Ɨnû 3 - Meta’

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Sadìs

¹ Ə̀nùŋɨ̀sɨg nyaʼa bə̀ gha ɨ num ni: “Ŋwaʼnɨ əmbɨ aŋgɨrə̀ we ɨŋga ɨfetɨ bə̂d Kristo we rɨ ə Sadìs ni, 'Ɨŋgam wɔ̂ yɨ rɨ əmbɨ wə̀d we nɨ yɨm ɨzwî Ŋwiə̀ mbe sambe bə̀ yim rɨtəmɨ te sambe. Ɨ wɨə ghàə̀ ni, mə kyerɨ ɨnû mbe nɨ àwɔ̀ ə ghɨ̀ə̀: mə kyerɨ ni à wɨə ghɨ̀ ɨghabɨ ni à wɨə kɨrɨ ɨkǎ, àyɨə à fə kwɨ.

² Nɔʼ rɨ əŋgwenɨ, ghɨ̀ ni tɨ əghɨ ze nɨ buʼ ɨŋga ne ə kwɨ i, ɨmbə̀ʼ ɨghəm nɨ mə̀ fə zə ni chəi ɨnû mbe nɨ àwɔ̀ ə ghɨ̀ə̀ kɨrɨ bɔŋ màànɨ̀ ɨfě mɨ Ŋwiə̀.

³ Əne kɔndɨ ɨnû mbe nɨ mbɨ nyaʼa chwiə ɨ ne à zu. Beŋ e fîŋ, nùŋ ɨnû mbe. À mɨ ton nɔʼ e rɨ əŋgwenɨ, mə bɨrɨ yeʼe ɨghabɨ ɨjɨ. Chəi à bɨrɨ kyerɨ ə nyùmə̀ we nɨ mə̀ bɨrɨ yeʼe.

⁴ Àyɨə bə̂d mɔʼɔ rɨpiî mbɨ ə Sadìs nɨ chəi mbɨ kɨrɨ tab tə ngywɨ. Mbɨ bɨrɨ yen mbɨ num ɨŋga ngywɨ̌ tɨ rɨ̀fɨ, ɨmbə̀ʼ ɨghəm nɨ mbɨ kàŋ kùʼ nɨ ghɨ əne.

⁵ Wə̀d we nɨ baŋ ɨnû rɨbɔ̀ŋ bɨrɨ bɨ zɨ ngywɨ̌ tɨ rɨ̀fɨ ɨghabɨ mɨ̀mə̌d. Chəi mə̀ bɨrɨ nimnɨ ɨkum məd rɨŋga ə̀ŋwàʼnɨ̀ ze nɨ mbɨ ŋwaʼnɨ tɨkum bə̂d mbe nɨ bɨrɨ jɨg ɨ̀tènɨ̀. Mə bɨrɨ gha ɨfě mɨ Mbǎʼ bə̀ ghà ɨfě mbɨ̀aŋgɨrə̀ məd ni mə kyerɨ əməd.

⁶ Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghà əmbɨ rɨfetɨ bə̂d Kristo.'”

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Fìlàdelfià

⁷ Ə̀nùŋɨ̀sɨg nyaʼa bə̀ gha ɨ num ni, “Ŋwaʼnɨ əmbɨ aŋgɨrə̀ we nɨ yeʼ ɨŋga ɨfetɨ bə̂d Kristo we rɨ ə Fìlàdelfià ni, 'Ɨŋgam wɔ̂ yɨ rɨ əmbɨ wə̀d we nɨ zeŋɨ, nɨə bə̀ ghà rəsìʼ. Məd ə berɨ əfiʼ ze nɨ yeʼ əzɨ ɨfɔ̀n Dèvîd. Wɨ̀ mɨ fiʼ nəb, chəi wə̀d nɨ tɨ̀ wɨ̀ wùb. Wɨ̀ mɨ wùb nəb, chəi wə̀d nɨ tɨ̀ wɨ̀ fìʼ.

⁸ Mə kyerɨ ɨnû mbe nɨ àwɔ̀ ə ghɨ̀ə̀. Zə, mə fə fìʼ ɨchû nəb ɨ ne nɨ chəi wə̀d nɨ tɨ̀ wɨ̀ wùb. Mə kyerɨ ni e ɨka ə kə, àyɨə à fə ghɨ̀ ɨnû mbe nɨ mə̀ nyaʼa gha ɨ ne. Mə bə̀ kyerɨ ni chəi à ton əmɨ.

⁹ Zə, mə bɨrɨ ghɨ ni bə̂d mɨghab mbe nɨ yeʼ ɨŋga ɨfetɨ bə̂d Satàn yeʼe gundɨ ə si ənɨ e ɨfě, əne ben ni mə ghaʼ əwe. Mɨ̀mə̌d mbɨə ghàə̀ ni mbɨ yɨə mɨ̀Jû, àyɨə ka mbɨ yɨə mbɨwən.

¹⁰ Ɨchî nɨ à fə yim fîŋ nyìʼ ɨchî nɨ mə nyaʼa gha ɨ ne, mə bɨrɨ nəm əwe ənɨ ə nyùmə̀ we nɨ ŋgəʼ bɨrɨ yeʼe ɨgwɨ ɨsɨg jìm ɨmbə̀ʼ kwaʼnɨ bə̂d mbe nɨ yeʼ ɨgwɨ ə si.

