Ɨ̀fàʼì 14 - Meta’

Pɔ̂l mbɨ Banabàs nyaʼa zə ŋgəʼ ə Ikoniùm

¹ Pɔ̂l mbɨ Banabàs nyaʼa wò ə Ikoniùm chè wò nyɨ ɨŋga nəb ə̀kàtɨ̀ mɨ̀Jû ze nɨ nyaʼa əŋgu. Mbɨ nyaʼa ghà ɨŋgam Ŋwiə̀ ɨŋga nəb ə̀kàtɨ̀ ze ənɨ ɨnə̂njɨ̀ nɨ mɨ̀Jû nɔnɔʼ mbɨ ə bə̂d mɨ̀nɔnɔʼ mbe nɨ ka mbɨ yɨə nyaʼə mɨ̀Jû nyaʼa ben ɨŋgam we.

² Àyɨə mɨ̀Jû mbe nɨ chəi mbɨ nyaʼa ben Kristo nyaʼa no bə̂d mbe nɨ kaʼi mɨ̀Jû, chə̀kɨ̀ fîŋ tɨ mɨ̀mə̌d ni mbɨ kɔ ban bə̂d mbe nɨ nyaʼa ben ə Kristo.

³ Pɔ̂l mbɨ Banabàs nyaʼa chub ə Ikoniùm əgha ə se. Ɨ mbɨə nyaʼə ghà ɨŋgam Ŋwiə̀ əŋgu ɨmbə̀ʼ Ə̀nùŋɨ̀sɨg mbɨ ə fîŋ nɨ kǎ. Ə̀nùŋɨ̀sɨg nyaʼa chwi ni ɨŋgam we nɨ mbɨ nyaʼə ghà ɨmbə̀ʼ ɨ̀chɔ̀m məd yɨ ənû rəsìʼ ɨchî nɨ wɨ̀ nyaʼa ghɨ ni mbɨ ghɨ ɨnû yiirɨ bə̀ ghɨ̀ ɨnweenɨ-ɨnû.

⁴ Bə̂d mbe rɨŋga əsɨ ze nyaʼa ghàbrə̀. Mbɨ mɔʼɔ nyaʼa ben ɨnû mbe nɨ mɨ̀Jû nyaʼə ghàə̀, mbɨ cherə nyaʼa ben mbe nɨ bə̂d tom mbe nyaʼə ghàə̀.

⁵ Bə̂d mbe nɨ kaʼi mɨ̀Jû mbɨ mɨ̀Jû fɔrɨ bə̂d mbe nyaʼə tekɨ ɨnû ɨŋga əbeŋ mɨ̀Jû nyaʼa kə̀b ni njɨ mbə chə bə̂d tom mbe bə̀ tumbɨ mɨ̀mə̌d ənɨ əti.

⁶ Ənɨ bə̂d tom mbe nyaʼa zu ənû ze, mbɨ nyaʼa norə wò ə Listrà fɔrɨ ə Də̂be, nɨ nyaʼa ɨsɨ ɨŋga əbà əbeŋ ze rɨ ə Laikonià. Mbɨ nyaʼa bə̀ wò fɔrɨ ɨŋga ɨsɨ mbe nɨ nyaʼa ɨban ɨban.

⁷ Mbɨ nyaʼa pè əŋgu ghà ɨkə̂n chɔ̀m ɨmbə̀ʼ Ə̀nùŋɨ̀sɨg Yeso.

Ənû ze nɨ bə̂d mbe rɨ ə Listrà mbɨ mbe rɨ ə Də̂be nyaʼa ghɨ̌

⁸ Mbaŋə̀ mɔʼɔ zɨə nyaʼə Listrà nɨ nyaʼa buʼrə. Tɨ ənɨ mbɨ nyaʼa gywɨ əməd, chəi wɨ̀ nyaʼa kweʼ yènɨ̀.

⁹ Mbaŋə̀ ze nyaʼa chub ɨ zwetɨ ənû ze nɨ Pɔ̂l nyaʼə ghàə̀. Pɔ̂l nyaʼa toŋ əghə ɨgwɨ məd, əne zə ni wɨ̀ nyaʼa berɨ ɨbenɨ nɨ tɨ mbɨ ghɨ̀ wɨ̀ bɔtɨ.

¹⁰ Əne Pɔ̂l nyaʼa ghà ɨ bɔ ənɨ ə gɨ̂ nɨ kǎ ni, “Nɔʼɔ təm!” Mbaŋə̀ ze nyaʼa nɔ̀ʼ təm kɔ yènɨ̀.

