1 Tèsàlonikà 2 - Meta’

Ɨnû mbe nɨ Pɔ̂l nyaʼa ghɨ ə Tèsàlonikà

¹ Mba bɔŋgɔb, mbə fə kyerɨ ə ni ɨchî nɨ tɨ̀ nyaʼa yeʼe mò əwən, rɨ nyaʼa chè i ətu ə̀kǒ.

² Bə̂d mbe rɨ ə Filipì nyaʼa ghɨ̀ tɨ̀ zə ŋgəʼ. Mbɨ nyaʼa bə̀ naʼ tɨ̀nìd ətu na ɨchî nɨ mbə̀ kyerɨ. Àyɨə Ŋwìə̀ nyaʼa nàʼ ɨka ɨ na ni tɨ̀ gha ɨkə̂n chɔ̀m ɨ nən, ka à bè yeʼi ni chəi bə̂d mɨ̀nɔnɔʼ nyaʼa kəb ni tɨ̀ gha ɨkə̂n we.

³ Ka ɨchî nɨ tɨ̀ nyaʼə ghà ɨŋgam Ŋwiə̀ yɨ i rɨ ənɨ ɨchî nɨ tɨ̀ feb ənû, kɨ̀ rɨ ənɨ tɨkɔndɨ rɨbɔ̀ŋ, kɨ̀ ɨmbə̀ʼ tambɨ əwən.

⁴ Tɨ̀ wɨə ghà àmei ɨchî nɨ Ŋwìə̀ kəbɨ ni tɨ̀ ghamə. Wɨ̀ fə nèŋ əwa zə ni tɨ̀ kùʼ ni wɨ̀ saŋ ɨkə̂n chɔ̀m wɔ̂ ɨŋga ta rɨkyerɨ-ɨbɔ. Chəi tɨə ghà ɨmbə̀ʼ ghɨ ni fîŋ rɨ bə̂d bɔŋə. Tɨ̀ wɨə ghàə̀ yeʼ ɨmbə̀ʼ fîŋ Ŋwìə̀ we nɨ kyerɨ ta rɨkɔndɨ bɔŋə.

⁵ Mbə̀ kyerɨ ə ni chəi tɨ̀ nyaʼa gha ɨŋgam nəmɨ nəmɨ ɨ nən ɨmbə̀ʼ tambɨ əwən. Ŋwiə̀ bə̀ kyerɨ ni ka tɨ̀ yɨ a bə̂d əjə, əne chəi tɨ̀ nyaʼa gha ɨnû mbe ɨmbə̀ʼ nəm ni tɨ̀ yɨə bə̂d əjə.

⁶ Chəi tɨ̀ nyaʼa kəb ni bə̂d wumnɨ əwa, kɨ̀ à kɨ ə mbə̀nə kɨ̀ bə̂d cherə,

⁷ ka à be yeʼi ni ɨghabɨ ə bə̂d tom Kristo njɨ tɨ̀ nyaʼa biirɨ ɨghɨ rɨ nən. Tɨ̀ wɨə nyaʼə kàŋə̀ bɔtɨ əkaʼ nən ɨghabɨ ɨŋgɔb nɨə nəŋgɨə mbi bɔn.

⁸ Əne ɨchî nɨ tɨ̀ nyaʼa ghaʼ əwən kwàʼ rɨŋgəʼ, chəi tɨ̀ nyaʼa kəb àmei nɨ ghɨ ni mbə̀ kyerɨ ɨkə̂n chɔ̀m ɨmbə̀ʼ ə Ŋwiə̀, tɨ̀ nyaʼa bə̀ kəb nɨ ghɨ ɨnû jìm ɨmbə̀ʼ weerɨ əwən. Mə wɨə ghà əne ɨmbə̀ʼ ɨghəm nɨ tɨ̀ nyaʼa ghaʼ əwən, əne tɨ̀ wɨə bə̀ kɨrɨ ghaʼ əwən ənɨ ta fîŋ rɨ̀jìm.

⁹ Mba bɔŋgɔb, mbə̀ kyerɨ ə ɨchî nɨ tɨ̀ nyaʼə fàʼ əkaʼ nən kwàʼ rɨ̀kǎ. Tɨ̀ wɨə nyaʼə fàʼ əziə mbɨ ɨzimɨ ɨmbə̀ʼ tɨ rɨ̀ chə a wə̀d mɔʼɔ rəbɔʼ nən ɨmbə̀ʼ ənû rɨjɨg ənɨ tɨ̀ nyaʼə ghà ɨkə̂n chɔ̀m ɨmbə̀ʼ ə Ŋwiə̀ ɨ nən.

¹⁰ Mbənə mbɨ ə Ŋwiə̀ yɨ mɨ̀zərɨmbin ni tɨ̀ wɨə nyaʼə chub ɨzeŋɨ zeŋɨ, ghɨ̀ə̀ ɨnû nɨ kùʼnɨ̀ bə̀ ghɨ̀ə̀ ɨnû nɨ chəi ənɨ tɨ̀ wə̀d mɔʼɔ ghà ɨnû rɨbɔ̀ŋ ɨmbə̀ʼ əwa əmbɨ mbə̀n mbe nɨ ben ə Kristo.

