Ɨnû 5 - Meta’

Tɨ̀taanɨ njə̀m nɨ Wan njɨ̀g nyaʼa nɨŋ ə̀ŋwàʼnɨ̀ nɨ mbɨ karɨ

¹ Mə nyaʼa zə ə̀ŋwàʼnɨ̀ nɨ mbɨ karɨ ɨŋga əbɔ ə jɨgɨ məd we nɨ nyaʼa chub ɨgun ətən ɨfɔ̀n. Mbɨ nyaʼa ŋwàʼnɨ̀ ɨnû ɨgun ə̀ŋwàʼnɨ̀ ze ɨba jìm, kad ə̀ŋwàʼnɨ̀ ze sɨ neŋ ɨsɨ sambe.

² Mə nyaʼa bə̀ zə aŋgɨrə̀ kǎ kǎ mɔʼɔ, nɨ nyaʼə saʼ ənɨ gɨ̂ nɨ kǎ ni, “À kɨə we nɨ kuʼu nɨ tɨ̀ wɨ̀ kyeʼrɨ ɨneŋ we fiʼ ə̀ŋwàʼnɨ̀ ze nɨ mbɨ karɨ ə?”

³ Chəi wə̀d mɔʼɔ ɨkaŋ kɨ̀ ɨgwɨ ə si kɨ̀ əton ə si nɨ tɨ̀ wɨ̀ kə̀ʼ fìʼ ə̀ŋwàʼnɨ̀ ze kɨ̀ bè nèŋ ɨŋga.

⁴ Mə nyaʼa chweŋ mɨsɨ kwàʼ rɨŋgəʼ ɨmbə̀ʼ ɨghəm nɨ chəi wə̀d mɔʼɔ nɨ kəʼ kùʼ nɨ fiʼ ə̀ŋwàʼnɨ̀ ze kɨ̀ nɨ be nèŋ ɨŋga.

⁵ Wə̀d mɔʼɔ rəbɔʼ bə̂d kyeŋ mbe nyaʼa ghà ɨ num ni, “Tɨrə̀ chweŋ e mɨsɨ. Zə, Ŋgwàbaʼ we rɨŋga ɨnəbɨ Judà, nɨ yeʼ rɨ ənɨ əghaŋ Ɨfɔ̂n Dèvîd, fə baŋ mbi bə̂d pə̀n, əne ɨ we tɨ̀ wɨ̀ kyeʼrɨ ɨneŋ we ɨsɨ mbe sambe, fiʼ ə̀ŋwàʼnɨ̀ ze.”

⁶ Mə nyaʼa zə Wan njɨ̀g nɨ nyaʼa təm ɨŋga mɨgharə̀ ətən ɨfɔ̀n, ɨŋga mɨgharə̀ ɨghɨ mbe ɨkwè nɨ yeʼ ɨkǎ bə̀ təm əkaʼ bə̂d kyeŋ mbe. Zɨə chub ɨghabɨ ni mbɨ nyaʼa fə kyemɨ Wan njɨ̀g we, àyɨə ɨ zɨ i ɨkǎ. Zɨ̀ nyaʼa berɨ ndɔŋ sambe mbɨ əghə ə sambe. Əghə ze sambe yɨ ɨzwî mbe sambe nɨə fàʼ əmbɨ ə Ŋwiə̀, nɨ Ŋwìə̀ nyaʼa cha ɨŋga ɨsɨg jìm.

⁷ Wan njɨ̀g we nyaʼa wò nɨŋ ə̀ŋwàʼnɨ̀ ze rɨŋga əbɔ ə jɨgɨ məd we nɨ nyaʼa chub ɨgun ətən ɨfɔ̀n.

