátsʼta iáh tahontahaiérihthe tsi ní꞉ioht tsi enhaterénnothe onhʼní꞉ioht tsi ahontatheweiennéntaʼne nahonterí꞉io?

⁹ Kwáh ne sahoháʼa, onhní꞉ioht tsi ahiakonikonrahiéntaʼne tsi nahóten shataráhkwen tóhkaʼ ne sateriwahnothátshera thiʼwennásate shástha tánon iáh tehionikonrahiéntat? Ne shawenhnahókon tsi iowehráhre tsienwáhton!

¹⁰ Kwáh íken tsi wéso niaʼteionronkhatsheráhkes ne tsi ionwentsiáte, tánon iáh nénska ne iáh thènen tahkentónsehke.

¹¹ Onk tóhkaʼ iáh tahonkateriéntarahke nahronkhátshera ne iakotaráhkwen, tsi niʼiákon né꞉ne iónstha kwáh thiʼhiakahontsiáte nahkerihwáhke tánon ní꞉i kwáh nònʼne thiʼwahkonhontsiáte tsi nòkwah ne ronónha.

¹² Tsi kwáh tionninekénʼen nahisewahiéna naʼtathawítshera ne kariwiʼiosthóntshera, ónenk tsi iaʼtesewahtátʼtiahathe nahisewahiénahwaʼse tsi niháti ne shakothiʼiénahwaʼse ne tiakawetákwen.

¹³ Nónkwe ne iontátis ne ó꞉ia nikawenhnóten, káti, ónenk tsi enhionterénnahien nahieiéna nahtathawítshera nahienikonrahiéntathe tsi nihiónton.

¹⁴ Asèhken tóhkaʼ thóh kíʼ ní꞉ioht tsi akatherénnahien, akeshastenserakwekon kahterénnahiens, onk nahkenikónrah kwáh nènne iáh thènen tekahiátareh.

¹⁵ O ónhthe náhtiereh, káti? Akeshatstenserakwékon nón nenkaterénnaien, tánon kíʼ ó꞉ni akenikónrahke nón nenkaterénnahien; akeshatstenserakwékon nón nahtekeríhwahkwe, tánon kíʼ ó꞉ni akenikónrahke nón nahtekeríwahkwe.

¹⁶ Nónen tentienonwehráhton ne Rawenni꞉io kwáh nék khók iéken ne satónnhets, onh ní꞉ioht tsi aiekwéni ne thiʼkénhak nónkwe né skátʼke sewatʼkenníson nahiaiéron “Éhʼtho niʼiáwen” ne shaʼterennaientatsheráhkon ne kanonwehrahthóntshera? Kwáh iáh tahóten tehonahteriéntare tsi nahóten sáhton.

¹⁷ Shekinònne ne shaterennaientátshera tsi tetienonwehráhtons ne Rawenni꞉io tsi kwáh ioiánereh, iáh kíʼ tehiakoiatakénas nahkorénsons.

¹⁸ Teinonwerátons ne Rawenni꞉io tsi katátis ne thiʼwennásates sénha tsi ní꞉ioht níse.

¹⁹ Ónk kíʼ nónen iakoterénnahien nononsatokentí꞉ke ahontakeráhko wísk niʼiowénhnahke akatáti né nahiakonikonrahiéntaʼne, eh nahontáwe ahiakorihónnien notiakésons, tsi ní꞉ioht ne tewenhniawehetsherásen niʼiowénhnahke akahtáti ne thiʼwahronkhatsheráthe.

²⁰ Tóhsa iekʼshahnéha tsi ní꞉ioht tsi sewahnonthonniónhek, tewatenroʼshónʼa; tesewahtetʼshathóntat tsi nióre ne kariwáhneren tsi ahonnontonniónheke, ónk sewahthonkwetisonhónhak tsi ní꞉ioht tsi sewahnonthónnions.

²¹ Noriwahtokentíke kahiáton, “Tsi niʼkéntons nónhkwe ne iontátis sontekʼtí꞉io nahronkhátsheras enkhethárahse nahnonkwetaʼsónhas, ráton ne Roiá꞉ner. Rathisháhkes ne thiʼhononwenhtiáthe nónwe nenkatáti, sheʼkinònne nahkonkwetaʼsónhas iáh tahionkatahónsathathe.”

²² Éhthoh káti, natathawítshera nahiontáti ne shontekʼthí꞉io nahwenhnáshon ne iakoriwahniráhti ne iáh tethohnetákwen, iáh nènne ne thohnetákwen, tsi náhe nahtathawítshera nahionteriwahnóten ne Rawenni꞉io raoteriwahnothátshera ne iakoriwahniráhtis ne tiakawehtákwen, iáh nènne ne iáh tethohnetákwen.

²³ Tóhka, káti, kanenrahkwékon ne tiakawehtákwen skátne enhonnitiokwaróronke tánon kwáh rahthikwékon enthontáshawen shóntek thiʼwenhnáhsathe ahontáti—tánon tohká꞉a thiʼkáhionk ónkwe tóhka ó꞉ni ne iáh tetiakawehtákwen enhiontáwehiathe, iáh onhtèken tahiaiéron kwáh sheʼwahkwékon teshewahnonwarawénrie?

