Mk 8 - Meta’

Yeso nyaʼa jə bə̂d chuʼ rɨ̀kwè

¹ À nyaʼa ənɨ ə nyùmə̀ we, ɨnɔ̂n bə̂d nɨ nyaʼa kwàʼ wɨ kyeŋ nyaʼa fetɨ. Ɨchî nɨ chəi mbɨ nyaʼa wɨrɨ berɨ əghɨ ə mɔʼɔ nɨ tɨ mbɨ jɨg, Yeso nyaʼa tɔŋ mbi mə̀mə̀ə̀nɨ̀-ɨnû əsɨ ni, ghà əmbɨ mɨ̀mə̌d ni,

² “Mə wɨə kàŋə̀ kə̀n ɨmbə̀ʼ ɨnɔ̂n bə̂d wɔ̂, ɨmbə̀ʼ ɨghəm nɨ mbɨ fə chubɨ mbɨ num ɨni tad, əne chəi mbɨ wɨrɨ berɨ əghɨ ə mɔʼɔ nɨ tɨ̀ mbɨ jɨg.

³ Mə mɨ chà mɨ̀mə̌d ɨnûʼ njì, njɨ mbɨ bɨrɨ gù ɨnə̂njɨ̀ nə̀ŋə̀, ɨmbə̀ʼ ɨghəm nɨ mbɨ mɔʼɔ rəbɔʼ mɨ̀mə̌d kàŋ nɔ̀ʼ rɨ əsa əgha.”

⁴ Mə̀mə̀ə̀nɨ̀-ɨnû ɨməd nyaʼa biirɨ ɨ bɔ ni, “Wə̀d kɨə wo nɨŋ ŋgə̀ŋ rɨ ə yi əgha ɨŋga ɨbad rɨkwàʼi nɨ bɨrɨ kùʼ nɨ tɨ̀ mbɨ jə bə̂d mbɔ̂ mɨ̀jìm əŋgu ə?”

⁵ Wɨ̀ nyaʼa biirɨ əmbɨ mɨ̀mə̌d ni, “Mbə̀ berɨ chiŋ ŋgə̀ŋ rɨsəʼ ə?” Mbɨ nyaʼa wììrɨ̀ ni, “Tɨ̀ berɨ chiŋ ŋgə̀ŋ sambe.”

⁶ Yeso nyaʼa zu əne ghà əmbɨ ɨnɔ̂n bə̂d we ni mbɨ chub ə si. Ənɨ mbɨ nyaʼa chubɨ, wɨ̀ nyaʼa nɨŋ chiŋ ŋgə̀ŋ te sambe, kɔ̀ŋgɨ̀ ə Ŋwìə̀, bəʼrɨ, nàʼ əmbɨ mbi mə̀mə̀ə̀nɨ̀-ɨnû ni mbɨ ghapə. Mbɨ nyaʼa nɨŋ ghàpɨ̀ əmbɨ ɨnɔ̂n bə̂d we.

⁷ Mbɨ nyaʼa bə̀ berɨ əgwi ə kwa kwa mɔʼɔ rɨpiî. Ənɨ wɨ̀ nyaʼa zɨ əbɔrəbɔd ɨgun əgwi ze, wɨ̀ nyaʼa bə̀ ghà ni mbɨ ghapə.

⁸ Mbɨ nyaʼa bə̀ ghàpɨ̀, əne wə̀d jìm nyaʼa jɨg kod. Mə̀mə̀ə̀nɨ̀-ɨnû mbe nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ sambe.

⁹ À yɨə nyaʼə ɨghabɨ ə bə̂d chuʼ rɨ̀kwè nɨ nyaʼa əŋgu. Ənɨ mbɨ nyaʼa fə jɨgɨ màànɨ̀, wɨ̀ nyaʼa ghà ni mbɨ sɨ wò əwən.

¹⁰ Àmei əwu əwən, wɨ̀ nyaʼa nɔ̀ʼ wò nyɨ əbaŋ ɨgyɨ̀ mbɨ mbi mə̀mə̀ə̀nɨ̀-ɨnû mbɨ wò əbà əbeŋ ze rɨ ə Dàlmanutà.

