Lk 24 - Meta’

Yeso fə zwemə

¹ À nyaʼa ɨgwɨ əni rɨtu ɨŋga kàb, kwàʼ ɨsɔsɔ ənɨ ɨtuʼ ə chɨgə, məyi mbe nyaʼa nɨŋ tɨtiirɨ te nɨ mbɨ nyaʼa tekɨ wò ətu ɨsì ze.

² Mbɨ nyaʼa pè zə ni mbɨ fə biŋ ɨti we nɨ mbɨ nyaʼa kən ɨchû ɨsì we əŋgu.

³ Àyɨə ənɨ mbɨ nyaʼa nyɨ ɨŋga, chəi mbɨ nyaʼa zə əvɨ ə Yeso.

⁴ Ənɨ ɨtu mɨ̀mə̌d nyaʼa kɨrɨ buurɨ ɨmbə̀ʼ ənû zɔ̂, mbaŋə̀ mɔʼɔ rɨbe nɨ nyaʼa zɨ ngywɨ̌ nɨ nyaʼə fuə teenɨə, nyaʼa sàʼ təm ɨban mɨ̀mə̌d.

⁵ Ɨfeŋ nyaʼa yim məyi mbe, mbɨ bindɨ əne chəŋ mbə ɨtu ə si. Mbaŋə̀ te nyaʼa biirɨ əmbɨ mɨ̀mə̌d ni, “Mbə̀ kɨə kə̀bə̀ wə̀d we nɨ yeʼ ɨkǎ əkaʼ ɨvɨ bə̂d ɨmbə̀ʼ ə ye ə?

⁶ Chəi əməd əgha. Wɨ̀ fə zwemə. Mbə̀ kɔndɨ ənû ze nɨ wɨ̀ nyaʼa gha ɨ nən ənɨ wɨ̀ nyaʼa kɨrɨ ə Galiliî. Wɨ̀ nyaʼa ghà ni,

⁷ 'Mbɨ berɨ yim Wan Wə̀d nàʼ əmbɨ ə bə̂d mbe nɨə ghɨ̀ ɨnû rɨbɔ̀ŋ. Bə̂d mbe bɨrɨ kombɨ əməd əzed ə baʼnɨ, àyɨə ɨni nɨə pè ɨtad, wɨ̀ zwemə.'”

⁸ Ənɨ məyi mbe nyaʼa zu ənû ze, mbɨ nyaʼa kɔndɨ ɨŋgam we nɨ Yeso nyaʼa gha əmbɨ mɨ̀mə̌d.

⁹ Ənɨ mbɨ nyaʼa bə̀ndɨ̀ rɨ ətu ɨsì ze, mbɨ nyaʼa ghà ɨnû mbe jìm əmbɨ mə̀mə̀ə̀nɨ̀-ɨnû mbe wum chɔ̀b mɔʼ, bə̀ ghà əmbɨ ə̀bùʼ ə bə̂d mbə mɨjìm.

¹⁰ Məyi mbe nɨ nyaʼa gha ənû ze əmbɨ ə bə̂d tom Kristo mbe yɨə nyaʼə Mèri Màgdàlen, Jòanà, Mèri ɨŋgɔb Jems mbɨ məyi cherə mbe nɨ nyaʼa mbɨ mɨ̀mə̌d.

¹¹ Bə̂d tom mbe nyaʼa zu ɨnû mbe nɨ məyi mbe nyaʼa ghǎ, àyɨə zɨə nyaʼa chub əmbɨ mɨ̀mə̌d ɨghabɨ ni à yɨ ənû əko. Əne chəi mbɨ nyaʼa benɨ. [

¹² Àyɨə Pità nyaʼa norə wo ətu ɨsì ze, pè gundɨ ə si neŋ ɨŋga. Wɨ̀ nyaʼa nèŋ əne zə àmei ngywɨ̌ rɨ̀fɨ te nɨ mbɨ nyaʼa tweŋ əməd mbɨ rɨwən. Wɨ̀ nyaʼa zə əne wɨrɨ bə̀ndɨ̀ wò ɨnuʼ, yènə̀ bid ɨmbə̀ʼ ɨnû mbe nɨ ghɨ.]

