Ɨnû 10 - Meta’

Tɨ̀taanɨ njə̀m ɨmbə̀ʼ aŋgɨrə̀ nɨ nyaʼa yim Ə̀ŋwàʼnɨ̀ ə Kwa Kwa nɨ mbɨ karɨ

¹ Mə nyaʼa zə aŋgɨrə̀ cherə nɨ berɨ ɨka nɨ nyaʼə swiʼə rɨkaŋ yeʼe. Ngywɨ̌ aŋgɨrə̀ we yɨə nyaʼə pàʼ. Tə̀nàbə nyaʼa kad ətu əməd. Ɨfě məd wɨə nyaʼə te ɨchî nɨ nyùmə̀ ə teə. Ɨwu məd mbɨə nyaʼa ɨghabɨ ə təʼ nɨə berɨə ɨchî nɨ ɨwid ə berɨə.

² Wɨ̀ nyaʼa yim ə̀ŋwàʼnɨ̀ ə kwa kwa nɨ mbɨə karɨə, àyɨə chəi mbɨ nyaʼa kad əze nɨ wɨ̀ nyaʼa yimɨ. Wɨ̀ nyaʼa te əwu ə jɨgɨ ɨgun rɨ̀bàà bə̀ te əwu ə tweŋ ɨgun ə si.

³ Wɨ̀ nyaʼa kyeŋ ənɨ gɨ̂ kǎ kǎ ɨchî nɨ ŋgwàbaʼ ə zùʼə̀. Ənɨ wɨ̀ nyaʼa kyeŋ əne, mbə̀ŋ nyaʼa kùm ɨghəm sambe.

⁴ Ənɨ mbə̀ŋ ze nyaʼa kum ɨghəm sambe, mə nyaʼa nɨrə ŋwàʼnɨ̀ ɨnû mbe nɨ mbə̀ŋ ze nyaʼa kumɨ ghà ɨ num, àyɨə mə nyaʼa zu gɨ̂ nɨ nyaʼa ghàm rɨkaŋ ghà ni, “Tɨrə̀ tɔ ghà e ənû ze nɨ mbə̀ŋ kum ɨghəm sambe ghà ɨ ne. Tɨrə̀ bɨ tɔ ŋwàʼnɨ̀ e ə si.”

⁵ Aŋgɨrə̀ we nɨ mə nyaʼa zə nɨ nyaʼa təm ɨgun rɨ̀bàà bə̀ təm ɨgun ə si nyaʼa nɔ̀ e əbɔ ə jɨgɨ ɨkaŋ

⁶ əne kàn ənɨ ɨkum məd we nɨ ten i koŋ, nɨ à yɨə məd nyaʼa tekɨ ɨkaŋ bə̀ tekɨ ɨghɨjìm mbe nɨ yeʼ ɨkaŋ, tekɨ si bə̀ tekɨ ɨghɨjìm mbe nɨ yeʼ ɨgwɨ ə si, tekɨ rɨ̀bàà bə̀ tekɨ ɨghɨjìm mbe nɨ yeʼ ɨŋga rɨ̀bàà. Wɨ̀ nyaʼa kàn ghà ni, “Chəi Ŋwìə̀ bɨrɨ wɨrɨ wòm.

⁷ Àyɨə ənɨ aŋgɨrə̀ we nɨ pe ənɨ mbɨ sambe fə i taŋ, Ŋwiə̀ bɨrɨ ghɨ ɨnû mbe nɨ yeʼ ənə̀mə, ɨchî nɨ wɨ̀ nyaʼa fə ghǎ əmbɨ mbi bə̂d ə̀fàʼì mbe nɨ yeʼ bə̂d ɨ̀kə̀n ɨməd.”

⁸ Ənɨ wɨ̀ nyaʼa gham əne, gɨ̂ ze nɨ mə nyaʼa zu rɨkaŋ nyaʼa wɨrɨ ghàm ɨ num ghà ni, “Ndə̀ wo nɨŋ ə̀ŋwàʼnɨ̀ ze nɨ yeʼ əfìʼə tɨ ɨkye əbɔ aŋgɨrə̀ we nɨ təm ɨgun rɨ̀bàà bə̀ təm ɨgun ə si.”

⁹ Əne mə nyaʼa wò əsɨ aŋgɨrə̀ we pè ghà ɨ bɔ ni wɨ̀ naʼ ə̀ŋwàʼnɨ̀ ə kwa kwa ze ɨ num. Wɨ̀ nyaʼa ghà ɨ num ni, “Nɨŋ kud, wən bɨrɨ nə̀m ɨŋga e ɨchû ɨghabɨ ə ju, àyɨə wən bɨrɨ bèŋ fe ɨbum.”

¹⁰ Mə nyaʼa nɨŋ ə̀ŋwàʼnɨ̀ ə kwa kwa ze rɨ ɨkye əbɔ aŋgɨrə̀ we kud. Wən nyaʼa nə̀m ɨghabɨ ə ju ɨŋga mɨ ɨchû, àyɨə ənɨ mə̀ nyaʼa fə kurɨ, wən nyaʼa bèŋ fum ɨbum.

¹¹ Mbɨ nyaʼa ghà ɨ num ni, “À berɨ wɨrɨ gha ɨkə̂n Ŋwiə̀ ɨmbə̀ʼ ənû ze nɨ wɨ̀ kàʼi əmbɨ ə bə̂d mɨ̀nɔnɔʼ, əmbɨ ə bə̂d ɨŋga ɨbeŋ nɔnɔʼ, əmbɨ ə bə̂d nɨə ghàm mɨŋgam jìm bə̀ ghà əmbɨ mɨ̀fɔ̀n.”