¹¹ Mə bɨrɨ zambɨ yeʼe. Àwɔ̀ nuŋ fîŋ ɨgwɨ num, ɨmbə̀ʼ tɨ wə̀d mɔʼɔ fe i ɨneʼe we nɨ à berɨ.

¹² Mə bɨrɨ nuŋ wə̀d we nɨ baŋ ɨnû rɨbɔ̀ŋ ənɨ ə təʼ ɨŋga mbàn mɨ Ŋwìə̀. Chəi wɨ̀ bɨrɨ nɔ jwɨ rɨŋga mbàn ze. Mə bɨrɨ ŋwàʼnɨ̀ ɨkum mɨ Ŋwiə̀ ɨgwɨ məd, bə̀ ŋwàʼnɨ̀ ɨkum tɨ ənɨ əsɨ mɨ Ŋwiə̀. Əsɨ ze yɨə Jèrusalèm fi we nɨ Ŋwiə̀ ə swiə rɨkaŋ. Mə bɨrɨ bɨ ŋwàʼnɨ̀ mɨ ɨkum fi ɨgwɨ məd.

¹³ Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghàə̀ əmbɨ rɨfetɨ bə̂d Kristo.'”

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Laodisià

¹⁴ Ə̀nùŋɨ̀sɨg nyaʼa bə̀ ghà ɨ num ni, “Ŋwaʼnɨ əmbɨ aŋgɨrə̀ we nɨ yeʼ ɨŋga ɨfetɨ bə̂d Kristo we rɨ ə Laodisià ni, 'Wɔ̂ yɨ ɨŋgam rɨ əmbɨ À yɨ əne. Məd wɨə ghà rəsìʼ. Ɨ wɨə bə̀ ghɨ̀ ɨnû mbe nɨ wɨ̀ ghǎ. Ŋwìə̀ nyaʼa chè ənjìm məd tekɨ ɨghɨjìm.

¹⁵ Mə kyerɨ ɨnû mbe nɨ àwɔ̀ ə ghɨ̀ə̀. Chəi àwɔ̀ ə nòmə̀ kɨ̀ beə zwɨ̀ə̀. Mə kə̀b ni à nomə kɨ̀ ni à zwɨ ə!

¹⁶ Əne ɨchî nɨ à zabɨ, nɨ chəi àwɔ̀ ə nòmə̀ kɨ̀ zwɨ̀ə̀, mə bɨrɨ chwɨ əwe rɨŋga mɨ ɨchû.

¹⁷ À wɨə ghàə̀ ni, 'Mə yɨə wə̀d mbɔ̂n, mə berɨ ɨghɨ nɔnɔʼ, chəi mə kwaŋ əghɨ ə mɔʼɔ.' Àyɨə chəi à kyerɨ ni tə yɨə wə̀d ŋgəʼ, ni tə yɨə wə̀d nɨ bə̂d ə neŋə kə̀nə̀, ni tə yɨə wə̀d ɨkwaŋ, ni tə yɨ ɨfɨgɨ fɔrɨ ni tə wɨ rɨ̀sɔ̀ʼ ɨkyerɨ.

¹⁸ Əne mə wɨə kəərɨ əwe ni à zon ə gôl rɨ num, nɨ yeʼ ə gôl we nɨ mbɨ tɔn ɨŋga ɨwid chiʼ kwàʼ ɨchî chɔ̀m. À mɨ ghɨ̀ əne à bɨrɨ berɨ mbɔ̂n. Bə zon ngywɨ̌ rɨ̀fɨ zɨ̀, ɨmbə̀ʼ chɨ tɨ̀nìd ətu we nɨ bə̂d ə zəə ni à wɨ rɨ̀sɔ̀ʼ ɨkyerɨ. Zon ɨfuʼ əghə zɨ̀ ɨŋga e əghə ɨmbə̀ʼ à wɨrɨ zə ɨsɨ.

¹⁹ Mə wɨə ghàm əbɔʼ bə̂d mbe nɨ mə ghaʼi. Mə wɨə bə̀ chəə mbe nɨ mə ghaʼi. Əne, zə ni à zɨ ətu nɨ nòm, bə̀ zə ni à bèŋ e fîŋ.

²⁰ Zə, mə təm ɨchû nəb ɨ goŋgɨ, wə̀d mɔʼɔ mɨ zu mɨ gɨ̂, fiʼ ɨchû nəb, mə bɨrɨ nyɨ ɨŋga nəb tɨ̀ jɨg ɨnɔ̂n.

²¹ Mə bɨrɨ ben ni wə̀d we nɨ baŋ ɨnû rɨbɔ̀ŋ chub ɨgun ətən ɨfɔ̀n ɨban num, àmei ɨchî nɨ mə̀ nyaʼa bə baŋ mbɨ bə̂d pə̀n əne chub ɨban mɨ Mbǎʼ ɨgun ətən ɨfɔ̀n əməd.

²² Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghà əmbɨ rɨfetɨ bə̂d Kristo.'”