Jn 21 - Meta’

Yeso nyaʼa chwi i ɨnyod əmbɨ mə̀mə̀ə̀nɨ̀-ɨnû sambe

¹ Ənɨ ɨnû mbɔ̂ nyaʼa fə che i, Yeso nyaʼa yì chwi i ɨnyod əmbɨ mbi mə̀mə̀ə̀nɨ̀-ɨnû ɨban ə sà ze rɨ ə Tìberiàs. Wɨ̀ nyaʼa chwi ənɨ ɨnə̂njɨ̀ wɔ̂:

² Saimon Pità mbɨ Tomas, nɨ mbɨ nyaʼə bə̀ tɔŋ ənɨ ə Didimùs, əne yɨ ni wan ŋwìə̀, mbɨ Natanaèl, nɨ nyaʼa rɨ ə Kanà ə Galiliî, mbɨ ə bɔn Zebèdiî mbɨ mə̀mə̀ə̀nɨ̀-ɨnû Yeso cherə be nyaʼa əsɨ ə mɔʼ.

³ Saimon Pità nyaʼa ghà əmbɨ mɨ̀mə̌d ni, “Mə wɨə wo gywɨ əgwi.” Mbɨ nyaʼa ghà ɨ bɔ ni, “Tɨ̀ bɨrɨ wò mbɨ ne.” Əne mɨ̀mə̌d mɨjìm nyaʼa jwɨ̀ wò nyɨ əbaŋ ɨgyɨ̀ kɔ màʼ tə kɨ̀, àyɨə chəi mbɨ nyaʼa gywɨ əghɨ ə mɔʼɔ ɨzimɨ we.

⁴ Ənɨ ɨtuʼ nyaʼə sɨə chɨgə, Yeso nyaʼa təm əŋgo ə sà ze, àyɨə chəi mə̀mə̀ə̀nɨ̀-ɨnû mbe nyaʼa kyerɨ ni à yɨə Yeso.

⁵ Wɨ̀ nyaʼa ghà əmbɨ mɨ̀mə̌d ni, “Mbɨ bɔn, mbə wa fə gywɨ̀ əgwi ə mɔʼɔ ə?” Mbɨ nyaʼa wììrɨ̀ ni, “Chə̂.”

⁶ Wɨ̀ nyaʼa ghà əmbɨ mɨ̀mə̌d ni, “Mbə maʼ tə kɨ̀ əbà əbɔ ə jɨgɨ, mbə bɨrɨ gywɨ əzɨ ə mɔʼɔ.” Mbɨ nyaʼa màʼ kɨ̀ te gywɨ̀ əgwi ə nɔnɔʼ. Chəi ɨchî nɨ tɨ̀ mbɨ nyaʼa suŋ kɨ̀ te chà ɨŋga əbaŋ ɨmbə̀ʼ ɨghəm nɨ əgwi ze ə nyaʼa kàŋ nɔʼ əku.

⁷ Ə̀mə̀ə̀nɨ̀-ɨnû we nɨ Yeso nyaʼa ghaʼi nyaʼa ghà əmbɨ Pità ni, “À yɨ Ə̀nùŋɨ̀sɨg!” Ənɨ Saimon Pità nyaʼa zu ni à yɨ Ə̀nùŋɨ̀sɨg, wɨ̀ nyaʼa wɨrɨ zɨ̀ ti ngywɨ̌, tòm ɨgyɨ̀ wò əsɨ Yeso. Wɨ̀ nyaʼa bè chɨ̀ ti ngywɨ ɨmbə̀ʼ ɨghəm nɨ wɨ̀ nyaʼa wo fàʼ.

⁸ Mə̀mə̀ə̀nɨ̀-ɨnû mbə nyaʼa beenɨ ɨŋga əbaŋ ɨgyɨ̀. Mbɨ nyaʼə yènə̀ sùŋə̀ kɨ̀ ze nɨ əgwi ə nyaʼa swi ɨŋga, ɨmbə̀ʼ ɨghəm nɨ chəi ŋgò ə sà ze nyaʼa sa rɨ əsɨ ze nɨ mbɨ nyaʼə əŋgu. Əgha ə nyaʼa àmei ɨghabɨ mɨ̀metà ɨkɨ fibɨ̀.

