Lk 23 - Meta’

Mbɨ nyaʼa nɨŋ ə Yeso wò ɨfě Pailèt

¹ Ɨnɔ̂n bə̂d we jìm nyaʼa nɨŋ ə Yeso mbɨ wò ɨfě Pailèt.

² Mbɨ nyaʼa pè əŋgu kɔ zɨ ɨsaʼi ɨgwɨ məd ghàə̀ ni, “Tɨ̀ kəʼ zə mbaŋə̀ zɔ̂ ənɨ wɨə bùùrɨ̀ a əbeŋ ghàə̀ ni tɨ bə̂d maʼ ə mɨ̀tagsɨ̀ əmbɨ Kaisà. Ɨ wɨə nyaʼə bə̀ ghàə̀ ni tə yɨə Wə̀d we nɨ Ŋwiə̀ zɔʼɔ, nɨ yeʼ ɨfɔ̂n.”

³ Pailèt nyaʼa zu əne biirɨ ɨ bɔ ni, “Àwɔ̀ kɨ ɨfɔn mɨ̀Jû ə?” Wɨ̀ nyaʼa wììrɨ̀ ɨ bɔ ni, “À fə ghà əne.”

⁴ Pailèt nyaʼa bèŋ ghà əmbɨ ə bə̂d kyeŋ mbe rɨ ə mbàn Ŋwìə̀ fɔrɨ əmbɨ mɨnɔ̂n bə̂d mbe ni, “Chəi mə zə ənû rɨbɔ̀ŋ ə mɔʼɔ ze nɨ mbaŋə̀ zɔ̂ ghɨ̌.”

⁵ Àyɨə mbɨ nyaʼa rəbə nyèŋ ə nyeŋɨ ghà rɨ̀kǎ ni, “Məd wɨə noə bə̂d ɨŋga Jùdeyà jìm mbɨ ɨnû mbe nɨ wɨə chwiə. Wɨ̀ nyaʼa kɔ ə Galiliî. Tɨ̀nîn wɨ̀ fə yeʼe pè əgha.”

Mbɨ nyaʼa nɨŋ ə Yeso wò ɨfě Herɔ̀d

⁶ Ənɨ Pailèt nyaʼa zu ənû zɔ̂, wɨ̀ nyaʼa biirɨ ni, “Mbaŋə̀ zɔ̂ wa kɨ rɨ ə Galiliî ə?”

⁷ Ənɨ wɨ̀ nyaʼa zu ni Yeso yɨə nyaʼa rɨ əba əbeŋ ze nɨ Herɔ̀d nyaʼə tùmbɨ̀ə̀, wɨ̀ nyaʼa chà əməd əmbɨ Herɔ̀d nɨ nyaʼa ə Jèrusalèm ənɨ ə nyùmə̀ we.

⁸ Ənɨ Herɔ̀d nyaʼa zə ə Yeso, wɨ̀ nyaʼa ghaʼ kwàʼ rɨŋgəʼ, ɨmbə̀ʼ ɨghəm nɨ əgha ə nyaʼa fə sà nɨ wɨ̀ nyaʼə kə̀b zə əməd. Wɨ̀ nyaʼa fə zu ɨnû nɔnɔʼ ɨmbə̀ʼ əməd, əne ɨ wɨə nyaʼə kə̀bə̀ ni wɨ̀ ghɨ̀ ənû ə yiirɨ ə mɔʼɔ tə zə.

⁹ Herɔ̀d nyaʼa biirɨ ɨnû nɔnɔʼ ɨ bɔ, àyɨə chəi wɨ̀ nyaʼa wiirɨ kaʼ àbei əzɨ ə mɔʼɔ.

¹⁰ Bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ nyaʼa təmbɨ ɨban ɨban kàŋə̀ zɨ̀ ɨsaʼi ɨgwɨ məd kwàʼ ənɨ ɨ̀kǎ.

¹¹ Herɔ̀d mbɨ mbi mɨ̀sɔgyɨ̀ nyaʼa tìbrɨ̀ əməd bə̀ baʼrɨ əməd. Mbɨ nyaʼa bə̀ zɨ̀ ngywɨ̌ nɨ kaŋ bɔŋ ɨgwɨ məd, wɨrɨ chà əməd əmbɨ Pailèt.

