Ɨnû 11 - Meta’

Tɨ̀taanɨ njə̀m ɨmbə̀ʼ mɨ̀zərɨmbin mɨbe

¹ Mbɨ nyaʼa nàʼ əmɨgɨ ɨ num nɨ nyaʼa ɨghabɨ ə mbàŋ. Mbɨ nyaʼa nàʼ əne ghà ɨ num ni, “Ndə̀ wo mɨ̀g mbàn Ŋwìə̀ ɨgwɨ ə si bə̀ mɨ̀g ɨkwi ɨjə̀ŋ ə̀fààrɨ̀, bə̀ taŋ bə̂d mbe nɨə wumnɨ ə Ŋwiə̀ ɨŋga mbàn ze.

² Àyɨə tɨrə̀ mɨ̀g e ɨkye ɨkam we nɨ kad mbàn ze, ɨmbə̀ʼ ɨghəm nɨ mbɨ fə nàʼ əmbɨ ə bə̂d mbe nɨ kaʼi mɨ̀Jû. Mbɨ bɨrɨ təʼrɨ əsɨ ə zeŋɨ əmɨg ɨwum kwè chɔ̀b rɨ̀be.

³ Mə bɨrɨ naʼ ɨka əmbɨ mbɨ mɨ̀zərɨmbin mɨbe nɨ zɨ tɨkurɨ ɨdì, ni mbɨ wò ghà ɨkə̂n we nɨ mə̀ ghà əmbɨ mɨ̀mə̌d ɨni chuʼ fibɨ̀ mbɨ əkɨ əbe mbɨ ɨwum rɨ̀fuə.”

⁴ Mɨ̀zərɨmbin mbɔ̂ mɨbe yɨ ɨzed olìf mbe be mbɨ ɨtən mbe be nɨ mbɨə te ɨnam ɨgun. Ɨtən mbe mbɨ ɨfě Ə̀nùŋɨ̀sɨg rɨ ɨgwɨ ə si.

⁵ Wə̀d mɔʼɔ mɨ kəb ghɨ əghəm ənɨ mɨ̀mə̌d, ɨwid jwɨ̀ rɨŋga ɨchû mɨ̀mə̌d nimnɨ bə̂d pə̀n mɨ̀mə̌d. À yɨ ənɨ ɨkwɨ ɨchî wɔ̂ nɨ mbɨ bɨrɨ zwiirɨ wə̀d mɔʼɔ we nɨə kə̀b ghɨ əghəm ənɨ mɨ̀mə̌d.

⁶ Mbɨ berɨ ɨka nɨ wub əton ɨkaŋ ɨmbə̀ʼ tɨ mbə̀ŋ nɔ i ənɨ ə nyùmə̀ we nɨ mɨ̀mə̌d ə ghà ɨkə̂n Ŋwiə̀. Mbɨ berɨ ɨka nɨ beŋ mɨnib ənɨ ənəm, bə̀ berɨ ɨka nɨ ghɨ̀ ni tɨkwɨrɨ ŋgəʼ kǎ kǎ jìm yeʼe ɨgwɨ ə si ənɨ mɨ̀nyùmə̀ jìm mbe nɨ mbɨ kəbɨ.

⁷ Ənɨ mbɨ fə maanɨ nɨ gha ɨkə̂n we, nyam kyeŋ ze nɨ kɔʼ rɨŋga ɨbɨgɨ we nɨ chəi ɨnwǐ bɨrɨ maʼ bid mbɨ mɨ̀mə̌d, baŋ mɨ̀mə̌d əne zwiirɨ mɨ̀mə̌d.

⁸ Ɨvɨ mɨ̀mə̌d bɨrɨ nokɨ ɨgun ɨnə̂njɨ̀ ɨŋga əbeŋ ə kyeŋ ze nɨ mbɨ nyaʼa kombɨ Ə̀nùŋɨ̀sɨg mɨ̀mə̌d əzed ə baʼnɨ. Bə̂d mbɨə tɔŋ əsɨ ze ənɨ ɨnə̂njɨ̀ cherə ni Sodòm fɔrɨ ə Ɨjìpt.

⁹ Bə̂d rɨŋga ɨsɨ jìm, rɨŋga mɨnəbɨ jìm, bə̂d nɨə ghàm tɨkwɨrɨ ɨŋgam əbeŋ jìm mbɨ ə bə̂d rɨŋga ɨbeŋ jìm bɨrɨ toŋ ɨghə ɨgwɨ ɨvɨ mɨ̀mə̌d ɨni tad rɨ əbà. Chəi mbɨ bɨrɨ ben ni mbɨ tweŋ ɨvɨ mɨ̀mə̌d.

¹⁰ Ɨghaʼi bɨrɨ swi ɨŋga fîŋ bə̂d mbe nɨə chub ɨgwɨ ə si, ɨmbə̀ʼ ɨghəm nɨ mɨ̀zərɨmbin mbe fə kwɨ. Mbɨ bɨrɨ chaanɨ mɨneʼe mbənə mbənə bə̀ ghɨ̀ ɨghaʼi ɨmbə̀ʼ ɨghəm nɨ bə̂d ɨ̀kə̀n mbɔ̂ mɨbe mbɨə nyaʼə chə ə bə̂d rɨ ɨgwɨ ə si.

