1 Kɔrèn 3 - Meta’

Bə̂d tom yɨə bə̂d nɨə fàʼ əmbɨ ə Ŋwiə̀

¹ Bɔŋgɔb, chəi ənɨ tɨ̀ mə nyaʼa ghàm ɨ nən ɨchî nɨ tɨ̀ mə nyaʼa ghàm əmbɨ ə bə̂d mbe nɨ Əzwî ə Ŋwiə̀ ə yeʼ ɨŋga mɨ̀mə̌d. Mə nyaʼa berɨ gham ɨ nən ɨghabɨ ni mbə yɨə bə̂d rɨŋga ɨsɨg, kɨ̀ ɨghabɨ ni mbə yɨə bɔn bɔd ənɨ ənû ə Kristo.

² Mə wɨə nyaʼə nàʼ ɨbən ɨ nən, kaʼi əghɨjɨg nɨ kaanɨ, ɨmbə̀ʼ ɨghəm nɨ chəi mbə̀ nyaʼa kɨrɨ kuʼ nɨ jɨg ɨghɨjɨg nɨ kaanɨ. Ka àbei tɨ̀nîn chəi mbə̀ kɨrɨ kuʼ,

³ ɨmbə̀ʼ ɨghəm nɨ mbə̀ yɨə kɨrɨ ɨghabɨ ə bə̂d rɨŋga ɨsɨg. Ənɨ mbə̀ə ghɨ̀ ə̀dìì bə̀ chɔbə, ɨmbə̀ʼ mbə mbɨə ghɨ̀ ɨchî nɨ bə̂d rɨŋga ɨsɨg ə ghɨ̀ə̀ ə? Ɨmbə̀ʼ mbə mbɨə ghɨ̀ ɨnû ɨghabɨ ə bə̂d nɨ chəi mbɨ kɨrɨ kyerɨ Ə̀nùŋɨ̀sɨg ə?

⁴ Wə̀d mɔʼɔ rəbɔʼ nən mɨ ghà ni tə wɨə beenɨ əbɔʼ ə Pɔ̂l, wɨ cherə bə̀ ghà ni tə wɨə beenɨ əbɔʼ ə Àpolòs, ɨmbə̀ʼ mbə mbɨə ghɨ̀ ɨghabɨ ə bə̂d nɨ chəi mbɨ kɨrɨ kyerɨ Ə̀nùŋɨ̀sɨg ə?

⁵ Àpolòs kɨə we? Pɔ̂l bə̀ ə we? Tɨ̀ yɨə àmei bə̂d ə̀fàʼì mbe nɨ mbə̀ nyaʼa che ənjìm mɨ̀mə̌d ben ə Yeso Kristo. Wə̀d mɔʼ mɔʼ rəbɔʼ na wɨə fàʼ ə̀fàʼì ze nɨ Ə̀nùŋɨ̀sɨg nyaʼa naʼ ɨ bɔ.

⁶ Mə nyaʼa kon, Àpolòs nyaʼa chùb. À yɨə Ŋwìə̀ nyaʼa ghɨ̀ ni ɨghɨ mbe kwi.

⁷ Ka wə̀d we nɨ nyaʼa konɨ kɨ̀ we nɨ nyaʼa chubɨ yɨ i əghɨ ə mɔʼɔ. We nɨ che bə̂d mɨ̀jìm yɨə Ŋwiə̀ we nɨ nyaʼa ghɨ ni ɨghɨ mbe kwi.

⁸ Wə̀d we nɨ konɨ mbɨ we nɨ chubɨ mbɨə ghɨ̀ àmei ənû ə mɔʼ, àyɨə Ŋwìə̀ bɨrɨ chwɨ wə̀d mɔʼ mɔʼ rəbɔʼ mɨ̀mə̌d ɨchî nɨ wɨ̀ fàʼi.

⁹ Tɨ̀ yɨə bə̂d nɨə fàʼ ɨnɔ̂n əmbɨ ə Ŋwiə̀. Mbə yɨə mbeŋ Ŋwìə̀, bə̀ yeʼ nəb nɨ Ŋwìə̀ korɨ.

¹⁰ Ŋwìə̀ nyaʼa ghɨ̀ ɨ̀chɔ̀m ənɨ ə num, ghɨ̀ mə bɔm əchɨ ə nəb ɨghabɨ əbɔm nəb nɨ jeŋgɨ kyerɨ ə̀fàʼì. Wə̀d cherə wɨə kod ɨgun əchɨ ze. Àyɨə wə̀d mɔʼ mɔʼ we i ɨchî nɨ wɨə kod ɨgun əchɨ ze,

¹¹ ɨmbə̀ʼ ɨghəm nɨ chəi əchɨ ə nəb ə cherə nɨ tɨ̀ wə̀d bɔm chè rɨ ənɨ əze nɨ Ŋwìə̀ nyaʼa fə bɔmɨ. Əchɨ ze yɨə Yeso Kristo.