¹² Àmei əni ze Herɔ̀d mbɨ Pailèt nyaʼa wɨrɨ kɔ jɨg ə̀sə̀ʼ, ɨmbə̀ʼ ɨghəm nɨ ɨ mbɨə nyaʼə be ənɨ ə pə̀n.

Pailèt nyaʼa sob ni mbɨ zwiirɨ ə Yeso

¹³ Pailèt nyaʼa tɔŋ bə̂d kyeŋ mbe rɨ ə mbàn Ŋwìə̀, tɔŋ mə̀tùmbɨ̀ əbeŋ bə̀ tɔŋ bə̂d mɨjìm,

¹⁴ əne ghà əmbɨ mɨ̀mə̌d ni, “Mbə̀ kə̀ʼ nɨŋ mbaŋə̀ zɔ̂ yeʼe əsɨ num ghà ni ɨ wɨə bùùrɨ̀ ə bə̂d. Mə fə nwèndɨ̀ əməd ənɨ ə ɨfě, əne zə ni chəi wɨ̀ gu ənû ə mɔʼɔ rəbɔʼ mbe nɨ mbə̀ zɨ ɨgwɨ məd.

¹⁵ Chəi Herɔ̀d bə zə ənû ə mɔʼɔ ze nɨ wɨ̀ gǔ, ɨmbə̀ʼ ɨghəm nɨ wɨ̀ fə wɨrɨ chà əməd ɨ na. Əne chəi mbaŋə̀ zɔ̂ gu ənû ə mɔʼɔ nɨ tɨ̀ mbɨ zwiirɨ əməd.

¹⁶ Mə bɨrɨ som əməd, saŋ wɨ̀ wò i.” [

¹⁷ Ənɨ mbɨ nyaʼə jɨgə Əchwɨ̂ ə Che-ɨgun ɨghəm ɨwu jìm, Pailèt nyaʼa berɨ chɨ wə̀d ndəŋ fibɨ̀ saŋɨ.]

¹⁸ Mɨ̀mə̌d mɨjìm nyaʼa kyeŋ rɨkǎ ghà ni, “Zwiirɨ mbaŋə̀ zɔ̂, chɨ̀ ə Barabas nàʼ ɨ na.”

¹⁹ (Mbɨ nyaʼa zɨ ə Barabas ə ndəŋ ɨmbə̀ʼ ɨghəm nɨ wɨ̀ nyaʼa bu əchɔb, wə̀d kwɨ.)

²⁰ Pailèt nyaʼa kə̀b ni njɨ tə saŋ ə Yeso, əne wɨ̀ nyaʼa yì ghà əmbɨ ə bə̂d mbe ni chəi wɨ̀ gu ənû ə mɔʼɔ.

²¹ Àyɨə mbɨ nyaʼa kyeŋ rɨkǎ ghà ni, “Kombɨ əməd əzed ə baʼnɨ! Kombɨ əməd əzed ə baʼnɨ!”

²² Pailèt nyaʼa ghà əmbɨ mɨ̀mə̌d ənɨ ɨghəm nɨ pe tad ni, “Mə̀ kombɨ əməd əzed ə baʼnɨ ɨmbə̀ʼ ə ye ə? Wɨ̀ gu ənû ə ye ə? Chəi mə̀ zə ənû ə mɔʼɔ ze nɨ wɨ̀ gǔ nɨ tɨ̀ mbɨ zwiirɨ əməd. Mə bɨrɨ som əməd sàŋ wɨ̀ wò i.”

²³ Mbɨ nyaʼa rəbə nyeŋ ə nyeŋɨ kyeŋə rɨkǎ ghàə̀ ni Pailèt kombɨ Yeso əzed ə baʼnɨ. Mbɨ nyaʼa kyeŋ əne pè ənɨ mbɨ nyaʼa beŋ fîŋ Pailèt.

²⁴ Əne Pailèt nyaʼa ghà ni mbɨ ghɨ ɨchî nɨ mbɨ kəbɨ.