¹¹ Ənɨ ɨni mbe tad rɨ əbà nyaʼa fə chě, Ŋwìə̀ nyaʼa chà əzwî nɨə nàʼ ɨ̀tènɨ̀. Zɨə nyaʼa yeʼe nyɨ ɨŋga mɨ̀mə̌d, əne ɨvɨ bə̂d mbe nyaʼa nɔ̀ʼ təm rətiə. Ɨfeŋɨ nyaʼa yim bə̂d mbe nɨ nyaʼa zə mɨ̀mə̌d.

¹² Əne bə̂d ɨ̀kə̀n mbɔ̂ mɨ̀be nyaʼa zu gɨ̂ kǎ kǎ nɨ nyaʼa ghàm rɨkaŋ ghàə̀ əmbɨ mɨ̀mə̌d ni, “Mbə̀ kɔʼ yeʼe əgha!” Ənɨ bə̂d pə̀n mɨ̀mə̌d nyaʼə nèŋə̀, mbɨ nyaʼa wo ɨkaŋ ɨŋga pàʼ.

¹³ Àmei ənɨ ə nyùmə̀ we, si nyaʼa wùd kwàʼ rɨ̀kǎ, əba ə fibɨ̀ ənɨ mbɨ ghapɨ nəb te rɨŋga əsɨ ze ɨsɨ wum nyaʼa buʼə. Si ze nyaʼa wùd əne, zwiirɨ bə̂d chuʼ sambe. Ə̀bùʼ ə bə̂d ə nyaʼa bɔ kwàʼ rɨŋgəʼ, əne mbɨ nyaʼa nàʼ ɨwumnɨ əmbɨ ə Ŋwìə̀ we nɨ yeʼ ɨkaŋ.

¹⁴ Ŋgəʼ kǎ kǎ ze nɨ pe ənɨ tɨ rɨbe fə chè i, àyɨə ze nɨ pe ənɨ tɨ rɨtad bɨrɨ zambɨ yeʼe.

Tɨ̀taanɨ njə̀m ɨmbə̀ʼ aŋgɨrə̀ we nɨ pe ənɨ mbɨ sambe

¹⁵ Aŋgɨrə̀ we nɨ pe ənɨ mbɨ sambe nyaʼa fə i tàŋ, əne gɨ̂ rɨ kǎ kǎ mɔʼɔ tɨə nyaʼə gham rɨkaŋ ghàə̀ ni, “Ənû ɨfɔ̀n rɨ ɨgwɨ ɨsɨg fə bèŋ sɨ ənû ɨfɔ̀n a Ə̀nùŋɨ̀sɨg mbɨ əzɨ wə̀d məd we nɨ wɨ̀ zɔʼɔ. Əne məd bɨrɨ tumbɨ ɨsɨg koŋ koŋ.”

¹⁶ Bə̂d kyeŋ mbe ɨwum be chɔ̀b rɨ̀kwè nɨə chub ɨgun ɨtən ɨfɔ̀n ɨfě Ŋwiə̀ nyaʼa gù nòkɨ̀ ə si rəkubə wumnɨ ə Ŋwiə̀.

¹⁷ Ɨ mbɨə nyaʼə wumnɨə ghàə̀ ni, “Tɨ̀ nàʼ məben-əwe ɨ ne, àwɔ̀ Ə̀nùŋɨ̀sɨg Ŋwìə̀kɔʼ, we nɨ yeʼ tɨ̀nîn, nɨ nyaʼa be i əŋgu, ni à fə nɨŋ e ɨka kyeŋ əne à fə kɔ tumbɨ ɨsɨg.

¹⁸ Bə̂d nɨ kaʼi mɨ̀Jû nyaʼa sə ɨtəm kwàʼ rɨŋgəʼ, àyɨə nyùmə̀ we nɨ àwɔ̀ bɨrɨ chə mɨ̀mə̌d fə yeʼe. Nyùmə̀ fə kùʼi nɨ à bɨrɨ saʼ ɨvɨ bə̂d, nɨ à bɨrɨ naʼ ɨchɔʼ ə̀fàʼì əmbɨ mbe bə̂d ə̀fàʼì, əmbɨ mbe bə̂d ɨ̀kə̀n, əmbɨ mbe bə̂d fɔrɨ əmbɨ ə bə̂d mɨ̀jìm mbe nɨə wumnɨ əwe, əne yɨ mbɨ kwa mbɨ mbɨ kyeŋ. Nyùmə̀ fə kùʼi nɨ à bɨrɨ nimnɨ bə̂d mbe nɨə chə̀kɨ̀ ə si.”

¹⁹ Mbɨ nyaʼa fiʼ mbàn Ŋwìə̀ ze nɨ yeʼ ɨkaŋ, əne bə̂d nyaʼa zə tɨkub ə fɨso ze ɨŋga. Ɨbi mbə̀ŋ wɨə nyaʼə ŋwàŋə̀, gɨ̂ rɨ ghàmə̀, mbə̀ŋ kùmə̀, si wùd, əwəŋ ə feŋgɨ kwàʼ rɨ̀kǎ.