Lk 5 - Meta’

Yeso nyaʼa tɔŋ mbi mə̀mə̀ə̀nɨ̀-ɨnû rɨtu

¹ À nyaʼa əni ə mɔʼɔ nɨ Yeso nyaʼa təm əŋgo ə sà ze rɨ ə Gènesarèt, bə̂d nyaʼa jeŋgɨ tindɨ ɨban məd ɨmbə̀ʼ zu ɨŋgam Ŋwiə̀.

² Wɨ̀ nyaʼa zə ɨbaŋ ɨgyɨ̀ be ɨban ə sà ze. Mə̀gywɨ̀-əgwi mbe nɨ nyaʼa ɨŋga ɨbaŋ mbe nyaʼa fə jwɨ̀ sɨə sò tə kɨ̀.

³ Wɨ̀ nyaʼa nyɨ ɨŋga əbaŋ ə mɔʼɔ, nɨ nyaʼə əzɨ ə Saimòn. Wɨ̀ nyaʼa nyɨ əne ghà əmbɨ Saimòn ni wɨ̀ tin əbaŋ ze nɔ̀ʼ rɨ əŋgo ə sà wò ɨŋga rɨpiî. Wɨ̀ nyaʼa chub ɨŋga kɔ chwi ɨnû əmbɨ ə bə̂d.

⁴ Ənɨ wɨ̀ nyaʼa fə ghamɨ màànɨ̀, wɨ̀ nyaʼa ghà əmbɨ Saimòn ni, “Tin əbaŋ zɔ̂ wò əsɨ ze nɨ sa ɨŋga, màʼ te kɨ̀, à bɨrɨ gywɨ əgwi.”

⁵ Saimòn nyaʼa wììrɨ̀ ɨ bɔ ni, “Masà, tɨ̀ fàʼ kwàʼ rɨ̀kǎ ɨzimɨ wɔ̂ jìm, àyɨə chəi tɨ̀ gywɨ əghɨ ə mɔʼɔ. Àyɨə ɨchî nɨ à ghǎ əne, mə bɨrɨ màʼ.”

⁶ Ənɨ mbɨ nyaʼa maʼ kɨ̀ te, mbɨ nyaʼa gywɨ̀ əgwi ə nɔnɔʼ. Ɨchî nɨ kɨ̀ te nyaʼə kə̀b sandə,

⁷ mbɨ nyaʼa nepɨ mbə bɔŋgɔb ə̀fàʼì ɨŋga əbaŋ ə cherə ni mbɨ yeʼe wèèrɨ̀ əwən. Mbɨ nyaʼa wò fɔtɨ chɨ̀ əgwi ze zɨə swi ɨbaŋ mbe be. Zɨə nyaʼa ghɨ̀ ɨbaŋ mbe sɨə kə̀b nim əton ɨgyɨ̀.

⁸ Ənɨ Saimon Pità nyaʼa zə əne, wɨ̀ nyaʼa gù ə si ɨfě Yeso ghà ni, “Nɔʼ e rɨ ɨban num, kyɨ Ə̀nùŋɨ̀sɨg, ɨmbə̀ʼ ɨghəm nɨ mɔ̌ yɨə wə̀d nɨə ghɨ̀ ɨnû rɨbɔ̀ŋ.”

⁹ Saimon Pità mbɨ ə bə̂d mbe nɨ nyaʼa mbɨ məd nyaʼa yiirɨ ɨnun əgwi ze nɨ mbɨ nyaʼa gywɨ̌.

¹⁰ À yɨə nyaʼa bə̀ ənû ə yiirɨ əmbɨ Jems mbɨ Jɔ̌n nɨ nyaʼa bɔn Zebèdiî. Mbɨ yɨə nyaʼə bɔŋgɔb ə̀fàʼì Saimòn. Yeso nyaʼa ghà əmbɨ Saimòn ni, “Tɨrə̀ bɔ e, àyɨə kyerɨ ni nɔ̀ʼ tɨ rə̀chɔ̀ŋ à bɨrɨ sɨə gywɨ̀ə̀ bə̂d.”

