2 Tès 2 - Meta’

Wə̀d we nɨ ton ə Ŋwiə̀ bə̀ ton rɨkə məd

¹ Mba bɔŋgɔb, ɨmbə̀ʼ ənû nɨ a Ə̀nùŋɨ̀sɨg Yeso Kristo bɨrɨ wɨrɨ yeʼe fɔrɨ ɨmbə̀ʼ ɨchî nɨ tɨ̀ bɨrɨ fetɨ wo kumnɨ əməd, tɨ̀ wɨə buʼ ɨbɔ ɨ nən ni,

² tɨ mbə ɨtu buurɨ i kɨ̀ tə fîŋ tɔb əwən ɨmbə̀ʼ bə̂d mbe nɨə ghà ni əni ze nɨ Ə̀nùŋɨ̀sɨg bɨrɨ wɨrɨ yeʼe fə pè. Ka mbɨ bè ghà ə ni à yɨ Əzwî ə gha ɨ na, kɨ̀ nɨ à yɨə mbǎ nyaʼa ŋwaʼnɨ, kɨ̀ nɨ à yɨə mbǎ nyaʼa ghamɨ, tɨ mbə̀ ben ə.

³ Tɨ mbə̀ ben ə ni wə̀d mɔʼɔ che ənɨ ɨkwɨ ɨnə̂njɨ̀ mɔʼɔ tambɨ əwən, ɨmbə̀ʼ ɨghəm nɨ chəi əni ze ə bɨrɨ kɨrɨ yeʼe pè ənɨ bə̂d mbe nɨ bɨrɨ ton ɨnû jìm ɨmbə̀ʼ ə Ŋwiə̀ fə yeʼe, wə̀d we nɨ ton ə Ŋwiə̀ bə̀ ton tɨkə rɨ məd bə̀ jwɨ̀ bə̂d zə. Məd yɨ we nɨ bɨrɨ nim.

⁴ Wɨ̀ bɨrɨ ton ɨghɨjìm mbe nɨ bə̂d ə tɔŋ ni ŋwìə̀, kɨ̀ mbe nɨ bə̂d ə wumnɨə, əne ghà nɨ tə chè ɨghɨ mbe jìm. Wɨ̀ bɨrɨ wo chub ɨŋga mbàn Ŋwìə̀ ghà ni tə yɨə Ŋwiə̀.

⁵ Chəi mbə̀ wɨrɨ kɔndɨ ni ənɨ mə nyaʼa mbɨ nən mə nyaʼa ghà ənû zɔ̂ ɨ nən ə?

⁶ Mbə kyerɨ ənû ze nɨə kɨrɨ yim əməd tɨ̀nîn, ɨmbə̀ʼ ənɨ nyùmə̀ kuʼu, wɨ jwɨ̀ bə̂d zə.

⁷ Ənû ze nɨ Satàn ə ghɨ̀ ni bə̂d ton ə Ŋwiə̀ bə̀ ton tɨkə rɨ məd fə sɨə fàʼə̀. Àmei məd we nɨ yim ənû ze bɨrɨ wo ɨmbì yim pè ənɨ Ŋwìə̀ chɨ əməd rɨ ɨnə̂njɨ̀.

⁸ À yɨ ənɨ ə nyùmə̀ we nɨ wə̀d we nɨə ton ə Ŋwiə̀ bə̀ tonə tɨkə rɨ məd bɨrɨ jwɨ̀ mbɨ zə. Ə̀nùŋɨ̀sɨg Yeso bɨrɨ zwiirɨ əməd ənɨ ɨfə we nɨə jwɨ̀ rɨŋga ɨchû məd, əne nimnɨ əməd ənɨ ɨzeŋɨ zeŋɨ we nɨ bɨrɨ te ənɨ ə nyùmə̀ we nɨ wɨ̀ wɨrɨ yeʼe.