Mə̀mə̀ə̀nɨ̀-ɨnû Yeso mɨbe nyaʼa zə əməd ənɨ mbɨ nyaʼə wò ə Emaòs

¹³ Àmei əni ze, mə̀mə̀ə̀nɨ̀-ɨnû Yeso mɔʼɔ mɨbe nyaʼə wò əsɨ ə mɔʼɔ nɨ mbɨ nyaʼə tɔŋ ənɨ ə Emaòs. Emaòs yɨə nyaʼa ɨghabɨ mɨ̀kilometà wum chɔ̀b mɔʼ rɨ ə Jèrusalèm.

¹⁴ Ɨ mbɨə nyaʼə yènə̀ tumə ŋgan ɨmbə̀ʼ ɨnû jìm mbe nɨ nyaʼa ghɨ̌.

¹⁵ Ənɨ mbɨ nyaʼə yènə̀ tum əne, Yeso ziə nyaʼa wò kɔɔrɨ mɨ̀mə̌d. Əne mbɨ nyaʼa kɔ yènə̀ wò ɨnɔ̂n.

¹⁶ Mə̀mə̀ə̀nɨ̀-ɨnû mbe nyaʼa zə ə Yeso, àyɨə əghɨ ə mɔʼɔ ə nyaʼa kən ni tɨ mbɨ kyerɨ ə ni à yɨə məd.

¹⁷ Wɨ̀ nyaʼa biirɨ əmbɨ mɨ̀mə̌d ni, “Mbə̀ kɨə yènə̀ tumə ŋgan ghàə̀ ni ye ə?” Mbɨ nyaʼa təm rɨ kɨ̂d, tɨfě tɨ mɨ̀mə̌d chwiə ni ə̀kə̀nɨ̀ ə nyaʼa swi ɨŋga fîŋ tɨ mɨ̀mə̌d.

¹⁸ Wɨ mɔʼɔ rəbɔʼ mɨ̀mə̌d nɨ ɨkum məd nyaʼə Kliopàs nyaʼa biirɨ ɨ bɔ ni, “À wa kɨə mei àwɔ̀ nɨ yeʼ wə̀d rɨ̀sɔ̀ʼ ə Jèrusalèm nɨ chəi à kyerɨ ɨnû mbe nɨ ghɨ əŋgu ɨŋga ɨni mbɔ̂ ə?”

¹⁹ Wɨ̀ nyaʼa biirɨ əmbɨ mɨ̀mə̌d ni, “À kɨ ɨnû mbi ə?” Mbɨ nyaʼa wììrɨ̀ ɨ bɔ ni, “À yɨ ɨnû ɨmbə̀ʼ ə Yeso we rɨ ə Nazàret, nɨ nyaʼə wə̀d ɨ̀kə̀n Ŋwìə̀. Ɨ wɨə nyaʼə ghɨ̀ ɨnû yiirɨ nɨ che əbɔ bə̀ ghà ɨnû nɨ dabə ɨfě Ŋwiə̀ fɔrɨ ɨfě bə̂d mɨjìm.

²⁰ Mba bə̂d kyeŋ mbe rɨ ə mbàn Ŋwìə̀ mbɨ mə̀tùmbɨ̀ əbeŋ nyaʼa gywɨ̀ əməd, nàʼ əmbɨ gɔmnà ni wɨ̀ sob ni mbɨ zwiirɨ əməd. Əne mbɨ nyaʼa kòmbɨ̀ əməd əzed ə baʼnɨ.

