Jn 6 - Meta’

Yeso nyaʼa jə mbaŋə̀ chuʼ rɨ̀tân

¹ Ənɨ ə nyùmə̀ mɔʼɔ nyaʼa chě, Yeso mbɨ mbi mə̀mə̀ə̀nɨ̀-ɨnû nyaʼa wò ɨnjin ə sà ze rɨ ə Galiliî, nɨ mbɨ nyaʼə bə̀ tɔŋ ənɨ ə sà ze rɨ ə Tìberiàs.

² Ɨnɔ̂n bə̂d nɨ nyaʼa kwàʼ wɨ kyeŋ wɨə nyaʼə beenɨ əbɔʼ məd, ɨmbə̀ʼ ɨghəm nɨ mbɨ nyaʼa zə ɨnû yiirɨ mbe nɨ wɨ̀ nyaʼa ghɨ̌ ɨgun ə bə̂d mbe nɨ nyaʼə wɔ̀nə̀.

³ Ənɨ mbɨ nyaʼa pe əŋgu, Yeso mbɨ mbi mə̀mə̀ə̀nɨ̀-ɨnû nyaʼa kɔʼ ɨkaŋ ɨwum pe chub ə si.

⁴ Əni nɨ mɨ̀Jû nyaʼa berɨ jɨgɨ Əchwɨ̂ ə Che-ɨgun nyaʼa fə tiinɨ.

⁵ Yeso nyaʼa nèŋ əne zə ɨnɔ̂n bə̂d nɨ nyaʼa kwàʼ wɨ kyeŋ nɨ nyaʼə yeʼe əsɨ məd. Wɨ̀ nyaʼa zə əne, biirɨ əmbɨ Filip ni, “Tɨ̀ kɨə wo zon ŋgə̀ŋ rɨ ə yi, ɨmbə̀ʼ jə bə̂d mbɔ̂ əŋgu ə?”

⁶ Wɨ̀ nyaʼa ghà ənû zɔ̂ ɨmbə̀ʼ zweʼrɨ ə Filip, ɨmbə̀ʼ ɨghəm nɨ məd ziə nyaʼa kyerɨ ənû ze nɨ wɨ̀ bɨrɨ ghɨ̀.

⁷ Filip nyaʼa wììrɨ̀ ɨ bɔ ni, “Ka mɨ̀fraŋ chuʼ əkɨ əbe bɨrɨ kuʼ i nɨ zon ŋgə̀ŋ nɨ tɨ̀ wə̀d mɔʼ mɔʼ rəbɔʼ bə̂d mbɔ̂ jɨg ka àbei ɨkə rɨpiî.”

⁸ Ə̀mə̀ə̀nɨ̀-ɨnû cherə nɨ mbɨ nyaʼə tɔŋ ənɨ ə Andrù, nɨ nyaʼə aŋgɔb Saimon Pità, nyaʼa ghà ni,

⁹ “Wan mbaŋə̀ mɔʼɔ wɨ əgha nɨ berɨ chiŋ ŋgə̀ŋ rɨtân nɨ mbɨ tekɨ ənɨ ə balì mbɨ əgwi ə be. Àyɨə əzɔ̂ kɨə yè əkaʼ bə̂d mbɔ̂ mɨjìm ə?”

¹⁰ Yeso nyaʼa ghà əmbɨ mbɨ mə̀mə̀ə̀nɨ̀-ɨnû ni, “Mbə̀ gha əmbɨ ə bə̂d mbɔ̂ ni mbɨ chub ə si.” Ɨfu nyaʼa kàŋ nɔʼ əsɨ ze. Əne bə̂d mbe mɨjìm nyaʼa chub ə si. Mbaŋə̀ rɨwən nyaʼa ɨghabɨ ə chuʼ rɨtân.

¹¹ Ənɨ mbɨ nyaʼa chubɨ, Yeso nyaʼa nɨŋ chiŋ ŋgə̀ŋ te, nàʼ məben-əwe əmbɨ ə Ŋwiə̀, ghàpɨ̀ əmbɨ ə bə̂d mbe nɨ nyaʼa əŋgu. Wɨ̀ nyaʼa bə̀ ghɨ̀ əndəŋ əndəŋ mbɨ əgwi ze. Wə̀d jìm nyaʼa berɨ ɨchî nɨ wɨ̀ nyaʼa kəbɨ.