⁹ Ənɨ mbɨ nyaʼa jwɨ əsaŋ, mbɨ nyaʼa zə ɨwid kyi əŋgu mbɨ əgwi ɨgun ɨwid we. Mbɨ nyaʼa bə̀ zə ŋgə̀ŋ.

¹⁰ Yeso nyaʼa ghà əmbɨ mɨ̀mə̌d ni, “Mbə̀ yeʼe mbɨ əgwi ə mɔʼɔ ze nɨ mbə̀ cherə gywɨ̀ə̀.”

¹¹ Saimon Pità nyaʼa wò nyɨ əbaŋ ɨgyɨ̀ ze, sùŋ kɨ̀ ze chà əŋgo ə sà ze. Əgwi ə kyeŋ ə nyaʼa swi ɨŋga kɨ̀ ze. Əgwi ze yɨə nyaʼə ɨkɨ fibɨ̀ mbɨ ɨwum tân chɔ̀b rɨtad. Ka à bè yeʼi ni əgwi ze ə nyaʼa nɔʼ əku, chəi kɨ̀ ze nyaʼa sandə.

¹² Yeso nyaʼa ghà əmbɨ mɨ̀mə̌d ni, “Mbə̀ yeʼe sobrɨ ənə̂d.” Chəi wə̀d mɔʼɔ rəbɔʼ mə̀mə̀ə̀nɨ̀-ɨnû mbe nɨ tɨ̀ wɨ̀ nyaʼa yim fîŋ biirɨ ɨ bɔ ni, “Àwɔ̀ kɨə we?” ɨmbə̀ʼ ɨghəm nɨ mɨ̀mə̌d mɨjìm nyaʼa kyerɨ ni à yɨ Ə̀nùŋɨ̀sɨg.

¹³ Yeso nyaʼa wò nɨŋ ŋgə̀ŋ ze mbɨ əgwi ze nàʼ əmbɨ mɨ̀mə̌d.

¹⁴ Ɨghəm wɔ̂ yɨ ɨghəm nɨ pe tad nɨ Yeso nyaʼa jwɨ ɨfě mə̀mə̀ə̀nɨ̀-ɨnû mbe ənɨ Ŋwìə̀ nyaʼa fə zwemnɨ əməd.

Yeso nyaʼa biirɨ ɨŋgam əmbɨ Pità

¹⁵ Ənɨ mbɨ nyaʼa fə sobrɨ ənə̂d, Yeso nyaʼa biirɨ əmbɨ Pità ni, “Saimòn, àwɔ̀ wan Jɔ̌n, à ghaʼ əmɨ chè bə̂d mbɔ̂ ə?” Pità nyaʼa wììrɨ̀ ɨ bɔ ni, “Ee, kyɨ Ə̀nùŋɨ̀sɨg, à kyerɨ ni mə ghaʼ əwe.” Yeso nyaʼa ghà ɨ bɔ ni, “Jə mbɨ bɔn njɨ̀g.”

¹⁶ Yeso nyaʼa yì biirɨ ɨ bɔ ənɨ ɨghəm nɨ pe be ni, “Saimòn, àwɔ̀ wan Jɔ̌n, à ghaʼ əmɨ ə?” Pità nyaʼa wììrɨ̀ ɨ bɔ ni, “Ee, kyɨ Ə̀nùŋɨ̀sɨg, à kyerɨ ni mə ghaʼ əwe.” Yeso nyaʼa gha ɨ bɔ ni, “Nəŋgɨ tɨ njɨ̀g.”

¹⁷ Yeso nyaʼa yì biirɨ ɨ bɔ ənɨ ɨghəm nɨ pè tad ni, “Saimòn, àwɔ̀ wan Jɔ̌n, à ghaʼ əmɨ ə?” Pità nyaʼa kə̀n ɨmbə̀ʼ ɨchî nɨ Yeso nyaʼa biirɨ ɨ bɔ ənɨ ɨghəm nɨ pè tad ni, “À ghaʼ əmɨ ə?” Əne wɨ̀ nyaʼa wììrɨ̀ əmbɨ Yeso ni, “Ə̀nùŋɨ̀sɨg, à kyerɨ ɨnû jìm. À kyerɨ ni mə ghaʼ əwe!” Yeso nyaʼa ghà ɨ bɔ ni, “Jə tɨ njɨ̀g.