²¹ Tɨ̀ nyaʼa nùŋ ta rɨkɔndɨ ɨgwɨ məd ni à yɨə məd bɨrɨ choʼ ətu mɨ̀Izre. Tə̀chɔ̀ŋ yɨ ɨni tad nɨ ɨnû mbɔ̂ fə ghɨ.

²² Ɨ wò ɨmbì, məyi mɔʼɔ rəbɔʼ na nyaʼa ghɨ̀ tɨ̀ yiirɨ. Mbɨ nyaʼa wò ətu ɨsì ze ənjɨtuʼ

²³ àyɨə chəi mbɨ nyaʼa zə əvɨ əməd. Əne mbɨ nyaʼa bə̀ndɨ̀ yeʼe pè ghà ɨ na ni mbə kə̀ʼ zə tɨ̀taanɨ njə̀m nɨ mbɨ̀aŋgɨrə̀ gha ɨ nən ni ɨ wɨ ɨkǎ.

²⁴ Bə̂d mɔʼɔ rəbɔʼ mbe nɨ nyaʼa mbɨ na nyaʼa wò ətu ɨsì ze pè zə ɨnû mbe àmei ɨchî nɨ məyi mbe nyaʼa ghǎ, àyɨə chəi mbɨ nyaʼa zə əməd.”

²⁵ Yeso nyaʼa zu əne ghà əmbɨ mɨ̀mə̌d ni, “Mbə yɨ ɨneŋ, mbə mbɨə jìŋgɨ̀ə̀ nɨ ben ɨnû jìm mbe nɨ bə̂d ɨ̀kə̀n Ŋwiə̀ nyaʼa fə ghǎ!

²⁶ Zɨ rɨ wa nyaʼa kuʼi ni Wə̀d we nɨ Ŋwiə̀ zɔʼɔ zə ŋgəʼ ənɨ ɨnû mbɔ̂ bɔŋ nyɨ ɨŋga ənû ɨfɔ̀n əməd ə?”

²⁷ Ənɨ wɨ̀ nyaʼa ghà əne, wɨ̀ nyaʼa toʼrɨ ɨnû mbe nɨ Ɨ̀ŋwàʼnɨ̀ Ŋwiə̀ jìm gha ɨmbə̀ʼ əməd ziə. Wɨ̀ nyaʼa kɔ rɨ ənɨ ɨ̀ŋwàʼnɨ̀ mbe nɨ Mose nyaʼa ŋwaʼnɨ wò pè ənɨ mbe nɨ bə̂d ɨ̀kə̀n Ŋwiə̀ mɨjìm nyaʼa bə ŋwàʼnɨ̀.

²⁸ Ənɨ mbɨ nyaʼa sɨ ɨban əsɨ ze nɨ mbɨ nyaʼə wò əŋgu, wɨ̀ nyaʼa ghɨ̀ ɨghabɨ ni ɨ wɨə chèə̀ wò ɨmbì.

²⁹ Àyɨə mbɨ nyaʼa yim əməd rə̀bɔ̀ʼɔ̀ ghà ni, “Ni mbɨ na, ɨmbə̀ʼ ɨghəm nɨ ɨsɨ mbɨə sɨə finə, nyùmə̀ fə bə̀ chè i.” Wɨ̀ nyaʼa bə̀ wò ni tə bɨrɨ ni mbɨ mɨ̀mə̌d.

³⁰ Ənɨ wɨ̀ nyaʼa chubɨ ɨ jɨg mbɨ mɨ̀mə̌d, wɨ̀ nyaʼa nɨŋ chiŋ ŋgə̀ŋ, kɔŋgɨ ə Ŋwiə̀, bəʼrɨ, nàʼ əmbɨ mɨ̀mə̌d.

³¹ Ənɨ wɨ̀ nyaʼa ghɨ əne, əghə ə mɨ̀mə̌d ə nyaʼa fìʼə̀, əne mbɨ nyaʼa kyerɨ əməd, àyɨə wɨ̀ nyaʼa nim i rɨ ɨfě mɨ̀mə̌d.