¹² Ənɨ wə̀d jìm nyaʼa fə jɨg kod, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni, “Mbə fetɨ tɨkə te nɨ buʼu, ɨmbə̀ʼ tɨ ɨkə mɔʼɔ nim i.”

¹³ Ənɨ bə̂d mbe nyaʼa fə jɨgɨ, mbɨ nyaʼa fetɨ tɨkə te nɨ nyaʼa buʼu tɨ ənɨ ə chiŋ ŋgə̀ŋ balì te, tɨ swi mbɨ̀rɨkaʼ wum chɔ̀b rɨ̀be.

¹⁴ Ənɨ bə̂d mbe nyaʼa zə ənû ə yiirɨ ze nɨ Yeso nyaʼa ghɨ̌, mbɨ nyaʼa ghà ni, “Wɔ̂ yɨə kàŋ ə wə̀d ɨ̀kə̀n we nɨ nyaʼa wo yeʼe ɨŋga ɨsɨg!”

¹⁵ Yeso nyaʼa kyerɨ ni bə̂d mbe mbɨə nyaʼə kə̀b yeʼe gywɨ əwi ənɨ ɨka ɨmbə̀ʼ zɔʼ ənɨ ɨfɔ̀n, əne wɨ̀ nyaʼa wɨrɨ nɔ̀ʼ wo ɨkaŋ ɨwum tə̀zìʼ wi.

Yeso nyaʼa yèn ɨgun ə sà

¹⁶ À nyaʼa sɨ ɨkwirɨ kwirɨ, mə̀mə̀ə̀nɨ̀-ɨnû Yeso nyaʼa swiʼi wo əŋgo ə sà ze rɨ ə Galiliî.

¹⁷ Ɨsɨ nyaʼa fə fin, àyɨə chəi Yeso nyaʼa kɨrɨ wo kumnɨ mɨ̀mə̌d, əne mbɨ nyaʼa nyɨ əbaŋ ɨgyɨ̀ kɔ baanɨ wò ə Kàpenàhom.

¹⁸ Əfim ə nyaʼa kɔ che, əne ghɨ̀ mɨnib kɔ nɔ̀ʼə̀ swiʼə kwàʼ rɨ̀kǎ.

¹⁹ Ənɨ mbɨ nyaʼa fə tin əbaŋ ze ɨghabɨ mɨ̀kilometà mɨ̀tân kɨ ɨghabɨ mɨ̀kilometà rɨ̀fuə, mbɨ nyaʼa zə ə Yeso nɨ nyaʼə yènə̀ yeʼe ɨgun ə sà ze. Ɨ wɨə nyaʼə yèn ɨban əbaŋ ze. Ənɨ mbɨ nyaʼa zə əməd, mbɨ nyaʼa bɔ kwàʼ rɨŋgəʼ.

²⁰ Àyɨə Yeso nyaʼa ghà əmbɨ mɨ̀mə̌d ni, “Tɨ mbə̀ bɔ ə, à yɨə mɔ̌!”

²¹ Mbɨ nyaʼa kàŋ ghaʼ ni njɨ mbə nyaʼa nɨŋ əməd ɨŋga əbaŋ ɨgyɨ̀ ze, àyɨə əbaŋ ze ə nyaʼa pè əsɨ ze nɨ mbɨ nyaʼə wò əŋgu àmei əwu əwən.

Ɨnɔ̂n bə̂d we nɨ Yeso nyaʼa jə nyaʼə kə̀b əməd

²² À nyaʼa əni ze nɨ beenɨ, bə̂d mbe nɨ nyaʼa tən ɨnjin ə sà ze nyaʼa zə ni àmei əbaŋ ə mɔʼ ə nyaʼa əŋgu. Mbɨ nyaʼa bə̀ kyerɨ ni chəi Yeso nyaʼa nyɨ əbaŋ ze mbɨ mbi mə̀mə̀ə̀nɨ̀-ɨnû. Mbɨ nyaʼa zə ni mə̀mə̀ə̀nɨ̀-ɨnû mbe nyaʼa wo mbənə mbənə nɨ chə nyaʼa i Yeso əbɔʼ mɨ̀mə̌d.

²³ Ɨbaŋ ɨgyɨ̀ mɔʼɔ rɨ ə Tìberiàs nyaʼa wo təm ɨban əsɨ ze nɨ Yeso nyaʼa nɨŋ ŋgə̀ŋ, kɔŋgɨ ə Ŋwiə̀, nàʼ əmbɨ ɨnɔ̂n bə̂d we ni wɨ̀ jɨg.