Mɨ̀Farisiî nyaʼa ghà ni Yeso ghɨ ənû ə yiirɨ

¹¹ Mɨ̀Farisiî mɔʼɔ nyaʼa wò kɔ tàŋɨ mbɨ Yeso. Mbɨ nyaʼə kə̀b nɨ kwàʼnɨ̀ əməd, əne mbɨ nyaʼa ghà ɨ bɔ ni wɨ̀ ghɨ ənû ə yiirɨ nɨ chwi ni à yɨə Ŋwìə̀ naʼ ɨka ɨ bɔ.

¹² Ənû ze ə nyaʼa bètɨ̀ fîŋ məd, wɨ̀ zwi rɨ fùùm əne ghà ni, “Ɨghəm bə̂d wɔ̂ kɨə kə̀b ənû ə yiirɨ ɨmbə̀ʼ ə yè ə? Mə ghà rəsìʼ ɨ nən ni chəi mbɨ bɨrɨ chwi ənû ə yiirɨ ə mɔʼɔ əmbɨ mɨ̀mə̌d.”

¹³ Ənɨ wɨ̀ nyaʼa ghà əne, wɨ̀ nyaʼa sàŋ mɨ̀mə̌d yì wò nyɨ əbaŋ ɨgyɨ̀ ze baanɨ wò ɨnjin wə.

Ɨpatɨ dè ɨfuʼ mɨ̀Farisiî mbɨ wɨ Herɔ̀d

¹⁴ Mə̀mə̀ə̀nɨ̀-ɨnû Yeso nyaʼa neb nɨ nɨŋ ŋgə̀ŋ. Mbɨ nyaʼa berɨ àmei chiŋ ŋgə̀ŋ mɔʼ ɨŋga əbaŋ ze.

¹⁵ Əne Yeso nyaʼa patɨ mɨ̀mə̌d ghà ni, “Mbə̀ chub ɨkyèʼe we əwən ɨmbə̀ʼ ɨfuʼ mɨ̀Farisiî mbɨ wɨ Herɔ̀d we nɨə ghɨ̀ ni ŋgə̀ŋ kɔʼ.”

¹⁶ Mbɨ nyaʼa kɔ ghǎ mbənə mbənə ni, “Ɨ wɨə ghà əne ɨmbə̀ʼ ɨghəm nɨ chəi tɨ̀ berɨ ŋgə̀ŋ.”

¹⁷ Yeso nyaʼa kyerɨ ənû ze nɨ mbɨ nyaʼə ghàə̀, əne wɨ̀ nyaʼa ghà əmbɨ mɨ̀mə̌d ni, “Mbə kɨə ghà ənû ɨmbə̀ʼ ɨchî nɨ chəi mbə̀ berɨ ŋgə̀ŋ ɨmbə̀ʼ ə yè ə? Chə wa kɨrɨ i ɨwe ətu nən ə? Chəi mbə ɨtu bə kɨrɨ zeŋ ə? Tə fîŋ wa fə bə̀ tu ə?

¹⁸ Mbə berɨ əghə, àyɨə chəi ənɨ tɨ̀ mbə zə ɨsɨ ə? Mbə berɨ ɨ̀tǒŋ, àyɨə chəi ənɨ tɨ̀ mbə zu ɨnû ə? Chəi mbə̀ wɨrɨ kɔndɨ ə?

¹⁹ Ənɨ mə̀ nyaʼa bəʼrɨ chiŋ ŋgə̀ŋ te rɨ̀tân əmbɨ ə bə̂d chuʼ rɨ̀tân, mbə̀ nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ səʼ ə?” Mbɨ nyaʼa ghà ɨ bɔ ni, “Tɨ̀ nyaʼa fetɨ mbɨ̀rɨkaʼ wum chɔ̀b rɨ̀be.”

²⁰ Wɨ̀ nyaʼa bə̀ yì biirɨ ni, “Ənɨ mə̀ nyaʼa bəʼrɨ chiŋ ŋgə̀ŋ te sambe əmbɨ ə bə̂d chuʼ rɨ̀kwè, mbə̀ nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ səʼ ə?” Mbɨ nyaʼa ghà ɨ bɔ ni, “Tɨ̀ nyaʼa fetɨ mbɨ̀rɨkaʼ sambe.”

