1 Corinthians 11 - Ohiatonhseratokénti

¹ I꞉i tontaskwahteniénthensts, káti, kwáh tsi ní꞉i nahtetehiatenienténstha ne Kerístos.

Ahiontenontsistórohke Nónen Iakoterénnaien

² Tekonrénsarons tsoríwah tsi tiókonthe takéhiatre tánon íhksere ne karihonniennítsheras ne thonʼhiáwi.

³ Ónk tewahkathonwenhtióni nahisanikonraiéntaʼne nètho Kerístos tsi kwáh tseshakowenní꞉io ne rohnónkwe, ne rohniákon tseshakowenhní꞉io ne róne, tánon ne Rawenni꞉io tsehohiatakweʼní꞉io ne Kerístos.

⁴ Ne káti ne rónkwe ne raterénnaiens tóhka óni rateriwahnót꞉tha ne Rawenni꞉io raoteriwahnotátshera ne tsi iakoterénnaien nónkwe tánon rotenontsistóron rohsennaksátha ne Kerístos.

⁵ Tánon ónka ne tiotʼtonwísen wahterénnaien thó꞉kaʼ ó꞉ni wateriwahnótʼtha ne Rawenni꞉io raoteriwahnotátshera ne tsi iakoterénnaien nónkwe tánon iáh thènen teiononwahróron rohsennaksátha ne róne; kwáh iáh thènen tathetsiatʼtí꞉en nahónʼa tánon ne tiotonwísen ne onahónsta koniónni tsi kowahnonráron.

⁶ Tóhka ne tiotonwísen iáh tahontenontsistóroke, sénha ioiánere nahontatenonráron. Tánon tsi niwahtehenserowáhnen ne tiotonwísen nonahónstha aiónni ne kanontsíne tóhkaʼ ó꞉ni nahontatenonráron, ahówenk nahontenontsistóroke.

⁷ Ne rónkwe iáh tatehotonwenhtióni nahatenontsistóroke, tsoríwah tsi renéstha tsi nateskaieróntare ne Rawenni꞉io tánon ne raoiatanerahkwáhtshera. Nok ne tiotonwísen ne wenéstha ne rónkwe rahorensaróntshera;

⁸ Asèken tsi ronwahiatíson ne rónkwe iáh tiotonwísen nónwe thetawénon, nók ne tiotonwísen rónkwe né nónwe nitiawénon.

⁹ Iáh ó꞉ni tsi ronwahiatíson ne rónkwe tóhka kén tiotonwísen aorihónniat, nók tsi konwahiatíson ne tiotonwísen né꞉ne rónkwe raorihónniat.

¹⁰ Tsi nòkwa ne ratironhiakerónons, ne káti, ne tiotonwísen aówenk nahiotenontsistóron nawénesthe tsi róne taniarótaron.

¹¹ Tsi tsiónnhe rahonháke ne Roiá꞉ner, ne káti, ne tiotonwísen iáh tahiónnheke tóhka iáh kanèka tarésehke ne rónkwe, né nònne sháh꞉ka ne rónkwe iáh tarónnheke tóhka iáh kanèka tawésehke ne tiotonwísen.

¹² Aséhken tsi konwahiatíson ne tiotonwísen rónkwe nónwe nitisawénon, kwáh ne sahoháha tiotonwísen ronahkerátsʼton ne rónkwe; tánon kwáh seh Rawenni꞉io akwékon nieshakahónnets.

¹³ Í꞉se tesewahiatóret tóhkaʼ kén tkariwahiéri ne tiotonwísen Rawenní꞉ioke iahonterénnaien ne ónkwe nónen iakoterénnaien ne iáh thènen tehiotenontsistóron.

¹⁴ Nontiéren, tsi niʼiorennáhon ne tsi ionwenhtsiáte sharihonniénʼnis tsi nihiothéha nahononkwiserésonʼke ne rónkwe,

¹⁵ nók ne tiotonwísen neʼnèn né꞉e ionkwetiʼiosténnis. Tsi iononkwíseres ne tiówis nahioiénawahse nahontenontsistórok꞉te.

¹⁶ Nók tóhka ónka íʼienre né taieriwahkénahthe, thók khók níkon wáhtien nahkíron tóhkaʼ kén nontionhahak ó꞉ni nahkorénsons ne rotiriwiʼiosthénions taionkwaienahon noriwahkaionʼnéha tsi ní꞉ioht tsi ahonterennaiénʼsehke.

Ne Iehiatarástha

¹⁷ Ne ionónterahtse ne karihonniennítsheras, tsi niʼiótha, iáh thatekonrénsarons, tsoríwah tsi shewahtiataróroks nen sehwahterénnaien oriwiʼiohónwe tsi sénha kahetʼkéntha tsi ní꞉ioht nahioianeréhake.

