Ɨ̀fàʼì 16 - Meta’

Timotì nyaʼa fɔtɨ əbɔʼ ə Pɔ̂l mbɨ Sailàs

¹ Pɔ̂l mbɨ Sailàs nyaʼa wò pè ə Də̂be fɔrɨ ə Listrà. Mbaŋə̀ mɔʼɔ nɨ nyaʼa ben ə Kristo wɨə nyaʼa əŋgu nɨ ɨkum məd nyaʼə Timotì. Ɨŋgɔb məd yɨə nyaʼə əyi Jû nɨ nyaʼa ben ə Kristo, àyɨə mbǎʼ məd yɨə nyaʼə wə̀d rɨ ə Gris.

² Bə̂d mbe nɨ nyaʼa ben ə Kristo ə Listrà fɔrɨ ə Ikoniùm mbɨə nyaʼə ghà ɨnû chɔ̀m ɨmbə̀ʼ ə Timotì.

³ Pɔ̂l nyaʼa kə̀b ni njɨ tə nɨŋ ə Timotì mbə wò ɨnɔ̂n. Əne wɨ̀ nyaʼa ne əməd ɨmbə̀ʼ ɨghəm nɨ mɨ̀Jû mɨ̀jìm mbe nɨ nyaʼa ɨŋga ɨsɨ mbe nyaʼa kyerɨ ni mbǎʼ məd yɨ rɨ ə Gris.

⁴ Ɨchî nɨ mbɨ nyaʼə yèn ɨsɨ ɨsɨ, mbɨ nyaʼə yènə̀ ghàə̀ tɨkə te nɨ bə̂d tom mbɨ ə bə̂d mbe nɨ nyaʼə chà ɨfetɨ we rɨ ə Jèrusalèm nyaʼa ben ni mbɨ nuŋ ə. Mbɨ nyaʼa ghà əmbɨ mɨ̀mə̌d ni mbɨ nuŋ tɨkə te rɨjìm.

⁵ Əze ə nyaʼa ghɨ̀ ni bə̂d rɨŋga tɨfetɨ bə̂d Kristo berɨ ɨbenɨ nɨ kaanɨ. Ɨnun bə̂d mbe nɨ nyaʼa ben ə Kristo wɨə nyaʼə nɔʼrɨə wò ɨmbì ɨni jìm.

Tɨ̀taanɨ njə̀m nyaʼa chè ə Pɔ̂l ə Troàs

⁶ Pɔ̂l mbɨ Sailàs fɔrɨ ə Timotì nyaʼa wò chè ə Frigìà nɨ nyaʼa ɨŋga əbà əbeŋ ze rɨ ə Gàlesià. Chəi Əzwî ə Zeŋɨ ə nyaʼa ben ni mbɨ ghà ɨŋgam Ŋwiə̀ ə Esià.

⁷ Ənɨ mbɨ nyaʼə sɨə wò pe ə Misià, mbɨ nyaʼa kəb ni njɨ mbə wo nyɨ ə Bitinià, àyɨə chəi Əzwî ə Yeso ə nyaʼa ben ni mbɨ wo nyɨ ɨŋga əbà əbeŋ ze.

⁸ Əne mbɨ nyaʼa wò chè ə Misià, swiʼi wò ə Troàs.

⁹ À nyaʼa ɨzimɨ we, tɨ̀taanɨ njə̀m nyaʼa chè ə Pɔ̂l, wɨ̀ zə mbaŋə̀ mɔʼɔ rɨ ə Màsèdonià nɨ nyaʼa təm buʼ ɨbɔ ɨ bɔ ghà ni, “Baanɨ yeʼe weerɨ əwa ə Màsèdonià.”

¹⁰ Ənɨ Pɔ̂l nyaʼa zə tɨ̀taanɨ njə̀m ze, tɨ̀ nyaʼa tekɨ ɨnyod əwu əwən ɨ wo ə Màsèdonià, ɨmbə̀ʼ ɨghəm nɨ tɨ̀ nyaʼa kyerɨ ni Ŋwìə̀ fə tɔŋ əwa ni tɨ̀ wo ghà ɨkə̂n chɔ̀m əmbɨ ə bə̂d mbe rəŋgu.

Lidià we rɨ ə Filipì nyaʼa beŋ i fîŋ ben ə Kristo

¹¹ Tɨ̀ nyaʼa nyɨ əbaŋ ɨgyɨ̀ ə Troàs, baanɨ zɨ rɨ bɨ̀gə̀, wò pè ə Samotràs nɨ nyaʼa əsɨ ɨŋga mɨgharə̀ ə sà. À nyaʼa əni ze nɨ beenɨ, tɨ̀ nyaʼa nyɨ əbaŋ ɨgyɨ̀ baanɨ wò ə Niapolìs.

