1 Jɔn 4 - Meta’

Ɨkwepɨ rɨ ənɨ Əzwî ə Ŋwìə̀ bə̀ fɔrɨ tɨ ənɨ əzwî ə wə̀d pə̀n Kristo

¹ Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ mbə̀ ben ə wə̀d jìm we nɨ gha ni Əzwî ə Ŋwiə̀ ə zɨ ɨŋga məd, àyɨə mbə̀ zweʼrɨ ɨzwî jìm ɨmbə̀ʼ zə ni mbɨ yɨ rɨ əmbɨ ə Ŋwiə̀ kɨ̀ chə, ɨmbə̀ʼ ɨghəm nɨ bə̂d ɨ̀kə̀n mɨghab nɔnɔʼ fə jàŋ ɨŋga ɨsɨg.

² Ɨchî nɨ mbə̀ bɨrɨ kyerɨ wə̀d we nɨ Əzwî ə Ŋwìə̀ ə yeʼ ɨŋga məd yɨ ni: Wə̀d jìm we nɨ ben ni Yeso Kristo nyaʼa yeʼe ɨŋga ɨsɨg ɨŋga nyamnyod wə̀d mɨ̀sɔŋɨchù, Əzwî ə Ŋwiə̀ ə zɨ ɨŋga məd.

³ Chəi Əzwî ə Ŋwìə̀ ɨŋga wə̀d jìm we nɨ chəi wɨ̀ ben ə Yeso. Əzwî ze nɨ yeʼ ɨŋga məd yɨ rɨ əmbɨ ə wə̀d pə̀n Kristo. Mbə nyaʼa fə zu ni əzwî ze ə bɨrɨ yeʼe, əne tɨ̀nîn ə zɨə sɨ i ɨŋga ɨsɨg.

⁴ Mbɨ bɔn nɨ mə̀ ghaʼi kwàʼ rɨŋgəʼ, mbə yɨə bə̂d Ŋwiə̀ əne mbə fə baŋ bə̂d ɨ̀kə̀n mɨghab mbe. Mbə fə baŋ mɨ̀mə̌d ɨmbə̀ʼ ɨghəm nɨ Əzwî ze nɨ yeʼ ɨŋga nən ə chè əze nɨ yeʼ ɨŋga ɨsɨg.

⁵ Bə̂d ɨ̀kə̀n mɨghab mbɔ̂ yɨə bə̂d rɨŋga ɨsɨg, əne ɨnû mbe nɨ mbɨə ghàə̀ yɨ ɨnû rɨŋga ɨsɨg. Ɨsɨg wɨə zwetɨ ɨnû mbe mbɨə ghàə̀.

⁶ Tɨ̀ yɨə bə̂d Ŋwiə̀, əne wə̀d mɔʼɔ we nɨ kyerɨ ə Ŋwìə̀ wɨə zwetɨ ɨnû mbe nɨ tɨə ghàə̀. Chəi wə̀d we nɨ kaʼi wə̀d Ŋwìə̀ ə zwetɨ ɨnû mbe nɨ tɨə ghàə̀. Wɔ̂ yɨ ɨchî nɨ tɨ̀ rɨ̀ kyerɨ ɨkwepɨ rɨ ənɨ əzwî ze nɨə ghɨ̀ ni tɨ̀ kyerɨ rəsìʼ bə̀ fɔrɨ tɨ ənɨ əze nɨə tambɨə bə̂d.

Ŋwìə̀ ə ghaʼ mbi bɔn, bɔn bə̀ ghaʼ ə ɨnyod mbə̀nə mbə̀nə

⁷ Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ̀ wo ɨmbì nɨ ghaʼ mba bɔŋgɔb, ɨmbə̀ʼ ɨghəm nɨ à yɨə Ŋwìə̀ ə ghɨ̀ə̀ ni bə̂d ghaʼ mbə bɔŋgɔb. Wə̀d we nɨ ghaʼ mbi bɔŋgɔb yɨə wə̀d Ŋwìə̀, əne məd ə kyerɨ ə Ŋwìə̀.

⁸ We nɨ chəi wɨ̀ ghaʼ mbi bɔŋgɔb rɨka kyerɨ i ə Ŋwiə̀. Mbə̀ kyerɨ ni Ŋwìə̀ wɨə ghaʼə bə̂d.

⁹ Ŋwìə̀ wɨə chwi ɨchî nɨ wɨ̀ ghaʼ əwa əni: Wɨ̀ nyaʼa tom i Wan we mɔʼ ɨŋga ɨsɨg ɨmbə̀ʼ tɨ̀ we tɨ̀ rɨ̀ chè ənjìm məd jɨg ɨ̀tènɨ̀.