¹¹ Mbə kyerɨ ə ni tɨ̀ wɨə fàʼə̀ mbɨ nən ɨchî nɨ mbǎʼ ə fàʼə̀ mbɨ mbi bɔn.

¹² Tɨ̀ wɨə nyaʼə tìmbɨ̀ əwən, nəərɨə əwən bə̀ ghà ɨ nən ni mbə̀ chub ɨchî nɨ bɨrɨ ghɨ ni fîŋ Ŋwìə̀ bɔŋə. À yɨə məd tɔŋ əwən ni mbə̀ yeʼe nyɨ ɨŋga ənû ɨfɔ̀n əməd fɔrɨ ɨŋga ɨwumnɨ məd.

¹³ Tɨ̀ wɨə bə̀ nàʼə̀ məben-əwe əmbɨ ə Ŋwiə̀ ɨghəm jìm ɨmbə̀ʼ ənû zɔ̂ ni ənɨ tɨ̀ nyaʼa yeʼe mbɨ ɨŋgam Ŋwiə̀ ɨ nən, mbə nyaʼa zu benɨ, kaʼi ɨghabɨ ni à yɨ ɨŋgam bə̂d mɨ̀sɔŋɨchù. Mbə nyaʼa kàŋ ben ni à yɨ ɨŋgam Ŋwiə̀. Ɨŋgam we wɨə fàʼ ɨŋga mbə̀n mbe nɨ ben ə Kristo.

¹⁴ Mba bɔŋgɔb, mbə mbɨə nyaʼə ghɨ̀ ɨnû mbe nɨ bə̂d mbe nɨ nyaʼa ɨŋga rɨfetɨ bə̂d Ŋwiə̀ te rɨ ə Jùdeyà nɨ yeʼ ənɨ ɨfɔtɨ mbɨ Kristo Yeso nyaʼə ghɨ̀ə̀. Mbə mbɨə nyaʼə zəə ŋgəʼ rɨ əmbɨ mbə bə̂d əbeŋ àmei ɨchî nɨ mbɨ nyaʼə zəə rɨ əmbɨ mɨ̀Jû.

¹⁵ Mbɨ mɔʼɔ nyaʼa zwiirɨ ə Yeso, mbɨ mɔʼɔ nyaʼa zwiirɨ bə̂d ɨ̀kə̀n Ŋwiə̀, mbɨ mɔʼɔ nyaʼa fid əwa tɨ ɨŋga ɨbeŋ mɨ̀mə̌d. Ɨ mbɨə nyaʼə ghɨ̀ ɨnû nɨ chəi fîŋ Ŋwìə̀ nyaʼa bɔŋ əbɔʼ mɨ̀mə̌d. Mbɨ yɨə bə̂d pə̀n əmbɨ wə̀d jìm,

¹⁶ ɨchî nɨ mbɨ nyaʼə kə̀b kən ni tɨ rɨ gham a əmbɨ ə bə̂d mbe nɨ kaʼi mɨ̀Jû ɨmbə̀ʼ mbɨ jwɨ̀ rəŋgəʼ. Àyɨə tɨ̀ nyaʼa wo ɨmbì rəbə gham a ghamɨ. Ɨchî nɨ mbɨ nyaʼə ghɨ̀ əne ə nyaʼa swe mbə ɨnû rɨbɔ̀ŋ mbɨ swi. Ŋwiə̀ nyaʼa sə ɨtəm əbɔʼ mɨ̀mə̌d ənɨ ɨnwǐ.

Pɔ̂l nyaʼa kə̀b ni njɨ tə zə bə̂d Kristo mbe rɨ ə Tèsàlonikà

¹⁷ Mba bɔŋgɔb, ənɨ tɨ̀ nyaʼa berɨ saŋ əwən ənɨ ɨkə nyùmə̀, tɨ̀ nyaʼa kywɨ ənywɨ kàŋ kə̀b kwàʼ rɨka nɨ yeʼe əsɨ nən ɨmbə̀ʼ wɨrɨ zə əwən. Chə nyaʼa i əwa mbɨ nən, àyɨə tɨ̀ wɨə nyaʼə kɔndɨ əwən ɨghəm jìm.

¹⁸ Tɨ̀ nyaʼa kàŋ kə̀b nɨ wɨrɨ yeʼe əsɨ nən àyɨə Satàn nyaʼa kən əwa. Mɔ̌ Pɔ̂l nyaʼa kàŋ kəb yeʼe ɨghəm nɔnɔʼ.

¹⁹ À kɨ mɨwe ə ghɨ̀ ni tɨ̀ nuŋ ɨkɔndɨ ɨgwɨ ɨghɨ mbe nɨ tɨ ə wòm ə? À kɨ mɨwe bɨrɨ ghɨ ni tɨ̀ ghaʼrɨ ə? À kɨ mɨwe bɨrɨ ghɨ ni tɨ̀ goŋ ɨgɔ̂ ɨfě Ə̀nùŋɨ̀sɨg Yeso ənɨ wɨrɨ yeʼe ɨghabɨ ni tɨ̀ yɨə bə̂d nɨ chè ə̀nòtɨ̀ ə? Kaʼ à wa kɨ i mbə̀nə ə?

²⁰ À yɨ rəsìʼ ni à yɨə mbə̀nə bɨrɨ ghɨ ni tɨ̀ goŋ ɨgɔ̂ bə̀ chub ənɨ ɨghaʼi.