1 Kɔrèn 8 - Meta’

Ənû ɨmbə̀ʼ ɨghɨjɨg mbe nɨ mbɨ naʼ ənɨ ɨghɨ ə̀fà əmbɨ mbɨ̀anèŋ

¹ Tɨ̀nîn mə wɨə kə̀b ghà ɨmbə̀ʼ tɨjɨg te nɨ mbɨ naʼ ənɨ ɨghɨ ə̀fà əmbɨ mbɨ̀anèŋ: Tɨ̀ kyerɨ ni, “Mba mɨjìm ə berɨ ɨwe,” ɨchî nɨ mbə̀n mɨmɔʼɔ ə ghàə̀. Ɨwe wɨə ghɨ̀ ni bə̂d nɔ ɨnyod, àyɨə ɨghaʼi wɨə korə bə̂d ənɨ mbɨ mɔʼ.

² Chəi wə̀d mɔʼɔ we nɨ kɔndɨ ni tə kyerɨ ənû kɨrɨ kyerɨ ɨchî nɨ tɨ̀ wɨ̀ kə̀ʼ kyerɨ.

³ Ŋwìə̀ ə kyerɨ wə̀d we nɨ ghaʼ əməd.

⁴ Əne, mə wɨə kəb gha ɨmbə̀ʼ tɨjɨg te nɨ mbɨ naʼ ənɨ əghɨ ə̀fà əmbɨ mbɨ̀anèŋ: Tɨ̀ kyerɨ ni, “Kaʼ anèŋ yɨ i əghɨ nɨ yeʼ ɨkǎ” ɨchî nɨ mbə̀n mɨmɔʼɔ ə ghàə̀. Tɨ̀ bə̀ kyerɨ ni, “Ŋwìə̀ mei we mɔʼ” ɨchî nɨ mbə̀n mɨmɔʼɔ ə bə̀ ghàə̀.

⁵ Ka à bè yeʼi ni ɨghɨ mɔʼɔ mbe nɨ mbə̀n mɨmɔʼɔ ə tɔŋ ənɨ mɨ̀ŋwìə̀ ɨ mbɨ ɨkaŋ kɨ̀ ɨgwɨ ə si, ɨchî nɨ à yɨ rəsìʼ ni mɨ̀ŋwìə̀ nɔnɔʼ mbɨ mɨ̀-ə̀nùŋɨ̀sɨg nɔnɔʼ mbɨə bə əŋgu,

⁶ àyɨə ɨ na, Ŋwìə̀ mei we mɔʼ, nɨ yeʼ Mbǎʼ. Ɨghɨjìm yɨ rɨ ɨ bɔ. Tɨ̀ wɨ ɨka ɨmbə̀ʼ əməd. Tɨ̀ bə̀ berɨ Ə̀nùŋɨ̀sɨg mɔʼ, nɨ yeʼ ə Yeso Kristo. Ŋwìə̀ nyaʼa tekɨ ɨghɨjìm ənjìm məd. Tɨ̀ wɨə bə̀ ɨka ɨmbə̀ʼ əməd.

⁷ Àyɨə kaʼi wə̀d jìm kyerɨ ənû zɔ̂. Bə̂d mɔʼɔ mbe nɨ fə jeŋgɨ mə̀d mbɨ mbɨ̀anèŋ mɨ yeʼə jɨgə tɨkwɨ rɨjɨg tɔ̂, ɨ mbɨə kɨrɨ kɔndɨə ni à yɨ rɨjɨg nɨ mbɨ naʼ ənɨ əghɨ ə̀fà əmbɨ mbɨ̀anèŋ. Əne fîŋ tɨ mɨ̀mə̌d te nɨ bɔrɨ tɨə saʼə mɨ̀mə̌d, mbɨ sɨə kɔndɨə ni mbə mbɨ rɨzeŋ.

⁸ Ka rɨjɨg bɨrɨ ghɨ i ni tɨ̀ yeʼ bə̂d chɔ̀m ɨfě Ŋwìə̀. Chəi tɨ̀ bɨrɨ sam əghɨ ə mɔʼɔ əwù ze nɨ chəi tɨ̀ jɨgɨ. Chəi tɨ̀ bɨrɨ bɨ jɨg njìm mɔʼɔ əwù ze nɨ tɨ̀ jɨgɨ.

⁹ Mbə̀ we əwən ni tɨ ɨchî nɨ tɨ mbə̀ jɨg əghɨ ə mɔʼɔ kɨ̀ ɨchî nɨ chəi ənɨ tɨ̀ mbə̀ jɨg ə ghɨ ni bə̂d mbe nɨ ɨbenɨ mɨ̀mə̌d bɔd gu ənû.

¹⁰ Wə̀d mɔʼɔ we nɨ fîŋ məd bɔrɨ mɨ zə əwe, àwɔ̀ nɨ berɨ ɨwe, nɨ àwɔ̀ ə jɨg ɨŋga mbàn anèŋ, ka wɨ̀ wa bɨrɨ ghaʼi nɨ bɨ jɨg ɨghɨ mbe nɨ mbɨ naʼ ənɨ ɨghɨ ə̀fà əmbɨ mbɨ̀anèŋ ə?

¹¹ Əne yɨ ni aŋgɔb wɔ̂ nɨ bɔrɨ, nɨ Kristo nyaʼa bə̀ kwɨ ɨmbə̀ʼ əməd, fə nim ɨmbə̀ʼ ɨchî nɨ à berɨ ɨwe.

¹² Ənɨ à ghɨ ənû rɨbɔ̀ŋ ənɨ mbe bɔŋgɔb ənɨ ɨkwɨ ɨchî wɔ̂, əne zɨ̀ əna ənɨ ə fîŋ tɨ mɨ̀mə̌d te nɨ fə be bɔrɨ i, kyerɨ ni à fə ghɨ̀ ənû rɨbɔ̀ŋ ənɨ Kristo.

¹³ Əne, əghɨ ze nɨ mə̀ jɨg ə mɨ ghɨ̀ ni wum aŋgɔb gu ənû, chəi mə̀ bɨrɨ nɔ wɨrɨ kud nyam, ɨmbə̀ʼ tɨ wum aŋgɔb gu i.