1 Corinthians 1 - Ohiatonhseratokénti

Tiotahsawáhkwen

¹ Kór kíʼ nón nitsawénon tsi iehonwahnáton né tsi thóh nitonikonriʼióʼon ne Rawenni꞉io nahoteriwahnótʼtáse ne Kerístos Ié꞉sos, tánon nonkwáh naʼthatekénsera Sosthenes ó꞉ni ki non nitsawénon.

² Ne thonwetákwen ne Rawenni꞉io thóh nónwe ne Corinth, tsi nihiákon ieiontatenáton ne Rawenni꞉io raotiokwahtokénti akénhake, tsi rahónha rahonkwetaʼshónha ne tsi tehonaterihwahshóntere ne Kerístos Ié꞉sos, rahtikwékon ne kwáh tsik nonwéson ne ronwahsénnaiens ne Ié꞉sos Kerístos, rahónha ne Shakoiáner ó꞉ni nonkwáhtiakes;

³ Aiáwens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skénnen.

Nakohiataterítshera Rahonháke Ne Kerístos

⁴ Tiotʼkonhónwe tenʼinonweráton ne Rawenni꞉io níse sewahriwáhke tsoríwah tsi nitʼiáwi ne kenténrat rahonháke ne Kerístos Ié꞉sos.

⁵ Asèken tsi tesewahterihwahshóntere ne Kerístos kwáh orihwahkwékon tsi wesewahkwáhtseʼne, tóh íkare akwékon tsi nisewahtátis ó꞉ni akwékon natʼtokhátsheras.

⁶ Nahterihwahnotátshera tsi nòkwah ne Kerístos kwáh íken tsi wahoriwahnírah ne tionhakéson

⁷ kwáh iáh ne tioríhwah thetisewahnorónʼon nénskakʼkhók ne kaiataterítshera aisewahienáhon, tsi nisewáhrare ne Sonkwahiáner Ié꞉sos Kerístos nahataténesthe.

⁸ Kwáh ó꞉ni enʼiorihwahníronke tsi entsisewahtiénawasʼte kwáh tsi nió꞉re ieʼiótokʼte, ne káti ne tóhsa thènen aisewahnitsheraiéntahke nónen téntre ne Sonkwahiáner Ié꞉sos Kerístos.

⁹ Rawenni꞉io seh ronwahniahesénhak, ne Rawenni꞉io tsi nikáien ne iehianáton taitiateriwahshónteren ne Roiénha Ié꞉sos Kerístos.

Tsi Nahtekanenrahkháshion Nó꞉nonsatokentike

¹⁰ Raoshahtstenserákon ne Sonkwahiáner Ié꞉sos Kerístos wahkwahretiáron, tewatenroshónʼa, nahkariwahnonwéʼon tsi naotenshóns sewahtónnions, né꞉ne tóhsa thènen taisewahnenratʼkháshion. Kwáh ieiokontakwénhak tsi skakaríwah kénhak, kwáh sheʼwahnontonnióntshera khók kénhak tánon tioríhwahkhok akénhake.

¹¹ Ótiakes nonkwesónhas né Chloe raowáhtsire kwáh sakʼtíken tsi ní꞉ioht tsi wahontróri, tewatenroshónʼa, tióʼkonthe tesewahriwahkénen.

¹² Tóh kén nitʼtiérat; tsi sehwahhiatátʼtion sewáhton knahótenk tetsatʼthí꞉en. Tsiehiáta enhiaiéron, “Kór thiʼhiatsʼwahnónʼne”; nó꞉ia, “Apollos thiʼhiatsʼwahnónʼne”; nó꞉ia “Tiér thiʼhiatsʼwahnónʼne”; tánon nó꞉ia, “Kerístos thiʼhiatsʼwahnónʼne.”

¹³ Ne Kerístos iáh thaʼónton ne tahonwahkháh꞉shion. Tsi nónwe nikentiokwahkérons! Kór ken kahiasáke tsi sehwenhéiase níse? Tsi sehwahtenekwahéston né ken ne Kór ahatonkwetaráhko?

¹⁴ Teiethinonwerá꞉tons ne Rawenni꞉io tsi iáh ónhka tsi nítion ní꞉i tekwahnekwahéston nek khók ne Crispus tánon ne Gaius.

¹⁵ Iáh kíʼ ónhka taʼiekwéni naʼhiaiéron, káti, né seh wahtenekwahestáh꞉kwen ní꞉i akitiókwah aisewáhton. (

¹⁶ Ah tóhske, kwáh ó꞉ni Stephanas tánon ne raowáhtsire kenekwahéston; onk kwáh kíʼ iáh teskhehiáras nónka akóren ahkhenekwahéston.)

¹⁷ Kerístos iáh né tethakateniéton nakhenekwáhesthe. Tsi tahkatheʼniéton né nakatʼró꞉ri ne kariwí꞉ios, tánon tsi enkatʼró꞉ri iáh ónhkwe akoronkhátshera ó꞉ni akonikonrahientátshera thaʼkátsthe, eh nahʼhontáwe orihwí꞉io aionʼníhake ne Kerístos tsi kaiasáke rawenhéion né꞉ne tóhsa ahkáneskwe neʼthóh ahoshatsʼténsera.

