Ɨ̀fàʼì 22 - Meta’

¹ “Mbɨ bɔŋgɔb mbɨ mbɨ mɨ̀mbǎʼ, mbə̀ zwetɨ ənû ze nɨ mə̀ bɨrɨ gha ɨfě nən ɨmbə̀ʼ chɨ ɨnû rɨ ɨgwɨ num.”

² Ənɨ mbɨ nyaʼa zu ənɨ wɨ̀ nyaʼə ghàm əmbɨ mɨ̀mə̌d ənɨ ɨŋgam Hibrù, mbɨ nyaʼa wɨrɨ yi jeŋgɨ kəm rəziə. Əne wɨ̀ nyaʼa ghà ni,

³ “Mɔ̌ yɨə Jû. Mbɨ nyaʼa gywɨ əmɨ ə Tasùs ə Selisià. Mə nyaʼa kwi əgha ə Jèrusalèm bə̀ kwembɨ ə̀ŋwàʼnɨ̀ əton ə Gàmalièl. Mə nyaʼa kwembɨ rɨkə te nɨ mbɨ nyaʼa naʼ əmbɨ mba mɨ̀mbǎʼ rəŋwe. Mə wɨə nyaʼə bə̀ zɨ̀ ətu ənɨ ə̀fàʼì ə Ŋwiə̀ ɨchî nɨ mbə̀n mɨjìm ə zɨ̀ rə̀chɔ̀ŋ.

⁴ Mə wɨə nyaʼə nwèndɨ̀ rɨkyerɨ-ɨwu bə̂d mbe nɨ nyaʼə beenɨ əbɔʼ Ɨnə̂njɨ̀ wɔ̂ nɨ Kristo nyaʼə chwiə. Mə wɨə nyaʼə zwiirɨə mbɨ mɔʼɔ. Mə wɨə nyaʼə gywɨ̀ə̀ mbaŋə̀ mbɨ məyi korə wò nàʼə̀ ni mbɨ zɨ ə ndəŋ.

⁵ Ətu ɨgwɨ ə bə̂d mbàn Ŋwìə̀ mbɨ mə̀saʼ əbeŋ mɨjìm mbe tɨ mbɨ ben ni ənû zɔ̂ nɨ mɨə ghà ɨ nən yɨ ənû rəsìʼ. Mə nyaʼa nɨŋ ɨ̀ŋwàʼnɨ̀ rɨ əmbɨ mɨ̀mə̌d ɨ wò nàʼ əmbɨ mɨ̀Jû mbe nɨ nyaʼa ə Dàmaskɔ̀s. Əne mə nyaʼa wò əŋgu ɨmbə̀ʼ gywɨ bə̂d Kristo, kod nɨŋ yeʼe ə Jèrusalèm ɨmbə̀ʼ mbɨ chə mɨ̀mə̌d.

Pɔ̂l ghà ɨchî nɨ Kristo nyaʼa beŋ əwi

⁶ “À nyaʼa ɨghabɨ əzi ə ka, ənɨ mə nyaʼə sɨə tiinɨ ə Dàmaskɔ̀s, ɨzeŋɨ zeŋɨ kyeŋ nɨ nyaʼa rɨkaŋ nyaʼa sàʼ te kad əmɨ.

⁷ Mə nyaʼa feŋ ə si, əne zu gɨ̂ nɨ nyaʼa biirɨ ɨ num ni, 'Sɔ̂l, Sɔ̂l, à kɨə nwèndɨ̀ tum rɨkyerɨ-ɨwu ɨmbə̀ʼ ə yè ə?'

⁸ Mə nyaʼa biirɨ ni, 'Àwɔ̀ kɨə we Ə̀nùŋɨ̀sɨg ə?' Wɨ̀ nyaʼa wììrɨ̀ ɨ num ni, 'Mɔ̌ yɨə Yeso we rɨ ə Nazàret, nɨ àwɔ̀ ə nwèndɨ̀ rɨkyerɨ-ɨwu məd.'

⁹ Mbaŋə̀ te nɨ nyaʼa mbɨ num, nyaʼa zə ɨzeŋɨ zeŋɨ we, àyɨə chəi mbɨ nyaʼa zu gɨ̂ ze nɨ nyaʼa gham ɨ num.

¹⁰ Mə nyaʼa biirɨ ni, 'Mə ghɨ ye Ə̀nùŋɨ̀sɨg ə?' Ə̀nùŋɨ̀sɨg nyaʼa ghà ɨ num ni, 'Nɔʼ rətiə, wò nyɨ ə Dàmaskɔ̀s. À mɨ pè əŋgu, wə̀d mɔʼɔ bɨrɨ gha ənû ze nɨ Ŋwiə̀ chɔʼ əwe ni à faʼ ɨ bɔ.'