²⁴ Ónk tóhkaʼ onhkwetaʼkwékon iaʼkoteriwahnóthe ne Rawenni꞉io raoteriwahnotátshera tánon iahiontáwehiathe ne iáh tetiakawehtákwen tóhkaʼ ó꞉ni ne thiʼkáhionk ónkwe, enhontatiéntereʼne tsi rotiriwáhneren ne tsi nahóten rohnatʼthónthe.

²⁵ Tsi nahoténsons rohtiriwahshé꞉tons ne raotinikónrahkons ónenk tsi enhontʼróhri, tánon ónenk tsi tenhontentʼtsóten ó꞉ni enhonwahsénnaien ne Rawenni꞉io, rónhthon, “Oriwiʼiohónwe tsi sewahkónkon ne Rawenni꞉io kíʼ kénʼen!”

Tsi Niʼioteriwahtséren Nononsatokentíke

²⁶ Kén nahóten kíʼ kítons, tewatenroʼshónʼa. Nónen skátʼke ensewáhton naisewahterénnaien, tiehiáta tenʼieríwahkwe, tionkwéta né nènʼne ne ashakorihónnien, nó꞉ia né nenʼne enharihotáshion tsi nahóten ne Rawenni꞉io totkáwen, nó꞉ia né nènʼne enhateriwahnóten ne ó꞉ia ní꞉ioht owénna, tánon shé꞉kon thiʼhahiátathe enhanikonrahiéntathe tsi nahóten wahónronke. Ónenk tsi kwáh kanenrahkwékon enhiakoiénahwahse.

²⁷ Tóhka ónhkak enhiontáti ne shóntek thiʼwennásate, tenihiáse tóhkaʼ ó꞉ni ásen niháti skátke tsi ahontáti, tenhonthiʼhashiónko, tánon ónenk tsi ónhkak enienikonrahiéntathe tsi nahóten wahonníronh.

²⁸ Ónk tóhkaʼ iáh ónhka thóh tèiens nahiekwéni nahienikonrahiéntathe, éhʼtho ne kíʼ tsi nikáien ne rahrónkha ne shóntek thiʼwennásate kwáh sak tenhatatónni tánon rahonháke khók tsi enhatáti ó꞉ni tsi nòkwah ne Rawenni꞉io.

²⁹ Tenihiáse tóhkaʼ ó꞉ni ásen niháti ne thonwahnáhwi ne Rawenni꞉io rahoteriwahnotátshera ahówenk nahontáti, ónk ne ronáhtiakes tenhatihiatórethe tsi nahóten ronthónton.

³⁰ Onk tóhkaʼ ónhkak ne thóh iétsʼkothe waheiénah ne Rawenni꞉io rahoteriwahnotátshera, tsi nikáien ne róhthare ónenk tsi enhátkaʼwe tsi róhthare.

³¹ Shewahkwékon ahónton ne aisewahteriwahnóten ne Rawenni꞉io rahoteriwahnothátshera, kwáh tsi sewahiatátʼtsion, eh nahontáwe kwáh onkwetaʼkwékon enheweientétane tánon enhiakonikonrahnírahthe.

³² Nahtathawítshera nahionteriwahnóten ne Rawenni꞉io raoteriwahnothátshera ne ahówenk ne rateriwahnótʼtha ahontahaniarohtárohke.

³³ Asèken ne Rawenni꞉io iáh tatehothonwenhtióni tsík tiahiotónhahke nontionháke onk skariwahakénhake ó꞉ni skénnen. Kwáh tsi ní꞉iot akwékon nononsatokentíke ne Rawenni꞉io rahonkwetashónhas,

³⁴ ne tsotonwísen ahówenk ne thataiothótehke ne tsi watʼkenníson. Iáh tehioteriwahiénni nahontáti; tsi niwáhton ne Sitaeró꞉non kaianerénsera, iáh tehiówenk nahkonterihónten.

³⁵ Tóhka thènen tehionahtonwenhtióni nahionateriéntarahne, ne ronwahtiriwahnóntons ne rohtiniákon. Kwáh íken tsi wahthehenserohwáhnen ne tiontonwísen nahontáti nononsatokentíke nónen iakotkenníson.

³⁶ Káhton onhtèken ne Rawenni꞉io raowénhna isèke nonʼnitsawénon? Káhton ontèken tionhatsíwah khók nón nieʼiawénon?

³⁷ Tóhka ónhkak arérehʼke Rawenni꞉io roteriwahnótani tóhka ó꞉ni róhien ne kariwiʼiostóntshera atathawítshera, ónenk tsi enhaién꞉terene tsi nahóten kwahiatónnis ne tsi Roiá꞉ner nón nitsawéhnon.

³⁸ Ónk tóhkaʼ iáh kí꞉ken tehatenikonráhratʼte, tóhsa thènen tatʼtsisewahriwásnies.

³⁹ Éhʼtho káti, tewatenroʼshónʼa, ne sewahteriasaserónni naisewahteriwanóten ne Rawenni꞉io raoteriwahnotátshera, ónk tóhsa sewahiótat nahiontáti ne sontekʼthí꞉io nahwenhnáhson.

⁴⁰ Oriwahkwékon ónenk tsi thóh nenkaiéren ne tkariwahiéri ó꞉ni ne ioiánereh.