²⁴ Ənɨ bə̂d mbe nyaʼa zə ni chəi Yeso kɨ̀ mə̀mə̀ə̀nɨ̀-ɨnû ɨməd əŋgu, mbɨ nyaʼa nyɨ ɨŋga ɨbaŋ ɨgyɨ̀ mbe ɨ wo kəb əməd ə Kàpenàhom.

Yeso yɨə ŋgə̀ŋ ze nɨə nàʼ ɨ̀tènɨ̀

²⁵ Ənɨ bə̂d mbe nɨ nyaʼə kə̀b ə Yeso nyaʼa zə əməd ɨnjin ə sà ze, mbɨ nyaʼa biirɨ ɨ bɔ ni, “Əchwiə̀-ɨnû, à yeʼe əgha əwù zi ə?”

²⁶ Yeso nyaʼa wiirɨ əmbɨ mɨ̀mə̌d ni, “Mə gha rəsìʼ ɨ nən ni mbə mbɨə kə̀b əmɨ ɨmbə̀ʼ ɨchî nɨ mbə nyaʼa jɨg ŋgə̀ŋ kod, kaʼi ənû ə yiirɨ ze nɨ mə̀ nyaʼa ghɨ̌.

²⁷ Tɨ mbə̀ faʼ ə àmei nɨ berɨ ɨghɨjɨg mbe nɨ bɨrɨ bə, àyɨə mbə̀ faʼ ɨmbə̀ʼ berɨ mbe nɨ bɨrɨ tə̀nə̀. Ɨghɨ mbe bɨrɨ ghɨ̀ mbə jɨg ɨ̀tènɨ̀ rɨ mì. Əzɔ̂ yɨ əghɨjɨg ze nɨ Wan Wə̀d bɨrɨ naʼ ɨ nən. Ŋwìə̀ Mbǎʼ fə nàʼ ɨka ɨ bɔ ni wɨ̀ ghɨ əne.”

²⁸ Mbɨ nyaʼa biirɨ ɨ bɔ ni, “Tɨ̀ kɨə wo ghɨ ye ɨmbə̀ʼ ghɨ ənû ze nɨ Ŋwìə̀ kə̀b ə?”

²⁹ Yeso nyaʼa wììrɨ̀ əmbɨ mɨ̀mə̌d ni, “Ənû ze nɨ Ŋwìə̀ kəbɨ yɨ ni: mbə̀ ben wə̀d we nɨ wɨ̀ nyaʼa tomɨ.”

³⁰ Ənɨ wɨ̀ nyaʼa gha əne, mbɨ nyaʼa biirɨ ɨ bɔ ni, “À kɨ ənû ə yiirɨ zi nɨ tɨ̀ à ghɨ̀ ɨmbə̀ʼ tɨ̀ zə ben ənû ze nɨ àwɔ̀ ə ghà ə? À kɨ ənû zi nɨ à bɨrɨ ghɨ̀ ə?

³¹ Mba mɨ̀mbǎʼ rəŋwe nyaʼa jɨg ə manà ɨŋga ɨbad rɨkwàʼi. Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Ŋwìə̀ nyaʼa nàʼ ŋgə̀ŋ nɨ nɔʼ rɨkaŋ əmbɨ mɨ̀mə̌d ni mbɨ jɨg.'”

³² Yeso nyaʼa sɨ ghà əmbɨ mɨ̀mə̌d ni, “Mə ghà rəsìʼ ɨ nən ni, kaʼi Mose nyaʼa naʼ ŋgə̀ŋ ze nɨ nyaʼa nɔʼ rɨkaŋ ɨ nən. À yɨ mɨ Mbǎʼ ə nàʼ ŋgə̀ŋ ze nɨ yeʼ zɨ rəsìʼ ze nɨ nɔʼ rɨkaŋ.

³³ Ŋgə̀ŋ ze nɨ Ŋwìə̀ ə nàʼə̀ yɨə məd we nɨ swiʼi rɨkaŋ. À yɨə məd we nɨ swiʼ rɨkaŋ ə nàʼ ɨ̀tènɨ̀ əmbɨ ə bə̂d ɨŋga ɨsɨg.”

³⁴ Mbɨ nyaʼa ghà ɨ bɔ ni, “Masà, kɨə nàʼə̀ ŋgə̀ŋ zɔ̂ ɨ na.”