¹¹ Chəi ənɨ tɨ̀ mə nyaʼa zə ɨsɨ ɨmbə̀ʼ ɨzeŋɨ zeŋɨ we, əne mbaŋə̀ te nɨ nyaʼə yènə̀ mbɨ num nyaʼa yim mɨ əbɔ tɨ̀ wò nyɨ ə Dàmaskɔ̀s.

¹² “Mbaŋə̀ mɔʼɔ zɨə nyaʼə əŋgu nɨ ɨkum məd nyaʼə Ànàniàs. Ɨ wɨə nyaʼə nùŋ i fîŋ ɨgun ə Ŋwiə̀. Ɨ wɨə nyaʼə bə̀ nùŋə̀ tɨkə rɨ Mose. Mɨ̀Jû mɨ̀jìm mbɨə nyaʼə ghà ɨnû chɔ̀m ɨmbə̀ʼ əməd.

¹³ Wɨ̀ nyaʼa yeʼe əsɨ num, pè təm ɨban num, ghà ni, 'Aŋgɔb Sɔ̂l, wɨrɨ kɔ zə ɨsɨ.' Àmei əwu əwən, mə nyaʼa wɨrɨ kɔ zə ɨsɨ, əne mə nyaʼa zə əməd.

¹⁴ Wɨ̀ nyaʼa ghà ni, 'Ŋwìə̀ mba mɨ̀mbǎʼ rəŋwe fə chɔʼ əwe ni à kyerɨ ɨnû mbe nɨ wɨ̀ kə̀bɨ, ni à zə Wə̀d məd we nɨə ghɨ̀ ɨnû nɨ kùʼnɨ̀ mbɨ ni à zu ɨŋgam rɨ ɨchû məd,

¹⁵ ɨmbə̀ʼ ɨghəm nɨ à bɨrɨ gha ɨnû jìm mbe nɨ à fə zə bə̀ zu ɨmbə̀ʼ əməd əmbɨ ə bə̂d mɨjìm.

¹⁶ Əne tɨ̀nîn à kɨə wòm ə ye ə? Nɔʼ rətiə, nɨŋ mɨnib, kɔ̀ŋgɨ̀ Ə̀nùŋɨ̀sɨg ɨmbə̀ʼ wɨ̀ so mbe ɨnû rɨbɔ̀ŋ.'

¹⁷ “Mə nyaʼa bə̀ndɨ̀ wo ə Jèrusalèm. Ənɨ mə̀ nyaʼə kɔ̀ŋgɨ̀ ə Ŋwiə̀ ɨŋga mbàn Ŋwìə̀, tɨ̀taanɨ njə̀m nyaʼa chè əmɨ

¹⁸ mə zə Ə̀nùŋɨ̀sɨg nɨ nyaʼa gha ɨ num ni, 'Zambɨ ghɨ̀, nɔ̀ʼ rɨ ə Jèrusalèm əmad əmad, ɨmbə̀ʼ ɨghəm nɨ chəi bə̂d mbe rəŋgu bɨrɨ ben ɨnû mbe nɨ àwɔ̀ ə ghà ɨmbə̀ʼ əmɨ.'

¹⁹ Mə nyaʼa wììrɨ̀ ni, 'Ə̀nùŋɨ̀sɨg, mbɨ kàŋ kyerɨ ni mə wɨə nyaʼə wò ɨŋga nəb tɨ ə̀kàtɨ̀ rɨjìm ɨmbə̀ʼ gywɨ bə̂d zɨ ə ndəŋ bə̀ som mbe nɨ ben əwe.

²⁰ Ənɨ mbɨ nyaʼə zwiirɨ ə Stɨfɨ̀n we nɨ nyaʼə ghà ɨnû ɨmbə̀ʼ əwe, mə nyaʼa təm ɨban ben ni mbɨ zwiirɨ əməd. Mə wɨə nyaʼə nəŋgɨə ngywɨ̌ rɨ bə̂d mbe nɨ nyaʼa zwiirɨ əməd.'

²¹ Ə̀nùŋɨ̀sɨg nyaʼa ghà ɨ num ni, 'Ndə̀, ɨmbə̀ʼ ɨghəm nɨ mə bɨrɨ cha əwe əsa əgha əsɨ ə bə̂d mbe nɨ kaʼi mɨ̀Jû.'”