Kerístos Ne Kashatsʼténsera Tánon Né꞉ne Rawenni꞉io Raorihwahkwahrishióntshera

¹⁸ Asèken naʼteriwahnothátshera tsi nòkwa ne Kerístos tsi tehonwahiáshonte ononkwarohríta íken tsi niháti ne rohtihiatatónʼon; onk nonkwatiakheshóns tsi tionkwahiakén꞉en né꞉ne íken ne Rawenni꞉io raoshatsʼténshera.

¹⁹ Noriwahtókenti wáhton, “Enʼkeriwáhtonthe ne raonatʼtokhátsheras ne rotinikonrowáhnen, tánon enkateweiénton ne raoʼtinikonrahientátsheras ne shakotirihonniénʼnis.”

²⁰ Átskwi, kahʼnènʼne nónwe niaʼtenhonahtátere ne rontʼthóhʼkas? Tóhkaʼ ó꞉ni ne shakotirihonniénʼnis? Tóhkaʼ ó꞉ni ne rohtirennaʼon tehatirihwahwénhrons ne kén꞉en ionwenhtsiáthe? Rawenni꞉io rahwenéston né kén꞉en ionwenhtsiáte ahotokʼtkátshera tsi tehiotenonwahrorítonthe!

²¹ Asèken tohrahorihwahkwahrishiontsherá꞉kon ne Rawenni꞉io oriwí꞉io rahónni tsi kwáh tsehionikonróktha ne ónhkwe ahonwahientérahne tsi nikéntons ne raonatʼthotʼkhátshera. Khé꞉khok, tsi nikéntons ne konwahnathónkwah “ononwahroríta” ateriwahnotháhtshera ionkwahteriwahnóte, Rawenni꞉io iatoriwahiéntase nashakoniákenthe tsi nihiákon ne tiakawetákwenh.

²² Sitaeró꞉nons né tehonahtonwenhtióni nakariwahniráhtonke ne iorihwahnerahkwahthénions, ónk ne Greek né꞉ne ronnésaks ne atʼthohʼkhátsheras.

²³ Ónk nontionhake, ne tewahrihowahnáhtha tsi tehonwahiásonte ne Kerístos, nétho aterihwahnotátshera rotirihwahientaténnis ne Sitaeró꞉nons ónk tehiotenonwahroríhtonte ne raotirihwáhke ne iáh tehatiʼsitaerónons;

²⁴ ónk tsi niháti ne Rawenni꞉io ieshahkonáton, tetsáron ne Sitaeró꞉nons ó꞉ni ne iáh tehatiʼsitaeʼró꞉nons, kí꞉ken ateriwahnotátshera Kerístos seh shahʼkwahteriwahnótani, rahónha ne Rawenni꞉io raoshatsʼténsera ó꞉ni ne raototʼkhátshera ne Rawenni꞉io.

²⁵ Nahóten síken né꞉ne akénhake tahiotenonwahroritóntahke raohénton ne Ní꞉io sénha kíʼ ne watʼtókhatsherowáhnen tsi ní꞉ioht ne ónkwe akothotʼkhátshera, ó꞉ni tsi nahóten síken ne kwáh iáh tetʼkashátsʼthe raohénton ne Ní꞉io sénha kíʼ né kashatsʼte tsi ní꞉ioht ne ónkwe akoshatsʼténsera.

²⁶ Ónen shahsewehiárah tsi nisewahiatoténnen, tewatenroʼshónʼa, ne Rawenni꞉io shahtsisewahnáton. Tsi nihiakonʼnóten nonkwesénha tohʼkárak khók nitiónkwe ne sewahnikonrowáhnenʼne tóhkaʼ ó꞉ni sehwahshátsʼtekwe tóhkaʼ ó꞉ni éneken tisewátʼtekwe.

²⁷ Rawenni꞉io tahanikonrónni ne waharáhko tsi nahóten ne tsi ionwentsiáte kanatónkwah tehiotenonwahroritónten onʼnahiáwenhne nashahkotéhate ne iakonikonrowáhnen, tánon ó꞉ni ne waharáhko tsi nahóten ne tsi ionwenhtsiáte kanatónkwah iáh tekashátsthe onʼnaiáwenhne nashahkotéhathe ne ratishátsʼthes.

²⁸ Ne waharáhko tsi nahóten ne tsi ionwenhtsiáte ehtàke iakahónʼnis ó꞉ni iakokenrónʼnis tánon íwenhre iáh thènen tekástha, nahkarihwahthónʼton tsi nahóten ne tsi ionwenhtsiáte íwenhre iorihowáhnen.

²⁹ Ne náh꞉ti kí꞉ken kén꞉tons iáh ónhka thaiekwéni ne taiontaterénsaron raohénton ne Rawenni꞉io.

³⁰ Nók Rawenni꞉io tahiaiaténhawe ne taitiateriwahshónteren ne Kerístos Ié꞉sos, tánon Rawenni꞉io wahahónnien ne Kerístos rahónha nonkwahnikonrowahnhátshera akénhake. Rahónha shaʼshonkwarihwahserónnien tsi natetewáhtere ne Rawenni꞉io; Rawenni꞉io rahonkwetatókenti weteʼwáhton ó꞉ni setewahtatewenhní꞉ioʼne.

³¹ Káti, tsi niwáhton norihwahtokénti, “Ónhka áienre tahiontaterénsaron ónenk tsi né teierénsaron tsi nihohiotén꞉en ne Roiá꞉ner.”