³⁵ Yeso nyaʼa ghà əmbɨ mɨ̀mə̌d ni, “Mɔ̌ yɨə ŋgə̀ŋ ze nɨə nàʼ ɨ̀tènɨ̀. Kaʼ njì bɨrɨ nɔ wɨrɨ zaŋ i wə̀d we nɨ yeʼe əsɨ num. Kaʼ ədɔʼ ə mɨnib ə bɨrɨ wɨrɨ nɔ ne i wə̀d we nɨ ben ənû ze nɨ mɨə ghàə̀.

³⁶ Ka à bè yeʼi əne, mə nyaʼa fə ghà ɨ nən ni mbə fə zə əmɨ, àyɨə chəi mbə̀ kɨrɨ benɨ.

³⁷ Bə̂d mɨjìm mbe nɨ mɨ Mbǎʼ naʼ ɨ num bɨrɨ yeʼe əsɨ num. Əne chəi mə̀ bɨrɨ nɔ fid wə̀d mɔʼɔ we nɨ yeʼe əsɨ num,

³⁸ ɨmbə̀ʼ ɨghəm nɨ mə nyaʼa swiʼi rɨkaŋ yeʼe. Chəi mə̀ nyaʼa swiʼi yeʼe ɨmbə̀ʼ ghɨ ɨnû mbe nɨ mə kəbɨ. Mə nyaʼa swiʼi yeʼe ɨmbə̀ʼ ghɨ mbe nɨ wə̀d we nɨ nyaʼa tom əmɨ kəbɨ.

³⁹ Ənû ze nɨ wə̀d we nɨ nyaʼa tom əmɨ kəbɨ yɨ ni tɨ mə̀ nimnɨ əmɨ wə̀d mɔʼɔ rəbɔʼ bə̂d mɨjìm mbe nɨ wɨ̀ naʼ ɨ num. Wɨ̀ kəb yeʼ ni mə̀ zwemnɨ mɨ̀mə̌d əni ze nɨ sɨ nwìə̀.

⁴⁰ Ənû ze nɨ mɨ Mbǎʼ kəbɨ yɨ ni bə̂d mɨ̀jìm mbe nɨ zə Wan, ben əməd, bɨrɨ jɨg ɨ̀tènɨ̀ rɨ mì. Mə bɨrɨ zwemnɨ mɨ̀mə̌d əni ze nɨ sɨ nwìə̀.”

⁴¹ Ənɨ Yeso nyaʼa gha əne, mɨ̀Jû mbe nyaʼa kɔ dumbɨ ɨmbə̀ʼ əməd, ɨmbə̀ʼ ɨghəm nɨ wɨ̀ nyaʼa gha ni, “Mɔ̌ yɨə ŋgə̀ŋ ze nɨ nyaʼa swiʼi rɨkaŋ.”

⁴² Mbɨ nyaʼa ghà ni, “Ɨmbə̀ʼ mbaŋə̀ zɔ̂ yɨə Yeso, wan Jòsêf ə? Ɨmbə̀ʼ tɨ̀ kyerɨ mbǎʼ məd mbɨ ɨŋgɔb məd ə? Wɨ̀ sɨ chè rɨ ye ghà tɨ̀nîn ni tə nyaʼa swiʼi rɨkaŋ ə?”

⁴³ Yeso nyaʼa wììrɨ̀ əmbɨ mɨ̀mə̌d ni, “Tɨ mbə̀ dumbɨ ə.

⁴⁴ Chəi wə̀d mɔʼɔ nɨ tɨ̀ wɨ̀ yeʼe əsɨ num kɨrɨ ənɨ à yɨə Mbǎʼ we nɨ nyaʼa tom əmɨ suŋ əməd ni wɨ̀ yeʼe əsɨ num. Mə bɨrɨ zwemnɨ əməd əni ze nɨ sɨ nwìə̀.

⁴⁵ Bə̂d ɨ̀kə̀n Ŋwìə̀ nyaʼa ŋwàʼnɨ̀ ni, 'Ŋwìə̀ bɨrɨ chwi ɨnû əmbɨ mɨ̀mə̌d mɨjìm.' Wə̀d jìm we nɨ zu ənû ze nɨ Ŋwìə̀ ghǎ bə̀ kwembɨ ənû rɨ bɔ bɨrɨ yeʼe əsɨ num.

⁴⁶ Chəi wə̀d mɔʼɔ kweʼ zə Ŋwìə̀ Mbǎʼ chè rɨ ənɨ ə məd we nɨ nɔʼ rɨ əmbɨ ə Ŋwìə̀. Àmei məd we fə zə Ŋwìə̀ Mbǎʼ.