²¹ Wɨ̀ nyaʼa sɨ biirɨ əmbɨ mɨ̀mə̌d ni, “Əne chəi mbə ɨtu kɨrɨ zeŋ ə?”

Yeso nyaʼa vɨ mbaŋə̀ nɨ fɨ̀g ə Bètsaidà

²² Yeso mbɨ mbi mə̀mə̀ə̀nɨ̀-ɨnû nyaʼa wò ə Bètsaidà. Ənɨ mbɨ nyaʼa əŋgu, bə̂d mɔʼɔ nyaʼa wò əsɨ məd mbɨ ə mbaŋə̀ nɨ nyaʼa fɨgə. Mbɨ nyaʼa pè buʼ ɨbɔ ɨ bɔ ni wɨ̀ betɨ mbaŋə̀ ze.

²³ Yeso nyaʼa yim əbɔ ɨfɨgɨ we, mbɨ jwɨ̀ rɨŋga əsɨ ze. Ənɨ wɨ̀ nyaʼa fə fam mad ɨŋga əghə əməd bə̀ zab mbi ɨbɔ ɨgwɨ məd, wɨ̀ nyaʼa biirɨ ɨ bɔ ni, “À wɨə zə əghɨ ə mɔʼɔ ə?”

²⁴ Mbaŋə̀ ze nyaʼa nɔ̀ɔ̀rɨ̀ e ətu ghà ni, “Mə wɨə zə bə̂d nɨə yènə̀, àyɨə ɨ mbɨ ɨghabɨ ɨzed.”

²⁵ Yeso nyaʼa wɨrɨ yì bètɨ̀ əghə ə mbaŋə̀ ze. Ənɨ wɨ̀ nyaʼa bètɨ̀ əne, mbaŋə̀ ze nyaʼa sɔ̀ŋgɨ̀ əghə neŋ ɨsɨ, əne əghə əməd ə nyaʼa zeŋ, wɨ̀ zə ɨghɨjìm kwàʼ ɨchî chɔ̀m.

²⁶ Yeso nyaʼa ghà ɨ bɔ ni wɨ̀ wo əkwɨ ni. Wɨ̀ nyaʼa ghɨ̀ əne wɨrɨ ghà ɨ bɔ ni, “Tɨrə̀ tɔ wɨrɨ nyɨ e ə Bètsaidà.”

Pità nyaʼa ghà wə̀d we nɨ Yeso yeʼ wɨwən

²⁷ Yeso mbɨ mbi mə̀mə̀ə̀nɨ̀-ɨnû nyaʼa nɔ̀ʼ wò ɨŋga ɨsɨ mbe rɨ ə Kàisàriyà Filipì. Ənɨ mbɨ nyaʼa sɨ ɨnə̂njɨ̀, wɨ̀ nyaʼa biirɨ əmbɨ mɨ̀mə̌d ni, “Bə̂d kɨə ghàə̀ ni mɔ̌ yɨə we ə?”

²⁸ Mbɨ nyaʼa wììrɨ̀ ɨ bɔ ni, “Bə̂d mɔʼɔ mbɨə ghàə̀ ni àwɔ̀ yɨə Jɔ̌n we nɨ nyaʼə nàʼ mɨnib. Mbɨ cherə mbɨə ghàə̀ ni àwɔ̀ yɨə Èlaijà. Mbɨ cherə ghàə̀ ni àwɔ̀ yɨ wɨ mɔʼɔ rəbɔʼ bə̂d ɨ̀kə̀n Ŋwiə̀.”

²⁹ Wɨ̀ nyaʼa biirɨ əmbɨ mɨ̀mə̌d ni, “À yeʼ mbə̀nə, mbə̀ ghà ni mɔ̌ yɨə we ə?” Pità nyaʼa wììrɨ̀ ɨ bɔ ni, “Àwɔ̀ yɨə Wə̀d we nɨ Ŋwìə̀ zɔʼɔ.”