¹¹ Ənɨ mɨnɔ̂n bə̂d mbe nyaʼa zə ənû ze nɨ Pɔ̂l nyaʼa ghɨ̌, mbɨ nyaʼa kɔ kyeŋ rɨkǎ ənɨ ɨŋgam əbeŋ Likaonià ghàə̀ ni, “Mɨ̀ŋwìə̀ fə bèŋ ənɨ ə bə̂d, swiʼi yeʼe əsɨ na!”

¹² Mbɨ nyaʼa kɔ tɔŋ ə Banabàs ənɨ ə Zeòs, bə̀ kɔ tɔŋ ə Pɔ̂l ənɨ ə Hemès, ɨmbə̀ʼ ɨghəm nɨ à yɨə məd nyaʼə ghàmə̀.

¹³ Wə̀d mbàn Zeòs, nɨ mbàn ŋwìə̀ məd nyaʼa àmei ɨchû ɨkam ɨfě əsɨ ze, nyaʼa wò nɨŋ mɨnom mbɨ̀rɨkun bə̀ nɨŋ tɨ̀kwě wò mbɨ rɨwən ɨchû mɨkam mbe. Wɨ̀ nyaʼa ghɨ̀ əne ɨmbə̀ʼ ɨghəm nɨ məd mbɨ ɨnɔ̂n bə̂d we nyaʼa kəb naʼ ɨghɨ ə̀fà əmbɨ ə bə̂d tom mbe.

¹⁴ Àyɨə ənɨ bə̂d tom mbe, Banabàs mbɨ Pɔ̂l, nyaʼa zu ənû ze, mbɨ nyaʼa sèèrɨ̀ tə ngywɨ̌ ɨmbə̀ʼ ɨghəm nɨ chəi mbɨ nyaʼa ghaʼ ənû ze. Əne mbɨ nyaʼa nòrə̀ wò əkaʼ ɨnɔ̂n bə̂d we, yènə̀ kyeŋə ghàə̀ ni,

¹⁵ “Mba mɨ̀sə̀ʼ, mbə̀ kɨə ghɨ̀ ənû zɔ̂ ɨmbə̀ʼ ə yè ə? Tɨ̀ yɨə bə̂d mɨ̀sɔŋɨchù ɨghabɨ ə mbə̀nə. Tɨ̀ fə yeʼe mbɨ ɨkə̂n chɔ̀m ɨ nən ni mbə̀ saŋ ɨghɨ əko mbɔ̂ beenɨ əbɔʼ Ŋwìə̀ we nɨ yeʼ ɨkǎ. À yɨə məd nyaʼa tekɨ ɨkaŋ, tekɨ si, tekɨ rɨ̀bàà bə̀ tekɨ ɨghɨjìm mbe nɨ yeʼ ɨŋga ɨghɨ mbɔ̂.

¹⁶ À nyaʼa ɨŋga tɨ̀ghə̀m rɨ bə̂d te nɨ nyaʼa fə chě, Ŋwìə̀ nyaʼa sàŋ bə̂d ɨŋga ɨbeŋ jìm ni mbɨ chub ɨchî nɨ mbɨ ghaʼi.

¹⁷ Àyɨə məd ziə fə chwi ɨnweenɨ ni tə wɨ əŋgu ɨchî nɨ wɨə ghɨ̀ ɨ̀chɔ̀m ənɨ ə bə̂d. Ɨ wɨə ghɨ̀ ni mbə̀ŋ nɔ. Ɨ wɨə bə̀ ghɨ̀ ni mbə̀ berɨ tɨjɨg ənɨ ə nyùmə̀ we nɨ mbə̀ə kwəŋ ɨghɨ. Ɨ wɨə nàʼ ɨghɨjɨg ɨ nən. Ɨ wɨə bə̀ ghɨ̀ ni ɨghaʼi swi ɨŋga tə fîŋ.”

¹⁸ Mbɨ nyaʼa ghà ɨŋgam wɔ̂, àyɨə zɨə nyaʼa kàŋ se əku nɨ təmnɨ bə̂d mbe ni tɨ mbɨ faarɨ ə əghɨ ə mɔʼɔ əmbɨ mɨ̀mə̌d.