¹² Tɨ̀ nyaʼa nɔ̀ʼ rəŋgu wò ə Filipì, nɨ nyaʼa əsɨ ə kyeŋ əbà əbeŋ ze rɨ ə Màsèdonià. À yɨ məRom nyaʼə tùmbɨ̀ əsɨ ze. Tɨ̀ nyaʼa chub ɨni mɔʼɔ ɨŋga əsɨ ze.

¹³ À nyaʼa əni əkwɨ mɨ̀Jû, tɨ̀ nyaʼa jwɨ̀ rɨŋga ɨkam wò ɨban ɨgyɨ̀, nɨ nyaʼa əsɨ ze nɨ tɨ̀ nyaʼa kɔndɨ ni mɨ̀Jû mbɨə nyaʼə wò fetɨ əŋgu ɨ kɔ̀ŋgɨ̀ ə Ŋwiə̀. Tɨ̀ nyaʼa pè chub ə si kɔ ghambɨ mbɨ məyi mbe nɨ nyaʼa yeʼe fetɨ.

¹⁴ Əyi mɔʼɔ rəbɔʼ mbe nɨ nyaʼa zu ɨnû mbe nɨ tɨ̀ nyaʼə ghàə̀ yɨə Lidià. Wɨ̀ yɨə nyaʼa rɨ ə Tìatirà. Ɨ wɨə nyaʼə fènə̀ ngywɨ̌ əka ɨnun. Ɨ wɨə nyaʼə bə̀ wumnɨ ə Ŋwiə̀. Ə̀nùŋɨ̀sɨg nyaʼa fiʼ fîŋ məd ni wɨ̀ zɨ ətu ənɨ ənû ze nɨ Pɔ̂l nyaʼə ghàə̀.

¹⁵ Ənɨ mbɨ nyaʼa naʼ mɨnib ɨ bɔ fɔrɨ əmbɨ ɨnəbɨ məd jìm, wɨ̀ nyaʼa buʼ ɨbɔ ɨ na ghà ni, “Mbə mɨ zə ni mə fə nùŋ mɨ fîŋ ɨgun Ə̀nùŋɨ̀sɨg, mbə̀ yeʼe chub ɨŋga mɨ nəb.” Wɨ̀ nyaʼa ghà əne, fi mba ɨtu, tɨ̀ wò chubɨ mbɨ məd.

Bə̂d kyeŋ mbe rɨ ə Filipì nyaʼa zɨ ə Pɔ̂l mbɨ Sailàs ə ndəŋ

¹⁶ À nyaʼa əni ə mɔʼɔ nɨ tɨ̀ nyaʼə wò əsɨ ze nɨ mbɨ nyaʼə kɔŋgɨ ə Ŋwiə̀, wan əyi mɔʼɔ nɨ nyaʼa ə̀bòʼò nyaʼa yeʼe kumnɨ əwa. Əzwî rɨbɔ̀ŋ ə zɨə nyaʼa ɨŋga məd. Əzwî ze zɨə nyaʼə ghɨ̀ə̀ ni wɨ̀ gha ɨkwab. Əze ə nyaʼa ghɨ̀ ni bə̂d mbe nɨ berɨ ə̀bòʼò ze berɨ ɨkab.

¹⁷ Ɨ wɨə nyaʼə beenɨ əbɔʼ Pɔ̂l mbɨ na, yènə̀ kyeŋə ghàə̀ ni, “Bə̂d mbɔ̂ yɨə bə̂d ə̀fàʼì Ŋwiə̀ Ə̀chè-ɨsɨg. Mɨ̀mə̌d mbɨə ghà ɨnû ɨmbə̀ʼ ɨnə̂njɨ̀ we nɨ tɨ̀ bə̂d chè əŋgu jwɨ̀ rəŋgəʼ.”

¹⁸ Ɨ wɨə nyaʼə ghɨ̀ ənû zɔ̂ ɨni nɔnɔʼ. Əne Pɔ̂l nyaʼa sə ɨtəm, bèŋ ghà əmbɨ əzwî rɨbɔ̀ŋ ze ni, “Mə ghà ɨ ne ənɨ ɨkum Yeso Kristo ni à jwɨ rɨŋga wan əyi wɔ̂.” Əzwî rɨbɔ̀ŋ ze ə nyaʼa jwɨ̀ àmei əwu əwən.

