Jn 10 - Meta’

Ənû ə mɨgɨ ɨmbə̀ʼ ənə̂ŋgɨ̀-njɨ̀g

¹ Yeso nyaʼa ghà ni, “Mə ghà rəsìʼ ɨ nən ni wə̀d we nɨ chəi wɨ̀ che ɨchû ɨkam nyɨ ɨŋga əkad ə njɨ̀g, àyɨə wɨ̀ kɔʼ nyɨ ɨnə̂njɨ̀ cherə yɨ ɨjɨ fɔrɨ ə̀bàgɨ.

² We nɨ che ɨchû ɨkam nyɨ ɨŋga əkad ə njɨ̀g yɨ we nɨə nəŋgɨə njɨ̀g te.

³ We nɨə nəŋgɨ ɨchû ɨkam wɨə fiʼ ɨchû ɨkam we ɨ bɔ. Njɨ̀g te tɨə zuə gɨ̂ məd. Məd ziə wɨə tɔŋə ti njɨ̀g ənɨ rɨkum tɨ mɨ̀mə̌d. Məd wɨə bə̀ nɨŋə njɨ̀g te ni tɨ jwɨ̀ wò kud ɨfu.

⁴ Ənɨ wɨ̀ fə chɨ ti njɨ̀g rɨjìm əsaŋ, ɨ wɨə chè ɨmbì, njɨ̀g te sɨə beenɨ əbɔʼ məd. Ɨ tɨə beenɨ ɨmbə̀ʼ ɨghəm nɨ tɨ kyerɨ gɨ̂ məd.

⁵ Chəi tɨ bɨrɨ beenɨ əbɔʼ wə̀d rɨ̀sɔ̀ʼɔ̀. Tɨ bɨrɨ nod wə̀d rɨ̀sɔ̀ʼɔ̀ ɨmbə̀ʼ ɨghəm nɨ chəi tɨ kyerɨ gɨ̂ bə̂d rɨ̀sɔ̀ʼɔ̀.”

⁶ Yeso nyaʼa ghà ənû ə mɨgɨ zɔ̂ əmbɨ mɨ̀mə̌d, àyɨə chəi ɨtu mɨ̀mə̌d nyaʼa zeŋ ɨmbə̀ʼ ənû ze nɨ wɨ̀ nyaʼə ghàə̀.

Yeso yɨ ənə̂ŋgɨ̀-njɨ̀g chɔ̀m

⁷ Yeso nyaʼa yì ghà ni, “Mə ghà rəsìʼ ɨ nən ni, mɔ̌ yɨ ɨchû ɨkam əmbɨ ə njɨ̀g.

⁸ Bə̂d mɨjìm mbe nɨ nyaʼa be yeʼe bɔŋ mə nyaʼa sɨə yeʼe yɨ mɨjɨ fɔrɨ ɨ̀bàgɨ. Àyɨə chəi njɨ̀g te nyaʼa zwetɨ ɨnû mbe nɨ mbɨ nyaʼə ghàə̀.

⁹ Mɔ̌ yɨ ɨchû ɨkam. Əne wə̀d mɔʼɔ we nɨ che ənɨ ə num nyɨ ɨŋga ɨkam bɨrɨ jwɨ rəŋgəʼ. Wɨ̀ bɨrɨ nyɨ ɨŋga ɨkam bə̀ jwɨ̀ wò zə ɨfu chɔ̀m nɨ kud.

¹⁰ Ɨjɨ wɨə yeʼe àmei nɨ jɨ, nɨ zwiirɨ bə̀ fɔrɨ nɨ nimnɨ njɨ̀g te. Mə nyaʼa yeʼe ni njɨ̀g te jɨg ɨ̀tènɨ̀, əne jɨg ɨ swi.

¹¹ “Mɔ̌ yɨ ənə̂ŋgɨ̀-njɨ̀g chɔ̀m. Ənə̂ŋgɨ̀-njɨ̀g chɔ̀m wɨə benə nɨ kwɨ ɨmbə̀ʼ ti njɨ̀g.

¹² Ka wə̀d we nɨ mbɨ nɨŋ ənɨ ə̀fàʼì yɨ i ənə̂ŋgɨ̀-njɨ̀g we nɨ berɨ njɨ̀g te. Wɨ̀ mɨ zə ənɨ əfɔn ə yeʼe, wɨ̀ bɨrɨ saŋ njɨ̀g te nòd i. Wɨ̀ nɨə norə, əfɔn ze ə bɨrɨ yeʼe gywɨ̀ njɨ̀g rɨ mɔʼɔ, jàŋ ə̀bùʼù.

¹³ Wə̀d we nɨ mbɨ nɨŋ ənɨ ə̀fàʼì bɨrɨ nod ɨmbə̀ʼ ɨghəm nɨ mbɨ nɨŋ əməd nɨŋ əne chəi wɨ̀ zɨ ətu nɨ nəŋgɨ njɨ̀g te.

