Riong Ngopatnga 7 - Mangseng

Toko or 144,000 ako or ini Judare o el a God ile paatealing.

¹ Na ur areken i vus, lama tho thopol ensel or penel ako o mit a ulue ongepo epipeere nge, na o krim tuntun thue le espotonga or penel aken mo thue i pavurvur avele ako aro i thu ulue na rua na won.

² Lama tho thopola ensel relnga e ako i velpol a nang theki ile velpolainga na i es me, na i krim a God ako i mimi evelelnga ile ur ako i oma paatealing nge. Na i presa viringa nge ensel or penel ako God i sungu engenging a or nge ve aro o pakerenga ulue ome rua.

³ Na i ria ve, “O mothong tova o pakerenga ulue na rua na won i pavurvur ako aro them oma paatealing a ler God ile umongare a opowe tel.”

⁴ Na tho nongpol areko o ela a God ile paatealing a opowe kene oa titaling na i pavurvur nge 144,000. 12,000 nge Judare ole net omole omole.

^5-8 Ranga ve Juda, na Ruben, na Gat, na Aser, na Naptali, na Manase, na Simeon, na Livai, na Isakar, na Sebulun, na Josep ome a Benjamin. Toko or 12,000 nge net omole omole areken o el a God ile paatealing aken.

Pulua pomnga o lotual a God.

⁹ Lama tho thopol pulua pomnga na i pavurvur aro toko e i tital or avele, na or ini toko na seng areko o voth a pen elonga ake ru a ulue ako okei rel rel, na oni peti rel rel, na ole net rel rel, na o mit a mukaling nge nepes a menonga aken a Sipsip Tun itheki lemi, na o teun tekruk seltunnga velelesnga, na o krim vait thoing a omeni.

¹⁰ Na o presa viringa na o vo voing ako i vene, “Ler God ako i men a nepes a menonga tomo nge Sipsip Tun or paini inga ako o pamimi it.”

¹¹ Na ensel alavusnga o mit kalalual nepes a menonga aken tomo nge mukalinga areken na ur miminga or penel aken. Na o koru oeve nge nepes a menonga aken ma o lotual a God.

¹² Na o vo voing ako i vene, “I nunganga! Te risea ler God na te papomnga i, na te ri sivengaing a i nge, na te paaolonga i, eneke iion i kima, na ile mire aolonga, na ile engenging aolonga. Naro te oma venen aken nge nang elonga ako aro ile vusonga avele. I nunganga!”

¹³ Lama toko mukalinga aken e i nina tho ve, “Na areko o teun tekruk seltunnga velelesnga, or ini anga? Na o es a kath me?”

¹⁴ Na tho olal ile riong ve, “Toko Pomnga, lemik mire nge avele.” Na i ria tho ve, “Or ini areko o espot me nge matheong aolonga na sisisong. Na Jisas ile rinong i pariri or a God itheki, na i ranga ve ako o paut rir ole teunong nge Sipsip Tun ia mla, mako oa teunong i veleles.

¹⁵ Maken “O mit a mukaling nge a God ile nepes a menonga na nang na mlik o oma ile omaing a ile Lotu Tepun a Vel lemi. Na toko ako i men nge nepes a menonga aken i voth tomo nge or na i theal or.

¹⁶ Naro mesi pun ol or avele, naro thei i pun mun or avele ol, naro nang eve pen velnga i pavurvur aro i in oni peti avele ol.

¹⁷ Eneke Sipsip Tun ako i voth tothal nge nepes a menonga aken, aro i velpol ini othealnga, naro i wol or a pen ako thei ako i sung mimiong kene i lelpot nge me. Na God aro i girtetpot otheki einga naro o tang ol avele ol.”