⁴⁷ Mə ghà rəsìʼ ɨ nən ni, wə̀d we nɨ ben ənû ze nɨ mə̀ gha bɨrɨ jɨg ɨ̀tènɨ̀ rɨ mì.

⁴⁸ Mɔ̌ yɨə ŋgə̀ŋ ze nɨə nàʼ ɨ̀tènɨ̀.

⁴⁹ Mbə mɨ̀mbǎʼ rəŋwe nyaʼa jɨg ə manà ɨŋga ɨbad rɨkwàʼi, àyɨə mbɨ nyaʼa kɨrɨ kwɨ.

⁵⁰ Ŋgə̀ŋ zɔ̂ nɨ nɔʼ rɨkaŋ yɨ ze nɨ ka wə̀d mɔʼɔ we nɨ jɨgɨ bɨrɨ nɔ kwɨ i.

⁵¹ Mɔ̌ yɨə ŋgə̀ŋ ze nɨə nàʼ ɨ̀tènɨ̀ nɨ nyaʼa swiʼi rɨkaŋ. Wə̀d mɔʼɔ we nɨ jɨg ŋgə̀ŋ zɔ̂ bɨrɨ ten i koŋ. Ŋgə̀ŋ ze nɨ mə̀ bɨrɨ nàʼ ni ɨsɨg jɨg tènə̀ yɨ mɨ nyamnyod.”

⁵² Ənɨ mɨ̀Jû mbe nyaʼa zu ənû zɔ̂, mbɨ nyaʼa kɔ taŋ mbənə mbənə ghàə̀ ni, “Mbaŋə̀ zɔ̂ kɨə wo che rɨ ye nàʼ i nyamnyod ɨ na ni tɨ̀ kud ə?”

⁵³ Ənɨ Yeso nyaʼa zu əne, wɨ̀ nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, à mɨ yeʼ ni chəi mbə̀ kud nyamnyod Wan Wə̀d bə̀ nɔ ənəm əməd, chəi mbə̀ bɨrɨ jɨg ɨ̀tènɨ̀.

⁵⁴ Wə̀d jìm we nɨ kud mɨ nyamnyod bə̀ nɔ mɨ ənəm bɨrɨ jɨg ɨ̀tènɨ̀ rɨ mì. Mə bɨrɨ zwemnɨ əməd əni ze nɨ sɨ nwìə̀,

⁵⁵ ɨmbə̀ʼ ɨghəm nɨ mɨ nyamnyod yɨ tɨjɨg rəsìʼ, mɨ ənəm yɨə bə̀ mɨnoʼ rəsìʼ.

⁵⁶ Wə̀d jìm we nɨ kud mɨ nyamnyod bə̀ nɔ mɨ ənəm wɨ ənɨ ənû ə mɔʼ mbɨ num, mə wɨə bə̀ ənɨ ənû ə mɔʼ mbɨ məd.

⁵⁷ Ɨchî nɨ Mbǎʼ we nɨ yeʼ ɨkǎ nyaʼa tom əmɨ, əne mə wɨ ɨkǎ ɨmbə̀ʼ əməd. Əzɔ̂ ə chwi ni wə̀d we nɨ kud mɨ nyamnyod bɨrɨ bɨ yeʼ ɨkǎ ɨmbə̀ʼ əmɨ.

⁵⁸ Zɔ̂ yɨə ŋgə̀ŋ ze nɨ nyaʼa swiʼi rɨkaŋ. Ka ŋgə̀ŋ zɔ̂ yɨ i ɨghabɨ ze nɨ mbə mɨ̀mbǎʼ rəŋwe nyaʼa jɨgɨ àyɨə mbɨ nyaʼa bə̀ kɨrɨ kwɨ. Wə̀d we nɨ jɨg ŋgə̀ŋ zɔ̂ bɨrɨ ten i koŋ.”

⁵⁹ Yeso nyaʼa ghà ənû zɔ̂ ənɨ wɨ̀ nyaʼə chwi ɨnû ɨŋga nəb ə̀kàtɨ̀ mɨ̀Jû ze rɨ ə Kàpenàhom.

Mə̀mə̀ə̀nɨ̀-ɨnû Yeso nɔnɔʼ nyaʼa nɔ̀ʼ saŋ əməd

⁶⁰ Ənɨ mə̀mə̀ə̀nɨ̀-ɨnû Yeso nɔnɔʼ nyaʼa zu ənû zɔ̂, mbɨ nyaʼa ghà ni, “Ɨŋgam wɔ̂ ə kaŋ kà. À kɨə we nɨ tɨ̀ wɨ̀ ben ə?”