¹⁴ “Mɔ̌ yɨ ənə̂ŋgɨ̀-njɨ̀g chɔ̀m. Mə kyerɨ tɨ njɨ̀g, tɨ njɨ̀g bə̀ kyerɨ əmɨ.

¹⁵ Zɨə mei ɨchî nɨ Mbǎʼ kyerɨ əmɨ, mə bə kyerɨ ə Mbǎʼ. Mə fə ben nɨ kwɨ ɨmbə̀ʼ tɨ njɨ̀g.

¹⁶ Mə berɨ njɨ̀g rɨ cherə nɨ chəi ɨŋga əkad ə njɨ̀g zɔ̂. Mə berɨ bɨ nɨŋ njɨ̀g te yeʼe mbɨ rɨwən. Tɨ bɨrɨ zu mɨ gɨ̂, əne njɨ̀g te rɨ̀jìm bɨrɨ fɔtɨ ɨŋga əkad ə mɔʼ. Əne ənə̂ŋgɨ̀-njɨ̀g mɔʼ bɨrɨ nəŋgɨ mɨ̀mə̌d.

¹⁷ Əton nɨ Mbǎʼ ghaʼ əmɨ yɨ ni, mə fə ben nɨ kwɨ ɨmbə̀ʼ wɨrɨ chub ɨkǎ.

¹⁸ Chəi wə̀d mɔʼɔ bɨrɨ nɨŋ mɨ ɨ̀tènɨ̀ rɨ num. À yɨə mɔ̌ kaŋ ben ni mə bɨrɨ kwɨ. Mə berɨ ɨka nɨ kwɨ, bə̀ berɨ ɨka nɨ wɨrɨ chub ɨka. À yɨ mɨ Mbǎʼ gha ni mə ghɨ əne.”

¹⁹ Ə̀ghàbrɨ̀ ə nyaʼa yi jwɨ̀ əkaʼ mɨ̀Jû mbe ɨmbə̀ʼ ɨnû mbɔ̂ nɨ Yeso nyaʼa ghǎ.

²⁰ Mɨ̀mə̌d mɨ̀nɔnɔʼ nyaʼa ghà ni, “Əzwî rɨbɔ̀ŋ ə zɨ ɨŋga məd! Ɨ wɨə beə! Mbə kɨə zwetɨ ənû ze nɨ wɨə ghà ɨmbə̀ʼ ə yè ə?”

²¹ Mbɨ mɔʼɔ nyaʼa ghà ni, “Ka ɨŋgam wɔ̂ yɨ i wɨ wə̀d nɨ əzwî rɨbɔ̀ŋ ə yeʼ ɨŋga məd. Tɨ əzwî rɨbɔ̀ŋ ə fìʼ əghə ə wə̀d nɨ fɨg ə?”

Mɨ̀Jû nyaʼa ton ə Yeso

²² Nyùmə̀ nyaʼa kùʼ nɨ mɨ̀Jû nyaʼa wo jɨg əchwɨ̂ ɨmbə̀ʼ kɔndɨ ɨchî nɨ mbɨ nyaʼa wɨrɨ sweŋ mbàn Ŋwìə̀ ze rɨ ə Jèrusalèm. À yɨə nyùmə̀ nɨ ɨfə nyaʼə kɔ əku.

²³ Yeso wɨə nyaʼə yèn ɨŋga mbàn Ŋwìə̀ ɨŋga ə̀tâŋ ze nɨ mbɨ nyaʼa tɔŋ ənɨ ə̀tâŋ ə Solomòn.

²⁴ Mɨ̀Jû nyaʼa wò fetɨ kad əməd biirɨ ɨ bɔ ni, “À kɨə wo nuŋ əwa ənɨ ə̀bìrɨ̀ ənɨ əgha nɨ sa rɨ ye ə? Àwɔ̀ mɨ yeʼ Wə̀d we nɨ Ŋwìə̀ zɔʼɔ, kaŋ ghà ɨ na əsaŋ əsaŋ.”

²⁵ Yeso nyaʼa wììrɨ̀ əmbɨ mɨ̀mə̌d ni, “Mə nyaʼa fə ghà ɨ nən àyɨə chəi mbə̀ benɨ. Ɨnû mbe nɨ mɨə ghɨ̀ ənɨ ɨkum mɨ Mbǎʼ, ɨ mbɨə ghɨ̀ ni bə̂d kyerɨ wə̀d we nɨ mə yeʼ wɨwən.

²⁶ Chəi mbə̀ ben ɨmbə̀ʼ ɨghəm nɨ ka mbə̀ yɨ ə tɨ njɨ̀g.

²⁷ Tɨ njɨ̀g tɨə zu ənû ze nɨ mɨə ghàə̀. Mə kyerɨ tɨ njɨ̀g. Ɨ tɨə beenɨ əbɔʼ num.