¹¹ Ənɨ mbɨ nyaʼa chɨ ɨbaŋ ɨgyɨ̀ mbe əsaŋ, mbɨ nyaʼa sàŋ ɨghɨjìm beenɨ əbɔʼ Yeso.

Yeso nyaʼa vɨ̀ mbaŋə̀ nɨ nyaʼə wɔ̀n əpabɨ

¹² Ənɨ Yeso nyaʼa ɨŋga əsɨ ə mɔʼɔ, wə̀d mɔʼɔ nɨ əpabɨ ə nyaʼa swi ɨnyod məd nyaʼa yeʼe. Ənɨ wɨ̀ nyaʼa zə ə Yeso, wɨ̀ nyaʼa gù ɨfě ɨ bɔ, buʼ ɨbɔ ɨ bɔ ghà ni, “Masà, à mɨ ghaʼ, à ghɨ̀ mɨ ɨnyod zeŋ.”

¹³ Yeso nyaʼa sem əbɔ, betɨ əməd, ghà ni, “Mə ghaʼ nɨ ghɨ̀ əne. Ɨnyod, zeŋ!” Àmei əwu əwən, əpabɨ ze ə nyaʼa mì i.

¹⁴ Yeso nyaʼa ghà ɨ bɔ ni, “Tɨrə̀ tɔ ghà e ənû zɔ̂ əmbɨ wə̀d mɔʼɔ, àyɨə ndə̀ chwi e ɨnyod əmbɨ wə̀d mbàn Ŋwìə̀, əne nàʼ ɨghɨ ə̀fà ɨchî nɨ Mose nyaʼa ŋwaʼnɨ, ɨmbə̀ʼ bə̂d kyerɨ ni əpabɨ ze ə fə mì rɨ ɨgwɨ ne.”

¹⁵ Àyɨə ɨnû ɨmbə̀ʼ ə Yeso nyaʼa yi jeŋgɨ jàŋ. Mɨnɔ̂n bə̂d nɨ nyaʼa kwàʼ wɨ kyeŋ nyaʼa wò ɨmbə̀ʼ zu ɨnû mbe nɨ wɨ̀ nyaʼə ghàə̀. Wɨ̀ nyaʼa bə̀ wò ɨmbə̀ʼ wɨ̀ vɨ ɨnɔʼɔ mɨ̀mə̌d.

¹⁶ Yeso nyaʼa kɨə wò ɨŋga ɨbad rɨkwàʼi ɨmbə̀ʼ kɔŋgɨ ə Ŋwiə̀.

Yeso nyaʼa vɨ̀ mbaŋə̀ nɨ nyaʼa buʼrə

¹⁷ À nyaʼa əni ə mɔʼɔ, ənɨ Yeso nyaʼə chwi ɨnû, mɨ̀Farisiî mɔʼɔ mbɨ məchwiə̀ rɨ̀kə̌ mɔʼɔ nyaʼa bə̀ chub əŋgu. Mbɨ nyaʼa yeʼe rɨŋga ɨsɨ jìm mbe rɨ ə Galiliî, yeʼe rɨ ə Jùdeyà bə̀ yeʼe rɨ ə Jèrusalèm. Ɨka Ə̀nùŋɨ̀sɨg nyaʼa ɨgwɨ məd nɨ vɨ bə̂d əwɔn.

¹⁸ Àmei əwu əwən, bə̂d mɔʼɔ nyaʼa bèʼ mbaŋə̀ mɔʼɔ ɨgun əbàʼ yeʼe mbɨ wɨwən. Mbaŋə̀ ze nyaʼa buʼrə. Mbɨ nyaʼa kə̀b ni njɨ mbə nyɨ nùŋ əməd ɨfě Yeso.

¹⁹ Àyɨə ɨchî nɨ chəi mbɨ nyaʼa berɨ ɨnə̂njɨ̀ nɨ nyɨ ɨŋga nəb ze mbɨ məd, ɨmbə̀ʼ ɨnɔ̂n bə̂d we nɨ nyaʼa əŋgu, mbɨ nyaʼa kɔʼ ɨdom nəb, tòʼ ɨbɨgɨ, swi əməd ɨgun əbàʼ əməd ɨŋga mɨgharə̀ ɨnɔ̂n bə̂d we ɨfě Yeso.

