Ɨnû 8 - Meta’

Tɨ̀taanɨ njə̀m ɨmbə̀ʼ Wan njɨ̀g nɨ nyaʼa kyeʼrɨ ɨneŋ we nɨ pe ənɨ wɨ sambe

¹ Ənɨ Wan njɨ̀g nyaʼa kyeʼrɨ ɨneŋ we nɨ pe ənɨ wɨ sambe, ɨsɨ mbe nɨ yeʼ ɨkaŋ nyaʼa zwɨ̀ rɨ nyɔ̀ɔ̀m. Mbɨ nyaʼa zwɨ̀ ənɨ əkwirɨ ə awà.

² Mə nyaʼa zə mbɨ̀aŋgɨrə̀ mbe sambe nɨə təm ɨfě Ŋwiə̀. Mbɨ nyaʼa nàʼ tàŋ sambe əmbɨ mɨ̀mə̌d.

³ Aŋgɨrə̀ cherə, nɨ nyaʼa yim əkaŋ nɨ mbɨ tekɨ ənɨ ə gôl, nyaʼa yeʼe təm ɨban ɨkwi ɨjə̀ŋ ə̀fààrɨ̀. Mbɨ nyaʼa nàʼ ɨneŋ nɔnɔʼ ɨ bɔ ni wɨ̀ nyam əbɔʼ ɨ̀kɔ̀ŋgɨ̀ bə̂d Ŋwiə̀ mɨ̀jìm əne tɔ̀n ɨgun ɨkwi ɨjə̀ŋ we nɨ mbɨ nyaʼa tekɨ ənɨ ə gôl, nɨ nyaʼa ɨfě ətən ɨfɔ̀n ə Ŋwiə̀.

⁴ Ndiʼ ze nɨ nyaʼə jwɨ̀ rɨ ənɨ ɨneŋ we nyaʼa fɔtɨ əbɔʼ ɨ̀kɔ̀ŋgɨ̀ bə̂d Ŋwiə̀, əne nɔ̀ʼ rɨ ɨkye əbɔ aŋgɨrə̀ we wò ɨfě Ŋwiə̀.

⁵ Aŋgɨrə̀ we nyaʼa nɨŋ əkaŋ ze, swe ənɨ mbɨ̀akyiwid nɨə ghə̀ʼə̀, maʼ ɨgwɨ ə si. Wɨ̀ nyaʼa chɨ̀ mbɨ̀akyiwid mbe rɨ ənɨ ɨkwi ɨjə̀ŋ ə̀fààrɨ̀ we. Ənɨ wɨ̀ nyaʼa ghɨ̀ əne mbə̀ŋ nyaʼa kùm, gɨ̂ rɨ mɔʼɔ ghàm, ɨbi mbə̀ŋ ŋwàŋ, si bə̀ wùd.

Tɨ̀taanɨ njə̀m ɨmbə̀ʼ mbɨ̀aŋgɨrə̀ mɨ̀kwè nɨ nyaʼa fə tə tàŋ

⁶ Mbɨ̀aŋgɨrə̀ mbe sambe nɨ nyaʼa yim tàŋ te sambe nyaʼa tekɨ ə ɨnyod nɨ fə.

⁷ Aŋgɨrə̀ rɨtu nyaʼa fə i taŋ, əne əwəŋ mbɨ ɨwid, nɨ nyaʼa nyamɨ mbɨ ənəm, nyaʼa feŋgɨ ɨgwɨ ə si. Əba ə fibɨ̀ ənɨ mbɨ ghapɨ si ɨba tad nyaʼa fɨə. Əba ə fibɨ̀ ənɨ mbɨ ghapɨ ɨzed ɨba tad nyaʼa fɨə. Ɨfu zwɨ̂ jìm nyaʼa bə̀ fɨə.

⁸ Aŋgɨrə̀ we nɨ pe ənɨ mbɨ mɨbe nyaʼa fə i taŋ, əne mbɨ nyaʼa màʼ əghɨ ə mɔʼɔ nɨ nyaʼa ɨghabɨ ɨwum kyeŋ nɨə fɨə ɨŋga rɨ̀bàà. Əba ə fibɨ̀ ənɨ mbɨ ghapɨ rɨ̀bàà ɨba tad nyaʼa bèŋ ənɨ ənəm.

⁹ Əba ə fibɨ̀ ənɨ mbɨ ghapɨ ɨghɨ mbe nɨə chub ɨŋga rɨ̀bàà ɨba tad nyaʼa kwɨ. Mbɨ nyaʼa chəkɨ əba ə fibɨ̀ ənɨ mbɨ ghapɨ ɨbaŋ ɨgyɨ̀ ɨba tad.

¹⁰ Aŋgɨrə̀ we nɨ pe ənɨ mbɨ mɨtad nyaʼa fə i taŋ, əne fɨtəmɨ kyeŋ nɨ nyaʼə te ɨghabɨ ɨkaʼi nyaʼa nɔʼ rɨkaŋ feŋ ɨgun əba ə fibɨ̀ ənɨ mbɨ ghapɨ mɨgyɨ̂ ɨba tad bə̀ feŋ ɨgun mɨ̀jwɨ̀-əmboŋ.

¹¹ Ɨkum fɨtəmɨ fe yɨə Ənywɨ̀-ənywɨ̀. Əba ə fibɨ̀ ənɨ mbɨ ghapɨ mɨnib ɨba tad nyaʼa bèŋ sɨə nywɨ̀ə̀. Bə̂d mɨ̀nɔnɔʼ nɨ nyaʼa nɔ mɨnib mbe nyaʼa kwɨ ɨmbə̀ʼ ɨghəm nɨ mɨnib mbe mbɨə nyaʼə nywɨ̀ə̀.

¹² Aŋgɨrə̀ we nɨ pe ənɨ mbɨ mɨkwè nyaʼa fə i taŋ, əne əghɨ ə mɔʼɔ ə nyaʼa nun əbà ə fibɨ̀ ənɨ mbɨ ghapɨ nyùmə̀ ɨba tad, ənɨ mbɨ ghapɨ ɨmɨg ɨba tad, bə̀ fɔrɨ ənɨ mbɨ ghapɨ rɨtəmɨ ɨba tad. Əba ə fibɨ̀ ənɨ mbɨ tad ənɨ ɨzeŋɨ zeŋɨ mɨ̀mə̌d nyaʼa fin. Chəi nyùmə̀ nyaʼa te ənɨ əba ə fibɨ̀ ənɨ mbɨ ghapɨ əni ɨba tad. Chəi ɨmɨg mbɨ rɨtəmɨ nyaʼa te ənɨ əbà ə fibɨ̀ ənɨ mbɨ ghapɨ ɨzimɨ ɨba tad.

¹³ Mə nyaʼa nèŋ, əne zə ɨzam nɨ nyaʼə fid əton ɨkaŋ. Ɨ wɨə nyaʼə ghàmə̀ rɨ̀kǎ ghàə̀ ni, “Ŋgəʼ bɨrɨ nyɨ, ŋgəʼ bɨrɨ nyɨ, ŋgəʼ bɨrɨ nyɨ ɨgun ə bə̂d mbe nɨ yeʼ ɨgwɨ ə si ənɨ ə nyùmə̀ we nɨ mbɨ̀aŋgɨrə̀ cherə tad fə tə tàŋ!”