⁸ Ənɨ wɨ̀ nyaʼa nɨŋ ə̀ŋwàʼnɨ̀ ze, ɨghɨ mbe ɨkwè nɨ yeʼ ɨkǎ mbɨ ə bə̂d kyeŋ mbe ɨwum be chɔ̀b rɨkwè, nyaʼa gundɨ ə si ɨfě Wan njɨ̀g we. Wɨ mɔʼ mɔʼ rəbɔʼ mɨ̀mə̌d nyaʼa yim ɨnoŋɨ ngyi bə̀ yim ɨŋgupɨ ɨkaŋ nɨ mbɨ nyaʼa tekɨ ənɨ ə gôl. Ɨneŋ nyaʼa swi ɨŋga ɨŋgupɨ ɨkaŋ mbe. Ɨneŋ we yɨ ɨ̀kɔ̀ŋgɨ̀ bə̂d Ŋwiə̀.

⁹ Mbɨ nyaʼa kwerɨ ɨkyî fi ghà ni, “Àwɔ̀ ə kàŋ kùʼ nɨ nɨŋ ə̀ŋwàʼnɨ̀ ze, kyeʼrɨ mɨneŋ mbe, fiʼi, ɨmbə̀ʼ ɨghəm nɨ mbɨ nyaʼa kyem əwe, əne ənjìm ənəm ze nɨ à nyaʼa chəmnɨ, à fə choʼ bə̂d nàʼ əmbɨ ə Ŋwiə̀ rɨŋga mɨnəbɨ jìm, rɨŋga mɨŋgam jìm, rɨŋga ɨsɨ jìm bə̀ fɔrɨ rɨŋga ɨbeŋ jìm.

¹⁰ À fə ghɨ mɨ̀mə̌d ənɨ ə bə̂d mbàn ɨŋga e ənû ɨfɔ̀n, ɨmbə̀ʼ mbɨ faʼ əmbɨ à Ŋwiə̀. À fə bə̀ ghɨ̀ ni mbɨ tumbɨ si.”

¹¹ Mə nyaʼa wɨrɨ nèŋ əne zu gɨ̂ mbɨ̀aŋgɨrə̀ əkam mbɨ əkam fɔrɨ chuʼ mbɨ ə chuʼ. Mbɨ nyaʼa təm kad ətən ɨfɔ̀n ze, kad ɨghɨ mbe ɨkwè nɨ yeʼ ɨkǎ bə̀ kad bə̂d kyeŋ mbe.

¹² Ɨ mbɨə nyaʼə kwerɨ ɨkyî ənɨ ə gɨ̂ kǎ kǎ ghàə̀ ni, “Wan njɨ̀g we nɨ mbɨ nyaʼa kyemɨ ə kùʼ ni mbɨ naʼ ɨka, naʼ mbɔ̂n, naʼ ɨwe, naʼ ɨwumnɨ bə̀ naʼ ɨzeŋɨ zeŋɨ ɨ bɔ. Wɨ̀ bə̀ kùʼ ni mbɨ zɨ əbɔrəbɔd ɨgwɨ məd!”

¹³ Mə nyaʼa zu gɨ̂ ɨghɨjìm mbe nɨ Ŋwìə̀ nyaʼa tekɨ ɨkaŋ, tekɨ ɨgwɨ ə si, tekɨ əton ə si, tekɨ ɨŋga rɨ̀bàà. Mə nyaʼa bə̀ zu gɨ̂ ɨghɨjìm mbe nɨ yeʼ ɨŋga mɨ̀mə̌d. Ɨghɨ mbe mbɨə nyaʼə kwerɨ ɨkyî ghàə̀ ni, “Mbə̀ naʼ əbɔrəbɔd, nàʼ wumnɨ, yiirɨ bə̀ tìmbɨ̀ ɨka məd we nɨ chub ɨgun ətən ɨfɔ̀n. Mbə̀ bə ghɨ̀ əne ənɨ ə Wan njɨ̀g koŋ koŋ.”

¹⁴ Ɨghɨ mbe ɨkwè nɨ yeʼ ɨkǎ nyaʼa wììrɨ̀ ni, “À yɨ əne!” Bə̂d kyeŋ mbe nyaʼa gundɨ ə si wumnɨ ə Ŋwiə̀ bə̀ wumnɨ Wan njɨ̀g.