Jn 2 - Meta’

Yeso nyaʼa bèŋ mɨnib ənɨ mɨ̀nòʼ

¹ Ənɨ ɨni nyaʼa che ɨbe, mbɨ nyaʼa kàʼ ɨnamɨ mɔʼɔ ə Kanà əbà əbeŋ ze rɨ ə Galiliî. Ɨŋgɔb Yeso wɨə nyaʼa əŋgu.

² Mbɨ nyaʼa bə̀ won ə Yeso mbɨ mə̀mə̀ə̀nɨ̀-ɨnû ɨməd ənɨ ɨnamɨ we.

³ Ənɨ mɨnoʼ nyaʼa mì i, ɨŋgɔb Yeso nyaʼa ghà ɨ bɔ ni, “Mɨnôʼ mɨ̀mə̌d fə mì i.”

⁴ Yeso nyaʼa ghà ɨ bɔ ni, “Əyî, à berɨ ənû ə ye nɨ ghɨ̀ mbɨ num ə? Chəi mɨ nyùmə̀ kɨrɨ kuʼ nɨ ghɨ ənû ə mɔʼɔ.”

⁵ Ənɨ wɨ̀ nyaʼa ghà əne ɨŋgɔb məd nyaʼa ghà əmbɨ ə bə̂d mbe nɨ nyaʼə chà ɨnamɨ we ni, “Mbə̀ ghɨ ənû ze nɨ wɨ̀ gha ɨ nən.”

⁶ Mɨ̀Jû mbɨə nyaʼə nùŋə̀ tɨkyiŋ mɨnib nɨ mbɨ nyaʼa chəb ənɨ əti ɨfě nəb tɨ mɨ̀mə̌d. Tɨkwɨrɨ ɨkyiŋ tɔ̂ nyaʼa əŋgu rɨ̀fuə. Fɨkyiŋ fibɨ̀ nyaʼə yim mɨnib ɨghabɨ mɨ̀lità ɨwum famɨ wò pè ənɨ ɨkɨ fibɨ̀ mbɨ ɨwum be. Tɨkyiŋ te nyaʼa əŋgu ɨmbə̀ʼ ɨghəm nɨ ə zɨə nyaʼa ɨŋga rɨkə tɨ mɨ̀Jû ni mbɨ mɨ kə̀b wumnɨ ə Ŋwiə̀ ɨchî nɨ kuʼnɨ, mbɨ berɨ so ɨnyod bə̀ sò ɨghɨ bɔŋ sɨə jɨgə.

⁷ Yeso nyaʼa ghà əmbɨ ə bə̂d mbe ni, “Mbə̀ swe rɨkyiŋ te.” Mbɨ nyaʼa swe mɨnib kɔʼ pè ɨchû.

⁸ Əne mbɨ nyaʼa ghɨ əne, wɨ̀ nyaʼa ghà əmbɨ mɨ̀mə̌d ni, “Mbə̀ kom mbɨ mɔʼɔ wò nàʼ əmbɨ wə̀d kyeŋ we nɨə chà əchwɨ̂ zɔ̂.” Mbɨ nyaʼa kòm wò nàʼ.

⁹ Ənɨ wɨ̀ nyaʼa zweʼrɨ mɨnib mbe nɨ nyaʼa fə beŋ ənɨ mɨ̀nòʼ, chəi wɨ̀ nyaʼa kyerɨ əsɨ ze nɨ mɨnoʼ mbe nyaʼa nɔʼ rəŋgu (àmei bə̂d ə̀fàʼì mbe nɨ nyaʼa kom mɨnib mbe nyaʼa kyerɨ). Əne wɨ̀ nyaʼa tɔŋ ɨnom ɨgən

¹⁰ ghà ɨ bɔ ni, “Wə̀d jìm wɨə bèə̀ nàʼə̀ mɨnoʼ chɔ̀m əmbɨ ə bə̂d. Ənɨ mbɨ fə nɔ əku, wɨ̀ sɨ nàʼ mbe nɨ chəi mbɨ jeŋgɨ bɔ̀ŋ. À fə nùŋ mɨnoʼ chɔ̀m sɨ nàʼ àmei tɨ̀nîn!”

¹¹ Yeso nyaʼa ghɨ̀ ənû ə yiirɨ rɨtu zɔ̂ ə Kanà əbà əbeŋ ze rɨ ə Galiliî. Wɨ̀ nyaʼa chwi ɨwumnɨ we nɨ wɨ̀ berɨ, əne mə̀mə̀ə̀nɨ̀-ɨnû ɨməd nyaʼa ben əməd.

¹² Əze ə nɨə cheə, Yeso, ɨŋgɔb məd, bɔŋgɔb məd mbɨ mə̀mə̀ə̀nɨ̀-ɨnû ɨməd nyaʼa swiʼi wò ə Kàpenàhom, pè chub əŋgu ɨni mɔʼɔ.