²⁸ Mə wɨə nàʼ ɨ̀tènɨ̀ rɨ mì əmbɨ tɨ njɨ̀g. Chəi tɨ bɨrɨ nɔ kwɨ. Chəi wə̀d nɨ tɨ wɨ̀ fe mɨ̀mə̌d rɨ num.

²⁹ Mɨ Mbǎʼ we nɨ naʼ njɨ̀g tɔ̂ ɨ num ə chè wə̀d jìm. Chəi wə̀d nɨ tɨ̀ wɨ̀ fe mɨ̀mə̌d rɨ əmbɨ mɨ Mbǎʼ.

³⁰ Mɔ̌ mbɨ mɨ Mbǎʼ wɨ ənɨ ənû ə mɔʼ.”

³¹ Mɨ̀Jû nyaʼa wɨrɨ gwe əti ɨmbə̀ʼ tumbɨ əməd.

³² Yeso nyaʼa wììrɨ̀ əmbɨ mɨ̀mə̌d ni, “Mɨ Mbǎʼ fə ghɨ̀ ni mə ghɨ ɨnû chɔ̀m nɔnɔʼ əkaʼ nən. À kɨə zi rəbɔʼ ɨnû mbɔ̂ nɨ mbɨə kəb tumbɨ əmɨ ɨmbə̀ʼ əzɨ əwən ə?”

³³ Mbɨ nyaʼa wììrɨ̀ ɨ bɔ ni, “Kaʼi ɨmbə̀ʼ ənû ə chɔ̀m ə mɔʼɔ ze à ghɨ̌ nɨ tɨ̀ kəb tumbɨ əwe. Tɨ̀ wɨə kəb tumbɨ əwe ɨmbə̀ʼ ɨchî nɨ à zɔm ə Ŋwiə̀, ɨmbə̀ʼ ɨghəm nɨ àwɔ̀ wə̀d mɨ̀sɔŋɨchù wɨə ghàə̀ ni tə yɨə Ŋwiə̀.”

³⁴ Yeso nyaʼa wììrɨ̀ əmbɨ mɨ̀mə̌d ni, “Chəi mbɨ wa ŋwaʼnɨ ɨŋga tə rɨkə ni, Ŋwìə̀ nyaʼa ghà ni, 'Mbə yɨ mɨ̀ŋwìə̀ ə'?

³⁵ Ŋwìə̀ nyaʼa tɔŋ bə̂d mbe nɨ nyaʼa zu ɨŋgam məd ni mbɨ yɨ mɨ̀ŋwìə̀. Əne mbə̀ kyerɨ ni Ə̀ŋwàʼnɨ̀ ə Ŋwiə̀ ə zɨə ghà rəsìʼ.

³⁶ Mbə̀ mbɨə ghà ɨmbə̀ʼ mɔ̌ we nɨ Mbǎʼ nyaʼa zɔʼɔ chà ɨŋga ɨsɨg ni mə wɨə zɔ̀m ə Ŋwiə̀ ɨmbə̀ʼ ɨchî nɨ mə̀ gha ni, 'Mə yɨə Wan Ŋwìə̀ ə'?

³⁷ À mɨ yeʼ nɨ chəi mɨə ghɨ̀ ɨnû mbe nɨ mɨ Mbǎʼ ghà ɨ num, tɨ mbə̀ ben ə ɨnû mbe nɨ mɨə ghàə̀.

³⁸ Mə mɨ yeʼə ghɨ̀ ɨnû mbe, ka à be yeʼi ni chəi mbə̀ ben ənû mbe nɨ mɨə ghàə̀, àyɨə mbə ben ɨmbə̀ʼ mbə ɨtu zeŋ ni mɨ Mbǎʼ wɨ ənɨ ənû ə mɔʼ mbɨ num fɔrɨ ni mə wɨ ənɨ ənû ə mɔʼ mbɨ mɨ Mbǎʼ.”

³⁹ Mbɨ nyaʼa wɨrɨ kəb nɨ gywɨ əməd, àyɨə wɨ̀ nyaʼa vɨ rɨŋga tɨkyerɨ-ɨbɔ mɨ̀mə̌d.

⁴⁰ Yeso nyaʼa ghɨ̀ əne yì baanɨ ɨgyɨ̂ Jodàn ɨghəm cherə wo əsɨ ze nɨ Jɔ̌n nyaʼə bèə̀ nàʼ mɨnib. Wɨ̀ nyaʼa pè chubɨ əŋgu.

⁴¹ Bə̂d mɨ̀nɔnɔʼ nyaʼa wò əsɨ məd. Mbɨ nyaʼə ghàə̀ mbənə mbənə ni, “Chəi Jɔ̌n nyaʼa ghɨ ɨnû yiirɨ mɔʼɔ, àyɨə ɨnû jìm mbe nɨ wɨ̀ nyaʼa ghǎ ɨmbə̀ʼ mbaŋə̀ zɔ̂ yɨ ɨnû rəsìʼ.”

⁴² Bə̂d mɨ̀nɔnɔʼ nyaʼa ben ə Yeso əsɨ ze.