⁹ Wə̀d we nɨ ton ə Ŋwiə̀ bə̀ ton tɨkə rɨ məd bɨrɨ yeʼe mbɨ ɨka we nɨ Satàn naʼ ɨ bɔ. Wɨ̀ bɨrɨ pe ghɨ̀ tɨkwɨrɨ ɨnû yiirɨ mɨghab jìm, ghɨ̀ tɨkwɨrɨ ɨnweenɨ-ɨnû mɨghab jìm bə̀ ghɨ̀ tɨkwɨrɨ ɨnû mɨghab jìm nɨ dabə.

¹⁰ Wɨ̀ bɨrɨ nɨŋ tɨkwɨrɨ ɨnə̂njɨ̀ rɨbɔ̀ŋ jìm tambɨ bə̂d mbe nɨ bɨrɨ nim ɨmbə̀ʼ ɨghəm nɨ chəi mbɨ ben rəsìʼ ɨmbə̀ʼ Ə̀nùŋɨ̀sɨg Yeso ɨmbə̀ʼ jwɨ rəŋgəʼ.

¹¹ Əne Ŋwìə̀ fə fèbrɨ̀ tɨkɔndɨ tɨ mɨ̀mə̌d ɨmbə̀ʼ mbɨ ben ənû əko.

¹² Wɨ̀ fə bə̀ ghɨ̀ əne ɨmbə̀ʼ wɨ̀ zɨ ɨsaʼi ɨgun ə bə̂d mɨ̀jìm mbe nɨ chəi mbɨ nyaʼa ben rəsìʼ, nɨ mbɨə ghɨ̀ yeʼ ɨnû nɨ chəi mbɨ kuʼnɨ.

Ŋwìə̀ nyaʼa chɔʼ əwən ɨmbə̀ʼ chɨ rəŋgəʼ

¹³ Mba bɔŋgɔb nɨ Ə̀nùŋɨ̀sɨg ghaʼi kwàʼ rɨŋgəʼ, tɨ̀ berɨ naʼ məben-əwe əmbɨ ə Ŋwiə̀ ɨghəm jìm ɨmbə̀ʼ əwən, ɨmbə̀ʼ ɨghəm nɨ Ŋwiə̀ nyaʼa chɔʼ əwən ɨmbə̀ʼ chɨ rəŋgəʼ ənjìm ɨchî nɨ Əzwî ə Ŋwìə̀ ə ghɨ mbə zeŋ bə̀ fɔrɨ ənjìm ɨchî nɨ mbə̀ ben rəsìʼ.

¹⁴ Ŋwìə̀ nyaʼa tɔŋ əwən ɨmbə̀ʼ chɨ rəŋgəʼ ənjìm ɨkə̂n chɔ̀m we nɨ tɨ̀ nyaʼa gha ɨ nən. Əne yɨ ɨmbə̀ʼ bə̂d naʼ ɨkwɨ ɨwumnɨ we nɨ mbɨə nàʼ əmbɨ a Ə̀nùŋɨ̀sɨg Yeso Kristo ɨ nən.

¹⁵ Əne kyɨə bɔŋgɔb, mbə̀ təm kàànɨ̀, yim ɨnû mbe nɨ tɨ̀ nyaʼa chwi ɨ nən kɨ̀ à kɨ ənɨ mɨŋgam mbe nɨ tɨ̀ nyaʼə ghàə̀ kɨ̀ ɨŋga ə̀ŋwàʼnɨ̀ ze nɨ tɨ̀ ŋwaʼnɨ ɨ nən.

¹⁶ A Ə̀nùŋɨ̀sɨg Yeso Kristo ziə mbɨ Ŋwìə̀ a Mbǎʼ, nɨ ghaʼ əwa ənjìm ɨ̀chɔ̀m məd, nəərɨ əwa koŋ bə̀ ghɨ ni tɨ̀ nuŋ ɨkɔndɨ wòm ɨnû chɔ̀m mbe nɨ wɨ̀ kaʼ ɨ na.

¹⁷ Wɨ̀ nəərɨ əwən bə̀ nàʼ ɨka ɨ nən ni mbə̀ ghɨ ənû chɔ̀m jìm bə̀ ghà ɨŋgam chɔ̀m jìm.