Yeso nyaʼa fid bə̂d ɨwin rɨŋga mbàn Ŋwìə̀

¹³ Nyùmə̀ nyaʼa sɨə wò kùʼ ənɨ mɨ̀Jû nyaʼa berɨ jɨg Əchwɨ̂ ə Che-ɨgun, əne Yeso nyaʼa kɔʼ wò ə Jèrusalèm.

¹⁴ Wɨ̀ nyaʼa pè ɨkye ɨkam mbàn Ŋwìə̀ zə bə̂d nɨ nyaʼə fènə̀ mbɨ̀rɨkun, fènə̀ njɨ̀g bə̀ fènə̀ mbɨ̀rə̀bəŋə. Wɨ̀ nyaʼa bə̀ zə bə̂d nɨə kobrɨ ɨkab nɨ nyaʼa chub ɨgun mbə mɨ̀tebrə̀.

¹⁵ Əne wɨ̀ nyaʼa nɨŋ mɨniʼ tekɨ ŋgwad əŋgu kɔ fid njɨ̀g te mbɨ mbɨ̀rɨkun mbe rɨŋga ɨkye ɨkam mbàn Ŋwìə̀. Wɨ̀ nyaʼa bèŋ mɨ̀tebrə̀ bə̂d mbe nɨ nyaʼə kobrɨ ɨkab əne jàŋ ɨkab mɨ̀mə̌d.

¹⁶ Wɨ̀ nyaʼa ghà əmbɨ ə bə̂d mbe nɨ nyaʼə fènə̀ mbɨ̀rə̀bəŋə ni, “Mbə nɨŋ mbɨ̀rə̀bəŋə mbɔ̂ jwɨ̀ rɨ əgha. Tɨ mbə̀ beŋ ə nəb mɨ Mbǎʼ ənɨ ə nəb ɨwin.”

¹⁷ Mə̀mə̀ə̀nɨ̀-ɨnû ɨməd nyaʼa kɔndɨ ni ə zɨ ɨŋga Ə̀ŋwàʼnɨ̀ ə Ŋwiə̀ ni, “Ɨchî nɨ mə zɨ ətu ənɨ e nəb, kyɨə Ŋwìə̀, ə bɨrɨ ghɨ ni bə̂d zwiirɨ əmɨ.”

¹⁸ Ənɨ wɨ̀ nyaʼa ghɨ̀ əne, bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa biirɨ ɨ bɔ ni, “Ənû ə yiirɨ ze nɨ tɨ̀ à ghɨ̀ ɨ chwi ɨ na ni à berɨ ɨka nɨ ghɨ ənû zɔ̂ kɨ əzi ə?”

¹⁹ Yeso nyaʼa wììrɨ̀ əmbɨ mɨ̀mə̌d ni, “Mbə mɨ sàʼ mbàn Ŋwìə̀ zɔ̂, mə bɨrɨ nɨŋ ɨni tad wɨrɨ kod.”

²⁰ Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa biirɨ ɨ bɔ ni, “Mbɨ nyaʼa nɨŋ ɨghəm ɨwu ɨwum kwè chɔ̀b rɨ̀fuə bɔŋ maanɨ mbàn Ŋwìə̀ zɔ̂, əne à bɨrɨ nɨŋ ɨni tad kod ə?”

²¹ Àyɨə mbàn Ŋwìə̀ ze nɨ wɨ̀ nyaʼə ghàə̀ yɨə nyamnyod məd.

²² Ənɨ Ŋwìə̀ nyaʼa zwemnɨ əməd, mə̀mə̀ə̀nɨ̀-ɨnû ɨməd nyaʼa wɨrɨ kɔndɨ ni wɨ̀ nyaʼa ghà ənû zɔ̂, əne mbɨ nyaʼa ben ənû ze nɨ yeʼ ɨŋga Ə̀ŋwàʼnɨ̀ ə Ŋwiə̀ bə̀ ben ɨŋgam we nɨ Yeso nyaʼa bə̀ ghà.

²³ Ənɨ Yeso nyaʼa ə Jèrusalèm ənɨ nyùmə̀ we mbɨ nyaʼə jɨg Əchwɨ̂ ə Che-ɨgun, bə̂d mɨ̀nɔnɔʼ nyaʼa ben əməd ɨmbə̀ʼ ɨghəm nɨ mbɨ nyaʼa zə ɨnû yiirɨ mbe nɨ wɨ̀ nyaʼə ghɨ̀ə̀.

²⁴ Àyɨə chəi Yeso nyaʼa zɨ fîŋ ɨgun mɨ̀mə̌d, ɨmbə̀ʼ ɨghəm nɨ wɨ̀ nyaʼa kyerɨ tɨkwɨrɨ bə̂d nɨ bə̂d mɨ̀sɔŋɨchù yeʼ mbɨwən.

²⁵ Chə nyaʼa i əton nɨ tɨ̀ wə̀d mɔʼɔ nyaʼa wɨrɨ ghà ɨnû ɨ bɔ ɨmbə̀ʼ ə bə̂d, ɨmbə̀ʼ ɨghəm nɨ məd ziə nyaʼa kyerɨ ɨnû mbe nɨ nyaʼa ɨŋga fîŋ tɨ mɨ̀mə̌d.