1 Corinthians 12 - Ohiatonhseratokénti

Tsi Niteshakówis Nahtathawítshera Ne Ronikonratokénti

¹ Nónwah, né tsi nahóten sewahiáton tsi nòkwah ne atathawítshera tsi nitewéhtha ne Ronikonratokentíke. Tewahkatonwenhtióni nahisewahnikonrahiéntaʼne noriwí꞉io né nónwe aoriwáhke, tewatenroʼshón꞉ʼa.

² Sehwahteriéntare tsi náhe iáh tethisehwetákwenne, iehtsihiatʼtaharahkwáhtakwe wéso nóiah niʼiotónne ne tsi konwahtisénnaienskwe ne iáh tehkónonne kahiatónnis.

³ Tewahkatonwenhtsióni nahisewahteriéntaraʼne ónhka né꞉ne iakosháh꞉rine ne Rawenni꞉io Raonikónrah kwáh iáh ónhka taiekwéni nahiaiéron “Ronkwahkénron Ié꞉sos!” tánon iáh ónhka taiekwéni nahieriwahnírahte “Ié꞉sos seh ne Roiá꞉ner,” tóhka iáh ne Ronikonriʼióston teshakonikonrahnonʼnáhties.

⁴ Tóhka nahtetʼkonthihánions ne kariwiʼiostóntsheras atatawítsheras, nók né sahahiáta ne Ronikonriʼióston tatkáwas.

⁵ Tóhka nahtetʼkonthihánions tsi ní꞉ioht tsi ahiakoióten, nók kíʼ né sahahiáta ne Roiá꞉ner ronwahʼiótense.

⁶ Tóhka natetʼkonthihánions tsi nahiakokwénionke nahiakohióten, nók kíʼ né sahahiáta ne Rawenni꞉io takáwas tsi nahiakokwénionke ahionteriwahténtiathe ne katokénston kahioténserah ahiakoióten.

⁷ Tsi shakotiataráni ne tiehiatátʼtion ne Ronikonrahtokénti tsík nahʼiotónhake né꞉ne onhkwetaʼkwékon ahiakohianerásten.

⁸ Ne Ronikonratokénti tionkwéta enteshakáwen nahteriwahnothátshera thitʼkáhehre ne kariwahkwahrishióntshera, nók nó꞉ia ne sahahiáta ne Ronikonratokénti entesakáwenh nahteriwahnothátshera thitʼkáhere ne atʼtokháhtshera.

⁹ Énska tánon ne sahahiátha ne Ronikonratokénti tionkwéta entesakáwenh ne tewenhtákwen, nók nó꞉ia ne entesakáwenh ne kashatsʼténsera nahiontétienthe.

¹⁰ Ne Ronikonratokénti tionkwéta enteshahʼkáwen ne kashatsʼténsera ahiakoióten ne ioriwahnerákwa; nó꞉ia, nahtathawítshera né꞉ne ahionteriwahnóten ne Rawenni꞉io raoteriwahnothátshera; tánon shé꞉kon nó꞉ia, nahiekwéni nahiontróri tsi naʼtetsatʼtíhen nahtatawítshera ne Rawenní꞉ioke nitewéhtha tánon né iáh thóh nónwe tethewétha. Ne tiehiáta teshakówis naiekwéni ne thiʼwenhnásathe ahiontáti, tánon ne tiehiáta naiekwéni nahienikonrahiéntathe tsi nahóten wahton.

¹¹ Nók énskat khók kíʼ tánon kwáh né sahahiáta ne Rawenni꞉io akwékon kíʼ ehnihásahas; tánon tsi nihaskáneks, ne tekontʼthihánions tsi ahontashakáwen ne tiehiatátʼtion.

Skaieróntha Ne Wéso Ioiénton

¹² Ne Kerístos né teshiatiéren tsi síken ní꞉ioht ne énskak noierónta; shé꞉kon kíʼ énskak khók noierónta, éhʼtho sáhne ehʼní꞉ioht tsi káson tekontʼthihánion tsi nihioteriwahiénni.

¹³ Kwáh ne sáka, tewahkwékon, tóhkaʼ Sitaeró꞉nons tóhkaʼ ó꞉ni iáh tehatiʼsitaeʼró꞉nons, tóhkaʼ ienáskwah tóhkaʼ ó꞉ni iontatewenhní꞉io, iontatenekwahéston eh skátʼke ne skaierónta né꞉ne sakanikónrat, tánon énskak khók nonikónra tionkihiáwi nahitewahnekíra.

¹⁴ Asèhken ne iaʼtekahiáti noierónta iáh tioríwahkhok tsi ní꞉ioht tsi káhson, nók wéso tehiosóntere.

