Rm 14 - Meta’

Tɨ mbə̀ saʼ ə bə̂d cherə

¹ “Mbə̀ nɨŋ bə̂d mbe nɨ ɨbenɨ mɨ̀mə̌d bɔrɨ, àyɨə tɨ mbə̀ taŋ ə mbɨ mɨ̀mə̌d ɨmbə̀ʼ tɨkɔndɨ mɔʼɔ te nɨ mbɨ berɨ.

² Wə̀d mɔʼɔ ə ben ni tə we tɨ̀ rə jɨg ɨghɨjìm, àyɨə we nɨ ɨbenɨ məd bɔrɨ we tɨ̀ wɨ̀ jɨg àmei mbòb.

³ Tɨ we nɨə jɨg ɨghɨjìm təənɨ i we nɨ chəi wɨə jɨg ɨghɨjìm. Tɨ we nɨ chəi wɨə jɨg ɨghɨjìm bɨ sob i ɨsaʼi ɨgwɨ we nɨə jɨg ɨghɨjìm, ɨmbə̀ʼ ɨghəm nɨ Ŋwìə̀ fə nɨŋ əməd ənɨ wi.

⁴ Àwɔ̀ kɨə we nɨə sob ɨsaʼi ɨgwɨ ə wə̀d ə̀fàʼì wə̀d cherə ə? À yɨ mbǎʼ ə̀fàʼì məd bɨrɨ gha ni wɨ̀ fə fàʼ ɨchî chɔ̀m kɨ̀ ni wɨ̀ fə faʼ ɨchî rɨbɔ̀ŋ. Wɨ̀ bɨrɨ faʼ ɨchî chɔ̀m ɨmbə̀ʼ ɨghəm nɨ Ə̀nùŋɨ̀sɨg ə berɨ ɨka nɨ ghɨ ni wɨ̀ ghɨ əne.

⁵ “Wə̀d mɔʼɔ wɨə kɔndɨə ni ɨni mɔʼɔ ə bɔ̀ŋ chè ɨni cherə. Wɨ cherə wɨə kɔndɨə ni ɨni jìm yɨ əndəŋ əndəŋ. Wə̀d mɔʼ mɔʼ ben ni ənû ze nɨ wɨə kɔndɨə yɨ əze nɨ kuʼnɨ.

⁶ Wə̀d we nɨ zə ni əni ə mɔʼɔ ə chè mbɨ cherə, wɨə ghɨ̀ əne ɨmbə̀ʼ wumnɨ Ə̀nùŋɨ̀sɨg. We nɨə jɨg ɨghɨjìm, wɨə jɨg ɨmbə̀ʼ wumnɨ Ə̀nùŋɨ̀sɨg, ɨmbə̀ʼ ɨghəm nɨ mɨ̀mə̌d mɨjìm mbɨə nàʼə̀ məben-əwe əmbɨ ə Ŋwiə̀ ɨmbə̀ʼ ɨghɨjɨg mbe. We nɨ chəi wɨə jɨg ɨghɨjìm, wɨə ghɨ̀ əne ɨmbə̀ʼ wumnɨ Ə̀nùŋɨ̀sɨg. Məd wɨə bə̀ nàʼə̀ məben-əwe əmbɨ Ŋwiə̀ ɨmbə̀ʼ ɨghɨjɨg mbe.

⁷ Chəi wə̀d mɔʼɔ rəbɔʼ na nɨ yeʼ ɨkǎ ənɨ i ɨghəm. Chəi wə̀d mɔʼɔ rəbɔʼ na nɨə kwɨ ənɨ i ɨghəm.

⁸ Tɨ̀ mɨ yeʼ ɨkǎ, tɨ̀ wɨ ɨka ɨmbə̀ʼ wumnɨ Ə̀nùŋɨ̀sɨg. Tɨ̀ mɨ kwɨ, tɨ̀ fə kwɨ ɨmbə̀ʼ wumnɨ Ə̀nùŋɨ̀sɨg. Əne tɨ̀ mɨ yeʼ ɨkǎ kɨ̀ tɨ̀ mɨ kwɨ, tɨ̀ yɨə bə̂d Ə̀nùŋɨ̀sɨg.

⁹ Kristo nyaʼa kwɨ bə̀ wɨrɨ zwemə ɨmbə̀ʼ wɨ̀ yeʼ Ə̀nùŋɨ̀sɨg ɨgwɨ ɨvɨ bə̂d bə̀ fɔrɨ ɨgwɨ ə bə̂d mbe nɨ yeʼ ɨkǎ.

¹⁰ “À kɨə sob ɨsaʼi ɨgwɨ we aŋgɔb ɨmbə̀ʼ ə ye? Kɨ̀ à kɨə tə̀ə̀nɨ̀ we aŋgɔb ɨmbə̀ʼ ə ye? Mbə̀ kyerɨ ni mba mɨjìm bɨrɨ təm ɨfě Ŋwiə̀ ni wɨ̀ saʼ əwa.

¹¹ Ə zɨ ɨŋga Ə̀ŋwàʼnɨ̀ ə Ŋwiə̀ ni, Ə̀nùŋɨ̀sɨg ə ghà ni, 'Ɨchî nɨ mə̀ yeʼ ɨkǎ, wə̀d jìm bɨrɨ chindɨ ɨtu ɨnywɨ ənɨ mɨ ɨfě, wə̀d jìm bɨrɨ ghà ənɨ i ɨchû ni mɔ̌ yɨə Ŋwiə̀.'