¹⁹ Mɨ̀Jû mɔʼɔ nyaʼa nɔ̀ʼ rɨ ə Antiɔ̀k bə̀ nɔ̀ʼ rɨ ə Ikoniùm wò ə Listrà. Mbɨ nyaʼa pè fi ɨtu mɨnɔ̂n bə̂d mbe ni mbɨ beenɨ əbɔʼ nən. Əne mbɨ nyaʼa tumbɨ ə Pɔ̂l ənɨ əti. Mbɨ nyaʼa kɔndɨ ni wɨ̀ fə kwɨ, əne mbɨ nyaʼa sùŋ əməd rɨŋga Listrà chà ɨsɨg.

²⁰ Àyɨə ənɨ bə̂d mbe nɨ nyaʼa ben ə Kristo nyaʼa wò kad əməd, wɨ̀ nyaʼa nɔ̀ʼ bə̀ndɨ̀ wò nyɨ ɨŋga Listrà. À nyaʼa əni ze nɨ beenɨ, wɨ̀ nyaʼa nɔ̀ʼ mbɨ Banabàs mbɨ wò ə Də̂be.

Pɔ̂l mbɨ Banabàs nyaʼa bə̀ndɨ̀ wò ə Antiɔ̀k we rɨ əbà əbeŋ ze rɨ ə Sirià

²¹ Ənɨ Pɔ̂l mbɨ Banabàs nyaʼa ghà ɨkə̂n chɔ̀m we ə Də̂be, mbɨ nyaʼa beŋ bə̂d mɨ̀nɔnɔʼ ənɨ ə bə̂d nɨə beenɨ əbɔʼ ə Kristo. Mbɨ nyaʼa ghɨ əne, bə̀ndɨ̀ wò ə Listrà fɔrɨ ə Ɨkoniùm bə̀ fɔrɨ ə Antiɔ̀k.

²² Ɨ mbɨə nyaʼə yènə̀ tìmbɨ̀ ə bə̂d mbe nɨ nyaʼa ben ə Kristo, bə̀ yènə̀ ghàə̀ ni mbɨ yim ɨbenɨ wɨ kaanə wo ɨmbì. Mbɨ nyaʼa bə̀ ghà əmbɨ mɨ̀mə̌d ni, “Tɨ̀ berɨ zə ŋgəʼ nɔnɔʼ bɔŋ nyɨ ɨŋga ənû ɨfɔ̀n ə Ŋwiə̀.”

²³ Ənɨ mbɨ nyaʼa fə chɔʼ bə̂d mbe nɨə chà tɨfetɨ bə̂d Kristo te ɨ mɔʼ mɔʼ, mbɨ nyaʼa kɔŋgɨ ə Ŋwiə̀, chub rɨ jɨg, zɨ̀ mɨ̀mə̌d ɨŋga tɨkyerɨ-ɨbɔ Ə̀nùŋɨ̀sɨg we nɨ mbɨ nuŋ tə fîŋ ɨgwɨ məd.

²⁴ Mbɨ nyaʼa nɔ̀ʼ rəŋgu chè ə Pisidià wò ə Pamfilià.

²⁵ Ənɨ mbɨ nyaʼa ghà ɨŋgam Ŋwiə̀ ə Pegà, mbɨ nyaʼa nɔ̀ʼ rəŋgu swiʼi wò ə Atalià.

²⁶ Mbɨ nyaʼa nɔ̀ʼ rəŋgu wò nyɨ əbaŋ ɨgyɨ̀ baanɨ bə̀ndɨ̀ wò ə Antiɔ̀k. Antiɔ̀k yɨ əsɨ ze nɨ mbɨ nyaʼa kɔŋgɨ ə Ŋwiə̀ ɨgwɨ mɨ̀mə̌d ni wɨ̀ ghɨ ɨ̀chɔ̀m mbɨ wò faʼ ə̀fàʼì ze nɨ mbɨ cherə nɔʼ rɨ màànɨ̀.

²⁷ Ənɨ mbɨ nyaʼa pe ə Antiɔ̀k, mbɨ nyaʼa fetɨ bə̂d Kristo mɨjìm, əne ghà ɨnû jìm mbe nɨ Ŋwìə̀ nyaʼa ghɨ ənɨ ə nən bə̀ ghà ɨchî nɨ wɨ̀ nyaʼa fiʼ ɨnə̂njɨ̀ əmbɨ ə bə̂d mbe nɨ kaʼi mɨ̀Jû ni mbɨ ben ə Kristo.

²⁸ Mbɨ nyaʼa chub əngu əgha ə se mbɨ ə bə̂d mbe nɨ nyaʼa ben ə Kristo.