¹⁵ Tóhka síken nosíta akénron, “né tsiʼiáh ní꞉i otsána tèken, iáh tehiakenikwékon noierónta,” iáh kíʼ né tahiohiatónʼneke nahkenikwekónhake noierónta.

¹⁶ Tánon tó꞉kaʼ nohónta akénron, “né tsi iáh ní꞉i okárah tèken, iáh kíʼ tehiakenikwékon noierónta,” iáh kíʼ né tahiohiatónneke nahkekikwekónhake noierónta.

¹⁷ Tóhka oierontakwékon síken okaróskon khók akénhake, onh ní꞉ioht tsi ahiothónthene? Tánon tóhkaʼ síken ohonhtóskon khók akénhake, onh ní꞉ioht tsi aioswénhseke?

¹⁸ Kíʼ tsi ní꞉ioht, tsi nihiótha, Rawenni꞉io wahtasthonterónnion noierónta kwáh tsi nontahanónwene.

¹⁹ Iáh oierónta tahkénhake tóhkaʼ énskak khók tahiostontaráhke!

²⁰ Ónk tsi ní꞉ioht, wéso tehiostóntere onk énskak khók noierónta.

²¹ Kwáh káti, iáh tahónton ne okárah nahiawénhase notsána, “Iáh tahtekonhiatonwenhtióni!” Iáh ó꞉ni nonóntsi tahkakwéni nahiawénhase nosíta, “iohiánere, iáh tahtekonhiatonwenhtióni!”

²² Ne thikáthe, iáh tahionkwahteriwahténtsiaʼse ne tóhsa aitewásthe ne tewahiéronke tsi nahtehionatatsenakwáhkon tsi nikáien ne iotsihióha;

²³ tánon tsi nikáien ne ítewehre iáh thènen shatèkena tèken né sénha tethewahrótons; onk tsi nahóten ne tewahiéronke ne iáh tewatkathotsherí꞉io sénha ne tewahnikónrahre ne tóhsa tshiatahionkwáhtiethe,

²⁴ tsi nikáien ne sénha wakʼkathotserí꞉ios iáh nènʼne tatehiotonwenhtióʼon né thóh nióre tsi ahontennikonrahráthonke. Rawenni꞉io rahónha tehokhánion noierónta eh nióre tsi akanonstátonke tsi nikáien ne tehiothonwenhtióʼon.

²⁵ Tánon káti kwáh iáh thènen tatheʼiothirihóron noierontasónha, nók akwékon tsi naʼtekontʼthihánions kwáh ne sáhka tsi iotiríhwahien tsi natekónterons.

²⁶ Tóhka énskak tsi nahótenk noierónta akaronhiáken, kwáh kíʼ akwékon noiáson nihiotánion tsi skátʼke enkonthironhiáken; tóhkaʼ knahótenk nénskak khók takonwahrénsaron, kwáh notiakésons tsi wahkontiátaren nahotsennionniátshera.

²⁷ Kwáh sekwahkwékon ne iewáhtons ne Kerístos raiéronke, tánon kwáh tsi sewahiatátʼtion tsi ensewahiátare.

²⁸ Ne tsi ionterennaientákwah Rawenni꞉io akwékon rokwahtákwen tsi nikentiokoténsons shakorohónton: né thonatierénton ronteriwahnótʼthas, ne tekeníhaton iehatiríwahkens, tánon nasénhaton sakotirihonniénnis; ehʼthóne tsi nikáien ne ioriwahneráhkwat tsi nihatí꞉ierah, ne tionóntere tsi nikáien ne tonwahnáwi ne kasatsténshera nahontétsenthe tóhkaʼ ó꞉ni nashakotiʼiénawaʼse nakorénsons tóhkaʼ ó꞉ni nashakotihéntense tóhkaʼ ó꞉ni thiʼwenhnásathe ahontáti.

²⁹ Iáh rahtikwékon tehonteriwahnótha iáh ó꞉ni tiehatiríwahkens, iáh ó꞉ni teshakotirihonniénnis. Nók rahtikwékon rothishatsʼtenseráien nahotihióten ne ioriwahnerahkwathénions

³⁰ tóhkaʼ ó꞉ni nashakotítsenthe tsík nikannhʼrótens tóhkaʼ ó꞉ni nahontáti ne thiʼwenhnásathe tóhkaʼ ó꞉ni nahatinikonrahiéntathe tsi nahóten rónton.

³¹ Sewahtatheriashaserónni, káti, ne sénha iorihowáhnens ne atathawítsheras. Né kwáh tiohiánere, ne káti, tsi ní꞉ioht tsi tekariwahsóntereh.