Lk 18 - Meta’

Ənû ə mɨgɨ ɨmbə̀ʼ ɨku əyi mbɨ əsob mɨ̀sàʼi

¹ Yeso nyaʼa ghà ənû ə mɨgɨ əmbɨ mbi mə̀mə̀ə̀nɨ̀-ɨnû ɨ chwi ni mbɨ berɨ kɨə kɔ̀ŋgɨ̀ ə Ŋwiə̀ zɨ rɨ bɔd.

² Wɨ̀ nyaʼa ghà ni, “Əsob mɨ̀sàʼi mɔʼɔ wɨə nyaʼə əsɨ ə mɔʼɔ nɨ chəi wɨ̀ nyaʼə bɔə Ŋwiə̀ kɨ̀ bèə̀ tɔŋə wə̀d ənɨ ənù.

³ Ɨku əyi mɔʼɔ wɨə nyaʼə bə̀ əsɨ ze. Ɨ wɨə nyaʼə kɨə wò əsɨ məd pèə̀ ghàə̀ ni, 'Kaŋ weerɨ əmɨ ni mə̀ jɨg ɨsaʼi we nɨ mə̀ berɨ mbɨ mɨ wə̀d pə̀n.'

⁴ Əsob mɨ̀sàʼi we nyaʼa bè ton nɨ weerɨ əyi we ənɨ əkɔb ə nyumə̀. Àyɨə wɨ̀ nyaʼa nwìə̀ ghà ɨŋga i fîŋ ni, 'Ka à bè yeʼi ni chəi mɨə bɔə ə Ŋwiə̀ kɨ̀ bèə̀ tɔŋə wə̀d ənɨ ənù,

⁵ àyɨə mə bɨrɨ weerɨ ɨku əyi wɔ̂ ɨmbə̀ʼ ɨghəm nɨ ɨ wɨə chə əmɨ, njɨ chəi mə bɨrɨ berɨ ə̀zwììrɨ̀ ɨchî nɨ wɨə jwɨ̀ə̀ yeʼe.'”

⁶ Ə̀nùŋɨ̀sɨg nyaʼa ghà ni, “Mbə̀ zu ənû ze nɨ əsob mɨ̀sàʼi rɨbɔ̀ŋ we ə ghàə̀.

⁷ Əsob mɨ̀sàʼi rɨbɔ̀ŋ we mɨ yeʼə ghɨ̀ əne, njɨ ka Ŋwìə̀ wa bɨrɨ weerɨ i bə̂d ɨməd mbe nɨ wɨ̀ chɔʼɔ, ɨchî nɨ mbɨə zə̀ʼ ɨ bɔ əziə mbɨ ɨzimɨ ə? Wɨ̀ wa bɨrɨ tàndɨ̀ bɔŋ weerɨ mɨ̀mə̌d ə?

⁸ Mə ghà ɨ nən ni wɨ̀ bɨrɨ zambɨ weerɨ mɨ̀mə̌d. Àyɨə ənɨ Wan Wə̀d wɨrɨ yeʼe, wɨ̀ wa bɨrɨ zə ɨchî nɨ bə̂d rɨŋga ɨsɨg nuŋ fîŋ ɨgwɨ məd ə?”

Ənû ə mɨgɨ ɨmbə̀ʼ Farisiî mbɨ wə̀d nɨ nyaʼə fetɨə mɨ̀tagsɨ̀

⁹ Yeso nyaʼa bə̀ yì ghà ənû ə mɨgɨ zɔ̂ əmbɨ ə bə̂d mɔʼɔ mbe nɨ nyaʼə ghàə̀ ni mbə mbɨə ghɨ̀ ɨnû nɨ kuʼnɨ, əne sɨə tə̀ə̀nɨ̀ə̀ bə̂d cherə.

¹⁰ Wɨ̀ nyaʼa ghà ni, “Mbaŋə̀ mɔʼɔ rɨ̀be nyaʼa kɔʼ wò ɨŋga mbàn Ŋwìə̀ ɨ wo kɔŋgɨ ə Ŋwiə̀. Wɨ fìbɨ̀ yɨə nyaʼə Farisiî, wɨ cherə yɨə nyaʼə əfetɨ mɨ̀tagsɨ̀.