¹⁰ Wɔ̂ yɨə kaŋ ɨghaʼi rəsìʼ. Kaʼi ni tɨ̀ nyaʼa ghaʼ ə Ŋwiə̀, àyɨə ni məd ziə nyaʼa ghaʼ əwa əne tom i Wan ni wɨ̀ yeʼ əghɨ ə̀fà ze nɨ wɨ̀ bɨrɨ chè ənjìm məd waʼ mba ɨnû rɨbɔ̀ŋ.

¹¹ Mbɨ bɔŋgɔb nɨ mə̀ ghaʼi kwàʼ rɨŋgəʼ, wɔ̂ mɨ yeʼ ɨchî nɨ Ŋwìə̀ ghaʼ əwa, njɨ tɨ̀ berɨ bɨ ghaʼ a ɨnyod mbǎ mbǎ.

¹² Chəi wə̀d mɔʼɔ kweʼ zə ə Ŋwìə̀, àyɨə tɨ̀ mɨ ghaʼ a ɨnyod mbǎ mbǎ, Ŋwìə̀ bɨrɨ yeʼ ənɨ ənû ə mɔʼ mbɨ na. Wɨ̀ nɨə ghɨ əne, ɨghaʼi bɨrɨ swi ɨŋga ta fîŋ.

¹³ Ŋwìə̀ fə nàʼ e Əzwî ɨ na, əne wɔ̂ yɨ ɨnə̂njɨ̀ nɨ tɨ̀ kyerɨ ni məd wɨ ənɨ ənû ə mɔʼ mbɨ na bə̀ kyerɨ ni tɨ̀ wɨ ənɨ ənû ə mɔʼ mbɨ məd.

¹⁴ Tɨ̀ nyaʼa fə zə, əne tɨ̀ wɨə ghà əmbɨ ə bə̂d ni Mbǎʼ nyaʼa tom i Wan ni wɨ̀ yeʼ wə̀d nɨə chɨ̀ ɨsɨg jìm rəŋgəʼ.

¹⁵ Wə̀d we nɨ ben ni Yeso yɨə Wan Ŋwìə̀ wɨ ənɨ ənû ə mɔʼ mbɨ ə Ŋwìə̀. Ŋwìə̀ wɨə bə̀ ənɨ ənû ə mɔʼ mbɨ məd.

¹⁶ Əne tɨ̀ fə kyerɨ bə̀ ben ni Ŋwìə̀ ə ghaʼ əwa. Ŋwìə̀ wɨə ghaʼə bə̂d, əne wə̀d we nɨ ghaʼ wi aŋgɔb wɨ ənɨ ənû ə mɔʼ mbɨ ə Ŋwìə̀, Ŋwìə̀ ziə wɨə bə̀ ənɨ ənû ə mɔʼ mbɨ məd.

¹⁷ Ɨchî nɨ zɨə yeʼ əne, ɨghaʼi berɨ swi ɨŋga ta fîŋ, ɨmbə̀ʼ chəi tɨ̀ bɨrɨ bɔ ənû ə mɔʼɔ əni ze nɨ Ŋwìə̀ bɨrɨ saʼ ɨsɨg. Chəi tɨ̀ bɨrɨ bɔ ɨmbə̀ʼ ɨghəm nɨ a ɨ̀tènɨ̀ ɨŋga ɨsɨg wɔ̂ yɨ ɨghabɨ wɨ Kristo.

¹⁸ Chəi ɨbɔɔ əsɨ ze nɨ ɨghaʼi yeʼ əŋgu. Àyɨə ɨghaʼi we nɨ bɔŋɨ màànɨ̀ wɨə fid ɨbɔɔ jìm, ɨmbə̀ʼ ɨghəm nɨ ɨbɔɔ ə berɨ ənû nɨ ghɨ̀ mbɨ ɨchə, əne chəi ɨghaʼi swi ɨŋga fîŋ wə̀d we nɨə bɔə.

¹⁹ Tɨ̀ wɨə ghaʼə Ŋwiə̀ ɨmbə̀ʼ ɨghəm nɨ məd ziə nyaʼa bè ghaʼ əwa.

²⁰ Wə̀d mɔʼɔ mɨ ghà ni tə ghaʼ ə Ŋwìə̀, àyɨə wɨ̀ bàn wi aŋgɔb, əne məd yɨə wə̀d mɨghab, ɨmbə̀ʼ ɨghəm nɨ ka wə̀d we nɨ chəi wɨ̀ ghaʼ wi aŋgɔb nɨ wɨə zəə, bɨrɨ bɨ ghaʼ i Ŋwìə̀ we nɨ chəi wɨ̀ kweʼ zə.

²¹ Ɨkə we nɨ Ŋwìə̀ fə naʼ ɨ na yɨ ni, wə̀d we nɨ ghaʼ əməd berɨ bɨ ghaʼ wi aŋgɔb.