¹⁹ Ənɨ bə̂d mbe nɨ nyaʼa berɨ ə̀bòʼò ze nyaʼa zə ni chəi ənɨ tɨ̀ wan əyi we wɨrɨ ghɨ̀ mbə berɨ ɨkab, mbɨ nyaʼa gywɨ̀ ə Pɔ̂l mbɨ Sailàs, sùŋ mɨ̀mə̌d wò əsam ɨwin, wò nùŋ mɨ̀mə̌d ɨfě bə̂d mbe nɨ nyaʼə tùmbɨ̀ əsɨ ze.

²⁰ Mbɨ nyaʼa nɨŋ mɨ̀mə̌d wò ɨfě mə̀saʼ mɨ̀sàʼi pè ghà ni, “Bə̂d mbɔ̂ yɨ mɨ̀Jû. Ɨ mbɨə bùùrɨ̀ əsɨ zɔ̂ na.

²¹ Ɨ mbɨə chwi mɨchî mɔʼɔ mbe nɨ chəi ta rɨkə, mbà məRom benɨ. Chəi ənɨ tɨ̀ rɨ̀ bə̀ beenɨ əbɔʼ mɨchî mbe.”

²² Ɨnɔ̂n bə̂d we nyaʼa fɔtɨ əbɔʼ bə̂d mbe nɨ nyaʼa berɨ ə̀bòʼò ze, zɨ̀ ɨsaʼi ɨgun ə Pɔ̂l mbɨ Sailàs. Məsaʼ mɨ̀sàʼi mbe nyaʼa sèèrɨ̀ ngywɨ̌ rɨ Pɔ̂l mbɨ Sailàs, əne ghà əmbɨ mɨ̀sɔgyɨ̀ ni mbɨ buʼ mɨ̀mə̌d ənɨ ə mbàŋ.

²³ Ənɨ mbɨ nyaʼa som mɨ̀mə̌d kwàʼ ɨchî rɨbɔ̀ŋ, mbɨ nyaʼa wò zɨ̀ mɨ̀mə̌d ə ndəŋ. Mbɨ nyaʼa ghà əmbɨ wə̀d we nɨə nəŋgɨə nəb ndəŋ ze ni wɨ̀ jeŋgɨ nəŋgɨ mɨ̀mə̌d.

²⁴ Mbaŋə̀ ze nyaʼa zu ənû zɔ̂, wò zɨ̀ mɨ̀mə̌d ɨŋga ətu ə nəb ze rɨŋga, bə̀ zɨ̀ ɨkaʼ ənɨ ɨwu mɨ̀mə̌d.

²⁵ À nyaʼa sɨ ɨghabɨ ɨzimɨ ka, Pɔ̂l mbɨ Sailàs mbɨə nyaʼə kɔ̀ŋgɨ̀ ə Ŋwiə̀, bə̀ kwerɨ mɨkyî yiirɨ ə Ŋwiə̀. Bə̂d ndəŋ mbe nɨ nyaʼa əŋgu mbɨə nyaʼə zwetɨə.

²⁶ Mbɨ nɨ zə, si nyaʼa saʼ wùd, əne chìʼ əchɨ ə nəb ndəŋ ze. Àmei əwu əwən, mɨchû nəb mɨjìm nyaʼa fiʼ ə. Mɨ̀kàrə̀ mbe nɨ mbɨ nyaʼa kod mɨ̀mə̌d əŋgu bə̀ zà.

²⁷ Ənɨ mbaŋə̀ ze nɨ nyaʼə nəŋgɨ ə nəb ndəŋ ze nyaʼa nɔ̀ʼ rɨ əŋgwenɨ, wɨ̀ nyaʼa zə mɨchû nəb ndəŋ mbe əfìʼə. Wɨ̀ nyaʼa zə əne, chɔʼ fi ɨbi bid rɨ ə baʼ, kəb zwiirɨ i ɨnyod, ɨmbə̀ʼ ɨghəm nɨ wɨ̀ nyaʼa kɔndɨ ni bə̂d ndəŋ mbe fə jwɨ̀ nòd əwən.

²⁸ Àyɨə Pɔ̂l nyaʼa kyeŋ rɨ̀kǎ ghà ni, “Tɨrə̀ ghɨ e əghəm ənɨ e nyamnyod! Tɨ̀ wɨ əgha mbà mɨjìm.”

²⁹ Ɨbɔɔ nyaʼa ghɨ̀ mbaŋə̀ ze nɨ nyaʼə nəŋgɨ ə nəb ndəŋ ze bindɨ. Əne wɨ̀ nyaʼa ghà ni mbɨ yeʼe mbɨ ɨkaʼi. Wɨ̀ nyaʼa nɨŋ ɨkaʼi we nòrə̀ wò nyɨ ɨŋga nəb ndəŋ ze pè gù ɨfě Pɔ̂l mbɨ Sailàs.