¹¹ Ənɨ mbɨ nyaʼa wò əne, Farisiî we nyaʼa nɔʼ təm kɔ̀ŋgɨ̀ ə Ŋwiə̀ ɨmbə̀ʼ i ɨnyod ghà ni, 'Ŋwìə̀, məben-əwe ni chəi əmɨ ɨghabɨ ə bə̂d cherə mbe nɨə fè ɨghɨ bə̂d ənɨ ɨka, kɨ̀ ɨghabɨ mbe nɨ chəi mbɨə ghɨ̀ ɨnû nɨ kuʼnɨ, kɨ̀ ɨghabɨ mbe nɨə ni məyi bə̂d cherə, kɨ̀ be ɨghabɨ əfetɨ mɨ̀tagsɨ̀ wɔ̂.

¹² Mə wɨə chubə rɨjɨg ɨghəm be ɨŋga kàb. Mə wɨə ghàpɨ̀ ɨghɨjìm mbe nɨ mə berɨ ɨsɨ wum, nàʼ əsɨ ə fibɨ̀ ɨ ne.'

¹³ “Àyɨə əfetɨ mɨ̀tagsɨ̀ we nyaʼa təm əsa əgha. Chəi wɨ̀ nyaʼa be nɔ̀ɔ̀rɨ̀ e ətu ɨkaŋ, àyɨə wɨ̀ nyaʼa nuŋ mbi ɨbɔ ɨgun i fîŋ ghà ni, 'Ŋwìə̀, kən ənɨ ə num. Mə yɨə wə̀d ɨnû rɨbɔ̀ŋ!'

¹⁴ Mə ghà ɨ nən ni, ənɨ əfetɨ mɨ̀tagsɨ̀ we nyaʼa wò ɨnuʼ, wɨ̀ nyaʼa ghɨ̀ ənû nɨ kuʼnɨ ɨfě Ŋwiə̀ chè Farisiî we. Mbə̀ kyerɨ ni wə̀d jìm we nɨ nɔ i ɨnyod, Ŋwìə̀ bɨrɨ swi əməd, àyɨə wə̀d jìm we nɨ swi i ɨnyod, Ŋwìə̀ bɨrɨ nɔ əməd.”

Yeso nyaʼa zɨ̀ əbɔrəbɔd ɨgun ə bɔn kwa

¹⁵ Bə̂d mɔʼɔ mbɨə nyaʼə nɨŋə ka àbei mbə bɔn kwa wò əsɨ Yeso ni wɨ̀ betɨ mɨ̀mə̌d. Ənɨ mə̀mə̀ə̀nɨ̀-ɨnû ɨməd nyaʼa zə əne, mbɨ nyaʼa ghàm əbɔʼ ə bə̂d mbe.

¹⁶ Àyɨə Yeso nyaʼa tɔŋ bɔn mbe əsɨ ni, ghà əmbɨ mbi mə̀mə̀ə̀nɨ̀-ɨnû ni, “Mbə̀ saŋ bɔn kwa mbe yeʼe əsɨ num. Tɨ mbə̀ kən ə mɨ̀mə̌d, ɨmbə̀ʼ ɨghəm nɨ à yɨə bə̂d ɨghabɨ mbɔ̂ bɨrɨ jɨg ənû ɨfɔ̀n ə Ŋwiə̀.

¹⁷ Mə ghà rəsìʼ ɨ nən ni, ka wə̀d mɔʼɔ we nɨ chəi wɨ̀ ben ənû ɨfɔ̀n ə Ŋwiə̀ ɨghabɨ wan kwa bɨrɨ nɔ nyɨ i ɨŋga ənû ɨfɔ̀n ze.”

Ənû ɨmbə̀ʼ mbaŋə̀ nɨ nyaʼa berɨ mbɔ̂n

¹⁸ Mbaŋə̀ mɔʼɔ rəbɔʼ mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa biirɨ əmbɨ Yeso ni, “Əchwiə̀-ɨnû chɔ̀m, mə kɨə wo ghɨ ye bɔŋ jɨg ɨ̀tènɨ̀ rɨ mì ə?”