²⁵ Wɨ̀ nyaʼa chɨ̀ mbaŋə̀ ze nɨ mbɨ nyaʼa kəbɨ sàŋɨ̀, nɨ yeʼ we nɨ nyaʼa bu əchɔb, wə̀d kwɨ. Wɨ̀ nyaʼa sɨ nàʼ ə Yeso əmbɨ mɨ̀mə̌d ni mbɨ ghɨ mbɨ məd ɨchî nɨ mbɨ kəbɨ.

Mɨ̀sɔgyɨ̀ nyaʼa kòmbɨ̀ ə Yeso əzed ə baʼnɨ

²⁶ Ənɨ mɨ̀sɔgyɨ̀ mbe nyaʼa nɨŋ əməd mbɨ yènə̀ wòə̀, mbɨ nyaʼa bòmnɨ̀ mbɨ Saimòn nɨ nyaʼa rɨ ə Sìrin. Ɨ wɨə nyaʼə bə̀ndɨ̀ rɨ ə mbeŋ. Əne mbɨ nyaʼa yim əməd, boŋ əzed ə baʼnɨ ze ɨgwɨ məd ni wɨ̀ beʼe beenɨ ənjìm ə Yeso.

²⁷ Ɨnɔ̂n bə̂d nɨ nyaʼa kwàʼ wɨ kyeŋ wɨə nyaʼə beenɨ əbɔʼ məd mbɨ məyi nɨ nyaʼə dìə̀ bə̀ chweŋ mɨsɨ ɨmbə̀ʼ əməd.

²⁸ Àyɨə Yeso nyaʼa bèŋ nèŋ mɨ̀mə̌d ghà ni, “Bɔn məyi rɨ ə Jèrusalèm, tɨ mbə̀ chweŋ ə mɨsɨ ɨmbə̀ʼ əmɨ, mbə̀ chweŋ mɨsɨ yeʼ ɨmbə̀ʼ ə ɨnyod fɔrɨ ɨmbə̀ʼ mbə bɔn.

²⁹ Mbə̀ zə, ɨni mbɨə yeʼe nɨ mbɨ bɨrɨ ghà ni, 'Ŋwìə̀ zɨ əbɔrəbɔd ɨgun mɨkôm əyi, ɨgun məyi mbe nɨ chəi mbɨ kweʼ gywɨ̌ bə̀ zɨ̀ ɨgwɨ mbe nɨ chəi mbɨ kweʼ nyɔŋ bɔn!'

³⁰ Əne mbɨ bɨrɨ kɔ ghǎ əmbɨ rɨwum kyeŋ ni, 'Mbə̀ su ɨgwɨ na,' bə̀ ghà əmbɨ rɨwum kwa ni, 'Mbə̀ kubrɨ əwa.'

³¹ Bə̂d mɨ yeʼə ghɨ̀ əni ənɨ wə̀d nɨ chəi wɨ̀ ghɨ ənû rɨbɔ̀ŋ, zɨə kɨə wo yeʼ rɨ ye ənɨ we nɨ gu ənû ə?”

³² Mbɨ nyaʼa bə̀ nɨŋ mbaŋə̀ cherə rɨbe nɨ nyaʼa gù ənû ni mbɨ bɨrɨ zwiirɨ mɨ̀mə̌d əbɔʼ ə Yeso.

³³ Ənɨ mbɨ nyaʼa wò pè əsɨ ze nɨ mbɨ nyaʼə tɔŋ ənɨ Ɨwɔʼ-ətu, mbɨ nyaʼa kòmbɨ̀ əməd mbɨ ə mbaŋə̀ te nɨ nyaʼa gu ənû. Mbɨ nyaʼa kòmbɨ̀ wɨ̀ fìbɨ̀ əba əbɔ ə jɨgɨ, bə̀ kòmbɨ̀ wɨ fìbɨ̀ əba əbɔ ə tweŋ.