²⁰ Ənɨ Yeso nyaʼa zə ɨchî nɨ bə̂d mbe nyaʼa nuŋ fîŋ ɨgwɨ ni, wɨ̀ nyaʼa ghà əmbɨ ə mbaŋə̀ ze ni, “Mɨ sə̀ʼ, mə fə waʼ mbe ɨnû rɨbɔ̀ŋ.”

²¹ Məchwiə̀ rɨ̀kə̌ mbɨ mɨ̀Farisiî nyaʼa zu əne kɔ biirɨ mbənə mbənə ni, “Mbaŋə̀ zɔ̂ nɨə zɔ̀m ə Ŋwiə̀ kɨə we ə? À kɨə we nɨ tɨ̀ wɨ̀ waʼ ɨnû rɨbɔ̀ŋ bə̂d chè rɨ ənɨ ə Ŋwiə̀ rə̀zìʼ wi ə?”

²² Yeso nyaʼa kyerɨ ənû ze nɨ mbɨ nyaʼə biirɨə, əne wɨ̀ nyaʼa wììrɨ̀ əmbɨ mɨ̀mə̌d ni, “Mbə kɨə biirɨ ɨnû mbɔ̂ ɨŋga tə fîŋ ɨmbə̀ʼ ə ye ə?

²³ À kɨ ənû zi ə zam ə? À kɨ ɨ gha ni, 'Mə fə waʼ mbe ɨnû rɨbɔ̀ŋ', kɨ̀ ɨ gha ni, 'Nɔʼ rətiə yèn ə'?

²⁴ Àyɨə mə bɨrɨ ghɨ mbə̀ kyerɨ ni Wan Wə̀d ə berɨ ɨka ɨgwɨ ə si nɨ waʼ ɨnû rɨbɔ̀ŋ.” Ənɨ wɨ̀ nyaʼa ghà əne, wɨ̀ nyaʼa ghà əmbɨ ə mbaŋə̀ ze nɨ nyaʼa buʼrə ni, “Nɔʼ rətiə, bèʼ e ɨkon, wò əwe ɨnuʼ.”

²⁵ Àmei əwu əwən, mbaŋə̀ ze nyaʼa nɔ̀ʼ rətiə ɨfě mɨ̀mə̌d mɨjìm, bèʼ ɨkon we nɨ wɨ̀ kəʼ nòkɨ̀ ɨgun, wò əwi ɨnuʼ, yènə̀ yiirɨ ə Ŋwiə̀.

²⁶ Ənû ze ə nyaʼa chè mɨ̀mə̌d mɨjìm. Əne mbɨ nyaʼa bɔ yiirɨ ə Ŋwiə̀ ghà ni, “Tɨ̀ fə zə rɨ̀sɔ̀ʼ ɨnû rə̀chɔ̀ŋ.”

Yeso nyaʼa tɔŋ ə Levì

²⁷ Ənɨ ənû ze ə nyaʼa chě, Yeso nyaʼa jwɨ̀, əne zə əfetɨ mɨ̀tagsɨ̀ mɔʼɔ nɨ ɨkum məd nyaʼə Levì. Wɨ̀ nyaʼa chub ɨŋga nəb ze nɨ wɨ̀ nyaʼə fetɨ mɨ̀tagsɨ̀ ɨŋga. Əne Yeso nyaʼa ghà ɨ bɔ ni, “Beenɨ əbɔʼ num.”

²⁸ Levì nyaʼa nɔ̀ʼ sàŋ ɨghɨjìm beenɨ əbɔʼ məd.

²⁹ Levì nyaʼa kàʼ əchwɨ̂ ə kyeŋ əmbɨ Yeso ɨŋga i nəb. Məfetɨ mɨ̀tagsɨ̀ nɔnɔʼ nyaʼa əŋgu mbɨə bə̂d cherə nɨ nyaʼa chub ɨ jɨg mbɨ mɨ̀mə̌d.

