Ɨnû 4 - Meta’

Jɔ̌n nyaʼa zə rɨ̀taanɨ njə̀m nɨ mbɨə wumnɨ ə Ŋwiə̀ ɨkaŋ

¹ Ənɨ mə nyaʼa fə zə ɨnû mbɔ̂ jìm, mə nyaʼa neŋ ɨkaŋ, əne zə ɨchû nəb əfìʼə. Gɨ̂ ze nɨ mə̀ nyaʼa be zu nɨ nyaʼə ghàm ɨ num ɨghabɨ ə taŋ, nyaʼa ghà ni, “Kɔʼ yeʼe əgha. Ənɨ ɨnû mbɔ̂ fə che, mə bɨrɨ chwi ɨnû mbe nɨ berɨ ghɨ̀ ɨ ne.”

² Àmei əwu əwən, Əzwî ə nyaʼa nyɨ ɨŋga num, əne mə nyaʼa zə ətən ɨfɔ̀n ɨkaŋ, bə̀ zə wə̀d we nɨ nyaʼa chub ɨgun ətən ze.

³ Ɨnyod wə̀d we nɨ nyaʼa chub ɨgun ətən ɨfɔ̀n ze wɨə nyaʼə te ɨghabɨ ə jaspà bə̀ teə ɨghabɨ ə kaneliàn. Tə̀nàbə nɨ nyaʼa ɨghabɨ ə emeràl nyaʼa kad ətən ɨfɔ̀n ze.

⁴ Ɨtən ɨfɔ̀n cherə ɨwum be chɔ̀b rɨkwè nyaʼa kad ətən ɨfɔ̀n ze. Bə̂d kyeŋ ɨwum be chɔ̀b rɨkwè nyaʼa chub ɨgun ɨtən ɨfɔ̀n mbe. Mbɨ nyaʼa zɨ̀ ngywɨ̌ tɨ rɨ̀fɨ bə̀ zɨ̀ rɨdəm mɨfɔ̀n nɨ mbɨ nyaʼa tekɨ ənɨ gôl.

⁵ Ɨbi mbə̀ŋ wɨə nyaʼə ŋwàŋə̀, gɨ̂ rɨ mɔʼɔ ghàmə̀, mbə̀ŋ bə̀ kùmə̀ rɨ ənɨ ətən ɨfɔ̀n ze. Tɨbiŋ rɨkaʼi sambe tɨə nyaʼə berə ɨfě məd. Tɨbiŋ rɨkaʼi te yɨ ɨzwî mbe sambe nɨə fàʼ əmbɨ ə Ŋwiə̀.

⁶ Əghɨ ə mɔʼɔ zɨə nyaʼa ɨfě ətən ɨfɔ̀n ze ɨghabɨ rɨ̀bàà mɨ̀manèm nɨ tɨ̀ wə̀d zə ɨghɨ ənjìm, ɨchî nɨ mbɨə zə ənjìm ə kristal. Ɨghɨ mɔʼɔ ɨkwè nɨ yeʼ ɨkǎ, nyaʼa təm kad ətən ɨfɔ̀n ze ənɨ ɨba məd mbe ɨkwè. Əghə ə nyaʼa swi ɨgwɨ ɨghɨ mbe ɨfě bə̀ fɔrɨ ə njìm.

⁷ Əghɨ rɨtu ze nɨ yeʼ ɨkǎ zɨə nyaʼa ɨghabɨ ə ŋgwàbaʼ. Əze nɨ pe ənɨ mbɨ be zɨə nyaʼa ɨghabɨ ə rɨkun. Əze nɨ pe ənɨ mbɨ tad ə nyaʼa berɨ ɨfě ɨghabɨ wɨ wə̀d. Əze nɨ pe ənɨ mbɨ kwè zɨə nyaʼa ɨghabɨ ɨzam nɨə fìrə̀.

⁸ Ɨghɨ mbe ɨkwè ɨ mɔʼ mɔʼ nyaʼa berɨ tɨbabɨ̀ rɨ̀fuə. Əghə ə nyaʼa swi ɨgun bə̀ swi əton tɨbabɨ te. Ɨghɨ mbe mbɨə nyaʼə kwerɨ ɨkyî əziə mbɨ ɨzimɨ zɨ rɨ sob. Ɨ mbɨə nyaʼə kwerɨə ni, “Ə̀nùŋɨ̀sɨg Ŋwìə̀kɔʼ ə zeŋ, ə zeŋ, ə zeŋ. Məd yɨ we nɨ nyaʼa bei əŋgu, nɨ yeʼ əŋgu rɨ̀nîn, nɨ bɨrɨ wɨrɨ yeʼe!”

⁹ Ənɨ ɨghɨ mbe nɨ yeʼ ɨkǎ naʼ wumnɨ, yiirɨ bə̀ nàʼ məben-əwe əmbɨ məd we nɨ chub ɨgun ətən ɨfɔ̀n ze, nɨ wɨ̀ yeʼ ɨkǎ koŋ koŋ,

¹⁰ bə̂d kyeŋ mbe ɨwum be chɔ̀b rɨkwè gundɨ ə si ɨfě məd we nɨ chub ɨgun ətən ɨfɔ̀n, wumnɨ əməd we nɨ ten i koŋ. Mbɨ màʼrɨ̀ tə rɨdəm mɨfɔ̀n ə si ɨfě ətən ɨfɔ̀n ze, kwerɨ ɨkyî ghà ni,

¹¹ “Ə̀nùŋɨ̀sɨg à Ŋwìə̀, àwɔ̀ ə kùʼ ni wə̀d jìm yiirɨ əwe, nàʼ ɨwumnɨ ɨ ne bə̀ ghà ni à berɨ ɨka, ɨmbə̀ʼ ɨghəm nɨ à nyaʼa tekɨ ɨghɨjìm, ɨghɨjìm mbɨ əŋgu bə̀ yeʼ ɨkǎ ɨchî nɨ à nyaʼa kəbɨ.”