²² Bə̂d mbe mbɨə nyaʼə zwetɨ ɨŋgam Pɔ̂l yeʼe pè ənɨ wɨ̀ nyaʼa gha ɨŋgam wɔ̂. Əne mbɨ nyaʼa kɔ kyeŋ rɨ̀kǎ ghà ni, “Mbə̀ nimnɨ mbaŋə̀ zɔ̂ rɨŋga ɨsɨg! Wɨ̀ rɨka kuʼi nɨ wɨrɨ chub ɨkǎ!”

²³ Ənɨ mbɨ nyaʼə kyeŋ əne, ŋwìə̀ tə ngywɨ̌ bə̀ sab əgywɨ ɨŋga ɨfə,

²⁴ ətu ə kyeŋ ɨgwɨ mɨ̀sɔgyɨ̀ nyaʼa ghà ni mɨ̀sɔgyɨ̀ nɨŋ əməd wò ɨŋga ɨkam mɨ̀mə̌d, pè te əməd ənɨ ə ŋgwad ɨmbə̀ʼ jeŋgɨ nwèndɨ̀ əton nɨ bə̂d mbe nyaʼə kyeŋ ɨgwɨ ətu əməd.

²⁵ Àyɨə ənɨ mbɨ nyaʼa kod əməd ənɨ mɨniʼ, wɨ̀ nyaʼa ghà əmbɨ ətu ɨgwɨ mɨ̀sɔgyɨ̀ ɨkɨ fibɨ̀ nɨ nyaʼa təm ɨban ni, “Tɨkə ə wa chwiə ni mbə̀ te wə̀d Rom ənɨ ə ŋgwad nɨ chəi mbɨ sob ɨsaʼi ni wɨ̀ fə gù ə?”

²⁶ Ənɨ ətu ɨgwɨ mɨ̀sɔgyɨ̀ ɨkɨ fibɨ̀ we nyaʼa zu ənû ze, wɨ̀ nyaʼa wò əsɨ ətu ə kyeŋ ɨgwɨ mɨ̀sɔgyɨ̀ pè biirɨ ɨ bɔ ni, “À kɨə kəb ghɨ ye ə? Kyerɨ ni mbaŋə̀ zɔ̂ yɨə wə̀d Rom.”

²⁷ Əne ətu ə kyeŋ ɨgwɨ mɨ̀sɔgyɨ̀ nyaʼa wò biirɨ əmbɨ Pɔ̂l ni, “Gha ɨ num, àwɔ̀ kɨə wə̀d Rom ə?” Pɔ̂l nyaʼa wììrɨ̀ ni, “Ee.”

²⁸ Ətu ə kyeŋ ɨgwɨ mɨ̀sɔgyɨ̀ nyaʼa ghà ni, “Mə nyaʼa zon ənû nɨ yeʼ wə̀d Rom ənɨ ɨkab nɔnɔʼ.” Pɔ̂l nyaʼa wììrɨ̀ ɨ bɔ ni, “Mɔ̌ yɨə wan top si Rom.”

²⁹ Əne mbaŋə̀ te nɨ nyaʼə kə̀b nwèndɨ̀ ə Pɔ̂l nyaʼa wɨrɨ sùŋgɨ̀ rə̀bɔ̀ʼɔ̀ əwu əwən. Ətu ə kyeŋ ɨgwɨ mɨ̀sɔgyɨ̀ nyaʼa bə̀ bɔ, ɨmbə̀ʼ ɨghəm nɨ wɨ̀ nyaʼa zə ni tə fə kod ə Pɔ̂l nɨ yeʼ wə̀d Rom.

Pɔ̂l nyaʼa təm ɨfě mə̀saʼ əbeŋ

³⁰ Ətu ə kyeŋ ɨgwɨ mɨ̀sɔgyɨ̀ nyaʼə kə̀b kyerɨ əton nɨ mɨ̀Jû mbe nyaʼa zɨ ɨsaʼi ɨgwɨ ə Pɔ̂l. Əne à nyaʼa əni ze nɨ beenɨ, wɨ̀ nyaʼa ghà mbɨ zà ə Pɔ̂l, ghà əmbɨ ə bə̂d kyeŋ mbe rɨ ə mbàn Ŋwìə̀ bə̀ ghà əmbɨ mə̀saʼ əbeŋ mɨjìm ni mbɨ yeʼe bòmnɨ̀. Əne wɨ̀ nyaʼa nɨŋ ə Pɔ̂l nùŋ ɨfě mɨ̀mə̌d.