⁶¹ Chəi wə̀d nyaʼa gha ənû ə mɔʼɔ ɨ bɔ, àyɨə wɨ̀ nyaʼa kyerɨ ɨŋga i fîŋ ni mə̀mə̀ə̀nɨ̀-ɨnû ɨməd mbɨə nyaʼə dùmbɨ̀ə̀. Əne wɨ̀ nyaʼa ghà əmbɨ mɨ̀mə̌d ni, “Ɨŋgam wɔ̂ ə wa ghɨ̀ mbə sə ɨtəm ə?

⁶² Mbə̀ kɨə wo ghɨ ye ənɨ mbə̀ zə Wan Wə̀d ənɨ wɨə wò ɨkaŋ əsɨ nɨ wɨ̀ nyaʼa bè əŋgu ə?

⁶³ À yɨ Əzwî ə Ŋwiə̀ ə nàʼ ɨ̀tènɨ̀. Chəi ənɨ tɨ wə̀d mɨ̀sɔŋɨchù nàʼ ɨ̀tènɨ̀. Mɨŋgam mbe nɨ mə̀ fə gha ɨ nən yɨ rɨ əmbɨ Əzwî ə Ŋwìə̀. Ɨ mbɨə bə̀ nàʼ ɨ̀tènɨ̀.

⁶⁴ Àyɨə chəi bə̂d mɔʼɔ rəbɔʼ nən kɨrɨ benɨ.” Yeso nyaʼa ghà əne ɨmbə̀ʼ ɨghəm nɨ wɨ̀ nyaʼa fə bè kyerɨ bə̂d mbe nɨ chəi mbɨ bɨrɨ benɨ. Wɨ̀ nyaʼa fə bə̀ kyerɨ wə̀d we nɨ bɨrɨ fen əməd.

⁶⁵ Əne wɨ̀ nyaʼa ghà ni, “Əzɔ̂ yɨ əton nɨ mə nyaʼa gha ɨ nən ni chəi wə̀d mɔʼɔ nɨ tɨ̀ wɨ̀ yeʼe əsɨ num kɨrɨ ənɨ à yɨə Mbǎʼ ben ni wɨ̀ yeʼe.”

⁶⁶ Ɨ kɔ rɨ ənɨ ə nyùmə̀ we, mə̀mə̀ə̀nɨ̀-ɨnû ɨməd nɔnɔʼ nyaʼa sùŋgɨ̀ rə̀bɔ̀ʼɔ̀. Chəi mbɨ nyaʼə wɨrɨə beenɨ əbɔʼ məd.

⁶⁷ Yeso nyaʼa sɨ biirɨ əmbɨ mə̀mə̀ə̀nɨ̀-ɨnû mbe wum chɔ̀b rɨ̀be ni, “Mbə wa bə̀ kə̀b wo əwən ə?”

⁶⁸ Saimon Pità nyaʼa wììrɨ̀ ɨ bɔ ni, “Ə̀nùŋɨ̀sɨg, tɨ̀ kɨə wɨ wò əsɨ we ə? Àmei àwɔ̀ berɨ ɨŋgam we nɨə nàʼ ɨ̀tènɨ̀ rɨ mì.

⁶⁹ Tɨ̀ fə benɨ bə̀ kyerɨ ni àwɔ̀ yɨə Wə̀d Zeŋɨ we nɨ Ŋwìə̀ tomɨ.”

⁷⁰ Yeso nyaʼa wììrɨ̀ əmbɨ mɨ̀mə̌d ni, “Ɨmbə̀ʼ mə nyaʼa chɔʼ əwən mbə̀n mbɔ̂ wum chɔ̀b rɨ̀be ə? Àyɨə wɨ fibɨ̀ rəbɔʼ nən yɨə debɨ̀rə̀.”

⁷¹ Ɨ wɨə nyaʼə ghà ɨmbə̀ʼ ə Judàs we nɨ nyaʼə wan Saimòn Iskàriɔ̀t. Judàs yɨə nyaʼə wɨ mɔʼɔ rəbɔʼ mə̀mə̀ə̀nɨ̀-ɨnû mbe wum chɔ̀b rɨ̀be. À yɨə məd nyaʼa wo fen ə Yeso.