¹⁸ Mə ghà rəsìʼ ɨ ne ni ənɨ à nyaʼə ŋgwàʼ wə̀d, à wɨə nyaʼə zɨ̀ə̀ te ngywɨ̌ wò əsɨ ze nɨ à nyaʼa ghaʼ nɨ wò əŋgu. Àyɨə ənɨ à bɨrɨ fə nùn e, à bɨrɨ sem mbe ɨbɔ, wə̀d cherə zɨ̀ ngywɨ̌ ɨgwɨ ne, kod əwe nɨŋ wò əsɨ ze nɨ chəi à kəb nɨ wò.”

¹⁹ Yeso nyaʼa ghà ənû zɔ̂ ɨ chwi ɨkwɨ ɨvɨ we nɨ Pità bɨrɨ kwɨ ɨmbə̀ʼ wumnɨ ə Ŋwiə̀. Ənɨ Yeso nyaʼa ghàm əne, wɨ̀ ghà ɨ bɔ ni, “Beenɨ əbɔʼ num!”

²⁰ Pità nyaʼa bèŋ zə ə̀mə̀ə̀nɨ̀-ɨnû we nɨ Yeso nyaʼa ghaʼi, nɨ nyaʼə beenɨ əbɔʼ mɨ̀mə̌d. Ə̀mə̀ə̀nɨ̀-ɨnû wɔ̂ yɨ we nɨ nyaʼa tiinɨ ɨban ə Yeso ənɨ mbɨ nyaʼə jɨgə əne biirɨ ɨ bɔ ni, “Ə̀nùŋɨ̀sɨg, à kɨə we nɨ bɨrɨ fen əwe ə?”

²¹ Ənɨ Pità nyaʼa zə əməd, wɨ̀ nyaʼa biirɨ əmbɨ Yeso ni, “Ə̀nùŋɨ̀sɨg, à yeʼ ɨmbə̀ʼ mbaŋə̀ zɔ̂ ə?”

²² Yeso nyaʼa wììrɨ̀ ɨ bɔ ni, “Mə mɨ kə̀b ni wɨ̀ chub ɨka pè ənɨ mə̀ wɨrɨ yeʼe, əze ə kɨə ye ɨ ne ə? Beenɨ əbɔʼ num!”

²³ Ɨŋgam we nɨ wɨ̀ nyaʼa ghǎ nyaʼa jàŋ əkaʼ bə̂d mbe nɨ nyaʼə beenɨ əbɔʼ Yeso ni chəi ə̀mə̀ə̀nɨ̀-ɨnû wɔ̂ bɨrɨ nɔ kwɨ. Àyɨə chəi Yeso nyaʼa ghà ni chəi wɨ̀ bɨrɨ nɔ kwɨ. Wɨ̀ nyaʼa ghà yeʼ ni, “Mə mɨ kə̀b ni wɨ̀ chub ɨkǎ pè ənɨ mə̀ wɨrɨ yeʼe, əze ə kɨə ye ɨ ne ə?”

²⁴ Ə̀mə̀ə̀nɨ̀-ɨnû wɔ̂ yɨ we nɨə ghà ɨnû mbɔ̂. Məd yɨ we nɨ bə̀ ŋwàʼnɨ̀ ə si. Tɨ̀ kyerɨ ni ənû ze nɨ wɨ̀ ghǎ yɨ ənû rəsìʼ.

²⁵ Ɨnû nɔnɔʼ cherə mbɨ əŋgu nɨ Yeso nyaʼa ghɨ̌. À kɨ nɨ mbɨ nyaʼa ŋwaʼnɨ ɨnû mbe jìm, njɨ mə kɔndɨ ni chəi ɨsɨg wɔ̂ jìm kuʼ nɨ tɨ̀ mbɨ nùŋ ɨ̀ŋwàʼnɨ̀ mbe ɨŋga.