³² Mbɨ nyaʼa ghà mbənə mbənə ni, “Ɨmbə̀ʼ ənum ə nyaʼə san əwa ənɨ wɨ̀ nyaʼə ghàm ɨ na ɨnə̂njɨ̀, bə̀ fɔrɨ ənɨ wɨ̀ nyaʼə toʼrɨ Ə̀ŋwàʼnɨ̀ ə Ŋwiə̀ ɨ na ə?”

³³ Mbɨ nyaʼa nɔ̀ʼ àmei əwu əwən bə̀ndɨ̀ wò ə Jèrusalèm. Mbɨ nyaʼa pè zə mə̀mə̀ə̀nɨ̀-ɨnû mbe wum chɔ̀b mɔʼ nɨ nyaʼa fɔtɨ əsɨ ə mɔʼ mbɨ ə bə̂d mbe nɨ nyaʼa mbɨ mɨ̀mə̌d.

³⁴ Mbɨ nyaʼa ghà əmbɨ ə mbaŋə̀ te rɨ̀be ni, “À yɨ rəsìʼ ni Ə̀nùŋɨ̀sɨg fə zwemə! Wɨ̀ fə chwi i ɨnyod əmbɨ Saimòn!”

³⁵ Mbaŋə̀ te rɨ̀be nyaʼa ghà ənû ze nɨ nyaʼa ghɨ̌ ɨnə̂njɨ̀, bə̀ ghà ɨchî nɨ mbɨ nyaʼa kyerɨ əməd ənɨ ə nyùmə̀ we nɨ wɨ̀ nyaʼa bəʼrɨ ŋgə̀ŋ nàʼ əmbɨ mɨ̀mə̌d.

Yeso nyaʼa jwɨ̀ ɨfě mbi mə̀mə̀ə̀nɨ̀-ɨnû

³⁶ Ənɨ mbɨ nyaʼə ghà ənû zɔ̂ əne, Yeso ziə nyaʼa təm əkaʼ mɨ̀mə̌d, ghà əmbɨ mɨ̀mə̌d ni, “Əbɔrəbɔd ɨ nən mo.”

³⁷ Mbɨ nyaʼa təm mbə̀ŋnə, ɨfeŋ yim mɨ̀mə̌d əne mbɨ nyaʼa kɔndɨ ni à yɨə wə̀d əfub.

³⁸ Wɨ̀ nyaʼa biirɨ əmbɨ mɨ̀mə̌d ni, “Ənû zɔ̂ ə tɔb əwən ɨmbə̀ʼ ə ye ə? Tɨbiirɨ ə nɔʼ ɨŋga tə fîŋ ɨmbə̀ʼ ə ye ə?

³⁹ Mbə neŋ mbɨ ɨbɔ mbɨ mbɨ ɨwu zə ni à yɨə kaŋ ə mɔ̌. Mbə betɨ əmɨ zə ni à yɨə kàŋ ə mɔ̌, ɨmbə̀ʼ ɨghəm nɨ chəi wə̀d əfub berɨ nyamnyod mbɨ ɨwu ɨchî nɨ mbə zə ni mə berɨ.”

⁴⁰ Ənɨ wɨ̀ nyaʼa ghà əne, wɨ̀ nyaʼa chwi mbi ɨbɔ mbɨ mbi ɨwu əmbɨ mɨ̀mə̌d.

⁴¹ Ənɨ chəi mbɨ nyaʼa kɨrɨ ben ənû zɔ̂ ɨmbə̀ʼ ɨghaʼi fɔrɨ ɨmbə̀ʼ ɨchî nɨ mbɨ nyaʼa kɨrɨ bid ə, wɨ̀ nyaʼa ghà əmbɨ mɨ̀mə̌d ni, “Mbə wa berɨ əghɨ ə mɔʼɔ əgha nɨ jɨg ə?”