³⁰ Mɨ̀Farisiî mɔʼɔ mbɨ məchwiə̀ rɨ̀kə̌ nɨ nyaʼa ɨŋga ɨfɔtɨ mɨ̀mə̌d nyaʼa ghàmbɨ̀ ə Yeso əmbɨ mə̀mə̀ə̀nɨ̀-ɨnû ɨməd ghà ni, “Mbə̀ kɨə jɨgə bə̀ nɔə mbɨ məfetɨ mɨ̀tagsɨ̀ fɔrɨ mbɨ ə bə̂d mbe nɨə ghɨ̀ ɨnû rɨbɔ̀ŋ ɨmbə̀ʼ ə ye ə?”

³¹ Yeso nyaʼa wììrɨ̀ əmbɨ mɨ̀mə̌d ni, “Chəi bə̂d mbe nɨ yeʼ ɨkǎ ə kə̀bə̀ wə̀d ɨfuʼ. Bə̂d mbe nɨə kə̀bə̀ wə̀d ɨfuʼ yɨ mbe nɨə wɔ̀nə̀.

³² Chəi mə̀ yeʼe ɨ tɔŋ bə̂d mbe nɨə ghɨ̀ ɨnû nɨ kuʼnɨ ni mbɨ beŋ tə fîŋ. Mə yeʼe ɨ tɔŋ yeʼ mbe nɨə ghɨ ɨnû rɨbɔ̀ŋ ni mbɨ beŋ tə fîŋ.”

Ɨbiirɨ ɨmbə̀ʼ ənû nɨ chub rɨ jɨg

³³ Bə̂d mɔʼɔ nyaʼa ghà əmbɨ Yeso ni, “Mə̀mə̀ə̀nɨ̀-ɨnû Jɔ̌n mbɨə kɨə chubə rɨ jɨg bə̀ kɔ̀ŋgɨ̀ ə Ŋwìə̀, mbɨ mɨ̀Farisiî mbɨə bə̀ ghɨ̀ àmei əndəŋ əndəŋ, àyɨə mbe mbɨə jɨgə bə nɔə.”

³⁴ Yeso nyaʼa ghà əmbɨ mɨ̀mə̌d ni, “Tɨ̀ mbə ghɨ̀ ni bə̂d mbe nɨ yeʼe ɨ jɨg ɨgən chub rɨ jɨg ənɨ nom ɨgən kɨrɨ i mbɨ mɨ̀mə̌d ə?

³⁵ Ɨni mbɨə yeʼe nɨ mbɨ bɨrɨ nɨŋ ɨnom ɨgən we rəkaʼ mɨ̀mə̌d. Ɨni ze ə mɨ pè, mbɨ kɨ chubɨ rɨ jɨg.”

³⁶ “Ka wə̀d wɨə seerɨ i əghɨ ə ngywɨ̌ ə fi ɨmbə̀ʼ baŋgɨ ngywɨ̌ ə nun əŋgu. Wɨ̀ mɨ ghɨ̀ əne, wɨ̀ bɨrɨ seerɨ zɨ fi ze. Əne kaʼ əghɨ ə ngywɨ̌ ə fi ze ə bɨrɨ namnɨ i mbɨ əzɨ ə nun.

³⁷ Ka wə̀d wɨə zɨ̀ i mɨnoʼ zwɨ̀ ɨŋga chəŋ ənun. Wɨ̀ mɨ ghɨ̀ əne, mɨnoʼ zwɨ̀ mbe bɨrɨ zwi chəŋ te, mɨnoʼ mbe chwɨ̀ i, chəŋ te bə̀ bə i.

³⁸ Mbɨ berɨ zɨ mɨnoʼ zwɨ̀ yeʼ ɨŋga chəŋ rɨ fi.

³⁹ Chəi wə̀d mɔʼɔ əŋgu nɨ wɨ̀ mɨ nɔ mɨnoʼ nɨ kǎ, nɨ bɨrɨ wɨrɨ kə̀b mbɨ zwɨ̀, ɨmbə̀ʼ ɨghəm nɨ wɨ̀ bɨrɨ gha ni, 'Mɨnoʼ nɨ kǎ ə bɔ̀ŋ chè mbɨ zwɨ̀.'”