³⁰ Ənɨ Pità nyaʼa gha əne, wɨ̀ nyaʼa sɨ jeŋgɨ patɨ mɨ̀mə̌d ni tɨ mbɨ tɔ ghà əwən ənû ɨmbə̀ʼ əwi əmbɨ ə wə̀d mɔʼɔ.

Yeso nyaʼa ghà ni tə bɨrɨ zə ŋgəʼ kwɨ

³¹ Yeso nyaʼa kɔ chwi ɨnû əmbɨ mbi mə̀mə̀ə̀nɨ̀-ɨnû ni Wan Wə̀d berɨ jeŋgɨ zə ŋgəʼ, bə̂d kyeŋ mbe rɨŋga əbeŋ mbɨ ə bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ bɨrɨ ton əməd. Mbɨ bɨrɨ zwiirɨ əməd. Ɨni nɨə che tad wɨ̀ wɨrɨ zwemə.

³² Wɨ̀ nyaʼa ghà əzɔ̂ əsaŋ əsaŋ. Əne Pità nyaʼa nɨŋ əməd mbɨ tindɨ wò ɨban ɨban, pè kɔ gham əbɔʼ məd.

³³ Yeso nyaʼa bèŋ zə mbi mə̀mə̀ə̀nɨ̀-ɨnû əne ghàm əbɔʼ ə Pità ghà ni, “Àwɔ̀ Satàn, nɔʼ e rɨ ɨban num! Chəi à nuŋ e ɨkɔndɨ ɨgun ɨghɨ mbe nɨ Ŋwìə̀ kəbɨ. À nùŋ yeʼ ɨgun ɨghɨ mbe nɨ bə̂d mɨ̀sɔŋɨchù kəbɨ.”

³⁴ Ənɨ wɨ̀ nyaʼa ghà əne, wɨ̀ nyaʼa tɔŋ ɨnɔ̂n bə̂d we bə̀ tɔŋ mbi mə̀mə̀ə̀nɨ̀-ɨnû əsɨ ni, ghà əmbɨ mɨ̀mə̌d ni, “Wə̀d mɔʼɔ mɨ kəb yeʼe əbɔʼ num, wɨ̀ ton ɨnû mɔʼɔ mbe nɨ nyamnyod məd ə feenɨə, bèʼ e əzed ə baʼnɨ beenɨ əbɔʼ num,

³⁵ ɨmbə̀ʼ ɨghəm nɨ wə̀d mɔʼɔ we nɨə kə̀b nuŋ i ɨ̀tènɨ̀ bɨrɨ sam ɨ̀tènɨ̀ we. We nɨ sam i ɨ̀tènɨ̀ ɨmbə̀ʼ ɨkə̂n chɔ̀m bɨrɨ wɨrɨ jɨg ɨ̀tènɨ̀ we.

³⁶ Njìm ze nɨ wə̀d bɨrɨ jɨg kɨə ye əwù ze nɨ wɨ̀ berɨ ɨsɨg wɔ̂ jìm əne sam i ɨ̀tènɨ̀ ə?

³⁷ Əghɨ nɨ tɨ̀ wə̀d nàʼ ɨmbə̀ʼ wɨrɨ berɨ i ɨ̀tènɨ̀ kɨə yè ə?

³⁸ Ətu ə wə̀d mɔʼɔ mɨ yeʼə nìd ɨmbə̀ʼ əmɨ fɔrɨ ɨmbə̀ʼ mɨ ɨŋgam ɨŋga ɨghəm bə̂d wɔ̂ nɨ chəi wɨə wumnɨ ə Ŋwiə̀, nɨ wɨə bə̀ ghɨ̀ yeʼ ɨnû rɨbɔ̀ŋ, njɨ ətu ə Wan Wə̀d ə bɨrɨ bɨ nìd ɨmbə̀ʼ əməd ənɨ ə nyùmə̀ we nɨ wɨ̀ wɨrɨ yeʼe mbɨ mbi mbɨ̀aŋgɨrə̀ zeŋɨ mbɨ ɨka we nɨ Mbǎʼ naʼ ɨ bɔ ni wɨ̀ tumbɨ ɨsɨg.”