¹² Əne wə̀d mɔʼ mɔʼ rəbɔʼ na bɨrɨ gha ɨnû mbe nɨ wɨ̀ ghɨ̌ əmbɨ ə Ŋwiə̀.”

Tɨ mbə̀ ghɨ ə ni wə̀d mɔʼɔ rəbɔʼ nən gu ə

¹³ Tɨ tɨrə̀ bə̀ saʼ a mba bɔŋgɔb, àyɨə tɨ̀ nuŋ ɨŋga ta fîŋ ni chəi tɨ̀ bɨrɨ nuŋ əghɨ nɨ tɨ̀ wə̀d tɨgrɨ ɨgun, kɨ̀ əghɨ nɨ tɨ̀ zɨə kən ɨnə̂njɨ̀ əmbɨ wa aŋgɔb.

¹⁴ Ɨchî nɨ mə̀ yeʼ ənɨ ɨfɔtɨ mbɨ Ə̀nùŋɨ̀sɨg Yeso, mə kyerɨ ni chəi əghɨjɨg ə mɔʼɔ nɨ zɨ̀ rɨka zeŋ i ɨfě Ŋwiə̀. Əghɨjɨg ə mɔʼɔ ze tɨ̀ zɨə chubɨ zɨ rɨ zeŋ əmbɨ wə̀d we nɨ kɔndɨ ni zɨ rɨka zeŋ i.

¹⁵ Əghɨ ze nɨ àwɔ̀ ə jɨgə mɨ yeʼə tɔb we aŋgɔb, njɨ zɨə chwi ni chəi àwɔ̀ ə wɨrɨə ghɨ̀ ɨnû mbɨ ɨghaʼi. Tɨrə̀ ben e ni əghɨ ze nɨ àwɔ̀ ə jɨg ə nimnɨ ɨbenɨ wə̀d mɔʼɔ we nɨ Kristo nyaʼa kwɨ ɨgwɨ ətu əməd.

¹⁶ Tɨrə̀ ben e ni əghɨ ze nɨə bɔŋ ɨ ne ə yeʼ əghɨ nɨ bə̂d ə ghà ni zɨ̀ rɨka bɔŋ i.

¹⁷ Mbə̀ kyerɨ ni ka ənû ɨfɔ̀n ə Ŋwiə̀ yɨ i ənû nɨ jɨg bə̀ nɔ. À yɨ ənû nɨ ghɨ ɨnû nɨ kùʼnɨ̀, ənû nɨ chub ənɨ əbɔrəbɔd mbɨ ənû nɨ chub ənɨ ɨghaʼi ɨchî nɨ tɨ̀ yeʼ ənɨ ɨfɔtɨ mbɨ Əzwî ə Zeŋɨ.

¹⁸ Ənɨ wə̀d ə fàʼ əmbɨ Kristo ɨkwɨ ɨchî wɔ̂, Ŋwìə̀ wɨə ghaʼə, bə̂d bə̀ ben ni ɨ wɨə ghɨ̀ ənû nɨ kuʼnɨ.

¹⁹ Əne tɨ̀ beenɨ əbɔʼ ɨnû mbe nɨə ghɨ̀ ni tɨ̀ chub ənɨ əbɔrəbɔd, bə̀ beenɨ yeʼ əbɔʼ mbe nɨə ghɨ̀ ni tɨ̀ təm kàànɨ̀ ɨnɔ̂n.

²⁰ Tɨ mbə̀ chəkɨ ə ə̀fàʼì ə Ŋwiə̀ ɨmbə̀ʼ əghɨjɨg. Ɨghɨjɨg jìm ə zeŋ, àyɨə zɨ rɨka bɔ̀ŋ i ni mbə̀ jɨg əghɨ ze nɨ bɨrɨ ghɨ ni ɨbenɨ wə̀d cherə bɔd.

²¹ Zɨə bɔ̀ŋ ni tɨ wə̀d kud i nyam, kɨ̀ bè nɔ mɨnoʼ, kɨ̀ bè ghɨ̀ əghɨ mɔʼɔ ze nɨ bɨrɨ ghɨ̀ ni ɨbenɨ we aŋgɔb bɔd.

²² Ənû ze nɨ à benɨ ə ten i ɨ ne mbɨ ə Ŋwiə̀. Ŋwìə̀ zɨ əbɔrəbɔd ɨgun ə bə̂d mbe nɨ chəi mbɨ zɨ ɨsaʼi ɨgun ə ɨnyod, ɨmbə̀ʼ ɨghəm nɨ mbɨə ghɨ̀ ɨnû mbe nɨ mbɨ kyerɨ ni mbɨ yɨ ɨnû nɨ kuʼnɨ.

²³ Ŋwiə̀ bɨrɨ zɨ ɨsaʼi ɨgun ə bə̂d mbe nɨə bid ɨkwɨ əghɨjɨg ə mɔʼɔ bɔŋ wɨrɨ jɨg, ɨmbə̀ʼ ɨghəm nɨ chəi mbɨə jɨg ənjìm ɨbenɨ. Ənû ə mɔʼɔ ze nɨ wə̀d ə ghɨ̀ə̀ nɨ chəi zɨə yeʼe rɨ ənɨ ɨbenɨ yɨ ənû rɨbɔ̀ŋ.