¹⁹ Yeso nyaʼa wììrɨ̀ ɨ bɔ ni, “À tɔŋ əmɨ ənɨ wə̀d chɔ̀m ɨmbə̀ʼ ə ye ə? Chəi wə̀d mɔʼɔ nɨ bɔŋɨ chè rɨ ənɨ ə Ŋwìə̀ rə̀zìʼ wi.

²⁰ À kyerɨ tɨkə te ni, 'Tɨrə̀ ni e ɨwi wə̀d cherə. Tɨrə̀ zwiirɨ e ə wə̀d. Tɨrə̀ jɨ e. Tɨrə̀ ben e zərɨmbin mɨghab. Wumnɨ e mbǎʼ mbɨ e nɨ̌ŋ.'”

²¹ Mbaŋə̀ ze nyaʼa ghà ni, “Mə fə kɔ nùŋ tɨkə tɔ̂ rɨjìm tɨ ənɨ mə nyaʼə wan kwa.”

²² Ənɨ Yeso nyaʼa zu ənû zɔ̂, wɨ̀ nyaʼa ghà ɨ bɔ ni, “À kɨrɨ kwaŋ əghɨ ə mɔʼɔ. Ndə̀ wo fèndɨ̀ ɨghɨjìm mbe nɨ à berɨ, ghàpɨ̀ ɨkab we əmbɨ ə bə̂d ɨkwaŋ, əne à bɨrɨ berɨ mbɔ̂n ɨkaŋ. À mɨ ghɨ̀ əne, à yeʼe beenɨ əbɔʼ num.”

²³ Ənɨ mbaŋə̀ ze nyaʼa zu ənû zɔ̂, wɨ̀ nyaʼa kə̀nə̀ kwàʼ rɨŋgəʼ, ɨmbə̀ʼ ɨghəm nɨ wɨ̀ nyaʼa wom berɨ mbɔ̂n.

²⁴ Yeso nyaʼa neŋ əməd ghà ni, “Zɨə bɨrɨ kaŋ se əmbɨ ə bə̂d mbɔ̂n nɨ nyɨ ɨŋga ənû ɨfɔ̀n ə Ŋwiə̀!

²⁵ À yɨ rəsìʼ ni zɨə zàm əmbɨ ə kàmel nɨ chè ɨbɨgɨ saʼ, chè ɨchî nɨ wə̀d mbɔ̂n bɨrɨ nyɨ ɨŋga ənû ɨfɔ̀n ə Ŋwiə̀.”

²⁶ Bə̂d mbe nɨ nyaʼa zu ənû ze, nyaʼa biirɨ ni, “Zɨə nɨə yeʼ əne, njɨ à kɨə we nɨ tɨ̀ wɨ̀ jwɨ̀ rəŋgəʼ ə?”

²⁷ Yeso nyaʼa wììrɨ̀ ni, “Ənû ə zɨə chè yeʼ bə̂d, chəi zɨə chè ə Ŋwiə̀.”

²⁸ Pità nyaʼa ghà ni, “Zə, tɨ̀ fə sàŋ mba ɨkwɨ beenɨ əbɔʼ ne.”

²⁹ Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, chəi wə̀d mɔʼɔ we nɨ saŋ i nəb, kɨ̀ i ɨwi, kɨ̀ mbi bɔŋgɔb, kɨ̀ i mbǎʼ mbɨ i nɨŋ, kɨ̀ mbi bɔn ɨmbə̀ʼ ənû ɨfɔ̀n ə Ŋwiə̀,

³⁰ nɨ chəi wɨ̀ bɨrɨ berɨ ɨghɨ nɔnɔʼ ənɨ ə nyùmə̀ wɔ̂, bə̀ jɨg ɨ̀tènɨ̀ rɨ mì ənɨ ə nyùmə̀ we nɨ bɨrɨ yeʼe.”