³⁰ Wɨ̀ nyaʼa ghɨ əne, nɨŋ mɨ̀mə̌d mbɨ jwɨ ɨsɨg pè biirɨ ni, “Mbɨ mɨ̀mbǎʼ, mə̀ kɨə wo ghɨ ye bɔŋ jwɨ̀ rəŋgəʼ ə?”

³¹ Mbɨ nyaʼa wììrɨ̀ ni, “Nuŋ e fîŋ ɨgun ə Ə̀nùŋɨ̀sɨg Yeso, əne à bɨrɨ jwɨ rəŋgəʼ, əne yɨ àwɔ̀ mbɨ ə bə̂d mɨjìm mbe nɨ yeʼ ɨŋga e nəb.”

³² Mbɨ nyaʼa ghà əne, ghà ɨŋgam Ə̀nùŋɨ̀sɨg ɨ bɔ fɔrɨ əmbɨ ə bə̂d mɨjìm mbe nɨ nyaʼa ɨŋga nəb məd.

³³ Wɨ̀ nyaʼa nɨŋ mɨ̀mə̌d àmei ɨzimɨ we wò sò ɨna mɨ̀mə̌d. Mbɨ nyaʼa nàʼ mɨnib ɨ bɔ əwu əwən bə̀ nàʼ əmbɨ ɨnəbɨ məd ɨjìm.

³⁴ Wɨ̀ nyaʼa ghɨ̀ əne, nɨŋ mɨ̀mə̌d mbɨ wò ɨŋga i nəb pè nàʼ ɨghɨjɨg əmbɨ mɨ̀mə̌d. Məd mbɨ ə bə̂d mɨjìm mbe nɨ nyaʼa ɨŋga nəb nyaʼa kàŋ ghaʼ ni mbə fə ben ə Ŋwiə̀.

³⁵ Ənɨ ɨtuʼ nyaʼa chɨgɨ, bə̂d mbe nɨ nyaʼə tùmbɨ̀ əsɨ ze nyaʼa tom mɨ̀pùrɨsɨ̀ əsɨ ə mbaŋə̀ ze nyaʼə nəŋgɨ ə nəb ndəŋ ze. Mbɨ nyaʼa ghà ɨ bɔ ni “Saŋ mbaŋə̀ te wo əwən.”

³⁶ Mbaŋə̀ ze nɨ nyaʼə nəŋgɨ ə nəb ndəŋ ze nyaʼa ghà ənû ze əmbɨ Pɔ̂l ni, “Məsaʼ mɨ̀sàʼi fə cha ɨkə̂n ni mə̀ sàŋ əwən mbə̀ si wo ə. Əne mbə̀ sɨ jwɨ̀ wò əwən ənɨ əbɔrəbɔd.”

³⁷ Àyɨə Pɔ̂l nyaʼa ghà əmbɨ mɨ̀pùrɨsɨ̀ mbe ni, “Tɨ̀ yɨ məRom. Mbɨ fə som əwa ɨfě bə̂d bə̀ zɨ̀ əwa ə ndəŋ nɨ chəi tɨ̀ gu ənû ə mɔʼɔ. Tɨ̀nîn ɨ mbɨ kɨə kəb chɨ̀ əwa ənjìm ənjìm ə? Chə̂! mbɨ yeʼe chɨ̀ əwa mbənə mbənə.”

³⁸ Mɨ̀pùrɨsɨ̀ mbe nyaʼa wò ghà ɨnû mbe əmbɨ mə̀saʼ mɨ̀sàʼi mbe, əne mbɨ nyaʼa bɔ ənɨ mbɨ nyaʼa zu ni mbɨ yɨ məRom.

³⁹ Əne mbɨ nyaʼa wò buʼ ɨbɔ əmbɨ mɨ̀mə̌d, nɨŋ mɨ̀mə̌d mbɨ jwɨ̀ rɨ ə nəb ndəŋ ze. Mbɨ nyaʼa sɨ ghà əmbɨ mɨ̀mə̌d ni mbɨ saŋ əsɨ ze.

⁴⁰ Ənɨ Pɔ̂l mbɨ Sailàs nyaʼa jwɨ̀ rɨ ə nəb ndəŋ ze, mbɨ nyaʼa wò əkwɨ Lidià. Ənɨ mbɨ nyaʼa zə mbə bɔŋgɔb, mbɨ nyaʼa tìmbɨ̀ mɨ̀mə̌d, nɔ̀ʼ wò əwən.