⁴² Mbɨ nyaʼa nàʼ əkwirɨ əgwi nɨ mbɨ tiə ɨ bɔ.

⁴³ Wɨ̀ nyaʼa nɨŋ kud ɨfě mɨ̀mə̌d.

⁴⁴ Wɨ̀ nyaʼa ghɨ̀ əne ghà əmbɨ mɨ̀mə̌d ni, “Mbɔ̂ yɨ ɨnû mbe nɨ mə̀ nyaʼə ghà ɨ nən ənɨ mə nyaʼa kɨrɨ mbɨ nən. Mə nyaʼa ghà ni ɨnû jìm mbe nɨ mbɨ ŋwàʼnɨ̀ ɨmbə̀ʼ əmɨ ɨŋga tɨkə rɨ Mose, ɨŋga ɨ̀ŋwàʼnɨ̀ mbe nɨ bə̂d ɨ̀kə̀n Ŋwiə̀ nyaʼa ŋwaʼnɨ bə̀ fɔrɨ ɨŋga mɨ̀Sâm berɨ jwɨ ənɨ rəsìʼ.”

⁴⁵ Ənɨ wɨ̀ nyaʼa ghà əne, wɨ̀ nyaʼa fìʼ fîŋ tɨ mɨ̀mə̌d ni mbɨ kyerɨ Ə̀ŋwàʼnɨ̀ ə Ŋwiə̀, ɨtu mɨ̀mə̌d zeŋ.

⁴⁶ Wɨ̀ nyaʼa ghà əmbɨ mɨ̀mə̌d ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, Wə̀d we nɨ Ŋwìə̀ zɔʼɔ berɨ zə ŋgəʼ, àyɨə ənɨ ɨni nɨə pe tad, wɨ̀ wɨrɨ zwemə,

⁴⁷ fɔrɨ ni, bə̂d wo yènə̀ ghà ɨŋgam Ŋwiə̀ ənɨ ɨkum məd, kɔ rɨ ə Jèrusalèm wò pè ɨŋga ɨbeŋ jìm, ɨmbə̀ʼ bə̂d beŋ tə fîŋ, Ŋwiə̀ waʼ ɨnû rɨbɔ̀ŋ mɨ̀mə̌d.

⁴⁸ Mbə yɨ mɨ̀zərɨmbin ənɨ ɨnû mbɔ̂, əne mbə̀ bɨrɨ bə̀ sɨə ghà əmbɨ ə bə̂d cherə.

⁴⁹ Mbə̀ zə, mə bɨrɨ cha əghɨ ze nɨ mɨ Mbǎʼ kaʼ ɨ nən. Àyɨə mbə̀ chub ə Jèrusalèm pè ənɨ Ŋwìə̀ naʼ ɨka nən.”

Ŋwìə̀ nyaʼa nɨŋ ə Yeso ɨkaŋ

⁵⁰ Yeso nyaʼa nɨŋ mbi mə̀mə̀ə̀nɨ̀-ɨnû mbɨ jwɨ̀ wò ə Betanì. Wɨ̀ nyaʼa pè əŋgu nɔ̀ mbi ɨbɔ zɨ̀ əbɔrəbɔd ɨgwɨ mɨ̀mə̌d.

⁵¹ Ənɨ wɨ̀ nyaʼə zɨ əbɔrəbɔd ze əne, wɨ̀ nyaʼa sàŋ mɨ̀mə̌d, Ŋwiə̀ nɨŋ əməd ɨkaŋ.

⁵² Mbɨ nyaʼa wumnɨ əməd, wɨrɨ bə̀ndɨ̀ wò ə Jèrusalèm. Ɨghaʼi nyaʼa swi ɨŋga fîŋ tɨ mɨ̀mə̌d.

⁵³ Ɨ mbɨə nyaʼə wò yiirɨ ə Ŋwiə̀ ɨni jìm ɨŋga mbàn Ŋwìə̀.