¹² Wə̀d mɔʼɔ mɨ kod nəb ɨgun əchɨ ze ənɨ ə gôl, ənɨ ə sɨrɨvà, ənɨ əti ɨka ənun, ənɨ ɨzed, ənɨ ɨgwəŋ kɨ ənɨ ɨzaŋ,

¹³ mbɨ bɨrɨ zə ə̀fàʼì əməd ɨchî nɨ wɨ̀ korɨ, ɨmbə̀ʼ ɨghəm nɨ Əni ze nɨ Kristo bɨrɨ wɨrɨ yeʼe pè saʼ ɨsɨg, ə bɨrɨ chwi ɨkwɨ nəb we nɨ wə̀d we korɨ. Ɨwid bɨrɨ du ə̀fàʼ ə wə̀d əsaŋ. Ɨwid we bɨrɨ zweʼrɨ ɨkwɨ ə̀fàʼì ze nɨ wə̀d mɔʼ mɔʼ fə fàʼi.

¹⁴ Əghɨ ze nɨ wə̀d bɔm ɨgun əchɨ ze mɨ ton fɨ i, wə̀d we bɨrɨ nɨŋ ɨchɔʼ ə̀fàʼì.

¹⁵ Əghɨ ze nɨ wə̀d bɔm ə mɨ fɨ ə, wɨ̀ bɨrɨ nim i ɨchɔʼ ə̀fàʼì. Məd ziə bɨrɨ jwɨ̀ rəŋgəʼ àmei ɨghabɨ ɨchî nɨ wə̀d jwɨ rɨŋga ɨwid.

¹⁶ Chəi mbə̀ kyerɨ ni mbə yɨə mbàn Ŋwìə̀ mbɨ ni Əzwî ə Ŋwiə̀ ə zɨ ɨŋga nən ə?

¹⁷ Wə̀d mɔʼɔ mɨ nimnɨ mbàn Ŋwìə̀, Ŋwìə̀ bɨrɨ bɨ nimnɨ əməd, ɨmbə̀ʼ ɨghəm nɨ mbàn Ŋwìə̀ ə zeŋ. Mbə yɨə mbàn ze.

¹⁸ Tɨ wə̀d mɔʼɔ tambɨ i i ɨnyod. Wə̀d mɔʼɔ rəbɔʼ nən mɨ kɔndɨ ni tə yɨə wə̀d ɨwe, ɨchî nɨ bə̂d rɨŋga ɨsɨg kyerɨ bə̂d ɨwe, wɨ̀ beŋ ənɨ əneŋ ɨmbə̀ʼ wɨ̀ berɨ ɨwe we nɨ Ŋwìə̀ ə nàʼə̀,

¹⁹ ɨmbə̀ʼ ɨghəm nɨ ənû ze nɨ bə̂d rɨŋga ɨsɨg wɔ̂ kɔndɨ ni à yɨ ɨwe, Ŋwìə̀ wɨə zəə ni à yɨ ənû əneŋ. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ wɨə gywɨ̀ə̀ bə̂d mbe nɨ kɔndɨ ni mbə berɨ ɨwe àmei ənjìm ɨwe mɨ̀mə̌d.”

²⁰ Mbɨ bə̀ yì ŋwàʼnɨ̀ ni, “Ə̀nùŋɨ̀sɨg ə kyerɨ ni tɨkɔndɨ bə̂d mbe nɨ kɔndɨ ni mbə berɨ ɨwe yɨ ətu ə̀kǒ.”

²¹ Əne tɨ wə̀d mɔʼɔ goŋ i ɨgɔ̂ ni tə wɨə beenɨ əbɔʼ wə̀d mɨ̀sɔŋɨchù mɔʼɔ, ɨmbə̀ʼ ɨghəm nɨ Ŋwìə̀ fə nàʼ ɨghɨjìm ɨ nən.

²² Kɨ̀ à kɨ ə Pɔ̂l, kɨ̀ ə Àpolòs, kɨ̀ ə Pità, kɨ ɨsɨg wɔ̂, kɨ ɨ̀tènɨ̀, kɨ ɨvɨ, kɨ ə nyùmə̀ wɔ̂, kɨ nyùmə̀ we nɨ bɨrɨ yeʼe, Ŋwìə̀ fə nàʼ ɨghɨ mbɔ̂ jìm ɨ nən.

²³ Mbə̀ yɨə bə̂d Kristo. Kristo yɨə bə̀ ə wə̀d Ŋwìə̀.