¹⁸ Ne tiotserentákwenh, ionkʼróri tsi ientsinenratʼshahténnis nónen sehwatʼkenníshon; tánon ne kí꞉ken tketákwah ne tóhske ostónha akénhake. (

¹⁹ Iáh tehiothenówenk kwáh seh thó꞉kaʼa tehsewahnenratʼkháshion né꞉ne tsi niháti ne thateiérits aiotónʼon kwáh ahothiʼhiatakénthake.)

²⁰ Nónen ensehwahnitiokwahrórohke tánon skentiókwak khók iensewáhton, iáh seh Iehiatarástha tehséwaks.

²¹ Asèhken tsi tensehwatskáhon, tsi sehwahʼhiatátʼtsion ensehwahénthe tsi tensehwatskáhon, né tsi ótiake iontonkáriaks ónk ne rohnáhtiakes enhotinonwahráhthon nèn꞉ne.

²² Iáh kén tesehwahnonsóhton tsi nónwe nahtaiesewatskáhon ó꞉ni nahisewahnekírah? Káhton kén ne ahontesehwahráhko naietʼtsiʼiataróntsiense ne Rawenni꞉io rahonkwetaʼsónhas tánon ietʼtsihiatéhas nonkwesónhas ne tehontʼkárias? Nahóten takwáhrahre nahkíron kí꞉ken nahorihótens? Tahkwahrénsaron onhtèken? Oriwí꞉io seh tsi iáh thóh tátiere!

²³ Asèhken tsi nitahkáwi ne Roiá꞉ner ne karihonnienníhtshera tánon tsi níhtiohensténni: nètho Roiá꞉ner Ié꞉sos, ne sihiokaráhtsera ne shahonwahtennínon, wahtanáhtarahkwe,

²⁴ wathonnonweráhton ne Rawenni꞉io, watanahtáriahke, tánon wahénron, “Ne kí꞉ken nahtierónta, níse sewahriwáhke. Thóh kíʼ nahsewáhier naskwehiarastákwahke.”

²⁵ Kwáh ne sahoríwah, nónen sahatikwéntaʼne wathatsétaʼkwe tánon wahénron, “Kí꞉ken kátshe né꞉ne Rawenni꞉io áse rahoteriwahseronniátshera, né ioriwahniráhton nahkenekwénsa. Nónen skát꞉ke ne ensewanekírahte, tsi thóh nenshié꞉re tahkehiarasʼtákwat.”

²⁶ Né kí꞉ken kéntons tsi kwáh tsi nikaháwi enshenatárahke ó꞉ni ensnekírahthe kí꞉ken kátshe sák꞉rohris ne Roiá꞉ner tsi rahwenhéiont tsi nío꞉re téntre.

²⁷ Né iononterahtsétaʼne tóhkaʼ ónhka tsi nítion ensewahnátarahke ne Roiá꞉ner rahonátaro tóhkaʼ ó꞉ni ensewahnekírahthe ne rahó꞉tse tánon tsi naiáwenhne iáh thènen thatsisewahkwéniensʼthe ne rahónha, weshewahnontánahke ne kariwáhneren tsi nòkwah ne Roiá꞉ner rahoierónta ó꞉ni ne raonekwénsa.

²⁸ Ne káti, kwáh teiotonwenhtióhon ne tasewahtiérent tsi sehwahiatátʼtion sewahtatkenhénion, éthone shewahnátarak ó꞉ni sehnanekírat ne kátshe.

²⁹ Asèhken tóhkaʼ iáh teseriwahiénteres tsi nahóten kéntons ne Roiá꞉ner rahoierónta nónen ensenáhtarahke ó꞉ni ensnekírahthe ne kátshe, ísek wahshatatréwahthe tsi nensenáhtarahke ó꞉ni tsi ensnekírah.

³⁰ Ne aoríwah shèwenhtiokowáhnen sewahnonwáktani ó꞉ni shewahtsihióha, tánon tóhka nihiákon iakawenhéion.

³¹ Tóhka né entitewahtiérenthe entewahtatʼkenhénʼion, iáh tahionkwáhrahne ne Rawenni꞉io rahorewahthá꞉tshera.

³² Nók ne Roiá꞉ner teshonkwahhiatorétha ó꞉ni shonkwahrewáhtha, né꞉ne tóhsa skátʼke tsi aionkiréwahthe ne tsi ionwenhtsiáte.

³³ Ne káti, tewatenroʼshónʼa, nónen skátʼke tsi ensewahnitiowahróʼrhoke naisewahiatárahne, tesewahtateráhrat.

³⁴ Tánon ó꞉ni tóhkaʼ ónhka tsi nítion ne ionthonkáhriaks, tsi thisewahnónsohthe thontesewatskáhon, né꞉ne tóhsa atsisewahréwahthe ne Rawenni꞉io tsi skátʼke ensewahnitiokwahrórhoke. Né ohiáson nahorihoténsons, neʼnènʼne tsi nahténtʼke thó꞉ne enskeriwahkwahtáko.