Yeso nyaʼa ghà ɨmbə̀ʼ i ɨvɨ ənɨ ɨghəm nɨ pe tad

³¹ Yeso nyaʼa nɨŋ mə̀mə̀ə̀nɨ̀-ɨnû mbe wum chɔ̀b rɨ̀be mbɨ tindɨ ɨban ɨban. Əne wɨ̀ nyaʼa ghà əmbɨ mɨ̀mə̌d ni, “Mbə̀ zə, tɨ̀ yɨ əni kɔʼə wò ə Jèrusalèm, əne ɨnû jìm mbe nɨ bə̂d ɨ̀kə̀n Ŋwiə̀ nyaʼa ŋwaʼnɨ ɨmbə̀ʼ Wan Wə̀d bɨrɨ jwɨ ənɨ rəsìʼ.

³² Mbɨ bɨrɨ yim əməd nàʼ əmbɨ bə̂d mbe nɨ kaʼi mɨ̀Jû. Bə̂d nɨ kaʼi mɨ̀Jû bɨrɨ baʼrɨ əməd, naʼ tɨ̀nìd ətu ɨ bɔ bə̀ chèd mad ənɨ məd.

³³ Mbɨ bɨrɨ te əməd ənɨ ə ŋgwad, zwiirɨ əməd. Ɨni nɨə pe tad, wɨ̀ wɨrɨ zwemə.”

³⁴ Mə̀mə̀ə̀nɨ̀-ɨnû mbe nyaʼa zu ɨnû mbe, àyɨə chəi ɨtu mɨ̀mə̌d nyaʼa zeŋɨ. Ŋwìə̀ nyaʼa nə̀m əton ənɨ ɨŋgam wɔ̂ rɨ əmbɨ mɨ̀mə̌d. Chəi mbɨ nyaʼa bə̀ kyerɨ ənû ze nɨ wɨ̀ nyaʼə ghàə̀.

Yeso nyaʼa vɨ̀ ɨfɨgɨ nɨ nyaʼə nɔndɨ ɨghɨ

³⁵ Ənɨ Yeso mbɨ mbi mə̀mə̀ə̀nɨ̀-ɨnû nyaʼa sɨə tindɨ ɨban ə Jerikò, ɨfɨgɨ mɔʼɔ nɨ nyaʼa mbaŋə̀ nyaʼa chub ɨban ɨnə̂njɨ̀, nɔndɨ ɨghɨ.

³⁶ Ənɨ wɨ̀ nyaʼa zu ənɨ ɨnɔ̂n bə̂d nyaʼə chèə̀, wɨ̀ nyaʼa biirɨ ni, “À kɨ ənû ə ye ə?”

³⁷ Mbɨ nyaʼa ghà ɨ bɔ ni, “Yeso rɨə Nazàret wɨə chèə̀.”

³⁸ Ɨfɨgɨ we nyaʼa zu əne, kyeŋ rɨ̀kǎ ghà ni, “Yeso, wan Dèvîd, diirɨ əmɨ!”

³⁹ Bə̂d mbe nɨ nyaʼa ɨmbì nyaʼa ghàm əbɔʼ məd ghà ni wɨ̀ kəm rəziə, àyɨə wɨ̀ nyaʼa jeŋgɨ yì kyeŋ ghà ni, “Wan Dèvîd, diirɨ əmɨ!”

⁴⁰ Yeso nyaʼa təm əne ghà ni mbɨ nɨŋ əməd yeʼe nàʼ ɨ ni. Ənɨ wɨ̀ nyaʼa fə tiinɨ ɨban ɨban, Yeso nyaʼa biirɨ ɨ bɔ ni,

⁴¹ “À kəb ni mə ghɨ ənû ə ye ɨ ne ə?” Wɨ̀ nyaʼa wììrɨ̀ ni, “Ə̀nùŋɨ̀sɨg, ghɨ ni mə zə ɨsɨ.”

⁴² Yeso nyaʼa ghà ɨ bɔ ni, “Sɨ kɔ zə ɨsɨ! E ɨbenɨ fə ghɨ̀ ni à bɔtɨ e.”

⁴³ Àmei əwu əwən, wɨ̀ nyaʼa wɨrɨ kɔ zə ɨsɨ, əne wɨ̀ nyaʼa nɔʼ beenɨ əbɔʼ ə Yeso, yènə̀ yiirɨ ə Ŋwiə̀. Bə̂d mɨjìm mbe nɨ nyaʼa zə ənû ze nyaʼa bə̀ yiirɨ ə Ŋwiə̀.