³⁴ Yeso nyaʼa ghà ni, “Mɨ Mbǎʼ, waʼ ɨnû rɨbɔ̀ŋ mɨ̀mə̌d, ɨmbə̀ʼ ɨghəm nɨ chəi mbɨ kyerɨ ənû ze nɨ mbɨə ghɨ̀ə̀.” Mɨ̀sɔgyɨ̀ mbe nyaʼa sɔ̀ŋ mbaŋ ɨmbə̀ʼ ghàpɨ̀ ngywɨ̌ rɨ məd.

³⁵ Bə̂d nyaʼa təmbɨ ɨban ɨban ɨ neŋ, àyɨə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû mbɨə nyaʼə baʼrɨ əməd ghàə̀ ni, “Ɨ wɨə nyaʼə chɨ̀ə̀ bə̂d cherə rəŋgəʼ, wɨ̀ bə jwɨ̀ i rəŋgəʼ əwù ze nɨ wɨ̀ yeʼ Wə̀d we nɨ Ŋwìə̀ zɔʼɔ, mbɨ we nɨ Ŋwìə̀ chɔʼɔ!”

³⁶ Mɨ̀sɔgyɨ̀ mbe nyaʼa bə̀ baʼrɨ əməd. Mbɨ nyaʼa nàʼ twàŋ tɨ mɨnoʼ ɨ bɔ,

³⁷ ghà ni, “Àwɔ̀ mɨ yeʼ ɨfɔ̀n mɨ̀Jû, jwɨ̀ e rəŋgəʼ!”

³⁸ Mbɨ nyaʼa ŋwàʼnɨ̀ əghɨ ə mɔʼɔ kòmbɨ̀ əzed ə baʼnɨ ze ɨgwɨ ətu əməd ni, “Wɔ̂ yɨ ɨfɔ̂n mɨ̀Jû.”

³⁹ Mbaŋə̀ mɔʼɔ rəbɔʼ te nɨ mbɨ nyaʼa kombɨ nyaʼa bə̀ zɔ̀m əməd ghà ni, “Ɨmbə̀ʼ àwɔ̀ yɨə Wə̀d we nɨ Ŋwìə̀ zɔʼɔ ə? Jwɨ e rəŋgəʼ bə̀ chɨ̀ əwa!”

⁴⁰ Àyɨə awɨ̂n nyaʼa ghàm əbɔʼ məd ghà ni, “Ɨmbə̀ʼ à wɨə bɔ ə Ŋwiə̀ ə? À kɨə ghàə̀ əne ɨmbə̀ʼ ɨghəm nɨ mbɨ sob ɨsaʼi ɨgwɨ məd əndəŋ əndəŋ mbɨ na ə?

⁴¹ Mbɨ nyaʼa sob ɨsaʼi ɨgwɨ na wɨ kùʼ ɨmbə̀ʼ ɨghəm nɨ tɨ̀ yɨ əni nɨŋə ɨchwɨ rɨ ənɨ ɨnû mbe nɨ tɨ̀ ghɨ̌. Àyɨə chəi mbaŋə̀ zɔ̂ gu ənû ə mɔʼɔ.”

⁴² Wɨ̀ nyaʼa ghɨ̀ əne ghà ni, “Yeso kɔndɨ əmɨ ənɨ à wɨrɨ yeʼe ɨghabɨ ɨfɔ̀n.”

⁴³ Yeso nyaʼa ghà ɨ bɔ ni, “Mə ghà rəsìʼ ɨ ne ni tə̀chɔ̀ŋ à bɨrɨ chubɨ mbɨ num ə Paradaìs. ”

Yeso nyaʼa kwɨ

⁴⁴ À nyaʼa sɨ ɨghabɨ mɨ̀nyùmə̀ wum chɔ̀b rɨ̀be əziə, ɨsɨ nyaʼa fin ɨŋga əbeŋ ze ə jìm. Mbɨ nyaʼa fin əne wò pè ənɨ mɨ̀nyùmə̀ tad.

⁴⁵ Chəi əchwî ə nyaʼə teə. Ngywɨ̌ ze nɨ mbɨ nyaʼa tam ɨŋga mbàn Ŋwìə̀ nyaʼa san ɨba be.

⁴⁶ Yeso nyaʼa kyeŋ rɨ̀kǎ ghà ni, “Mɨ Mbǎʼ, mə fə sàŋ mɨ Əzwî ɨŋga te rɨkyerɨ-ɨbɔ!” Ənɨ wɨ̀ nyaʼa ghà əne, wɨ̀ nyaʼa mèndɨ̀.

⁴⁷ Ətu ɨgwɨ mɨ̀sɔgyɨ̀ nyaʼa zə ənû ze nɨ nyaʼa ghɨ̌, əne wɨ̀ nyaʼa yiirɨ ə Ŋwiə̀ ghà ni, “À yɨ rəsìʼ ni chəi mbaŋə̀ zɔ̂ kaŋ gù ənû ə mɔʼɔ.”

⁴⁸ Ənɨ mɨnɔ̂n bə̂d mbe nɨ nyaʼa fetɨ, nyaʼa zə ɨnû mbe nɨ nyaʼa ghɨ̌, mbɨ nyaʼa bə̀ndɨ̀ wò ɨnuʼ mbɨ ɨbɔ əmbə̀ʼ.

⁴⁹ Bə̂d mɨjìm mbe nɨ nyaʼa kyerɨ Yeso mbɨ məyi mbe nɨ nyaʼə beenɨ əbɔʼ məd nɔ̀ʼ tɨ rɨ ə Galiliî nyaʼa təm əsa əgha ɨ neŋ ɨnû mbe.

Mbɨ nyaʼa tweŋ ə Yeso

⁵⁰ Mbaŋə̀ mɔʼɔ zɨə nyaʼa əŋgu nɨ ɨkum məd nyaʼə Jòsêf. Wɨ̀ yɨə nyaʼa rɨŋga əsɨ ə mɔʼɔ ɨŋga Izre nɨ mbɨ nyaʼə tɔŋ ənɨ Àrimàtiyà. Məd yɨə nyaʼa wɨ mɔʼɔ rəbɔʼ bə̂d mbe nɨ nyaʼə saʼ əbeŋ ə Izre. Wɨ̀ yɨə nyaʼə wə̀d chɔ̀m nɨ nyaʼə bə̀ ghɨ̀ ɨnû nɨ kuʼnɨ.

⁵¹ Chəi wɨ̀ nyaʼa ben ənû ze nɨ mbɨ nyaʼa taŋɨ bə̀ ghɨ̀. Ɨ wɨə nyaʼə wòm ə nyùmə̀ we nɨ Ŋwìə̀ bɨrɨ tumbɨ ɨsɨg.

⁵² Wɨ̀ nyaʼa wò əsɨ Pailèt pè nɔn əvɨ ə Yeso.

⁵³ Pailèt nyaʼa benɨ, əne wɨ̀ nyaʼa wò swi əvɨ ə Yeso, nib ɨŋga ngywɨ̌ rɨ̀fɨ, wò boŋ ɨŋga ɨ̀sì nɨ mbɨ chəb ɨŋga ɨwɔ̌, nɨ chəi mbɨ kweʼ boŋ wə̀d mɔʼɔ ɨŋga.

⁵⁴ Əni ze yɨə nyaʼə əni nɨ mbɨ nyaʼə tekɨ ɨnyod ɨmbə̀ʼ jɨg Əchwɨ̂ ə Che-ɨgun, ɨmbə̀ʼ ɨghəm nɨ əni əkwɨ mɨ̀Jû ə nyaʼə sɨə wo kɔ.

⁵⁵ Məyi mbe nɨ nyaʼa yeʼe mbɨ məd tɨ ə Galiliî, nyaʼa beenɨ əbɔʼ məd. Mbɨ nyaʼa pè zə ɨsi we bə̀ zə ɨchî nɨ mbɨ nyaʼa boŋ əvɨ əməd.

⁵⁶ Mbɨ nyaʼa zə əne, bə̀ndɨ̀ wò tekɨ tɨtiirɨ mbɨ mɨwud nɨ mbɨ bɨrɨ zɔʼ əvɨ əməd əŋgu. À nyaʼa sɨ əni əkwɨ, mbɨ nyaʼa zwììrɨ̀ ɨchî nɨ rɨ̀kə̌ nyaʼa chwiə.